]> Annals of Loch Cé [A.D.1014-1590] An electronic edition Electronic edition compiled by the CELT Team University College Cork. Professor Marianne McDonald via the CELT Project Second draft. 69 800 CELT: Corpus of Electronic Texts: a Project of University College Cork
College Road, Cork, Ireland—http://www.ucc.ie/celt
2003 2008 CELT online at University College, Cork, Ireland. G100010B

Available with prior consent of the CELT programme for purposes of academic research and teaching only.

 Manuscript sources. (i) Dublin, Trinity College Library, 1293 olim H. 1. 19; vellum and some paper; s. xvi 2 (AD 1588); scribe Philip Badley [Ó Duibhgeannáin?], Dubthach [Ó Duibhgeannáin], Conaire (son of Maurice) [Ó Duibhgeannáin and others; patron Brian Mac Diarmata (died 1592) of Carraig Meic Diarmata on Loch Cé, near Boyle, lord of Mag Luirg, whose hand appears in some entries. Annals from 1014 to 1571 (ends imperfect) with lacunae from 1138 to 1170, and from 1316 to 1384. (ii) London, British Library, Additional 4792; vellum and paper; xvi 2; scribes Brian Mac Diarmata and others. Annals from 1568 to 1590. Editions. W. M. Hennessy (ed. & trans.) The Annals of Loch Cé, RS 54, 2 vols. (London, 1871; rep. Dublin, 1939). In Hennessy's printed text the lacuna from 1316 to 1413 is supplied from the Annals of Connacht (which see). Gearóid Mac Niocaill, Annála Uladh agus Annála Locha Cé, 1014-1220, Galvia 6 (1959) 337-340 [Parallel text of the prima manu entries from MSS TCD H 1 8 and TCL 1293]. Literature. Trinity College Library Ir Cat 84. British Library Cat i 21. J. H. Todd, 'On the Annals of Kilronan or Book of the O'Duigenans' Proc Roy Ir Acad 1 (1836) 22-7. Eugene O'Curry, Lectures on the manuscript materials of ancient Irish history (Dublin, 1861; repr. Dublin, 1878 & 1995) 93-107. Paul Walsh (review of Hennessy, Annals of Loch Cé) J Galway Archaeol Hist Soc 19 (1940) 102-104. Paul Walsh, 'The Annals of Loch Cé', Ir Ecclesiast Rec 5th ser., 56 (1940) 113-22, repr. (in part) in Paul Walsh, Irish men of learning (Dublin, 1947) 15-24. Séamus Ó Ceallaigh (review of Hennessy, Annals of Loch Cé) Studies (Dublin) 29 (1940) 474-75. S. Pender (review of Hennessy, Annals of Loch Cé) J Cork Hist Archaeol Soc 45 (1940) 144-45. Paul Walsh (review of Hennessy, Annals of Loch Cé) J Galway Archaeol Hist Soc 19 (1940/41) 102-104. R. Dudley Edwards (review of Hennessy, Annals of Loch Cé) Ir Hist Stud 2 (1940/41) 334-35; . Michael Duignan (review of Hennessy, Annals of Loch Cé) Éigse 3 (1941/42) 227-28. Aubrey Gwynn, 'The Annals of Connacht and the abbey of Cong', Journal of the Galway Archaeological and Historical Society 27 (1956/57) 1-9. Gearóid Mac Niocaill, 'Annála Uladh agus Annála Locha Cé, 1014-1220' Galvia 6 (1959) 18-25. Gearóid Mac Niocaill, The medieval Irish annals (Dublin, 1975) esp. 29-30. B. W. O'Dwyer, 'The Annals of Connacht and Loch Cé, and the monasteries of Boyle and Holy Trinity', Proc Roy Ir Acad (C) 72 (1972) 83-101. Bernadette Cunningham; Raymond Gillespie, 'Englishmen in sixteenth-century Irish annals', Irish Economic and Social History 17 (1990) 5-21. Daniel P. Mc Carthy, on his website at http://www.cs.tcd.ie/misc/kronos/chronology/synchronisms/annals-chron.htm offers comprehensive information on two traditions of dating used in the Irish Annals, together with two ancillary articles, 'Chronological synchronisation of the Irish annals', and 'Collation of the Irish regnal canon'. Daniel P. Mc Carthy, The Irish Annals: their genesis, evolution and history (Dublin 2008). The edition used in the digital edition The Annals of Loch Cé. A Chronicle of Irish Affairs from A.D. 1014 to A.D. 1590. Edited, with a translation, by William M. Hennessy, M.R.I.A. Published by the Authority of the Lords Commissioners of Her Majesty's treasury under the Direction of the Master of the Rolls. Vol. II William M. Hennessy First edition 689 pages Longman & Co., Trübner & Co., Paternoster Row; Parker & Co, Oxford; Macmillan & Co., Cambridge; A. & C. Black, Edinburgh; A. Thom, Dublin. Oxford/Cambridge/Edinburgh/Dublin 1871

CELT: Corpus of Electronic Texts.

Text represents even pages 2–518.

Text has been proof-read three times and parsed using NSGMLS.

The electronic text represents the edited text. Compound words, however, are hyphenated after CELT practice. In the case of lenition by point, f and s so lenited are rendered fh and sh. In the electronic edition Kl. represents Kl. with a stroke of the hardcopy edition; the superscript o in Latin ordinal numbers of the hardcopy edition has silently been omitted.

There are no quotations.

Soft hyphens are silently removed. When a hyphenated word (hard or soft) crosses a page-break or line-break, the break is marked after the completion of hyphenated word and punctuation mark.

div0=the body of annals; div1 represents the individual annal (i.e. the entries for one year); div2 represents the individual entry in a given annal. Passages of verse occurring within paragraphs are treated as embedded texts; stanzas are marked lg, and metrical lines are marked l. Page-breaks and line-breaks are marked.

Names of persons (given names), and places are not tagged. Terms for cultural and social roles are not tagged. Such tagging is envisaged in a future electronic edition. Latin words and passages are tagged frn lang="la"; English words are tagged frn lang="en".

 By unknown Irish monastic scholars. The text is in Early Modern Irish. A portion of the text is in Latin. A few words are in English. histor prose annals medieval 16c 2018-09-05 Beatrix Färber ed. Correction submitted by Dr Gregory Toner integrated. 2008-09-26 Beatrix Färber ed. Keywords added; file validated. 2005-08-25 Julianne Nyhan ed. Normalised language codes and edited langUsage for XML conversion 2005-08-04T15:17:53+0100 Peter Flynn ed. Converted to XML 2005-04-13 Beatrix Färber ed. Additions to bibliography and new wordcount made. 2003-03-24 Beatrix Färber ed. HTML file created. 2003-03-06 Beatrix Färber and Maxim Fomin ed. Whole file re-proofed; minor editorial changes integrated. 2003-02-16 Ruth Murphy ed. Structural markup and hyphenation checked; hyphens added from p. 400 to end. 2002-12 Marcos Balé ed. Changes in annal divisions in line with translation; file parsed. 2002-09-25 Beatrix Färber ed. Updated bibliography integrated. 2002-08-28 Julianne Nyhan ed. Minor editorial changes made to file. 2002-06-11 Ruth Murphy ed. Rest of hyphenation checked. 2001-08-21 Beatrix Färber ed. Bibliography inserted, poems and latin phrases marked up; file reparsed; hyphenation checked to year 1314. 2001-04-18 Beatrix Färber ed. File parsed using NSGMLS; HTML file created. 2001-04-01 Stephen Beechinor ed. Structural markup applied where missing, especially from entry 1237.14 onwards and second proofing from same entry. 2001-26-02 Beatrix Färber ed. Header created. 1997 Donnchadh Ó Corráin ed. Structural markup and line numbering applied. 1996-07 Philip Irwin ed. Corrections entered. 1996 Patricia Kelly ed. Proof corrections on hard-copy. pre-1994 Students at the CURIA Project data capture Text captured by scanning. Annala Locha Cé

Kl. Enair for Dardaoin, ocus cethre uathad fuirri; M.ccc.xl.ix.; bliadhain tosach noidecda í; secundo anno indictionis; xxu. cicli solaris.

Gilla na Naem Ua h-Ucinn mortuus est.

Maidm do thabhairt d'Aedh .H. Ruairc ar Flaithbheartach .H. Ruairc ocus ar Dondchadh .H. n-Domhnaill, ocus ar Dartraigibh, ocus Aedh Mac Flannchaidh, taisech Dartraigi, do marbhadh and, ocus Gilla na Naemh Mag Flannchaidh, ocus Lochlainn mac Andilis .H. Baighill, et alii multi nobiles.

Mac Mic and Iarla do teacht a Connachtaibh ocus creach do gabhail dó, ocus mac Uilliam Burc ocus Mac Feorais do breith air, ocus maidm adhbal do thabhairt air, ocus Mac Mic ind Iarla do gabhail ann, ocus moran do Chloinn Ricaird do gabhail ocus do marbhadh and bos.

Cocadh mor etir Fergal Mac n-Diarmada ocus Ruaidhri mac Cathail, ocus Gaill ocus Gaideal Connacht do tinol do Mac Diarmada, ocus Cenel Conaill agus Clann Muircheartaigh, gur chuiredar mac Cathail fa Cloinn Fernmoigi, ocus nir fedsad ni do, cur impodar cen giall can eidire, agus cur loisc ocus cur aircc mac Cathail urmor Moigi Luirg iarom.

Plaigh mor i m-Moig Luirc ocus an Erind uli in hoc anno. Matha mac Cathail .H. Ruairc d'ecc don plaigh sin.

Mac Mic an Iarla do écc.

Risderd .H. Raighillidh, rí na Breifne thoir, do éccaibh.

Dondchadh Riabhach, mac Maelechlainn Charraigh Mic Diarmada, do ghabhail do Cormac Bodhar Mac Diarmada, ocus a bhreith leis a n-Airtech, ocus a mharbhadh a fill do mac Gilla Criosd mic Taichlidh acus do Ua Cernaigh iarsin.

Gilliberd .H. Flannacan, taisech Tuaithi Rátha, do mharbhadh do macaibh Briain .H. Flannacan.

Muircheartach Ríaganach Mag Aengusa do marbhadh dia braithribh fein.

Kl. Enair for Aine, ocus coicedh .x. fuirri; M.ccc.l.; an dara bliadhain don cicil naedec do í, ocus in tres bliagain don cicil indictionis; xxui. cicli solaris.

Fergal mac Ualgarg .H. Ruairc do marbhadh do mac Cathail Clerig Mic Dondchaidh.

Brian Mac Diarmada, damhna righ Moigi Luirc, do marbhadh i r-Ros Comman do muinntir an espoicc .H. Finnachta, d'aen urchor t-soigti co tubaistech, ocus in fer ar ar cuired an t-orchur .i. Ruaidhri in t-Seomra .H. Dondchadha, do marbhadh ocus do chirrbhadh ann.

Brian, mac Domhnaill mic Briain Ruaidh .H. Briain, do marbhadh a fill do macaibh Lorcan Mec Ceothach, ut dixit poeta Truagh aen mac Domhnaill dala, Truagh oigir Briain Borámha, Truagh a dol mar nar sailedh, Truagh Clann Ceoch da comhmaidhemh.

Toirrdhealbach Occ .H. Briain do marbhadh se fir n-decc do Chlann Ceoch, ocus a crod ocus a ferand do bhuain dibh beoss.

Aed mac Aeda Breifnig .H. Conchobhair, ris i raiti .H. Conchobhair Breifnech, do marbhadh la h-Aedh .H. Ruairc a Moig Engaiti in hoc anno.

Ruaidhri, mac Cathail mic Domhnaill .H. Conchubair, do marbhadh a fill do cloinn Fergail Mic Dondchadha, tria forgall Aeda mic Toirrdhealbhaigh.

Muirgius mac Dondchaid do ecc in hoc anno.

Aedh mac Toirrdhealbhaigh do athrighadh do mhac Uilliam Burcc agus do Thuathaibh Connacht, ocus Aed mac Feidhlimidh do righadh doibh ina adhaig.

Aengus .H. h-Eodhusa mortuus est.

Aengus Ruadh .H. Dalaigh, sai Erend re dán, quieuit.

Cu Choicriche Mor mag Eochacan, dux Cenel Fiachaidh, quieuit.

Uilliam epscop Ua Dubda, .i. epscop Cille h-Alaid, quieuit.

Kl. Enair for Satharnn, ocus ui.xx. fuirri; M.ccc.l. primo; tertio anno cicli lunaris; iiii. annus indictionis; xxuii. cicli solaris.

Pilip Mag Udir mortuus est.

Aed mac Toirrdhealbaigh do theacht is tír, ocus braighdi Connacht do thabhach dó, ocus mac Feidhlimidh d'innarbadh re bliadhain do iar sin.

Aed .H. Ruairc do gabhail ic teacht o Cruaich Padruic, do mac Pilpin mic Uilliam Burcc, ocus Fergal mac Diarmada do ergi trít an n-gabhail sin, ocus cur fás cocadh coitchend hi Connachtaibh uile, ocus Magh Luirg do lomarcain trit sin.

Gairm coitchend do thabairt d'Uilliam mac Dondchaidh Muimnigh .H. Cellaigh, im notlaicc na garma, do dámhscolaibh Erend uili, ocus a teacht lán budech uile etir uasal ocus isel.

Mathgamain Mac Consnama do marbhadh do cloinn Dondchaid Mic Consnama.

Eogan Mac Suibne do marbad la Magnus .H. n-Domhnaill isin bliadhain cedna sin.

Enna .H. Flannacan, taisech Tuaithe Ratha, mortuus est.

Kl. Enair for Domhnach, ocus sechtmadh uathadh fuirri; M.ccc.l. secundo; iiii. anno cicli lunaris; u. anno indictionis; xxuiii. anno cicli solaris.

Aedh mac Toirrdhealbaigh do gabhail rigi Connacht ar ecin tar Gallaibh ocus tar Gaidhealaibh.

Aedh .H. Mael Brenainn ocus a dá mac do marbadh la h-Aed mac Feidhlimidh .H. Conchobair.

Aedh .H. Ruairc, ri Breifne, do marbhad do Chathal mac Aedha Breifnigh .H. Conchobhair ocus do Cloinn Muircheartaigh archena, ocus ár galloclaechaibh Cloinne Subne maroen ris.

Aengus O Domhnaill, ri Tiri Conaill, do marbhadh la Magnus .H. n-Domhnaill per dolum.

