Do bí Fionn mac Cumaill mhic Thrénmóir úi Bhaoiscne i n-áirdchennas ar Fhiannaib Eirenn le linn in tréinríg sin .i. Cormac in t-áirdrí ocus ríg na gcúiced ocus in rígféinnid, ocus do b'é Fionn in sechtmad rí do h-áirimti in Eirinn in tan sin.

Ba mhór tuillme ocus tuarastal Fhinn ocus na Féinne in tan sin .i. baile in gach tuaith ocus cethrama in gach baile, coilén con nó gadhair ann in gach tech ó Shamain co Belltaine ocus mórán sochar eile nach áirmither ann so. Ocus gér mhór na sochair iad sin fa mhó co mór na duaidh ocus na dochair do bí ar Fionn ocus ar Fiannaib Eirenn ina dhiaid, mar atá cosc ^[ocus] díchur danar ocus allmarach gada ocus díbfeirge ó Eirinn maille le gach olc eile ar chena, innus gur mhór d'olc ocus d'imshníom do gheibdís in Fhiann ac cosnamh Eirenn mar foillsigter ann so.

Laithe n-ann dá raibe Fionn ocus Fianna Eirenn in Almain lethanmhóir Laigen ac ól fleidhe meiscemhla medharchaoine Samhna, ocus do bátar maithe ocus móruaisle Féinne Eirenn ina fharrad in tan sin. Ro fhiarfaig Fionn díob inar mithig dóib dul do sheilg ocus do shírfiadach. Óir is é fa ghnáth le Fionn ocus le Fiannaib Eirenn in bhliadain do chaithem .i. ó Bhelltaine co Samain le fiadach ocus le fianchoscar, ocus ó Shamain co Belltaine ^[le] coimét cinntc comchoitchenn ar fheraib Eirenn.

Cid tra acht do cinnedh as a h-aithle sin dul do chommórad na seilge móire sin aco, ocus is é inad fá ndechadar dá dénamh .i. fá dhá chúiced mórdhálacha Muman. Do ghluaisedar iarum i n-athgairid gacha conaire ó Almain co ráncatar crích ó mBuilc. Co lár bfer gcell ocus co brosnaig Bladhma, ocus co dá sliab déc Eiblinne, ocus co cnámchoill mic Raighne, ocus co Drom Collchoille re a ráidter Aine Cliach in tan so.

Do srethad ocus do sraonad in t-selg le Fionn ocus le Fiannaib Eirenn fá imlib na foraoise risa ráidter ^[Fir] Muighe indiu, ocus fá dhiamraib dorcha ocus fá fherannaib aimréide ocus fá chríochaib caoináille caoinréide ocus fá shléibtib urárda Desmuman risa ráidter Luachair Dhegaid indiu, fá shliab chaomálainn chrot ocus fá thulchaib mínáille ^[Sléibe] Muice, ocus fá chríochaib oirermíne na Siuire srebhuaine, ocus fá mhagaib féruaine fírghlasa Feimen ocus fá Dhéisechaib urárda agarba aimréide Eithne, ocus as sin co belach ngormchoilltech nGabráin.

Cid tra acht ní raib fidh ná mag ná móirshliab in dá chúiced Muman nach raibe taoisech naonbair ac fiadach ocus ac fianchoscar ac srethad ocus ac sraonad na seilge amlaid sin, is ann sin do shuid Fionn ina dhuma sheilge ocus d'fanadar drem do na deglaochaib ina fhochair .i. Oisín mac Finn, Oscar mac Oisín, Goll mac Mórna, Art Mórbhuillech mac Mórna, Sciath Brec mac Dathchaoin .i. fer iomchair scéithe Fhinn, na tri Bailbh ón mboirinn trí meic aoincherda Beirre, Caoilte mac Rónáin, Diarmait détsholus Ó Duibne, Liathán Luath ó Luachair Dhegaid. Conán ^[Maol] mac Mórna .i. fer aithise ocus mílabartha na Féinne, ocus Fionn ^[bán] mac Bresail. Acht atá ní chena fa bhinn le Fionn ocus le Fiannaib Eirenn guth ocus glám na ngadhar, ocus glaodhach groidmher na ngasradh, ocus tormán na dtréinfher, fedghail ocus fírgháir na Féinne isna foraoisib ocus isna fásaib ina dtimchioll.

