Kl. Ianair i. f., l. iiii. Anno Domini .dcccc.xc.ii., alias 993.
Tuathal m. Rubai comarba Finnen & Mo Colmoc, Concobur m. Cerbaill H. Mael Sechlainn, mortui sunt.
Mael Ruanaid H. Ciardhai, ri Cairpri, do marbad do feraibh Tethba.
Da Ua Chanannan do marbad.
Eicnech H. Leogan, ri Luighne, do marbad la Mael Sechlainn i taigh abad Domnaigh Patraicc.
Mael Finnian Ua h-Oenaigh, comarba Feichini & episcopus Tuath Luighne, in Christo Iesu pausauit.
Cleirchen m. Maele Duin, ri H. n-Echach, a suis iugulatus est.
Dunibha mór for dainibh & cethraibh & bechaibh fo Erinn uile isin bliadain-siu.
Muirecan o Boith Dhomnaig, comarba Patraicc, for cuairt i Tir n-Eogain coro erlegh gradh righ for Aedh m. n-Domnaill i fiadnuse samhtha Patraicc, & co tuc mor-chuairt Thuaiscirt Erenn.