Dabacc Dilmain mac Uilliuc Umaill, cenn ceithirne Connacht, do ecc in hoc anno.

Flaithbheartach .H. Ruairc, ri Breifne, do ecc in hoc anno.

Matha mag Dorchaidh do marbhadh la Cloinn Muircheartaig.

Commach Baili in Duin la h-Aed mac Toirrdhealbaigh, ocus dith bo ocus caerach ann.

Conchubhar mac Muirgiosa mic Dondchaidh do h-ecc in hoc anno.

Nuala, inghen Mic Diarmada, do h-ecc in hoc anno.

Tomas Mag Ragnaill mortuus est.

Tadcc mac Siaccusa h-I Cellaigh do ec in hoc anno.

Kl. Enair for Mairt, occus ochtmadh decc fuirri; quinto anno cicli lunaris; ui. anno indictionis; primus annus solaris cicli; anno Domini M.ccc.l. tertio.

Aedh mac Ruaidhri h-I Neill mortuus est.

Tadg Mag Raghnaill, taisech Muinntire h-Eolais, do marbhadh do chloind t-Seafraidh Meg Raghnaill.

Aedh mac Toirrdhealbaigh do athrigadh, ocus Mac Branainn dia tabairt is tir.

Gormlaith inghean h-I Domhnaill, ben h-I Neill, in Cristo quieuit.

Mathgamhuin mac Gilla na Naemh h-I Fhergail mortuus est.

Kl. Enair for Cetain, agus .ix. fiched fuirri; M. ccc. l. quarto; ui. anno cicli lunaris; uii. anno indictionis; ii. anno solaris cicli.

Brian Ua Dubhda, righ Ua Fiachrach, mortuus est.

Rudhraighe Ua Mordha, righ Laighsi, mortuus est.

Sitriuc Mag Samhradhain mortuus est.

Derbforgaill inghean h-I Chonchobhair mortua est.

Seffraidh Mag Raghnaill mortuus est.

Tadhg Mac Senlaich mortuus est.

Seaan Ua Finnachta, espuc Oilefind, in Cristo quieuit.

Aedh mac Cormaic Buidhir do marbhadh do macuibh Donnchaidh Riabhaigh.

O Lachtnan, espuc Connacht, in Cristo quieuit.

Mac Murchadha do tarruing do Gallaibh, ocus coccadh mor itir Gallaibh ocus Gaidhelaibh trit sin. Aedh Mac Samhradhain do dul d'ecc dia ghonaibh.

Brían mac Aedha Moir h-i Neill mortuus est.

Feidhlim mac Cathail I Conchobhair d'ecc isin bliadhain cedna sin.

Cathal mac Neill h-I Ruairc do h-ec.

Maidhm mor do thabhairt do Chloind Aedha Buidhe ocus do Gallaibh Dúine Delcan ar Aedh U Neill, ocus ár mór do chur ann.

Hoibert a Burc do h-écc in hoc anno.

Ruaidhri mac Seoain Meg Mathghamhna do marbhadh i l-longport Meg Mathghamhna.

Kl. Enair for Dardaoin, ocus x. uathad fuirri; M.ccc.lu; uii. anno cicli lunaris; octauo anno indictionis; iii. anno cicli solaris.

Sir Muiris Fitomas, giuisdis na h-Erend ocus iarla Desmumhan, do ecc isin bhliadhain sin.

Domhnall mac Seoan .H. Ferghail, taisech Muinntire h-Angaile, do ecc, ocus a adhnacal a Letrath.

Conchubhar Mac Consnamha, espocc na Breifne, in Cristo quieuit.

Diarmaid .H. Mail Miadhaigh, taisech Muintire Cerbhallan, do marbhadh do Muintir Birn, ocus moran do Muintir Eolais maroen ris.

Maidhm do thabhairt do Gallaibh iarthair Connacht ar mac Uilliam Burc, ocus moran do marbhadh ann.

Cathal .H. Cuinn, taisech Muinntire Gillgain, occisus est, agus coicer da bhraithribh maroen ris, do cloind Aedha agus t-Seaain .H. Fergail.

Cormac Mag Ragnaill, taisech muintire h-Eolais, do marbhadh do cloinn Imhair Meg Ragnaill.

Maidm do thabhairt do Gaidhelaibh Laighin ar Gallaibh Atha Cliath.

Emann mac Uilliam mic Ricaird do marbhadh le Síl n-Anmchadha.

Maidhm mor do thabhairt le Ricard Occ ar lucht tighi mic Uilliam, .i. Emand a Burcc, agus ar t-Sil n-Anmchadha, dar marbhadh Stiamhna Mac Siurtan agus Enri mac Pilbin, agus se meic righ d'éc do t-Síl n-Anmchadha.

Cath do thabhairt do mhac righ Saxan agus do righ Franc. Ri Francc agus a mhac do gabhail and, agus ár mór do thabhairt forro.

Tuaim Da Gualand do loscadh do Cathal Ócc, ocus do mac Uilliam Burc.

Niall Mag Mathgamna do marbadh do cloinn t-Seoain Meg Mathgamna.

Murchadh mac Cathail .H. Fergail mortuus est.

Mac Cathail, .i. abb Sruthra, in Cristo quieuit in hoc anno.

Adducc Mac Ugilin do marbhadh le h-Ortheraibh.

Deich n-uain do breith do en chairigh in hoc anno.

Donnchadh .H. Domhnaill do marbadh ag breith inghine Meg Udhir ar ecin les.

Tadhcc Mac Aedhacan mortuus est.

Mac Gall-Gaidhil, abb na Trinnoitti, in Cristo quieuit.

Fergal, mac Ferghail, mic Muircheartaigh Moir, mic Congalaigh Meg Eochacan, taisech Ceneil Fiachaidh mic Neill .ix. Giallaigh, do ecc in quarto idus septimber.

Derborgaill ingen .H. Fergail mortua est.

Kl. Enair for Aine, agus .xxi. fuirre; M.ccc.lui; octauo anno cicli lunaris; ix. anno indictionis; quarto anno cicli solaris.

Aedh mac Toirrdhealbaigh .H. Conchobhair, righ Connacht, do marbhadh a m-Baili Locha Decair le Donnchadh Carrach .H. Cellaigh agus le Clainn an Baird, ar forgall Mainech, a n-digaltas ingine Seoinin a Burc, .i. ben .H. Cellaigh, do breith do mac Toirrdhealbaigh leis ar aithedh agus ar elodh; agus Aedh mac Feidhlimidh .H. Conchubhair do gabhail lan rige Connacht iaramh.

Conchobar macc Taidc .H. Cellaigh do marbhadh do Tadc mac Diarmada .H. Cellaigh.

Ferchar .H. Fallamhain, taoisech Cloinne h-Uadach, mortuus est.

Toirrdhealbach mac Aedha Breifnigh .H. Conchobhair do marbhadh do Chloinn n-Donnchaidh.

Diarmaid mag Carrthaigh agus a mhac do marbhadh la h-Ib Suilleabhan, .i. Dondchadh mac Diarmada.

Mor, inghean .H. Conchobair, ben .H. Fergail, do h-eg in hoc anno.

Ruaidhri mac Aedha .H. Chonchobhair mortuus est.

Muircheartach mac Seoain .H. Neill do marbhadh la Pilip Mag Udhir in hoc anno.

Giuistis Atha Cliath mortuus est.

Mac Feorais do marbhadh la Gallaibh in hoc anno.

Dubgall Mac Suibhne do marbhadh la Domhnall .H. Conchobair in hoc anno.

Dondchadh Mac Con Mara, mac taisigh rob fearr 'na aimsir, occisus est.

Domhnall mac Aedha Breifnigh .H. Conchobhair mortuus est.

Nicol mag Cathusaigh, espocc Oirgiall, in Cristo quieuit.

Solamh .H. Mellain, maer Chluicc ind Idachta, feichem coitcheann do chlíaraibh Erend, mortuus est.

Donnchadh Proistech do marbhad do dis da mhuinntir fein per dolum.

Gerodin Triel do tharraing do dubh Gallaibh ar faithchi Atha Cliath.

Murchadh mac Briain .H. Neill mortuus est.

Kl. Enair for Domhnach, agus aili uathad fuirri; M.ccc.luii.; ix. anno cicli lunaris; x. anno indictionis; u. anno cicli solaris.

Maghnus Mag Mathgamna, ri Oirghiall, mortuus est.

Lochlainn mac Muircheartaigh .H. Chonchobhair mortuus est.

Iarla Desmuman demersus est ac dol taris.

Feidhlim .H. Domnaill ocus a mac, .i. Raghnall, do marbhadh i l-laimh la Seoan .H. n-Domhnaill.

Ferghal Muimhnech .H. Duibhgennan, ollamh Conmaicne ocus cloinne Mael Ruanaigh tis ocus tuas, mortuus est.

Matha mac Tomais .H. Ruaircc, cend gaiscidh na Breifne, mortuus est.

Macraith mag Erraigh, sai coitchend, mortuus est.

Donnsléibhi Mac Cerbhaill, sai re seinm, mortuus est.

Brian mac Gilla Criosd .H. Ruairc, ocus Maghnus Buidhe Mag Samhradhan, do marbhadh ar Ruta mic Ugilin la h-Aedh .H. Neill in hoc anno.

Clement .H. Duibhgennan, bicari Cille Ronain, in Cristo quieuit.

Sith coitcheann etir in da Cathal in hoc anno, .i. Cathal mac Aedha Breifnigh, acus Cathal Oc mac Cathail mic Domhnaill.

Kl. Enair for Luan, agus tres.x. fuirri; M.ccc.luiii.; x. anno cicli lunaris; xi. anno indictionis; ui. anno cicli solaris.

Domhnall .H. h-Eghra, ri Luighne, do h-eg fo caisc in hoc anno.

Maghnus Mag Udir do marbhadh do Cloinn Cathmail in hoc anno.

Conchubhar .H. h-Anlighi, dux Cenel Dobtha mic Aengusa, do ecc iar m-breith buadha o demhan agus o domhan in hoc anno.

Maidm mor do thabhairt le h-Aedh .H. Neill ar Argiallaibh agus ar Feraibh Manach, du ar marbhadh Aedh mac Caba agus Mac an Espuic .H. Dubhda.

Cith mór do ferthain hi Carpri isin t-samhradh, agus nir mó fiadh ubhall na cach cloich don chith sin uili.

Maidm mor do thabhairt d'U Mordha for Gallaibh Atha Cliath, agus da .xx. ar da ced do marbhadh ann.

Brian mac Cathmail, espocc Arghiall, quieuit.

Senicin Mac Ugilin mortuus est in hoc anno.

Mac Andriu mic Feorais mortuus est.

Kl. Enair for Mairt, agus cethar fichet fuirri; M.ccc.l.ix.; xi. anno cicli lunaris; xii. anno indictionis; uii. anno cicli solaris.

Cormac mag Carrthaigh, rí Desmumhan, mortuus est.

Maidhm mor do thabhairt do Chathal Oc .H. Conchobhair fa beol Atha Senaigh for Conallchaibh, ocus Seoan .H. Dochartaigh, taisech Arda Midhair, agus Eogan Connachtach, agus Toirrdhealbach Mac Suibhne do gabhail and beoss, agus ar mor do thabhairt and. Matha mac Samhradhan, adhbhar taisigh Thellaigh Echach, do lot an lá sin, agus a ecc don lot sin oc a tig.

In Cathal ceadna sin do dol ar sluaghadh a Tir Conaill, agus a mhuintir do dol a crich .H. Gairmleadhaigh, agus Cathal Bodhar .H. Ruairc do marbadh la Mail Sechlaind .H. Gairmleadhaigh, agus Mael Sechlaind do marbhadh ar in lathair ceadna sin la Tigernan .H. Ruaircc.

Muircheartach mac Tomais .H. Floinn Líne, damhna righ .H. Tuirtri, do mharbhadh per dolum la h-Aedh mac Briain .H. Neill .i. mac Briain mic Aedha Buidhe.

Murchadh Oc mac Mathghamhna, damhna righ Corca Bascinn, do marbhadh la Sil m-Bríain.

Magnus .H. Dubhda, mac righ .H. Fiachrach, mortuus est.

Brian Mac Donnchaidh, adhbhar righ Tire h-Oilella, do marbhadh do mhac Sencha d'oireacht .H. Gadhrae.

Enri mac Uillec mic Ricaird mortuus est.

Domhnall mac Taidhg .H. Mathgamhna occisus est.

Aedh mac Conchobhair Mic Aedhacain do ecc in hoc anno.

Kl. Enair for Cedain, agus coicedh uathad fuirri; M.ccc.lx.

Mac righ Saxan do teacht a n-Erinn, agus loiscthi mora isin bliadhain sin .i. Ros Coman ocus Damhinis, agus Slicech, agus manister Lesa Gabhail, agus Fidnach, agus Druim Lias.

Diarmaid mac Donnchaidh Riabhaigh Mic Diarmada do marbhadh la Cathal Occ.

Diarmaid .H. Briain do athrighadh do mac brathar a athar fein.

Mael Ruanaigh mac an Gilla Muinelaigh .H. Baigill mortuus est.

Sir Roberd Sabhais do ecc in hoc anno.

Amhlaibh mac Sefraid Meg Raghnaill occisus est.

Seoan mac Gilla Criosd .H. Ruairc occisus est o Aedh Mag Dorchaidh.

Diarmaid .H. h-Anlighe mortuus est.

Tuathal .H. Finnachta mortuus est in hoc anno.

Primh-fhaidh Arda Macha in Cristo quieuit.

Ferghal mac Sefraidh meg Raghnaill mortuus est in hoc anno.

Cathal mac an Chaich Meg Raghnaill occisus est in hoc anno.

In Gilla Dubh Mag Builichan mortuus est.

Seoan mac Simag Mic Ugilin occisus est.

Inghen Toirrdhealbaigh .H. Conchubair, ben Fergail .H. Raighilligh, do marbhadh d'escur in hoc anno.

Gilla na Naemh Ua Conmaig, ollamh Tuadhmumhan re seinm, mortuus est.

Uilliam mac comharba Caillin occisus est.

Naemacc .H. Duibgennan mortuus est.

Kl. Enair for Aine, agus ui.x. fuirri; M.ccc.lxi.; xiii. anno cicli lunaris; xiiii. anno indictionis; ix. anno cicli solaris.

Artt Mac Murchadha, ri Laighen, agus Domhnall Riabhach, adhbhar ri Laighen, do gabhail per dolum do mac righ Saxan ina tigh fein, agus a n-ecc aige.