Is ann sin ro fiarfaig Fionn don druing sin do bhí ina fhochair cia do rachad d'faire ocus d'forchoimét na tulcha. Do frecair Fionn Bán mac Bresail úi Bhaoiscne don rígféinnid ocus adubairt co rachad féin ann. Ann sin tuc Fionn bán lám tapaid deglaoich tar a lethanarmaib ocus do ghluais roime co h-árd na tulcha. Ocus ro ghaib ac féchain uada ar gach taobh de ^{[mar atá]} soir siar ba dhes is ba thuaid, ocus nír chian do in tan atchonnairc sin n-áird anair gach ndírech dá innsaigid in fomor ferrda fírghránda, ocus in dúil diablaide dodelba, ocus in mogh modarda mísciamach. Ocus is amlaid ro bí ocus sciath dron dubh dathghránda doilbir ar stuaigleirg a dhroma, ocus cloidem claislethan glainbhéimnech ar a chroisshliasaid chírdhuib chlí, ocus dhá shleig shénta shlinnlethna nár tógbad cian d'aimsir roime sin i n-aimsir throda ná thegmála rena ghualainn amach, brat briste bogshnáithech ar uachtar a eirrid ocus a éidid, ocus ba dhuibe iná gual gobhann arna bhádad i n-uisce fhuar oigreta cach aighe de. Capall modarda mísciamach cretlom le caoildeired liath lúdartha fannchosach ocus aghastar agarb iarnaide uirre ocus é acá tarraing ina dhiaid, ocus ba h-ingnad mór nach dtairrngedh a cenn as a caomcholainn nó as a muinél le cach tarraing dá dtugadh don aghastar agarb iarnaide ac iarraidh aistir ocus imthechta do bhuain aiste. Ocus ba mhó iná sin in t-ingantus nach tairrngedh sise na láma fada sithremra do bí ac in bfer mór as chompar a chléib le cach stad ocus le cach fuirech dá ndénadh uaid ac dul tar a h-ais. Ocus ba shamail re tormán tuinne trénmóire cach buille bailcbhrígmar buanláidir dá mbuailedh in fer mór don luirgfhersaid iarainn ar in gcapall ac iarraid aistir ocus imthechta do bhuain aiste. Ocus arna fhaicsin sin d'Fionn bhán mhac Bhresail do thuic aige féin nár chóir a leithéid sin d'echtrannach ná d'allmarach do léigen gan fhios ar Fhionn ocus ar Fhiannaib Eirenn, ocus do ghluais roime ina chéimennaib trénluatha ocus ina ghaisib cosluatha nó go ráinic Fionn ocus Fianna Eirenn, ocus adubairt in laoidh: — Na dee dot bennachad a Finn, a fir in chomráid chnesda; táncas féin dot ghrésachtsa, mar do bí oram egla. Crét fár fágbais t'foraire, a Finn bháin an ^[re] droichscél; crét as fáth dot chorrachad, fár léigis díot do choimét. Dúil co ndroichdeilb ndiablaide, as mó gráin don druing daonda; ac tiacht cusna Fiannaibse, atá le síubal saothrach. Ech modarda mísciamach, ina diaid cen chéim deithnis; agastar agarb iarrainn, atá ar chenn in eich sin. Dá shleig shéta shenlethna, atá aige dá n-imchar; is lorg d'iarrann aithleghta, a chloidem cruaid le ciorrbad ag so fáth mo dheithnisse, ní thiocfainn co tráthnóna.

