Corpus of Electronic Texts Edition
The Annals of Ulster (Author: [unknown])

Year U1021

U1021.0

Kl. Ianair .i. f., l. xiii. Anno Domini M.xx.i.

U1021.1

Maidm ria n-Ughaire{folio & column H56rb} m. Dunluing, ri Laigen, for Sitriuc m. Amlaimh, ri Atha Cliath, ocon Deilgne Mo Goroc.

U1021.2

Fros cruithnechta do ferthain i n-Osraighibh.

U1021.3

Crech la mc. Aedha H. Neill dar Uib Dorrthinn batur i Maig Itechta & ro marbsat In Lethderg icon tairrecht conid-tairthetar forgla Airgiall ina diaigh & reimhe (l^ sic in Libro Duibh Da Leithi narratur) conid-tairthetur H. Meith & Mugdorna & na Saitne & Fir Fernmuighi & H. Dorrthainn cona righaibh. Ro bai dono H. Ceilecan & H. Lorcan co n-Uib Bresail & co n-Uib Niallain ara cinn a n-Aenach Macha co comrangadur uile ime, co ruc m. Aedha a gabail tairrsib uile, & ni raibe acht da .xx. deg oglach, & do-cer sochaide etarru for lar Aenaig Macha, l^ Aird Macha. Sic in Libro Duib Da Leithi.


p.458

U1021.4

Branacan H. Mael Uidir, airri Midhe, do bathadh dia Belltaine i l-Loch Ainninde.

U1021.5

Amhalgaid, comarba Patraicc do dhul isin Mumain cetna cur, co tuc mor-chuairt.

U1021.6

Ceallach H. Cathasaigh, ri na Saitne, do marbad do Chenel Eogain.

U1021.7

M. Flainn m. Mail t-Sechlainn, .i. ridomna Temrach, .i. Aedh, & Domnall H. Murchada, .i. ridomna Ailigh, occisi sunt.