Benedecht .H. Mochan, aircideachain Cilli Athrachta, mortuus est.

Dondchadh Ua Lochlainn, rig Corca Mo Druaidh, mortuus est.

Sir Emand a Burc mortuus est.

Cluithi an Righ an Erind uli co forlethan, agus Risdard Sabhais d'ecc de.

Remann mac Burcaig an Muine mortuus est.

Cathal agus Muircheartach, da mac Aedha mic Eogain, mortui sunt.

Uater Stondun mortuus est.

Tuathal .H. Maille moritur.

Tomas Mag Tigearnan, taisech Tellaigh Dunchadha, moritur.

Nicol .H. Finnachta mortuus est.

Gillibert mac Mailir mortuus est in hoc anno.

Kl. Enair for Satharn, agus sechtmadh .xx. fuirri; anno Domini M.ccc.lxii.; xiiii. cicli lunaris; xu. anno indictionis; x. anno cicli solaris.

Eogan find .H. Conchubhair, mac righ Connacht, do ecc in hoc anno.

Niall Mag Samhradhain, dux Tellaigh Echdhach, quieuit.

Mael Ruanaigh .H. Dubhda agus a bhen, .i. inghean Mic Dondchaidh, mortui sunt.

Cathal Occ agus mac Feidhlimidh .H. Conchobair do gabhail Baili in Tobair Brighti.

Sluaghadh adhbhal mor la Cathal Oc O Conchobair agus la mac Feidhlimidh .H. Concobhair, ri Connacht, isin Midhe, cur loiscsit co h-athais Midhe, agus cethre tempoill dec agus Cell Cainnig do loscadh doibh; agus ni bádh urusa a áremh na a rimh ar milledh din Midhe in tan sin; agus a teacht slan da tigibh iaramh.

Cormac Ballach .H. Mailechlainn, ri Midhe, moritur.

Tadcc mac Conchubhair mic Toirrdhealbaigh .H. Briain do marbhadh do Cloinn Culein.

Cathal Occ .H. Conchobhair, an t-aen mac righ do ba mó clu agus cride, agus alla agus ard nos, neart agus niachas do bhi a n-aen aimsir ris, do h-eg don phlaigh i Slicech in treas la iar Samhain.

Diarmaid mac Sean .H. Ferghail, taisech Muinntire h-Angaile, mortuus est.

Domhnall mac Ruaidhri .H. Cellaigh mortuus est.

Carpri .H. Cuind, taisech Muinntire Gillgain, mortuus est.

Tomas .H. Birn mortuus est.

Muircheartach Dond Mag Oreachtaig quieuit.

Aengus Mac ind Oclaigh, aircideochain Cille h-Airid, in Cristo quieuit.

Murchadh Manach mac Taidg quieuit.

Eogan .H. Mailli ocus a mhac, .i. Diarmaid, mortui sunt.

Cu Coigcriche mac Diarmada Meg Eochacan, acus Muiris mac Muircheartaigh Meg Eochacan, mortui sunt.

Kl. Enair for Domhnach, ocus ochtmadh uathadh fuirri; M.ccc.lx.iii.; xu. cicli lunaris; i. anno indictionis; xi. anno cicli solaris.

Magnus Eoganach .H. Domhnaill do ecc in hoc anno.

Aedh Mag Udhir, ri Fer Manach, do ecc in hoc anno.

Muircheartach Ruadh, mac Domhnaill Irruis .H. Conchobhair, do mharbhadh do Magnus mac Cathail .H. Chonchobhair.

Tadhcc Mac Consnamha, taisech Muinntire Cinaith, do lot accus do gabhail le Cathal mac Aedha .H. Conchubair, agus a eg isin lamdichas sin.

Catirfina, inghean .H. Fergail, ben .H. Raighilligh, do écc.

Cathal Mac Donnchaidh do marbhadh do lucht Moighi Luirg.

Gaeth mór in hoc anno cur bris tempaill agus tighi, agus cur báidh longa agus artraigi imdai.

Bebinn ingen Mec Eochagain, uxor Uulpis, quieuit.

Kl. Enair for Luan, agus .ix. decc fuirri; M.ccc. lx. quarto; xui. cicli lunaris; ii. anno indictionis; .xii. anno cicli solaris.

Aedh .H. Neill, ri coicidh Uladh, in t-aen rí is ferr tainicc ina aimsir fein, do écc iar m-breith buadha o demhan agus o domhan.

Diarmaid .H. Briain, rí Tuadhmumhan, do ecc in hoc anno.

Mael Sechlaind, mac Murchaidh, mic Giolla na Naemh, mic Aedho, mic Amhlaibh, mortuus est.

Giolla na Naemh mac Gobhand na Scel, sai senchusa, mortuus est.

Domhnall mac Ruaidhri .H. Cellaigh, damhna righ .H. Mane, quieuit.

Marghrec, inghean Uater a Burcc, ben mic Feidhlimidh, quieuit.

Giolla na Naemh .H. Duibdabhorenn, ollamh Corcumruadh re breitheamhnus, do h-ecc in hoc anno.

Donchadh .H. h-Uiginn, sai senchaidh, mortuus est.

Bran .H. Brain, sai timpanaigh, quieuit.

Kl. Enair for Cedaoin, agus .ix.xx. fuirri; M.ccc.lx.u.; xuii. cicli lunaris; iii. anno indictionis; xiii. cicli solaris.

Ruaidhri mac Domhnaill .H. Neill do marbhadh do Mhail Sechlaind mac in Ghirr Mac Cathmhail do oen orchur t-soighdi.

Tomas Mac Murchadha .H. Ferghail do ecc in hoc anno.

Indsaighidh do denamh do Cloinn Gosdelb ar Luignichaibh, dar marbhad ui.er mac righ fo Chorbmac .H. n-Eghra, .i. adhbhar righ Lugni in Corbmac sin.

Indsaighidh eli le h-Aedh mac n-Diarmada for Muinntir Eolais. Cealga mora agus creacha aidhbhli do denamh ar Muinntir n-Eolais don chur sin, agus nochar crecha cin dighail na creacha sin, ar daig do marbhadh ann-sidhe Corbmac Mac Diarmada Ruadh, agus da macc Tomaltaigh .H. Birn .i. Maeleachlainn Cáech agus Gilla Criosd; agus do gabhadh and beuss Diarmaid Mac Diarmada agus Mael Ruanaigh mac Dondchadha Riabhaigh; agus maidhm na macamh ainm in madhma sin osin ille.

Fedhlimidh an Enigh, mac Domhnaill .H. Conchubhair Corcumruadh, rí Corcumdruadh, do ecc.

Brian mac Matha Meg Tighearnan, taisech Tellaigh Dunchadha, fer do po mo clú do Bhreifnechaibh, mortuus est, ut dicitur — Brian Mag Tighearnan na tres; Re a enech nir cóir commes; Ro len cin fich don feli; Badh nem crich a cathreme.

Brian mac Aedha Meg Mathgamhna do gabhail righe n-Orgiall, acus cleamhnas do denamh dó re Somhairle mac Eoin Duibh Mic Domhnaill, ard constapla coicidh Uladh, agus co tucc fair ingen .H. Raighilligh do lecan agus a ingen fein do thabhairt; agus nir po cian as a h-aithli sin co tucc chuici ar cuiredh d'ól fína mar badh edh; agus ise cuiredh fuair o na chliamhain in tan sin a ghabhail agus a chengal agus a chur i loch da fholach. Brian fein do indarba triasan n-gniomh sin.

Cu Connacht .H. Raighilligh do dol ind ord in hoc anno.

Aedh mac Neill .H. Domnaill do marbhadh la Domhnall mac Muircheartaigh .H. Conchobair.

Tadc mac Magnusa .H. Conchobhair do bhreith ar Domhnall an la ceadna, agus a chur ar sibal in la ceadna sin, agus drong da muinntir do marbhadh fa Aedh mac Conchubhair mic Taidc.

Pilip .H. Raighilligh do righadh ind inad Con Chonnacht .H. Raighillidh.

Mac Uatin Baret, .i. Roberd, mortuus est.

Mac rig Saxan do facbail Ereann in hoc anno.

Kl. Ienair for Dardaoin, agus aenmadh .x. fuirri; anno Domini M.ccc.lxui.; xuiii. cicli lunaris; iiii. anno indictionis; xiiii. cicli solaris.

Cathal mac Aedha Breifnigh mic Cathail Ruaidh, agus a mhac .i. Maghnus Occ, do marbhadh a fill la Pilip Mac Udhir, righ Fer Manach, agus lasin fairchideochain Mag Udhir, ina n-airechtas fein, agus crecha aidhbhli do denamh ar Cloinn Muircheartaigh iaramh, agus sith do denamh do Muinntir Ruairc agus d'Fearaibh Manach re chele.

Cathal Mag Flannchaidh, taisech Dartraigi, do marbhadh la Cloinn Muircheartaigh iarsin.

Cormac Dond Mag Carrthaigh, ri .H. Carpri agus .H. n-Echach Mumhan, do marbhadh a fell la mac a derbhrathar budein .i. la mac Domhnaill na n-Domhnall.

Conchubhar .H. Conchubhair, ri Ciarraighe Luachra, do marbhadh do Branachaibh.

Seoan Mac Gosdelb, tighearna Sleibhi Luga, do ecc.

Ruaidhri mac Muircheartaigh .H. Conchobhair do bádhadh ar Sinaind.

Maidhm mor le Tadc mac Maghnusa .H. Conchobhair ar Seoan .H. n-Domhnaill cona ghallocclachaibh, ocus Mac Subne do gabhail and, agus braighdi imda maille ris, agus daine imdha do marbhadh and beos.

Mac Con Mara, taisech Cloinne Culen, mortuus est.

Maigistir Florint Mac ind Oclaigh do ecc isin bliadhain sin.

Coimhthinol cocaidh do Domhnall .H. Néill d'indsaigidh Neill .H. Neill, agus Mac Cathmhail do dichur as a duthaigh amach doibh, agus breith doibh ar deredh na n-imircech; agus Ragnall mac Alaxandair, oighri Cloinne Alaxandair, do theacht a h-Insibh Gall fon am sin dochum Neill .H. Neill, agus cethern galloglach ag gach cuid dibh .i. in t-athair do thaebh agus in mac agus in brathair don taeb araill; Toirrdelbhach an brathair, agus Alaxandar an mac. Agus cuiris Raghnall teachta da iarraidh orra diblinaibh in onoir a sinnsireachta can teacht air; agus nir dechsad do, acht ro indsaigsit co h-obann dochum atha an imiricc ina agaidh, ara facadar Raghnall, agus tucsat troit agus tachar anmhín da cheli ann sin; agus do marbhadh ann mac Raghnaill, agus do gabhadh Alaxandar mac Domhnaill and; agus nir leg Raghnall da mhuinntir a mharbhadh, agus adubhairt Raghnall nach beth esbhadh a brathar agus a mhic air; agus do marbhadh moran do mhuintir Domhnaill .H. Neill annsin.

Cocadh mor etir Gallaibh Connacht .i. Mac Uilliam agus Mac Muiris. Clann Muiris d'innarbadh la mac Uilliam Burc, agus a chur a Clann Ricaird don cur sin.

Muircheartach mag Ragnaill, mec Raghnaill Meg Raghnaill, do marbhadh a fill le Maeleachlainn Mag Raghnaill, taisech Muinntire h-Eolais. Maileachlainn fein do ecc a cinn da mis iar sin.

Kl. Enair for Aine, agus aili .xx. fuirri; anno Domini M.ccc.lx.uii.; xix. cicli lunaris; quinto anno indictionis; xu. cicli solaris.

In t-esbacc .H. Ferghail, .i. espog Ard Achaidh, in Cristo quieuit.

Sitriuc mac ind airchinnigh Meg Tighearnan mortuus est.

Cathal mac Imair Meg Tighearnain mortuus est.

Imirci do denamh do Cloinn Muircheartaigh i Moigh Nisi in hoc anno, agus toisc do denamh doibh i m-Moigh Luirg .i. Tadc mac Ruaidhri .H. Conchobhair acus Fergal Mag Tigearnan, dux Tellaigh Dunchadha, agus Diarmaid Mag Raghnaill, dux Muintire h-Eolais, agus galloclaechaibh maraen riu; agus longphort Aedha Micc Diarmada do loscadh leo. Ferghal Mac Diarmada, ri Moigi Luirg, do breith forra, agus Aedh Mac Diarmada, agus tachar do thabhairt doibh, acus daine da muinntir do marbhadh.

Cu Connacht .H. Raighilligh, ri na Breifne no gur threicc hi ar Dhia, mortuus est.

Maidhm mor do thabhairt la Domhnall mac Muircheartaigh .H. Chonchobhair, agus la Muinntir Ruairc agus le Cloinn Dondchaidh, agus le Teboit a Burcc cona cethirnn congbhala, ar Tadc mac Maghnusa .H. Conchobhair, agus breith forro ag Traig Eothuile in t-sair, agus galloclaechaibh mic Magnusa do marbhadh ann uili .i. .x. agus uii.xx., fa Domhnall mac Somhairle agus, fa Domhnall Oc a mhac, agus da mac Mic Subne, agus, fa Mac an Espoicc .H. Dubhda, agus fa Uilliam Mac Sithidh.

Derbhail inghean Mael Ruanaigh Moir Mic Diarmada, ben Ualghairg .H. Ruairc, do marbhadh la Cloinn Muircheartaigh. Aengus mac an Deacanaigh Mic Samhradhan, quieuit.

Tadc Mac Samhradhain mortuus est.

Maeleachlainn mac Sefraidh mic Gilla Padruic, ocus dream da mhuinntir, do marbhadh la Gallaibh a fill.

Mael Muire Og Mag Craith do ecc in hoc anno.

Tadc ocus Lochlaind, da mac Aengusa Ruaidh .H. Dálaig, mortui sunt.

Mac Muiris na m-Brig mortuus est.

Eogan mac Ruaidhri .H. Cellaigh mortuus est.

Muircheartach mac Muircheartaigh .H. Chonchobhair mortuus est.

Bebinn, inghean Ualghaircc .H. Ruaircc, ben Tomultaigh Mic Dondchadha, mortua est.

Aircideochan Argiall, .i. Malatsi Mag Udir, in Cristo quieuit.

Kl. Enair for Sathurnn, ocus treas h-uathadh fuirri; anno Domini M.ccc.lxuiii.; primus annus cicli lunaris; ui. anno indictionis; xui. anno cicli solaris.