A h-aithle na laoide sin atchonncadar in fer mór dá n-innsaigid ocus gér gherr uatha é is fada do bí ac techt ar olcas a aistir ocus a imthechta, ocus do bhennaig d'Fionn in tráth tháinic dá láthair ocus do chrom a chenn ocus do fhill a ghlún ocus tuc comartha umla d'Fionn. Tócbus Fionn a lám ós a chionn ocus tuc ced aithisc ocus uirghill do ocus fhiarfaigios Fionn scéla de. Cia d'folaib uaisle nó anuaisle in domain mhóir thu? ar Fionn. Adubairt seisen nach raib a fhios sin aige cia dhíobsan é, acht aonní amháin gur bfomór é do bí ag siubal ar rígaib certbhrethacha na crístaigechta ag iarraid tuillme ocus tuarastail i ngell air féin ocus co gcuala nár eitig Fionn duine ar thuarastal ariam. Ní dherna go deimin ar Fionn ocus ní mó eiteochaid sé thusa. Créd dobeir gan ghilla thu a fhir mhóir ar Fionn. Is maith in t-adhbar ar in fer mór óir ní fhuil sin doman ní as decra liom iná gilla dó bheith agam, óir is próinn trí céd fer do bhiad ocus do thomaltus fhognus dam co cenn do ló, ocus is beg liom sin dam féin ocus is mór liom gilla ina thimchioll agam. Masadh créd é in t-ainm atá ort? ar Fionn. Atá orm in Gilla Decair ar sé. Créd fár tugad in Gilla Decair ort? ar Fionn. Is maith in t-adbar ar in fer mór, óir ní fhuil isin doman ní as decra liom iná aonní do les mo thigerna ná aonduine agá mbím do dénam. A Chonáin mic Mórna ar in fer mór cia as mó tuarastal marcaig sin bféinn nó tuarastal coiside? Is mó tuarastal marcaig ar Conán, óir atá dá oired risin gcoiside ag in marcach. Cuirim a fhiadnaise ortsa a Chonáin gurab marcach mé ocus co bfuil ech agam ocus fós gurab ar marcaigecht do bhíos ag techt i gcionn na Féinne, a Fhinn mhic Chumaill ar in fer mór. Léigfed féin mo ech amach ar do chomairchese ocus ar chomairce na Féinne i bfochair echrad na Féinne. Léig ar Fionn. Tairrngios in fer mór in t-agastar agarb iarnaide do bí rena ech ocus do ghluais sí roimpe ina céimennaib trénluatha retha nó go ráinic echrad na Féinne, ocus do ghaib dá ledrad ocus dá luathmarbad. Ocus do bhained in t-súil do ghreim as ech ocus do bhained a chluais do ghreim don dara capall ocus do bhrised cos eich eile. Tabair th'ech let a fhir mhóir ar Conán: ranna nime ocus talman i gcoraigecht orm muna mbiadh mar do léigis amach ar chomairce Fhinn ocus na Féinne í co léigfinn a h-inchinn tré fhuinneogaib a cinn ocus a cennmhullaig amach, ocus cid imda droch-thurchartha do fuair Fionn i n-Eirinn ariam ní bfuair turchair ba mhesa iná thusa. Ranna nime ocus talman i gcoraigecht ormsa ar in fer mór má thugaimse liom í, óir ní fuil gilla dogenadh gillaigecht dam ocus ní h-obair liom féin m'ech do beith im láim agam.

