Kl. Ianair, .iii. f., l. ix. Anno Domini M.xl.u.
Muiredach m. Soergusa airchinnech Daim Liac, Cathasach H. Cathail comarba Coeimgin, Maenach H. Cirduban airchinnech Lughmaidh, in pace dormierunt.
Conghalach H. Lochlainn ri Corcu Mbruadh, Glun Iarainn H. Cleirchen ri H. Cairpri, Flaithbertach H. Canannan ri Ceniuil Conaill, Domnall H. Cetfatha, ordan Muman, mortui sunt.
Airchinnech Lethglinne do marbad a n-dorus na cille.
Crech la Muirchertach H. Neill i feraibh Bregh conus-tarraidh Gairbeidh H. Cathusaigh, ri Bregh, i Cassan Linne & an muir lan ara chinn co torchair Muirchertach ann & alii multi.
Carrthach m. Soerbrethaig, ri Eoganachta Caisil, do loscad i tigh theined do h-u Longarcan m. Duinn Cuan cum multis nobilibus ustis.
Cath eter Albanchu fein i torchair Cronan, ab Duine Caillenn.