Aedh mac Feidhlimidh .H. Conchobhair, ri Connacht, cend gaile ocus gaiscidh na n-Gaidhel, ocus Lughaidh Lamhfhada Leithe Cuind ind adhaigh Gall ocus Gaidhel bidis ina adhaigh, do h-eg iar m-buaidh n-aithrighe i r-Ros Cumman, iar na bheith da bliagain d'ecc i r-righe Connacht amal aspert an file— Da bhliadhain dec dheoch midaig D'Aedh a n-inad a cuigidaigh; Arm fa ced do chur na chorp, Ge do fhuair ecc ri h-adhort.

Crich Cairpre do roind ar dó eidir mac Maghnusa .H. Conchobhair ocus Domhnall mac Muircheartaigh.

Fergal Mac Diarmada, ri Muighe Luirg, mortuus est.

Tighernan mac Cathail .H. Ruairc mortuus est.

Cormac Occ Mac Diarmada, degh adhbhar righ ar a duthaidh fein, mortuus est.

Diarmaid mac Cormaic Duind Meg Carrthaigh do ghabhail le Mag Carrthaigh Cairbreach, ocus a thidhnacal do Gallaibh, ocus a mhilledh iar sin.

Dauid O Tuathail do marbhadh do Gallaibh Atha Cliath.

Seaan Ua Domhnallan mortuus est.

Uilliam Saxanach mac Sir Emainn a Burc, .i. oigri na n-Uilliamach, do h-ecc don galar brecc an Inis Cua.

Tomoltach Occ mac Ferghail Mic Diarmada, tánaiste Moighi Luirg, do ecc don galar brec.

Laiseach mac Dauid I Mordha mortuus est.

Sluaghadh adhbhal mor la Niall Ua Néill, ri cóicidh Uladh, an Oirghiallaibh, d'forbais ar Bhrian Mag Mathgamhna, ocus longphort do gabhail do a meodhon an tire, ocus cumhadha mora do thaircsin dó o Bhrian Mag Mathghamhna, .i. leth Orgiall do thabhairt do Niall mac Murchaidh mic Briain na Coiligh Oifrind, .i. don rig do bói remhe forsan tir, acus comhadae mora eli d'O Néill ind eric Mic Domhnaill; ocus .H. Neill da n-aentughadh sin. Ocus comhairli aili do denamh do mac Murchaidh Meg Mathghamhna, ocus d'Alaxandar Oc Mac Domhnaill, do tighearna na n-galloghlach, ocus gluasacht doibh diblinaibh can cet can comairle d'O Neill, tri coraighthi ceadfadhacha comhmora, d'indsaighidh Meg Mathgamhna, ocus ammus longphoirt do thabairt doibh fair; ocus Mag Mathgamna an lin do bái do erghi ina n-aghaidh, agus maidhm do thabhairt dó ar in slúagh sin, ocus mac Murchaidh Mec Mathghamhna, oighri Orgiall, do marbhadh annsin, ocus Alaxandar Ócc mac Toirrdhelbaigh Mic Domhnaill, consabla na n-galloglach ocus oighri Cloinne Domhnaill, do mharbhadh, ocus Eogan mac Toirrdhelbaigh mic Mael Sechlainn .H. Domhnaill do marbhadh ann, et alii multi nobiles et ignobiles.

Tomas .H. Floinn, ri .H. Tuirtri, sai Eireann ar enech ocus ar engnamh ocus ar uaisli, do ecc in hoc anno.

Tadc, mac Magnusa, mic Cathail, mic Domhnaill .H. Conchobhair, do ghabhail per dolum do Ruaidhri .H. Chonchobair, do rig Connacht, ina longphort féin an Ard in Choillin, iar na bhreith leis do Chormac Mac Dondchaidh go tech .H. Conchubhair; ocus is fria sin ro samalti cech olc; ocus ni ro samladh olcc fris, .i. ní mesa gabhail maic Maghnusa; ocus ní badh mesa ina sin do denamh ris ar trill, .i. a tidhnacal do Domhnall mac Muircheartaigh .H. Chonchobhair, ocus a mhilledh fa dheoigh la Domhnall i Caislen t-Sliccigh; cur fás coccadh mor i Connachtaibh uili triasan n-gniomh sin, .i. eidir mac Uilliam ocus .H. Conchobhair, ocus Mac Díarmada.

Ruaidhri mac Seonacc Mec Eochacan, sai na h-Erend uli cin imrisain a n-enech ocus a n-engnamh, do eg i quint id Kl. Enair in hoc anno.

Kl. Enair for Luan, ocus cethar dec fuirri; anno Domini M.ccc.lxix.; ii. annus cicli lunaris; uii. annus indictionis; xuii. annus cicli solaris.

Pilip .H. Raighillidh do gabhail da bhraithribh fein, ocus a chur a Cloich Locha h-Uachtair, ocus rige do gabhail do Maghnus .H. Raighilligh ina inat; ocus cocadh ro mór do ergi isin Bhreifne triasan n-gabhail sin, ocus sluagh mor do tinol la h-Annadh .H. Raighilligh, .i. mac Risdard, .i. Mag Mathghamhna ocus Oirgiallaidh archeana, do thabhach Philib .H. Raighilligh ar Maghnus; ocus maidhm mor do thabhairt ar Maghnus a m-Blen Cupa do Mag Mathghamhna ocus do Chloinn Capa, inar marbhadh tri meic Cormuic .H. Ferghail, Seonin ocus Maeleachlainn occus Fergus, ocus Fedhlimidh mac Aedha in Cleitín .H. Chonchobhair, ocus da mac Flaithbheartaigh moir Mic Conruba .i. Donn ocus Brian, ocus Sitrecc na Srona Mac an Maigistir.

Geralt Caemhanach, adhbhar airdrigh Laighean, do marbhadh don ridire dubh.

Tighearnan .H. Ruairc do dol for creich i Lurg, ocus a tabhairt les; ocus Aedh Occ mac Aedha Ui Ruairc do marbhadh d'O Maela Duin Luirg in iarmaireacht na creichi.

Diarmaid Lamhderg Mac Murchadha, airdrigh Laighen, do bheith a laimh fada ag Gallaibh Atha Cliath, iar na gabhail a fill don ridiri dubh, ocus a tharraing fa deoidh doibh; gniomh is mo do ronnadh ind Erinn a n-deredh aimsire.

Mathghamhain Maenmaigi .H. Briain, ri Tuadhmumhan, an Gaidheal is ferr ocus is airegdo do bhi ina aimsir fein, do eg ina longphurt iar m-buaidh n-aithrighe, ocus Brian Occ .H. Briain do gabhail righe ina inat iar sin.

Ua Maela Duin Luirg do marbhadh a fill do mhacaibh Neill .H. Domhnaill, ocus Pilip Mag Udhir do dol longus mor do dighail a oclaoich ar macaibh .H. Domhnaill, ocus Niall Occ .H. Domhnaill do marbhadh leis.

Brian mac Aodha Buidhe h-I Neill, adhbhar righ Erenn, mortuus est.

Espuc Odo O Néill, .i. espuc Oirgiall, in Cristo quieuit.

Ricard .H. Raighilligh, espuc na Breifne, in Cristo quieuit.

Maidhm mor do thabhairt la Brian .H. m-Briain, ri Tuadhmhumhan, inar gabhadh Geroit Iarla ocus Goill mora na Mumhan archena; ocus ni meinic do thuit ar aon lathair riamh urduil ar thuit do doinibh annsin.

Luimnech do loscadh don turus sin; ocus do ronsad gialladh d' U Briain; ocus Sida Occ mac inghine .H. Dubidir do gabhail barrdachta an baile iar sin.

Toisc loingsi do denamh do Pilip Mag Udhir co Loch Uachtair, ocus cloch .H. Raighilligh do gabhail do; ocus Pilip .H. Raighillidh, ri Brephne, do bhi a láimh inti do thabhairt esti; ocus a rige fein do thabhairt do aris iar sin.

Kl. Enair for Mairt, ocus coicedh .xx. fuirri; M.ccc.lxx.; iii. annus cicli lunaris; uiii. annus indictionis; xuiii. cicli solaris

Domhnall .H. Néill do thabhairt tighernais ocus braighdi do Niall .H. Néill. Bresmaidhm la Niall for Brian Mag Mathgamhna, ocus moran do bháthadh ocus do milleadh and.

Cocadh mor eidir Clann Mhuircheartaigh ocus Muinntir Raighilligh in hoc anno. H. Raighilligh ocus .H. Ferghail, ocus Mag Udhir, ocus .H. Conchobhair do erghe a n-adhaigh Cloinne Muircheartaigh, agus a cur a Muinntir Eolais re neart na righ sin, ocus a n-dol assidhe dochum mic Uilliam Burcc, agus Mag Tighearnain do dol leo annside.

Clann Aedha Mic Cathmail do marbhadh Gilla Padruic Mic Cathmail, righ-thaoisigh Cenel Feradhaigh, per dolum, ocus Con Uladh Mic Cathmail, ocus a mhic ocus a mhna .i. inghean Magnusa Meg Mathghamhna. Murchadh a dherbhrathair ina inat iar sin.

Muircheartach Sinnach, rex Fer Tethba, quieuit xix. n. Febradh.

Cathal .H. Conchobhair, adhbhar righ .H. Falgi, ocus Muircheartach .H. Mordha do toitim ar creich la Gallaibh Laigen.

Kl. Enair for Cedain, ocus .ui. uathad fuirri; M.ccc.lxxi.; quartus annus cicli lunaris; ix. annus indictionis; xix. cicli solaris.

Fergal Mag Cochlan do eg i l-laimh ac .H. Cendedig in hoc anno.

Fergal Mag Eochagan quieuit hi .u. id Septimper.

Murchadh .H. Madadan, feicheam coitcheann d'feraibh Erend, do marbhadh d'oen orchor t-soigdi in hoc anno.

Tadc Occ mac Magnusa .H. Conchobair do marbhadh a fill do Domhnall mac Muircheartaigh .H. Conchobair da lamhaibh fein, i Caislen Slicigh, iar na bheith fada i l-laimh i cuibhrech aige; agus ni meinicc do ronnadh a n-Erinn riamh marbhadh badh mesa ina sin.

Donnchadh .H. Birn quieuit.

Brian .H. Cennetigh, ri Urmhumhan, do mharbhadh la Gallaibh.

Airdespog Tuama, cend enigh na h-Erend, in Cristo quieuit.

Kl. Enair for Dardain, ocus uii.x. fuirri; M.ccc.lxxii.; u. anno cicli lunaris; x. anno indictionis; xx. anno cicli solaris.

Brían Mor Mag Mathgamna, ardrigh Orgiall, fer is mo do marbh do Gallaibh ocus do Ghaidhelaibh ina aimsir fein an Erind, do toitim le galloclach da mhuinntir fein a fill in hoc anno.

Seaan Mor Ua Dubhagain, sai re senchas ocus ollamh .H. Maine, do h-ecc in hoc anno.

Muircheartach Muimhneach mac Muircheartaigh Moir Meg Eochacan, taisech Cenel Fiachaidh mic Neill, quieuit i Kl. Octimber.

Uilliam mac Uillic, cenn suarcusa Erenn uli, quieuit.

Uilliam Occ .H. Cellaigh, adhbhar righ .H. Maine, quieuit.

Kl. Enair for Satharnn, ocus ochtmadh .xx. fuirri; M.ccc.lxxiii.; ui. anno cicli lunaris; xi. anno indictionis; xxi. anno cicli solaris.

Indsaighidh do denamh do Gallaibh na Mide isin Angaile, ocus Ruaidhri mac Cathail .H. Fergail ocus a mhac do marbhadh doibh, ocus moran da muinntir maille riu; ocus Dondchadh .H. Fergail da lenmhain, ocus moran do marbadh les dibh; ocus a mharbhadh fein do én orchar t-soigti fa dheoidh.

Uilliam Dalatun, serriam na Midhe, do mharbhadh le Cenel Fiachaid occus la .H. Mailechlaind.

Adam .H. Cianan, sai senchadha, do ecc a Lis Gabhail ina chananach.

Mac an Persun Mic Feorais do marbhadh la Toirrdhealbach Ruadh .H. Conchobhair do en bhuille cloidhimh hi Conmhaicne Duna Moir, des fill do denamh fair doibh, ocus se ag teacht a Conmaicne Cúili; ocus teacht do fein ar los a laimhe laidiri as ocus se beoloiti; ocus Andrias Mac Cinaith do marbhadh doibh des Toirrdhelbaigh Ruaidh da thairbheirt doibh a n-gill re a m-breith fein d'faghbhail doibh as.

Barrdub inghen .H. Ruairc, ben Domhnaill Meg Tighearnan, quieuit.

Gaeth ro mhor in hoc anno, ler brisedh móran do themplaibh.

Kl. Enair for Domnach, ocus noemhadh uathadh fuirri; M.ccc.lxx.quarto; uii. anno cicli lunaris; xii. anno indictionis; xxii. anno cicli solaris.

Senicin Sabhais do marbhadh la Mag Aengusa.

Domhnall Occ .H. Dochartaigh do ecc in hoc anno.

Cu Choigcriche Occ Mac Eochacain, dux Cenel Fiachaidh mic Neill, do marbhadh a fill hi coimhteacht an espaig Faltaig, do laimh an t-Sindaig mic Meran, hi sex Kl. Septimbir; ocus in Sinnach fein do tarraing ocus baill do denamh de iar sin.

Teboit a Burcc, oighri Mic Uilliam, do marbhadh la h-Ibh Maine.

Tighearnan mac Briain Meg Tighearnain, degh mac taisigh, quieuit.

Maidm mor la Niall .H. Neill for Gallaibh, inar tuit in rittiri Rotsich ocus Bocsa na Cairrci, agus an Santalach, ocus in Burcach, ocus Uilliam Baili dalad cenn anfeli Ereann.

Maileachlaind mac Diarmada .H. Fergail mortuus est.

Tadc Og Mag Ragnaill mortuus est.

Tadcc mac Ruaidhri mic Cathail Ruaidh .H. Conchobhair, dagh mhac righ, do ec in hoc anno.

Kl. Enair for Luan, ocus fichedh fuirri; M.ccc.lxx.u.; uiii. anno cicli lunaris; xiii. anno indictionis; xxiii. anno cicli solaris.

Mathghamhain mac Maghnusa .H. Conchubhair quieuit.