Eirgios Conán mac Mórna in tan sin ocus ghlacus an t-agastar agarb iarnaide ocus chuirios re h-ech in fir móir é, ocus tuc leis mar a raib Fionn ocus Fianna Eirenn í ocus do bí i bfad ina láim aige. A Chonáin mic Mórna ar Fionn ní ghéillfeá gillaigecht do dénam do dhuine bud ferr iná in fer mór i bfiannaigecht, ocus dá ndéntá mo chomairlese is é ní dogentá dul ar ech in fir móir ocus cnuic is cabháin ocus maga mínscothacha do chuartugad léi no co mbristeá a croide ina cliab tré ar mharb sí do echraid na Féinne. Eirgios Conán in tan sin ocus tuc echléim ar ech in fir móir ocus bhuailios a dhá sháil co dian ocus co díchellach uirre ocus nír chorraig ech in fir móir leis sin. Aithgnim in ní sin atá uirre ar Fionn: nó co bfaghbaid sí comtrom a marcaig féin do daoinib uirre ní bfoghabtar aister aiste. Do chuadar trí fir dég d'Fiannaib Eirenn ar chúla Chonáin ar ech in fir móir ocus luigios fútha ocus éirgios arís. Mesaim gurab ag magad is ag fonomaid atáthaoi faoi mo ech ocus ní saor mé féin uaib mar in gcédna. Ocus is mairg dam do chaithfedh in chuid eile dom bhliadain agat a Fhinn do ráid in fer mór ocus in mhéid so do bar sgige d'faicsin in chéd lá, ocus aithgnim gur teist bhréige do chuaid ort ocus biad ag imthecht uait, ocus adubairt in laoid mar lenus : — Biadsa anois ac delachad, riot a Finn is ret Fiannaib; ní bfuil ann acht merachad, do laoch tuidecht dot iarraid. Do muinter cid mórdálach, a Finn mic Chumaill chrechaig; ní mérad it ócláchas, ní anfa in Gilla Decair. Gid do chuaid do degtáscsa, a Finn ar fed na talman; is edh ort nach gceilimse, do chlú éirgenn gan adbar. Guth orainn ná tabairse, ná h-imthig uainn fá dólás; luigim fá na harmaibse, nár chailles riam ar óclách. Dá bfantása im farradsa, fedh bliadna a Ghilla Decair; dobérainn cen charrachad, ar ghellas duit na degaid. Dá mbud gan don bliadainse, a Finn acht aon lá beith ann; ní anfainn it Fiannaibse, tré a ndernsat orm do braflang. Cuirim suas dot muinterdas, a Finn cid maith do fregradsa; sin bféinn ó nár fuilngebar, ag imthecht uaibse biadsa.

Eirgios in fer mór a h-aithle na laoide sin co meta míthapaid ocus co hanbfann atuirsech nó gur chuir tulach idir é féin ocus Fhianna Eirenn, ocus ar ndul tar binn áird na tulcha do tógaib ós mellaib a mhás co lánárd, ocus do ghluais roime mar luas áinle nó feirbe nó mar shíde gaoithe glóraige ag dul tar cenn machaire nó móirshléibe i medón mísa Márta. Ba hé sin trebarluas déine ocus dígaire in torainn tennretha do bí leisin bfior mór ag fágbáil na tulcha.

Mar atchonnairc ech in fir móir a tigerna ag imthecht uaithe nír fuilnged sin léithe, gé gur mór a h-eire ocus a h-ualach do ghluais roimpe ina buinne retha róghéir i ndiaid a tigerna, ocus mar atchonnairc Fionn ocus na Fianna na trí fir dég sín ar chúla Chonáin mhic Mhórna ar ech in fir móir ocus í ar siubal do scredadar le gáir fonomaid faoi. Ocus mar atchonnairc Conán nach raibhe ar a chumus túirling d'ech in fir móir do scred ocus do scréch ar Fhionn ocus ar Fhiannaib Eirenn fá gan é féin do léigen leisin bfer mór fírghránda aduathmar nár bfes cá chlann ná cinél do, ocus do ghaib dá n-aithisiugad ocus dá n-imdergad. Nél marb ós uisce ort a Fhinn ar Conán: mac moghad nó ladrainn na fola anuaisle bud mhesa iná thu féin do mhac athar is máthar do bhuain do chinn is do choiméta bethad dhíot muna lenair sinn ocus gidbé iath nó inse nó oilén i mbéraid in fer mór sinn ár dtabairt let co h-Eirinn arís. Éirgios Fionn ocus Fianna na h-Eirenn in tráth sin, ocus do lenadar in Gilla Decair tar maoilinn gacha mórchnuic, ocus co h-ísle gacha glenna, ocus tar snám gacha h-inbir, ocus co Sliab lánaoibinn Luachra, ocus co Tulaig na Senghaoithe risa ráidter Berna Chabair, ocus co crích Corca Dhuibne. Ocus tuc in Gilla Decair a agaid roime gach ndírech dochum na fairrge falcmaire fírdhoimne ocus tar sálmhuir srebuaine, ocus bheirios Liagán Luaimnech ó Luachair Degaid a dá láim i n-erball eich in Ghilla Dhecair ocus do mes a tarraing chuige i ndiaid a fuilt ocus a sithfinnaid ocus in lucht sin do bí uirre do chongbáil. Tuc sise suinnedh láidir lánchalma do Liagán Luaimnech ocus thairrngios i mbél mara ocus mórfairrge amach é, ocus ghremaigios Liagán Luaimnech d'erball eich in ghilla in uair sin, ocus do bí in fhairrge ina maoltonnaib móráibsecha ag éirghe ina ndiaid ocus ina tráig ghainme rompa in gach áit ina ngébdaois.