Caislen Rosa Coman do thabhairt do Toirrdhealbach Ruadh .H. Conchobhair do Ruaidhri .H. Conchobair, ocus Baile in Tobair d'fagbail as, ocus comtha imdha nach airmther sunda.

Mac Arten, urra Cenel Fagurtaig, do marbhadh a fill do mac Gilli Ternaind.

Maidhm mor do thabhairt ar Gallaibh Dúin Da Leth Ghlas inar marbhadh sir Sémus Baile Atha Tidh, fer inait righ Saxan, agus an Burcach Camlinne, et alii multi.

Cu Uladh Mag Mathghamhna do dol dh'eg do cuislinn.

Art Mac Udhir quieuit.

Dondchadh Caemhanach Mac Murchadha, righ Laighen, do marbhadh do Galloibh a fill.

Diarmaid Mag Raghnaill do dol ar indsaighidh dochom Cormaic .H. Birn, ocus Dondchadh mac Conchobhair an Copan do marbhadh ann, ocus daine imdha aili; ocus moran édála do thabhairt leó.

Toiscc do chuadar da mhac Meg Tighearnan dochom Gall, .i. Cairbre ocus Eogan, ocus fer da muinntir fein do fell forro ocus da reic re Gallaibh do chinn indmusa, ocus Gaill do tinol ina timchell, ocus cóicer ar .xx. do marbhadh ann, ocus a n-di-chennadh fa da mac Meg Tigearnan.

Sir Emand Alpanach .i. mac Uilliam Burc, mortuus est iar m-buaidh n-aithrighe ocus n-ongtha, ocus a mhac ina inad .i. Tomas.

Maeleachlainn .H. Domhnallain, degh fher dana, do ecc don filun.

Cathal mac Cathail Oicc do Clainn Ricaird mortuus est.

Mac Feorais Atha na Righ mortuus est.

Oscur mac Airt Meg Udhir do marbhadh do Cloinn Dondchaidh Meg Udhir.

Sefraidh mac Gilla na Naemh .H. Ferghail, deagh adhbhar taisigh na h-Angaile, in Cristo quieuit.

Kl. Enair for Mairt, ocus aen uathadh fuirri; M.ccc.lxxui.; ix. anno cicli lunaris; xiiii. indictionis; xxiiii. anno cicli solaris.

Tadc .H. Ruairc ri Breifne mortuus est, ocus Tighearnan .H. Ruairc do gabhail righe da éise.

Donnchadh Mac Firbisigh quieuit.

Cuaifne .H. Conchubhair Falgi, mac righ ro mhaith, quieuit.

Ruarcan .H. h-Admaill, ollam .H. Anluain, quieuit.

Eoin .H. Ruanadha, ollamh Meg Aengusa, quieuit.

Mailechlaind .H. Mailmena, ollamh .H. Cathan, mortuus est.

Aedh .H. Tuathail, ri .H. Mail, do marbhadh la Galloibh in hoc anno.

Dalbach mac Maileachlainn .H. Brain, mac righ ro maith, do guin da spor fein, ocus a ecc de.

Conchobar .H. Bechan, sai re senchas, quieuit.

Cellach Mac Cruitin, ollamh Túadhmhumhan re senchas, quieuit.

Roiberd .H. Ferghail quieuit.

Bebinn inghean Domhnaill .H. Dhuinn, ben .H. Dimusaigh, quieuit.

Aedh mac Seoan .H. Fergail. mortuus est.

Kl. Enair for Dardain, ocus aili .x. fuirri; M.ccc. lxxuii.; x. anno cicli lunaris; xu. indictionis; xxu. anno cicli solaris.

Uater mac sir Dabid a Burc mortuus est.

Sefraidh .H. Flannacan, taisech Cloinne Cathail, mortuus est.

Maidm do thabhairt le Mac Con Mara .i. Cu Mara, ocus le Cloinn Culén archena, for Cloinn Ricaird, inar marbhadh Teboit mac Uillic, cend na cethirne mori, ocus tri meic .H. Edin; ocus moran do maithibh Cloinne Ricaird do mharbhadh ocus do gabhail ann fos.

Brian .H. Flaithbheartaigh mortuus est.

Seaan .H. Rodachan, comhorba Caillin, sai Eirenn, mortuus est.

In t-espocc Ua Cellaigh, espocc Chluana Ferta Brenaind, quieuit.

Cocadh mor eidir Ruaidhri .H. Conchubhair ocus Mac Diarmada, ocus Magh Luirg do loscadh eidir forcnemh ocus arbhar, ocus daine do marbhadh eatorra; ocus síth do denamh eatorra fa deoidh, ocus cumhadha mora d'faghbhail do Mac Dhiarmada in a dhighbhail do chind sidha.

Bellum Rosa Coman la Ruaidhri .H. Conchobair for mac Uilliam Burcc, ocus for Maileachlainn .H. Cellaigh, ri .H. Maine, inar marbhadh Risdeard a Burc, agus Domhnall mac Cathail Oicc, ocus Tadc Oc mac Taidc .H. Cellaidh, ocus .H. Mainnín, sai degh enigh daennachtach, ocus Mac Dubhghaill Gallocclach, ocus mac Neill Chaim, et alii multi nobiles et ignobiles.

Edubhard ri Saxan quieuit in Cristo.

Dondchadh mac Uilliam Alaind .H. Cerbhaill, righ Eli, quieuit.

Diarmaid Losc mac Branan, dux Corca Athchlaidh, quieuit isind Róimh.

Fachtna mac Dauid .H. Mordha, adhbhar righ Laighsi, quieuit.

Caislen Lis Aird Abla do denamh la Seoan .H. Ferghail in hoc anno.

Manisteir Esa Ruaidh do loscadh in hoc anno.

Gobhraidh mac Annaidh .H. Raighilligh occisus est o Cloinn in Chaich.

In Decanach Mac Muirgiosa in Cristo quieuit.

Kl. Enair for Aine, ocus treas ficheat fuirri; M.ccc.lxx.uiii.; xi. anno cicli lunaris; primus annus indictionis; xxui. anno cicli solaris.

Toirrdhealbhach Mac Suibhne árd chonstabla Chonnacht,

 Text resumes 1384

Seon mac Giolla Coisceli, maighistir, airchindeach ocus pearsún Airigh Brosca, d'ég.

Ruaidhri mac Toirrdhealbhaigh Ui Chonchubhair, ri Connacht, d'eg don phlaigh chéadna oidchi feli Caitríona banoigi isin ghemhriudh, iar caitheamh .ui. m-bliadhan .x. ocus raithe hi lán rigi Connacht, amhail foirgles an fili, .i. Mailin .H. Mail Chonaire, a n-duain in reme righraidhe: Fuair Ruaidhri righdha an snaithi A sé déag is degh rathi, Ar Chruachan Ai gan irgail, Mac tachar bhorb Toirrdhealbhaidh. Da ri do denamh ina inat iar sin .i. Toirrdhelbhach Ruadh mac Aedha meic Feidhlimidh do rigadh do Mac Diarmada ocus do Chloinn Muircheartaigh Muimhnigh, ocus do thaisechaibh Connacht archena, .i. do thaisechaibh Sila Muiredaigh; ocus Toirrdhelbach Occ mac Aedha mic Toirrdhelbaigh do righadh d'O Chellaigh ocus do Chloinn Ricaird ocus do Domhnall mac Muircheartaigh .H. Conchobair, ocus do Chloinn Dondchaidh; cur fás coccadh coitchend hi Condachtaibh uili iar sin, ocus co n-dernsatar uilcc imdha ocus urtha acus aircne do-aisneis da esi sin.

Pilip .H. Raighilligh quieuit.

Mailir a Burcc do marbhadh do escur.

Eogan .H. Maille ocus Cormac .H. Mailli et alii multi do marbhadh do Mhuinntir Flaithbheartaigh.

Daibhi a Burc quieuit.

Mael Mordha .H. Duibhginnan quieuit.

Pol Mag Tethechan, comorba Cluana, in Cristo quieuit.

Uilliam mac sirr Emainn a Burcc quieuit.

Sefraidh .H. Fergail quieuit.

Mag Raghnaill Dubh .i. Diarmaid mac Maileachlainn, in sár taiseach, sai an eneach ocus an engnamh, do marbhadh per dolum do chloinn Raghnaill Meg Raghnaill, a n-doras tigi Risdard Meg Raghnaill.

Muircheartach .H. Conchobhair, ri .H. Failgi, do écc ina shenoir.

Tomultach Mag Dorchaidh, dux Cenel Luachain, do marbhadh da scin fein ocus se ag cur cru.

Cu Chonnacht .H. Fergail, tighearna Maigi Trega, quieuit.

Donnchadh .H. Dubhda quieuit.

Aedh .H. Cellaigh ocus Feradhach .H. Cellaigh do écc don phláigh an aen sechtmain.

Ualgharg Ua Ruairc, adhbhar righ Breifne, do bhathadh ar Loch Gamna.

Domhnall mac Flaithbheartaigh Ui Ruairc quieuit.

Ricard mac Maidiucc mic Tomin Baret, feicheadh coitchend clú mór do cliaraibh Erend, do écc iar m-buaidh n-aithrighe.

Uguistín .H. Duibhginnan, ollamh Conmaicne re senchas, quieuit.

Seaan a Burc do écc don phlaigh in hoc anno.

Kl. Enair for Domhnach, ocus x. madh uathadh fuirri; M.ccc.lxxx.u.; xuiii. anno cicli lunaris; octauo anno indictionis; u. anno cicli solaris.

Art mac Airt Mhoir Ui Maileachlainn quieuit i pridh callain Mai.

Sluaghadh la Mac Donnchaidh ocus le h-Ua Ruairc cona sochraiti galloglach maraen riu a Magh Luirg, cur loiscedh leó longphurt Mic Diarmada ocus in chrich uili, ocus cur marbhadh leo a tóraigheacht an t-sluaigh sin Mac Seoan .H. h-Eghrai, ocus a bhrathair eli do ghabhail.

Indsaighidh la cloinn mic Feidhlimidh ar Mag Oreachtaigh, ocus in baili do loscadh leó, ocus daine do marbhadh ann, ocus Mag Oreachtaigh fein do gabhail doibh iar sin.

Daibhid mac Emainn mic Hoiberd do gabhail la h-Aedh .H. Conchobhair, agus a ecc a m-Bali in Tobair isin lamhdichas sin.

Indsaighidh la Feidhlimidh Cléireach .H. Conchobhair ocus la Conchobhar Occ Mac Diarmada, a Tir Oiliella, agus rabti iomdha do dol rompa ocus orcill do bheit ar a cinn, ocus gres do denamh doibh, ocus ceithirnn ocus marc slúagh na foraire da freagra, ocus siat oc marbhadh bó ocus dáine, ocus Cathal Cairbrech Mac Dondchaidh do marbhadh annsin, ocus Conchubhar Mac Diarmada do gabhail, ocus Feidhlimidh .H. Conchubhair do lott andsin.

Indsaighidh aili la Muircheartach mac Cathail, ocus le Cormac mac Ruaidhri, ocus la Tadc Mac n-Diarmada, ocus le Cathal Mac n-Diarmada, for Mag Raghnaill Ruadh ocus ar Aedh .H. Conchobhair, ocus a n-gabhail dibhlinaibh, ocus a m-breith ar Charraig Locha Cé da comed.

Cathal .H. Fergail, dagh adhbhar taoisigh na h-Anghaile, quieuit.

Cu Muighi Ua Cathan, ri Oireachta .H. Cathan, quieuit fo rind n-airmhe.

Mor indsaighidh le h-Ua Conchobhar Ruadh ocus le Macc n-Diarmada, ocus le Cloinn Muircheartaigh, ocus le taisechaibh Connacht, ar mac Emaind .H. Cellaigh, ocus baile mic Emaind do loscadh doibh, ocus moran do mhilleadh doibh; agus Uilliam Buidi Ua Neachtain do marbhadh doibh.

Breifnigh ocus Oileallaigh do theacht i conne .H. Conchobhair Duinn, ocus Corca Athchlann do loscadh doibh, ocus a guirt do gerradh uile.

Tir Fiachrach do loscadh le mac Uilliam Burc, ocus a dol assidhe co Sliccech, ocus Cairbri fos do loscadh leo, ocus Slicech; ocus Maidecc Mael do marbhadh ime ocus braighdi do gabhail imme.

Tir Amhalgaidh do loscadh le Domhnall mac Muirchertaigh, ocus daine do marbhadh, ocus braigdi do thabhairt lais ocus edala mora.

Maidm mor la Murchadh .H. Conchobhair, ri .H. Failgi, ocus la Cenel Fiachaidh mic Neill, for Galloibh na Midhe hi tochar Cruachan Bri Eli, inar marbhadh in Seomrach ocus a mhac, ocus in t-Uindsionnach na Midhe, et alii multi nobiles et ignobiles.

Tanaide Ua Mael Chonaire, ollamh sila Muiredhaigh Muillethain re senchus ocus re filidheacht, ocus int-í do bo treisi ar a ollamhnacht féin do bhi an Erind ana aimsir fein, do ecc ina tig fein iar m-buaidh ongtha ocus aithrighe fo Lughnasa, ocus a adhlacadh a Cluain Carpthi.

Eoin mac Eogain mic Gilla Pedair do marbhadh la Cathal .H. Conchobair ar greis i m-baile .H. Domhnallain. Sith do denamh do Chonnachtaibh iaramh, ocus Síl Muiredhaigh do roind ar dó eidir in dá .H. Conchobhair sin, ocus Aedh .H. Conchobhair ocus Conchobhar Mac Diarmada do lecen amach.

Derborgall, inghean Chathail Óicc, ben .H. Chonchobhair Ruaidh, quieuit do lamnad.

Benmidi inghean Meg Mathgamhna, bean .H. Neill, quieuit.

Kl. Enair for Luan, ocus aen fichit fuirri; M.ccc.lxxxui.; xix. anno cicli lunaris; ix. anno indictionis; ui. anno cicli solaris.

Aine, inghean Taidhg Mic Donnchaidh, uxor Tighearnain .H. Ruairc, ri Breifne, aen rogha ban Leithe Cuind, do écc a Túaim Senchaid oc Loch Findmaigi, ocus a h-adhlacadh a Slicech iar sin.

Carbri mac Briain mic Murchaidh .H. Fergail, tighearna Chalaidh na h-Angaile, mortuus est.

Niall mac Con Chocriche Oicc Mec Eochacain do marbhadh la Dalatunchaibh in .xuii. Kl. Mai; ocus do bo degh adhbhar taisigh for a dhuthaigh fein in fer sin.

Magnus mac Aedha Mic Díarmada do marbhadh las in muintir ceadhna sin.

Ua Conchobhair Ruadh do dol do chungnamh la mac Uilliam Burc, ocus a fuair do Chonnachtaibh leis, a n-adhaigh Domhnaill mic Muircheartaigh ocus Cloinne Dondchaidh, ocus crecha mora do thabairt a Tir Fiachrach Muaidhe, ocus dol doibh iar sin a crich Cloinne Ricaird for creachruathar, ocus sluagh dí-armidhe do breith forra fa .H. m-Briain ocus im mac Uilliam Cloinne Ricaird. Ua Conchobhair Ruadh do impodh friú, ocus maidhm do thabhairt forro, ocus Conchobhar mac Taidhc mic Conchobhair .H. Bhriain do marbhadh ann, et alii multi.

Kl. Enair for Mairt, aili uathadh fuirri; M.ccc. lxxx.uii.; primus annus cicli lunaris; x. indictionis; uii. annus cicli solaris.

Sadhbh, inghen Aedha Ui Neill, ben mic Eoin Bised, ocus ben dob ferr ar sliocht Neill Nai Gíallaigh, in Cristo quieuit.

Mac Uilliam Cloinne Ricaird .i. Ricard Occ, quieuit.

Ruaidhri .H. Cíanan, ollamh Orgiall re senchas, mortuus est.

Conchubhar mac Briain Charraigh .H. Neill do mharbhadh la muintir in t-Srát Baile.

Uilliam mac Díarmada Meg Raghnaill, adhbhar taoisigh Muintire h-Eolais, do marbhadh la Muintir Birnn.

Kl. Enair for Ceadain, ocus treas dég fuirri; M.ccc.lxxx.uiii.

Cormac Mac Dondchaidh, righdamhna Tire h-Oilella, do dol for creich oidchi i Magh Luirg, ocus creacha mora do gabhail do, ocus a cor a n-dítin dó; ocus .H. Conchobhair Rúadh ocus Clann mic Feidhlimidh, ocus clann Cathail Oicc .H. Conchobhair, ocus clann Aedha Micc Diarmada .i. Cathal occus Cormac, ocus moran do lucht an tire o sin amach da lenmhain hi tóraighecht na creach, ocus Cormac do gabhail deridh a mhuintiri fein, ocus nar gabh anacal uathaib cor bo h-ecen a mharbhadh fa dheoidh; agus Conchobar Mac Donnchaidh, ocus Murchadh mac Cormaic Mic Donnchaidh, ocus Mac Diarmada Ruadh do ghabhail and; ocus nir mo écht mic righ da n-dernadh an Erinn uile ina sin. Agus .H. Conchobhair Ruadh da lenmhain dar sliabh sís, ocus Clann Dondchaidh do teicheadh fa Cúl Mail ocus fo ichtar Tire h-Oiliolla.

Muircheartach mac Domhnaill .H. Conchubhair do dol fa foslongphurt .H. Domhnaill a manisteir Esa Ruaidh, ocus daine imdai do marbhadh and fa chloinn .H. Baighill, agus fa Ua n-Gallchubhair cona braithribh. Eich ocus daine do thabhairt do leis, ocus Mac Subhne ocus a mhac do gabhail and.

Seaan Ruadh .H. Tuathail, ri .H. Muiredhaigh, fegi enigh ocus engnamha Erenn ina aimsir fein, do marbhadh do bhodach ina thigh fein, ocus an bodach fein do mharbhadh do-samh iaramh.

Sigraidh Ua Curnín ocus Cairpre .H. Cuirnín do mharbhadh do Gallaibh Laighean.

Creacha mora do denamh d'O Chonchubhar Ruadh ar .H. Conchobhair n-Donn, ocus coccadh mór coitchend do ergi hi Connachtaibh uili trit sin.

Cu Coiccriche Ua Mail Muaidh, rig Fer Cell, quieuit in septimo Kalendas Martii.

Tinnscna cocaidh eidir .H. Ruairc ocus Clann Dondchaidh in hoc anno.

Kl. Enair for Aine, ocus cethramad .xx. fuirri; M.ccc.lxxx.ix.; iii. anno cicli lunaris; xii. anno indictionis; ix. anno cicli solaris.

Ua Ruairc do thabhairt cloinne Cathail Óicc chuici iar sin, ocus in cocadh do ergi co h-arrachta iar sin. Eogan .H. Ruairc ocus clann Chathail Óicc do dol co Caislen in n-Uabhair, ocus marcshluagh Muintire h-Elidhe d'erge doibh, ocus ruaig do thabhairt forro, ocus mac O n-Eilidhi do marbhadh doibh im Magnus O n-Eilidhe. Crecha Muintire h-Eilidhi do denamh d'U Ruairc ocus do chloinn Chathail Óicc. Muircheartach O h-Eilidhi do marbhadh ar in coccadh sin. Magnus Ua Ruairc do gabhail per dolum do Chormac O Fhergail. Síth do denam d'U Ruairc agus do Domhnall mac Muirchertaigh, ocus do Chloinn Donnchaidh dibhlinaibh.

Sith eli do dhenamh do Chloinn Donnchaidh occus do Mac Díarmada. Conchobhar Mac Dondchaidh ocus Murchad mac Cormac do leigean amach iar sin.

Maileachlainn Cam O Lochlaind, ri Chorcumdrúadh, do marbhadh da bhraithribh fein a fill.

Cathal Mac Diarmada do gabhail do Mhac Dondchaidh, ocus cos Chathail do bhrisedh, ocus a leiccin amach a comhfhuaslacadh isin t-sídh sin.

Muiris Maol Ua Conchobhair Fhailghi do marbhadh d'urchur t-shoighde le Fer d'Ibh Cellaigh Leige.

Mac Neill .H. Ruairc quieuit.

Creacha Muintire Duirnin do denamh do Mac Enri I Neill ar Monteach Moigi Heni in hoc anno.

Creacha Tire Conaill do denamh do Domhnall mac Muircheartaigh.

Raghnall mag Ruairc, flaith Tellaigh Conmusa, quieuit in Cristo.

Brian mac Domhnaill Oicc .H. Ruairc do mharbhadh do Cloinn Mhuircheartuigh.

Niall Occ O Neill do ghabhail la Gallaibh in hoc anno.

Kl. Enair for Satharnn, ocus seisidh uathadh fuirri; M.ccc.xc.; iiii. anno cicli lunaris; xxiii. anno indictionis; x. anno cicli solaris.

Coccadh mór eidir Ua Ruairc ocus Ua Raighillidh, ocus Angailigh ocus Eolusaigh, ocus Tellach Dunchadha, ocus Clann Mhuircheartaigh do teacht fo thoghairm an chogaidh sin tre seoladh Domhnaill mhic Mhuircheartaigh occus Tomoltaigh Mic Dundchaidh.

Magnus .H. Ruairc do bhi ag .H. Raighillidh a Cloich Locha h-Uachtair, élodh do esti, ocus dol co caislen Locha in Scuir, ocus Clann Muircheartaigh d'fagbhail braith air, ocus a mharbhadh doibh ag teacht as a choiti.

Brian mac Uilliam mic Branan occisus est .u. oidhchi ria samhfuin.

Sidh do denamh d'O Ruairc ocus d'Ua Raighilligh, ocus comtha mora d'faghbail d'O Raighilligh o .H. Ruairc do chinn a námhad accus a escarad do treccadh d'O Raighilligh, ocus d'innarbad uadha; ocus Eoghan Ua Ruairc ocus mac Cathail Riabhaigh do thabhairt a n-gell riu sin.

Clann Muircheartaigh ocus Tellach Dunchadha do denamh imirci neirt ar Muintir Ruairc fa Fidh na Finnoige, ocus fa Sliabh Chorran, ocus fa Chenel Luachain; ocus a fis sin d'fagbhail d'O Ruairc ocus se a n-Glinn Gabhli, ocus a imircecha do bhreith les fo barr Chenel Luachain, ocus innsaighidh chrodha choscurach do denamh d'O Ruaircc ar na righ cubhrinnaibh sin, ocus maidhm do thabhairt forro, ocus marbhadh do bheth ar an ellaighibh o Bheol Atha Dairi Dubthaigh co mullach na tulaighib m-Breifnech.

Tomas mac Mathghamhna .H. Raighilligh quieuit isin foghmhar da esi.

Ferghal .H. h-Eghra, ri Lugne, mortuus est.

Sean Ua Raighillidh do righadh. Caislen Chille Barrfinne do brisedh le Domhnall mac Muircheartaigh.

Brian mac Aedhacan, ollamh breitheman na Breifne, mortuus est.

Seaan Oifistel mac Aedhacan, fer a inaitt fein dob ferr ina aimsir, do marbhadh ceithre h-oidhchi ria nodluicc; ocus ni feidir cia ros-marbh.

Diarmaid mag Carmaicc occisus est.

Duibhginn Ua Duibhginnan, ollamh Conmaicne re senchus, quieuit.

Kl. Enair for Domhnach, ocus .ui.x. fuirri; M.ccc.xc. primo; u. anno cicli lunaris; xiiii. indictionis; xi. cicli solaris.

Diarmaid mac Dondchaidh mic Muircheartaigh Moir Mec Eochacan, dux Cenel Fiachaidh mic Neill, quieuit a prid id Enair.

Sidh do denamh d'Ua Ruairc ocus d'O Raighillidh, ocus Ua Ruairc do dol co Druim Lethan i coinne Uí Raigillidh becan da lucht tigi budhein, ocus coiger ar tri fichit do Chloinn Muircheartaigh do dol remhe ar belach, ocus Ua Ruairc d'indsaighidh an bhelaigh, ocus Seaan Mór mac mic na Ban-Fidigide do dol i coinne .H. Ruairc le buille slegi, ocus .H. Ruairc do dol da fhreasdal ocus da fhrithaladh, ocus a mharbhadh co h-ollamh athlomh d'aen builli sleghi, ocus buille aile do thabhairt dó ar Dondchadh mac Aedha in Cletigh, ocus a mharbhadh beos; ocus Tomas O Gaithin do chomhmaidhemh leis beos; ocus a imtheacht féin imslan cona mhuinntir co crodha coscurach, iar comhmaidhemh cethrair don chethirn.

Domhnall mag Carthaigh, ri Desmumhan, do ég iar n-aithrighe.

Mac Gilla Muire, ri Ua n-Derca Cein, occisus est a suis.

Ua h-Anluain, ri na n-Orther, do mharbhad per dolum o a braithribh féin.

Tadhc mac Gilla Choluim Ui Uigind, ocus Bebinn inghean Ui Mail Chonaire, ollamh dingbhala re dán ocus re daennacht, do eg iar n-aithrighe móir.

Kl. Enair for Luan, ocus secht .xx. fuirri; M.ccc.xcii.; sexto anno cicli lunaris; xu. anno indictionis; xii. anno cicli solaris.

Ard-espog Connacht .i. Grigoir Ua Mochan, sai craibhdheach clerchemhuil, quieuit in Cristo.

Enri Amhreid, per antiphrasim, mac Néill Mhóir .H. Neill, righdhamhna h-Erend de iure, ocus adhbhar righ Uladh can amhuras dia mairedh, ocus fer do ba mo duas ocus tidhnacal ocus tarbheartus tainicc ar slicht Neill mic Echaidh Muighmeadhoin, ocus fer ro po inganta ocus ro bo t-saebhnosaidhe einech uair eli, mortuus est in bono fine im feil Brenaind.

Cundais Desmumhan .i. inghean iarla Urmhumhan, ben dérceach degh einich, quieuit.

Donnchadh Ua Dimusaigh quieuit.

Morsluaghadh la Ua Conchubhair n-Donn ocus la h-urmhor Connacht lais, a n-Ibh Maine, ocus in crich do loscadh leó, ocus Cathal mac Aedha .H. Ruairc do fagbhail co h-anordaigthe ardeireadh an t-sluaigh, ocus a ghabhail le h-Ua Conchobhair Ruadh, ocus araile do marbhadh dibh.

Domhnall mac Enri Ui Néill do gabhail le Toirrdhealbach Ua n-Domhnaill, ocus creacha aidhble ocus urtha do denamh dó an la céadna air mac Enri.

Morsluaghadh la Niall .H. Néill for Gallaibh an t-Srat Bhaile, agus Sefín Fait do marbhadh ann don dola sin.

Toirrdhealbhach mac Briain Ua Cuanach mortuus est.

Findghuala inghean Maghnusa mic Cathail .H. Chonchubhair quieuit.

Ruaidhri mac Dondchaidh .H. Cherbhaill, righdamhna Eli, quieuit.

Etain inghean Sefraidh .H. Flannacan, uxor Uilliam mic Branan, quieuit im feil Cros.

Kl. Enair for Cedain, ocus ochtmadh uathad fuirri; M.ccc.xciii.; uii. cicli lunaris; i. anno indictionis; xiii. anno cicli solaris.

Aedh mac Conchubhair Mic Diarmada, ri Moigi Luirg, fer lan do cech uili maith, do ecc iar m-buaidh n-aithrighe, ocus a mhac .i. Cathal Mac Diarmada, do bathadh ar Loch Doiri iaramh.

Emann mac Mailechlainn Meg Radhnaill, damhna taoisigh Muintire h-Eolais, mortuus est.

Mael Ruanaidh mac Ferghail Mic Diarmada do righadh for Magh Luirg le neart Tomaltaigh Mic Dondchaidh, ocus indsaighidh do dénamh do cloinn Aedha Mic Diarmada co Cluain .H. Coinden isin caladh Lochae Deichet, ar Mac n-Diarmada, ocus bualadh do thabhairt doibh di araili; ocus briseadh ar Cloinn Aedha annsin, ocus Tomultach Dubh mac Diarmada do mharbhadh ann sin, ocus Conchubhar mac Diarmada, ocus Ruaidhri a bhrathair do gabhail ann, ocus Fergal mac Dondchaidh Riabhaigh do gabhail and, agus a élodh iaramh; ocus moran eli do gabhail ann.

Brian .H. Cellaidh, righdamhna Ua Maine, mortuus est isin errach cedna sin.

Ferghal Mag Samhradhain, dux Tellaich Echdhach, ocus fer do comhmoladh le cliaraibh Eireann ocus le crosanaibh in fer sin, eidir chaisc agus beltaine.