Ba h-imshníomach le Fionn na cúig fir dég sin dá mhuintir do bhreith uaid ocus é féin d'fágbáil fá ghesaib. Créd dogenam anois? ar Oisín re Fionn. Créd dogenmaois acht ár muintir do lenmain ocus gidbé iath nó inse nó oilén i mbérfaid in fer mór iad a dtabairt linn ar ais nó ar éigen co h-Eirinn arís. Créd dogénam gan luing? ar Oisín nó luathbarc againn? Atá ar Fionn gur fhágbadar Tuatha Dé Danann do bhuadaib ar chloinn Ghaodail ghlais mic Niuil mic Fhéiniusa farsaid gidbé aca re a mbiadh gnóithe le h-Eirinn d'fágbáil ^[acht] dul co Beinn Edair ocus gidbé líon do rachadh leis ann co bfuigdís a sáith do luing nó do luathbarc ann.

Fhéchus Fionn do thaob na fairrge in tan sin ocus atchonnairc dias gaisgedach sin chonair chuige ba mhó do mhíledaib ocus ba láidre do laochaib ocus ba chalma do churaib, ocus sciath druimnech dathálainn ar stuaigleirg a dhroma ag in gcédfer díob co ndeilb leoman ocus onchon ocus gríob ingantach arna mbuain ocus arna mbechttarraing innte. Colg toirtemail trénbuillech cruadloinnerda lánáibsech ar shliasaid a choise clí, ocus dá mhanaois móirremra rena ghualainn, ocus brat buanchorcra uime ocus delg óir sin mbrot ós a bhruinne, flesc ingantach fhionndruine ima chenn ocus ór fá gach cois de ocus a leithéid sin d'innioll ar in dara fer, ocus ní fada in comnaide dorignedar co dtáncatar do láthair ocus do chromadar a gcinn ocus do fhilledar a nglúine ocus tucatar comartha umla d'Fionn. Tócbus Fionn a lám ós a gcionn ocus tuc ced aithisc ocus úirghill dóib. Fiarfaigios Fionn scéla díob cia d'folaib uaisle nó anuaisle in domain dóib. Adubradar gur chlann do ríg na h-Innia iat ocus gurab é fáth a dturais co h-Eirinn .i. ar thí beith bliadain ar thuillem ocus ar thuarastal Fhinn in Eirinn, ocus co gcualamar nach bfuil in Eirinn duine bud ghlice iná é, ocus breith do breith idir na cerda do bí aca. Créd na cerda atá agaib? ar Fionn. Atá agam do cheird ar in chétfer acasan .i. tuag saoir ocus cranntabaill, ocus dá bfuighbinn deich gcéd fiched d'feraib Eirenn ar aon láthair dogenainn a sáith do luing nó do luathbarc dóib le trí builledaib dom thuaig do bhualad isin gcranntabaill, ocus ní iarrfainn do chuidiugad orra acht a gcinn do chromad in fedh do bheinn ag bualad na dtrí builied sin. Is maith in cherd sin ar Fionn, créd í in cherd atá ag in bfer eile úd? ar Fionn. Atá agamsa do cheird arsa in dara fer co mbérainn lorg na crannlachan naoi n-imaireda ocus naoi n-eitreda nó co mbérainn ina lebaid ocus ina h-inad uirre, ocus is comthrom dobeirim sin ar muir ocus ar tír. Maith an cherd ar Fionn. Ocus bud mhór ár bfeidm orraib dá dtuctáidhse congnam lorgairechta dúinn. Créd dorucad uait? ar fer díobsan. Innsios Fionn scéla in Ghilla Dhecair dóib ó thús co deired. Créd na h-anmanna atá oraib? ar Fionn. Atá orm Feradach Fírchalma mac ríg na h-Inaia ar in cétfer díob.