Seaan mac Sefraidh Ui Raighillidh, easpocc na Breifne, in Cristo quieuit.

Sith do denamh do lucht Moighi Luirg isin t-samhradh sin fa roind tire ocus comhfuaslacadh bragat.

Raghnailt, inghean mic Feidhlimidh .H. Conchobhair, quieuit.

Dub Dara Ua Mailli mortuus est.

Magnus Ua h-Eghra, adhbhar righ Luigne, quieuit.

Mac Emaind Ui Cellaigh quieuit.

Muiris Cam mac Ruaidhri meg Eochacan mortuus est in Noiuimber, ocus Brian macc Uilliam Oicc meg Eochacan mortuus est; in .ui. nonas Octobris quieuit.

Edaoin inghean Chathail Oig Ui Chonchubhair, bean Bhríain mic Maileachlainn Ui Cheallaidh, Domhnall ocus Emann, da mhac Maoileachlainn Ui Cheallaigh, ocus Diarmaid Ua Flannagan, ádhbhar taoisich Tuaithe Rátha, do ecc.

Mainistir Chille h-Achaidh in easpucoideacht Chille Dara do dheanamh do bhraithribh san Fransias la h-Ua Conchubhair b-Fhailghe.

MS resumes at 1398. Tomas mac Muirgheasa mic Donnchaidh, epscop Achadh Conaire, do ecc.

Cogadh mór do eirghidh eidir Ua Néill .i. Niall Óg, ocus O Domhnaill, Toirrdhealbhach; ocus a tháoiseachaibh ocus a oireacht do thréigedh Ui Dhomhnaill, go m-búi a c-cumhga mhóir ag cloinn Enri Ui Neill, ag cloinn t-Seain Ui Dhomhnaill, ag Ua n-Dochartaigh, ocus ag Cloinn t-Suibhne. Do chóidh mac Ui Dhomhnaill, Niall Garbh, ocus clann Domhnaill mic Néill Ui Domnaill, for ionnsaighidh i Fánait, gurro gabhadh leo Eoin mac Maol Muire mic Suibhne, ocus co n-déarnsat orgain.

Goill ocus Gaoidheal chóigidh Uladh do dhol i teach Ui Neill, ocus braighde ocus umla do thabhairt dó cenmothá O Domhnaill a aenar.

Morsluaghadh la Niall Occ .H. Neill, airdri coicedh Conchubhair, a tir Conaill Gulbain mic Neill, co rancadar a sirthi co Sid Aedha uas Es Ruaidh mic Badhairn, ocus ro aircidar manistir Esa Ruaidh fo na h-uile innmus don turas sin, ocus drong do mhuinntir .H. Domhnaill do thabhairt tachair don t-sluagh, ocus daine do mharbhadh ocus do bhascadh ann sin; acus Aedh mac mic Fergail Ruaidh do gabhail la h-Eoghanchaibh, ocus a n-imtheacht fein slan dia tigibh.

Sluaighedh la Tomas a Burc, tighearna Gall Connacht, ocus la Toirrdhealbach Ruadh .H. Conchubhair, tighearna Gaidhel Connacht, ocus la Feidhlimidh mac Cathail Oicc .H. Conchubhair cona bhraithrichaibh, ocus la Ruaidhri Ua n-Dubhda cona bhraithrechaibh, ocus la Tadhg Ua n-Eghra cona choimhthinol ocus cona bhraithrechaibh, a Tir n-Oiliolla, cur milledh leo an tir uile eidir fér ocus arbhar, eidir loch ocus cill, ocus duntibh ocus dinngnaibh ocus drobhelaibh rl.

Conchubhar Occ mac Aedha mic Diarmada ocus a bhraithrichaibh do teacht a Magh Luirg; agus Mael Ruanaigh Mac Diarmada, rex Moigi Luirg, do dol an oidchi sin co manistir na Búille, ocus a fuair se do bhíadh a mainister na Buille do chor ar carruic Locha Cé dó. Agus lorg na fedhna sin d'fagbhail dó Chonchobhar cona mhuintir, ocus an lorg do leanmhain doibh co h-Echdruim mic n-Aedha a Tir Ua m-Briuin na Sinna, ocus tempoll Echdroma do loscadh forra, ocus Conchobar mac Ferghail Mic Diarmada do marbhadh ann, ocus Mael Ruanaidh Mac Diarmada do gabhail ann, ocus moran da mhuintir do marbhadh ann; ocus a n-eich ocus a n-etidh do bein dibh.

Sluaghadh la Muircheartach mac n-Domhnaill .H. Conchubhair i Tír Aedha Ruaidh mic Badhuirnn dochum .H. Domhnaill, ocus ni rucsat ar edáil ann, ocus a n-impodh iar sin. Agus Aedh Ua Duirnin da lenmhain a toraigheacht, ocus imrúagad do thabhairt doibh a m-Beol Atha Senaigh, ocus ech Aedha do lot ocus a escar fein di, ocus tiugh an t-sluaigh do loighi air, ocus a mharbhadh la Cloinn Dondchaidh; ocus Seon mac Muiredhaigh Ruaidh do mharbhadh ar in tóraigheacht sin.

Loch Farbach do gabhail la Ruaidhri mac Aedha mic Diarmada, la righdamhna Moighi Luirg, ocus ni deochaid a comhairemh a frith d'édail air.

Murchadh Bán mac Seain mic Domhnaill .H. Fergail, an mac righ taisigh is ferr boi an Eirinn ina aimsir fein, mortuus est mí ria nodluicc mór, do bhás ola ocus ongtha ocus aithrighe, et sepultus est a manistir Leathratha a lebaidh a athar ocus a sheanathar.

Muiris mac Piarruis Dalatun occisus est la Muircheartach Occ mac Eochacan, ocus la Brian mac .H. Chonchobhair Failgi.

Glend Da Locha do loscadh la Saxanchaibh ocus le Gallaibh h-Eirend isin t-samhradh sin aridhise.

Domhnall .H. Nuallan occisus est o Galloibh in hoc anno.

Ua Briain Mael mortuus est.

Pilip mac Mathgamhna Duinn .H. Cennedigh mortuus est.

Semus mac Emaind .H. Cendedigh quieuit.

Mac Diarmada Seirbh I Briain mortuus est.

Uater mac Daibhid a Burcc do marbhadh la Gallaibh na Mumhan.

Geralt .H. Brain, ri Ua Faelan, quieuit.

Maelechlaind Ua Mordha, ri Laigsi, mortuus est.

Tomas mac Cathail, mic Murchadha .H. Fergail, do marbhadh la Gallaibh na Midhe isin Chaillin Chrubach, ocus do thadhaill an Tomas sin tighearnas na h-Angaile i n-aghaidh t-Seoain mic Briain mic Murchaidh, cen cor cóir dol a n-aghaidh an t-sinsir bhrathar maith.

Maidhm mor la Mag Carrthaigh Cairprech for Uibh Súillibhan, ocus Ua Suillibhan Calbus do marbhadh ann, ocus dá mac .H. Suillibhan Moir .i. Eogan ocus Conchobar Buidhe, et alii multi.

Muircheartach Occ mag Aengusa occisus est o a bhraithrechaibh budhéin.

Mor indsaighidh la mac Uilliam Burc ocus la cloinn Chathail Oicc for Sligech, ocus in baile do loscadh ocus do lomargain doibh.

Cing Risderd, ri Saxan, do theacht a n-Erind in hoc anno, ocus Art Mac Murchadha, rí Laighen, do bheith a namhneart mor on righ ocus o Saxanchaibh archeana.

Mac Murchadha do dol ar indsaighidh, ocus Gaill Laighen ocus na Midhe do breith fair, agus móran do sluagh Saxan occus ceitherna congbhala Mic Murchadha do marbhadh ann, im clainn Donnchadha .H. Duinn .i. Cerbhall ocus Eoghan, co maithibh a muintire maille riu, ocus Uilliam mac Cerbhaill mic Gilla Padruicc, ocus mac Diarmada Ruaidh Mic Gilla Padruicc, do marbhadh ann beoss.

Sluaghadh la .H. Conchobhair Ruadh, ocus la Conchubhar Mac n-Diarmada, ri Moigi Luirg, i Tír n-Oilella, co rancadar a scemhealta co Magh Tuiredh na Fomhorach, ocus airgni mora do gabhail doibh; ocus a tabhairt fo choilltibh Conchubhair, ocus a cethirn congbhala ocus glaslaithi do imtheacht le na n-edalaibh, ocus .H. Conchobair ocus Mac Diarmada, ocus Somhairle Buidhe mac Marcusa mic Domhnaill, consabla Mic Diarmada, do facbhail da muinntir fein ind uathadh slúaigh. Muircheartach mac Domnaill, ocus Mael Ruanaidh Mac Donnchaidh, ri Tíre h-Oilella, do breith forro cona sochraidi dibhlinaibh i Cnucc in Cromai, ocus a madhmachadh annside, ocus Somhairle Buidhe cona mhuinntir do marbhadh i Cnucc in Croma, ocus lamh des .H. Conchobhair do chreachtnughadh co mór d'aithius aen orchuir for in sluaghadh sin.

Mac Muiris Buidhe .H. Mordha, droched dámh ocus deoraidh Erend, tighearna Sleibhe Mairg, mortuus est.

Art Cam Ua Faelan quieuit.

Ingen Briain .H. Ferghail, uxor Uulpis, quieuit.

Findguala inghean Cathail Ui Madadhan, mortua est.

Pláigh mhór in hoc anno.

Kl. Enair for Cedaoin ocus cethar .x. fuirri; M.ccc.xc.ix.; xiii. anno cicli lunaris; uii. indictionis; xix. cicli solaris.

Brian .H. Briain, ri Tuadhmumhan, tuile ordain ocus airechais na h-Erend uile, do ecc iar m-breith buadha o doman ocus o demhan in hoc anno; agus Toirrdhealbhach mac Murchaidh .H. Briain, lettroman Tuadhmhumhan, do eg.

Aedh .H. Dondchadha, ri Eoghanachta Locha Lein, quieuit.

Gilla na Naemh Mac Aedhacan, ollamh oirthear Mumhan re breitheamhnas, ocus Baethghalach Mac Aedhacan, ollamh breithemhan .H. Fiachrach ocus .H. n-Amhalgaidh, mortui sunt.

Toirrdhealbach mac Mail Muire mic Suibhne, tighearna Fanatt, quieuit.

Cu Uladh Ua Neill .i. mac Neill .H. Neill, feicheadh coitchend d'ecsibh Erend, quieuit.

Feidhlimidh mac Cathail .H. Conchubhair, righdamhna .H. Falgi, mortuus est.

Seoan mac Briain mic Murchaidh .H. Ferghail, taoiseach na h-Angaile, do ecc, accus Domhnall mac Seain .H. Ferghail ina inat.

Hanri Mer mac Uatin, tighearna Tire h-Amhalgaidh, quieuit in Cristo.

Domhnall mac Gilla Isa Ruaidh Ui Raighillidh quieuit.

Diarmaid mac Aedha mic Fedhlimidh .H. Conchobair, degh ádhbhar righ Connacht, quieuit.

Mac Eochadha Eolach, ollamh na Caemhanach re dan, ocus feichedh coitchend d'feraibh Erend, do ecc iar m-buaidh n-aithrighe.

Primhfhaidh Arda Macha, .i. in Coltunach, in Cristo quieuit.

Tadc .H. Cerbhaill, ri Eli, do gabhail la h-Iarla Urmhumhan in hoc anno.

Cormac Ua Curnin, adhbhar ollamhan na Breifne, do ecc in hoc anno.

Domhnall Ruadh mac Sigraigh .H. Curnin, adhbhar ollamhan na Breifne, do ecc don plaigh in hoc anno.

Morsluaghadh la mac Uilliam Burc ocus le cloinn Cathail Oicc, ocus le cloinn .H. Cellaidh, a Cairpri, acus Ruaidhri mac Domhnaill mic Flaithbheartaigh .H. Ruairc do marbhadh leo don turas sin, ocus echta imda eli nach arimther sunn.

Kl. Enair for Dardain, ocus cuicid ficheat fuirri; M.cccc.; xiiii. cicli lunaris; uitid; xx. anno cicli solaris.

Aedh .H. Mail Muaidh, rex Fer Cell, quieuit xiiii. Kl. Febra.

Laignech mac Ferghail Ruaidh mic Donnchaidh meg Eochacain quieuit a teirt id Septimbir.

Risdard mac Feorais cum aliis do marbhadh a fill a tigh espoicc na Midhe .ix. callaind Iuil.

Dondchadh Sinnach, tighearna Muintire Tadcain, ocus ri Fer Tethbha de iure, quieuit.

Diarmaid ocus Brian, da mac .H. Catharnaigh mic an t-Sinnaigh, quieuerunt i Kallainn August.

Caislen Duin Imdain do gabhail do Mac an Abaidh .H. Conchubhair, ocus Hoberd mac Emaind mic Hoberd a Burc do mharbhadh ann, ocus mac mic Emaind .H. Cellaigh do bhi a lamhdechus and do lecen as dó.

Grigoir mac Tanaidhe .H. Mael Chonaire, adhbhar ollamhan t-Sila Muiredhaigh Muillethain, ocus sai foirbhthi ina cheird budhéin, do marbhadh go tubaistech do en bhuille gai do laimh Uilliam Ghairbh mic Daibhid for tochar Duin Imdain and amhricht, ocus tucadh se ba agus ui. xxit bo ina ericc.

Sadhbh ingean Taidc mic Dondchaidh quieuit.

Ruaidhri mac Airt Meg Aengusa do marbhadh le cloinn Con Uladh .H. Neill, occus la Cathbarr mag Aengusa in hoc anno.

Simon .H. Trebhair, airchidechan Cille Forga, quieuit.

Tomas O Curnin, ollamh fer m-Breifne, quieuit.

Creach mor la cloinn sir Daibhid for Niall Mor .H. n-Uiginn, ocus Dia do denamh indigti forra ind oidchi sin .i. ár ádhbhal do thabhairt forra o h-uachd na h-aidchi.

Seaan .H. Raighillidh .i. mac Pilip .H. Raighillidh, ri na Breifne Thoir, quieuit do bidcc.

Domhnall Ard .H. Dubhidhir do marbhadh la Gallaibh in hoc anno.

Cogadh mór eidir clainn t-Seaain .H. Domhnaill ocus .H. Domhnaill fein.

Sluaghadh mor la Niall .H. Neill a Tir Conaill, cor mhill mor d'arbhar an tire. Eich ocus daine do bhuain de.