Is ann sin do chromadar Fianna Eirenn a gcinn, ocus éirgios Feradach Fírchalma in tráth sin ocus bhuailios trí builleda don tuaig do bí aige sin gcranntabaill co nderna ciumsa in chuain ocus in chaladphuirt lán do longaib ocus do luathbarcaib. Créd doghenam d'iomad na iong úd? ar Fionn. Dogenam a gcur ar neimhní ar Feradach acht in méit ar a mbeidh feidm agatsa.

Eirgios Caoilte in tráth sin ocus do léig trí glaoda móra mór-áibsecha as ocus atchualatar Fianna Eirenn sin in gach áird i r-rabatar. Ocus do shaoiledar gurab i n-airc nó i n-éigen do bí Fionn ocus in chuid eile d'Fiannaib Eirenn ag echtrannaib nó ag állmarchaib, ocus do ghluaisetar rompa ina gconlánaíb bega bélscaoilte co ráncatar clochán cinn chait i n-iarthar Chorca Dhuibne. Ocus fiarfaigios Fianna Eirenn scéla d'Fionn créd in t-éigen nó in t-uathbás doruc air in uair do tharraing as a láithrechaib léicthe ocus as a bforaoisib fiadaig ocus as a n-innellaib selga iat. Innsios Fionn scéla in Ghilla Dhecair ó thús co deired dóib.

Is ann sin do chuaid Fionn ocus Oisín i gcomairle etorra féin ocus is é atconncus dóib ó nach rucad acht cúig fir dég dá muintír ó Fhionn é féin ocus cúig fir dég eile do dhul dá lorgairecht ocus Oisín d'fácbáil i gcennas na Féinne ag coimét na h-Eirenn. Ocus do chum Oisín ocus Fionn in laoidh: — Tusa ar écht ac imthecht, a Fhinn a armruaid fhuilig; do thoidecht i lluing lebair, co h-oirecht in fhuinn fhuinid. Tusa uainn ag anamain, i ndáil in t-slóig cen ailbéim; a dhuis díona in degshlóig, is a ruisc mhíonla mhaillréid. Echt ort a Fhinn almaine, écht as oirches ort d'fógra; iompádh isin chuan chétna, co tí fionnchlár fuar Fódla. Tusa uainn ac anamain, ní bfuil céim nach bud usa; cé do chuaid do chlú chatha, is derb co racha tusa.

A h-aithle na laoide sin do desaiged long luchtmar lánáibsech d'Fionn ocus dá mhuintir, ocus do cuired biad i n-inad a chaithme ocus ór i n-inad a bhronnta innte, ocus do shuidetar na h-óicfir arrachta sin ocus na curada caomchalma ar shlesaib ocus ar bhórdaib na luinge ina rabatar, ^{[ocus do ghabatar]} na ráma fada slislethna sithrigne ina ndóidib détla dóidlethna doleointe, ocus dorignetar imram tinnesnach trénláidir tar crioslachaib na fairrge falcmaire fírdhoimne, ocus tar glenntaib na mara móraidbéile mellghruamda, ocus tar glenntaib druimlethna drechduba dianluatha in chuain chraoislebair chubarbháin.

Is ann sin d'éirig in fhairrge ina h-uathbás ingantach blaoisc- ghéimnech, ocus ina bróintib borba brecuallacha baothtroma. Ocus ina cnocaib corracha camthacha cennghruamda, ocus ina bruachaib dorcha duba doscaoilte, ocus ina tonnaib craoislethna cnisghela, ocus ina maoilennaib mongruada mera míchéillide. Ocus ina srothaib gáibthecha glaisimda, ocus ina linntib luchtmara lethangharba lí-uaine. Ba cheol codalta ocus ba mhochchorrugad maidne d'Fionn ocus dá mhuintir beith ac éistecht re coicetal na mara mongruaide mórfairsinge ac crónán ocus ac congháir ocus ac coimdecht le slesaib is le bórdaib na luinge i r-rabatar.

Trí iá ocus teora oidche d'Fionn ocus dá mhuintir nach bfacatar taob críche innse ná oiléin. I gcionn na ré sin éirgios fer do mhuintir Fhinn i gcorr tosaig na luinge ocus atchonnairc garbalt glasmhór uaidh, ocus do sporadar in long d'innsaigid na h-aille sin, ocus fuaratar carraic cerchaille comdhaingen ar bhruach na h-aille ocus ba shleimhne iná mong escuinne i n-íochtar aibhne a slesa, ocus fuaratar lorg in Ghilla Dhecair ac dul d'innsaigid na cairrge ocus ní bfuaratar aon lorg acá fácbáil. Do labair Fergus Finnbheoil ollam Fhinn in tráth sin ocus atbert: is meta ocus is míthreorach do theichis, a Dhiarmaid úi Dhuibne ar sé, óir is ac Manannán mórchomachtach mac Lir dorignis foglaim ocus oilemain i dTír Thairrngire i gcríochaib na gcuan, ocus ac Aongus óc mac in Daghda do bechtmhúined thu, ocus is égcóir nach bfuil cuid dá ngoil ná dá ngaisced agat ocus Fionn is a mhuintir dobhreith i n-agaid na buinne nó na cairrgesi. Dergtar fá ghnúis Dhiarmada a h-aithle na mbriathar sin ocus bheirios ar chrannaib buada Manannáin do bí aige, ocus ar n-aithdergad do Dhiarmaid do éirig do léim ocus do chlesaib goile ós crannaib a chraoisech nó gur ghaib lán a dhá bonn don talam tromfhódach ar bhruach na fairrge. Fhéchus mac úi Dhuibne faoi síos ar Fhionn ocus ar a mhuintir ocus cémad mhian leis dul síos nír fhét Fionn ná a mhuintir do bhreith suas. Fhácbus mac úi Dhuibne in charraic ina dhiaid ocus ní fada do chuaid in uair atchonnairc in fiodh fásaig foithremail, ocus na coillte díona dosmhóra duillebair as mó fuaim srotha foghar gaoithe glór én ocus dórd bech dar shiubal ariam. Do bhí mac úi Dhuibne ac siubal in mhaige anoir is aniar andes ocus adtuaid ocus féchain dá dtuc sé uaid atchonnairc in bile flescach foithgégach ar in maig, ocus carraic commór cloiche ac in mbile, ocus benn bláithgér buabaill ar bheinn na cairrce, ocús tiobraid álainn fíruisce fá bhun na cairrce. Ocus do bí tart ocus tiormlach ar mac úi Dhuibne i ndiaid shiubail na mara ocus do b'áil leis lán na beinne buabaill d'uisce na tiobrad d'ól ocus chromus uirre, ocus atchualaid in torann ocus in trostán mór dá innsaigid. Tuicios mac úi Dhuibne gur do ghesaib na tiobraide gan aonbhraon dá h-uisce d'ól, ocus ^{[ar a aoi atbert]} Ólfad mo dhóithin de.

Ní fada ina dhiaid sin do mhac úi Dhuibne in tan atchonnairc in gruagach chuige ocus innell ocus agaid íorgaile air, ocus ní bennugad dorigne do mhac úi Dhuibne in tráth táinic do láthair acht achmasán ainiarmartach do thabairt do, ocus adubairt gur b'égcóir do beith ac siubal a fhoraoise ocus a fhásaig ocus ac ól a choda uisce. Tuc mac úi Dhuibne ocus in gruagach agaid ar a chéile co dásachtach ocus co nimnech míchéillide, ocus co calma curata, ocus co fraochmar foirniata, co rabatar ac frestal ocus ac fritheolam a chéile do bhuilledaib gáibthecha gérluatha ocus do bhéimennaib borba nó co ruc nóin ocus deired lae orra. Ocus ba mhithid leisin ngruagach delugad re comrac mhic úi Dhuibne ocus tuc a thennléim i n-íochtar na tiobraide uaid, ocus ba h-imshníomach le mac úi Dhuibne a chéile comraic do dhelugad leis mar sin. Féchus mac úi Dhuibne na ceithre h-árda ocus atchonnairc elba fiad ac gabáil na foraoise, ocus dhruidios ina gcoinne ocus tuc roth n-urchair ar in n-áigh allaid ba choimnesa do gur léic a h-abach ocus a h-inathar co lár. Ocus tuc leis í ocus bheirios tenlach teined amach, ocus dorigne mac úi Dhuibne teine thrénmór ocus dorigne aigeda beca bélscaoilte d'feoil na h-aige ocus chuirios ar beraib fada fionnchuill iat, ocus ithios a sháith d'feoil na h-aige in oidche sin ocus d'uisce na tiobraide le chéile.

Mhúsclus mac úi Dhuibne co moch arna mhárach ocus fuair in gruagach ac in tiobraid roime. Dar liom féin a mhic úi Dhuibne ar in gruagach nír leor let siubal mo fhoraoise ná mo fhásaig do bheith agat gan fiadach mo fhoraoise. Acht chena tucatar goin sin ngoin ocus buille sin mbuille ocus sáthad sin t-sáthad dá chéile nó co ruc nóin ocus deired lae orra. Trí lá ocus teora oidche do mhac úi Dhuibne ocus don ghruagach ac comrac re chéile ocus agh imdhíscir allta gacha h-oidche ac mac úi Dhuibne. Ar in lá déidenach don chomrac tuc in gruagach a thennléim ó mhac úi Dhuibne d'innsaigid na tibraide, dob áil le mac úi Dhuibne lám do chur fá brágaid in ghruagaig ocus do chuatar faoi in tibraid re chéile. Fácbus in gruagach mac úi Dhuibne ar ndul faoi in tibraid, lenus mac úi Dhuibne in gruagach ar bfácbáil na tibraide ina dhiaid ocus fuair in mag mínscothach fairsing mórálainn roime, ocus in chathair rígda rómhaisech ar lár in maige, ocus tiug slóig ocus sochaide ar fhaitche in longphuirt. Ocus mar atchonncatar siubal ac mac úi Dhuibne ar in ngruagach do léicetar ród ríg ocus conair coitchenn do nó co ndechaid tar dorus in dúnaid istech, ocus do dhruidetar dóirse na bruidne air ocus tucatar na slóig sin agaid ar mac úi Dhuibne. Ocus ní ar metacht ná ar mílaochas do chuaid sin do mhac úi Dhuibne. Óir do chuaid fútha ocus trítha ocus tarsa mar do gébadh sebac tré mhineltaib, nó mar fhaolchoin tré thrét caorach, nó mar thrénbuinne shrotha shaobháird ac dul tar faill mara nó mórfairrge acá sírledrad ac marbad ocus ac mórmúchad na slóg sin, co ndechatar fá fhedaib fásaig fírdaingne na críche ocus in chuid eile tar dorus in dúnaid istech aca ocus do dhruidetar dóirse na bruidne ocus na cathrach ina ndiaid. Ocus luigios mac úi Dhuibne ar in maig ocus do bí co cnedhach créchtach crólintech a h-aithle na troda trénmóire sin.