Clann Flaithbheartaigh .H. Ruairc do indarbadh asin Bhreifne amach.

Gilla Isa mac Anrigh do righadh isin Breifne, ocus a ecc a cinn mís.

Mac righ Saxan do theacht an Erind in hoc anno.

Muiris mac mic Iarla Desmumhan do ecc don pláigh.

Tadc .H. Cerbhaill do elodh on iarla a Belach Gabhrain.

Mac Mic in Milidh, tighearna na Stondunach, occisus est o Uilliam a Burcc.

Mac Maghnusa meg Uidir, brughaidh d'feraibh Erenn, do ecc do bidcc.

Mailechlaind mac an ardespoicc .H. Cellaigh do ecc don galar brecc.

Crech mor do denamh do chlainn Flaithbheartaigh ar Ua Ruairc.

Creach do denamh do Tighearnan .H. Ruairc ar Ua Maela Duin Luirg, occus .H. Domhnaill do breith fair, ocus in creach do thabhairt uadha ar ecin.

Findguala, inghen Chathail mic Aedha Breifnigh, ben Mic Suibhne Fanat, quieuit.

Diarmaid mac Muircheartaigh Ruaidh .H. Birn obiit .uii. idus Maii.

Kl. Enair for Satharnn, ocus ui.edh uathadh fuirri; M.cccc. primo; xu. cicli lunaris; ix. anno indictionis; xxi. cicli solaris.

Maelechlaind .H. Cellaidh, ri .H. Maine, fer lan d'enech, ocus d'engnumh, ocus do thréidibh in tighearnais, do ecc iar m-breith buadha o deman ocus o domhan.

Tomas mac Emaind Albanaich .i. mac Uilliam Burc, tighearna Gall Connacht ocus moran da Gaidhelaibh, mortuus est in hoc anno.

Conchubhar .H. Maileachlainn, rex Midie de iure, quieuit a teirt callainn April isin Letinnse Muigi h-Elli in bona fine.

Muircheartach Occ mac Muircheartaigh Móir meg Eochacan, do marbhadh i teirt noin Octimbir i m-Beol Atha Impir do en urchur gai, la Geroitt mac Roberd Dalatun, i comhescur oidchi, des a mhuintiri do chur uad ar indsaighidh isin m-Brenadh Muinntiri Gillgan.

Domhnall mac Teboit .H. Mail Muaidh, adhbhar righ Fer Cell, interfectus est in Almhain Laighen o Galloibh, in pridie idus Maii.

Gilla na Naemh mac Aedhacan, ollamh breitheamhan .H. Failgi ocus Cenel Fiachaidh, quieuit.

Teboid Buidi .H. Mail Muaidh do marbhadh i Cill Cruimthir Fiachrach i teirt callaind Octobir la clainn Airt .H. Mailechlaind.

Cathal Ruadh mag Raghnaill, dux Muinntire h-Eolais, do marbhadh a n-Druim Cubra le Sefraidh mac Maileachlaind meg Raghnaill, hi cind mís d'errach .i. hi quint noin Martai.

Mael Ruanaigh mac Cathail Ruaidh meg Raghnaill do marbhadh la cloind Maeleachlainn meg Raghnaill in bhliadhain cedna, a lurg a chreiche.

Da mac Uilliam do denamh tar éis Tomais a Burc .i. mac Uilliam do denamh d'Uillec mac Ricaird Oicc, ocus mac Uilliam eli do denamh do Uater mac Tomais a Burc, ocus a credemhain do mac Uilliam cloinne Ricaird ar sindsirecht.

Conchobhar Anabaidh Ua Cellaigh do rigadh a n-inat a athar féin.

Domhnall Ua Maille, ri Umhaill, do ecc in hoc anno.

Cormac mac Diarmada mic Branan occisus est per dolum la Conchobar mac Seain mic Branan.

Ar dimor la h-Art mac Airt, ri Laighen, for chundae Lochai Garman in hoc anno; acus a chumhain sin la Gallaibh Athai Cliath for Gaidhelaibh Laighen, ocus moran do cheithernaibh congbhala na Mumhan fa Thadhg .H. Meachair do marbhadh ann.

Pestelencia magna hi Conmhaicnibh Cuili, ocus i Clainn Ricaird.

Pilib Afal do ecc don phláigh sin.

Uilliac mac Ricaird, do Clainn Ricaird, submersus est for Turlach Mor .H. Fiachrach in hoc anno.

Mors .H. Flannacan Eli in hoc anno.

Falgi mac Eogain Ui Conchobhair Falgi do marbhadh d'athess aen urchuir do soighit girr in hoc anno.

Uilliam Occ .H. h-Uicinn occisus est o cloinn Cathail na m-Banfigech meg Flanchaidh eidir da abhaind, in hoc anno.

Mac Gilla Brighti na Muigi do marbhadh do escur.

Creacha do denamh do cloinn Domhnaill mic Muircheartaigh ar Mac n-Diarmada in hoc anno.

Carraic Locha Cé do gabhail do cloinn Fergail Mic Diarmada, ocus daine imdha do marbhadh ocus do bhathadh ina timchell, ocus lucht a coimheda da tindlacadh do chind cumhadh.

Feidhlimidh mac Cathail Oicc .H. Conchubhair do marbhadh do mac .H. Conchubhair Duind.

Gres an Chabhain do denamh la cloinn .H. Ruairc, .i. Tigearnan Occ ocus Aedh Budhi ocus Tadhg, ocus do cloinn Meg Samhradhan, for Mael Mórdha Ua Raighilligh, occus foslongphort ag muintir Mail Mordha ar a n-eis, ocus ni h-urusa a arimh ar milledh and-side do dainibh ocus mainibh, ocus do loiscedh .xx. beart etidh ann fa mac in biataidh tainicc do congnamh la Muinntir Raighillidh, ocus do benadh da xxit ech dibh beos.

Coccadh adhuathmhar do ergi eidir Toirrdhelbach mac Neill Ghairbh mic Aedha .H. Dhomhnaill, ocus righdamhna na n-Eoghanach .i. Brian mac Enri amhreidh Ui Neill, ocus foslongphurt Cloinne Dalaigh, ocus Toirrdhelbaich mic Neill Gairbh tighearna na Conallach, do innsaighidh co drochchomhairlech dimsach la mac Enri, ocus sraenmaidhm sechranach do bhen asta do tus lai co láidir lanchalma. Ocus mar nach teid olc cin indiched na dal can dighaltus, ni dechadar na dala sin gan dighaltus go deghthapaidh o Chenel Conaill; ocus is amhlaidh do raladar na dala sin doibh .i. mac Ui Neill d'fagbhail in h-uathadh sluaigh deodlai, ocus crech Enri .H. Gairmleadhaigh remhe, ocus ro benait na creacha sin de-simh la Cenel Moan, ocus rob e sin an t-aithes con anaithes do Chenel Moan; ar ro mharbhsam mac .H. Gairmleaghaidh d'oen bhuille cloidhimh; ocus asa h-aithle sin do iadsad Cenel Conaill uile a timchioll in trén mhilidh, ocus do maidhedh in mór echt sin la Toirrdealbhach Ua n-Domhnaill; occus do marbhadh Niall mac Neill Gairbh .H. Domhnaill, ocus Mael Sechlaind mac Flaithbheartaigh .H. Ruairc tus an lai sin la h-Eoganchaib; ocus do bo lan mhór a n-esbhadha osin amach, acht nach roich a n-airemh uli ar oman a n-emiltius.

Kl. Enair for Domhnach, ocus. xuii. fuirri; M.cccc.ii.; xui. cicli lunaris; x. anno indictionis; xxii. cicli solaris.

Cocadh adhbhal mór eidir Iarla Urmumhan ocus Iarla Desmhumhan, ocus in da mac Uilliam do dol diblinaibh do furtacht Iarla Urmhumhan.

Fergal mac Aedha .H. Ruaircc, mac righ Breifne, ocus adhbhar righ Ua m-Briuin, interfectus est ina tig budein la Lochlainn Colach mac Caba per dolum, caictigis ria Caiscc, ocus a adhlacadh a manistir t-Sligigh.

Carraic Locha Ce do gabhail iterum la Conchubhar Occ mac Aedha Mic Diarmada co h-arrachta incess for cloinn Fergail Mic Diarmada.

Niall Og, mac Neill Moir, mic Aedha Moir .H. Neill, airdri coicidh Uladh, do ecc a foghmhar na bliadhna sa iar m-breith báiri ar in saegul sa, do chlu ocus d'enech ocus d'ardnós, o lucht an bheathadh frecnairc; ocus curro airchisi Dia dia anmain, ocus Patraicc.

Muircheartach mac Dondchaidh .H. Dubhda, fer nar ér duine riamh im ní ar domhan, ocus a bheith aice, do ecc in bono fine a samhradh na bliadhna so, et sepultus est a n-Ard na Riad.

Pilib mac Briain Mhóir meg Mathgamhna, ard ri Orghiall, do ecc in bono fine, ocus Ardghal mac Briain 'na inad iaramh.

Cu Chonnacht mac Maghnusa mic Con Chondacht .H. Raighilligh, righdamhna Breifne, ocus aen mhac Una inghine Toirrdhealbaigh .H. Chonchobair, do ecc a n-aimsir foghmhair.

Brian mac Domhnaill .H. Flaithbheartaigh, ridamhna Cairn Gecain, quieuit in Cristo.

Mors Tomais mic Seaain na Tuaithe.

Insaighidh la cloinn Cormaic mic Donnchaidh meg Carrthaigh for Baroidechaibh, ocus maidhm do thabhairt forro do Baroidechaibh, ocus mac mic Dondchaidh meg Carrthaigh do gabhail and, ocus moran da mhuinntir maille ris; ocus Art .H. Caoimh do marbhadh ann beoss.

Mac Cinaith an Triucha do marbhadh da bhraithribh fein per dolum.

Feidhlimidh mac Cathail Óicc do leccen as a lamhdechas.

Brian mac Neill Oicc .H. Neill quieuit in Cristo ar sálaibh a athar.

Muircheartach Ua Flannacan, farcideochan Olifinn, quieuit.

Kl. Enair for Luan, ocus ochtmadh .xx. fuirri; M.cccc. tertio; xuii. cicli lunaris; xi. anno indictionis; xxiii. cicli solaris.

Maghnus mac Conmuighi na Cailleadh, ri Cianachta, mortuus est.

Tadc mac Cathail Óicc .H. Conchubhair occisus est la cloinn Toirrdhealbaigh Oicc .H. Chonchubair, ocus la h-Eogan mac ind Apaid .H. Conchobhair, for machaire na n-oileach, in hoc anno, fo feil Brighidi, et sepultus est i l-lebaidh Cathail mic Domhnaill, a shenathar.

Conchubhar Anabaidh Ua Cellaidh, ri .H. Maine, nathair nemhe na n-Gaidhel ar bheodhacht ocus creacharacht, do ecc iar n-ongadh ocus iar n-aithrighe, et sepultus est a manisteir Eoin Basti hi Tir Mane .i. manistir ar ar mhor a cummain budhein.

Cathal .H. Dimusaigh, righdamhna Cloinne Mail Ughra, occisus est la Gallaibh; ocus aithrisid an fiallaigh dana cur maith a enech ocus a engnamh.

Brían .H. Dimusaigh, a dherbhrathair, do mharbhadh do Gallaibh i cind mis iarsin.

Fedhlimidh Ua Dimusaigh do marbhadh la Gallaibh beos.

Findghuala, inghean Toirrdhealbaigh .H. Chonchubhair, uxor Mailechlaind .H. Cellaigh ri Ua Maine, an ben rob ferr clú do bi a n-aen aimsir friasi ind Eirinn uli, quieuit.

Sluaghadh adhbhal mór la Ua Conchobhair n-Donn, ocus la Muircheartach m-Bacach mac Domhnaill, tighearna Sliccidh, in Uachtar Connacht, ocus tighearnus Eoghain .H. Madadhan mic Murchaidh do gabhail doibh don duladh sin; ocus dol doibh a Claind Ricaird iaramh do congnamh la h-Uilleac mac Ricaird in adhaigh Mainechaibh; ocus do ghabhadar tren don turas sin ar Mainechaibh, ocus tancatar can tobeim can tubaist dia tigibh iarsin.

Muircheartach Bacach, mac Domhnaill, mic Muircheartaigh .H. Chonchubhair, tighearna Iochtair Connacht, do écc iar m-breith bari ar a bhidhbhadhaibh in cech aird d'Erinn uile, in aine iar feil Micheil.

Muircheartach Clerech Ua Dubhda, togha espuic Chille h-Alaidh, quieuit.

Coccadh mór do fás eidir Breifnechaibh ocus Clann Donnchaidh in hoc anno, dar marbhadh daine maithe, .i. Tomoltach Ócc mac Tomultaigh meg Dorchaidh, deodhflaith Chenel Luachain, do marbhadh eatorra, ocus Muircheartach Og .H. h-Eilidhi, brughaidh ceadach conaich, do mharbhadh ar in coccadh sin.

Mael Mordha, mac Con Connacht mic Gilla Isa Ruaidh, do gabhail tighearnais Muintire Maili Mordha in hoc anno.

Eogan mac Seoain .H. Ruairc do gabhail la Maeleachlainn .H. Ruairc; agus Seaan mac Taidhg mic Ualgharg .H. Ruairc do gabhail ocus do lot la muintir Mail Mordha; ocus coccadh do ergi asside eidir Muinntir Raighilligh ocus muintir Ruairc; ocus Mathghamhain mac Gilla Criosd mic Flaithbheartaigh Mic Cába do lot in lá sin la muinntir .H. Ruairc, ocus as annso do ronnadh gres an Chabhain amhail a dubhramar romhaind, madh iar n-araili liubhar.

Muircheartach Garbh Ua Sechnusaigh, ríghdamhna Ua Fiachrach Aidhne, do marbhadh la Mainechaibh.

Seaan Budhe mac Seoinin a Burc occisus est o Clannmaicne Eoghain .H. Cellaigh, ocus o cloinn Hoberd Dalatun.

Kl. Enair for Mart, ocus naemhadh uathadh fuirri; M.cccc.iiii.; xuiii. cicli lunaris; xii. indictionis; xxiiii. cicli solaris.

Tomas Bared, easpocc Olifind, sai Erend, in Cristo quieuit a n-errach na bliadhna so, et sepultus est i n-Airemh Locha Con.

Mors Maileachlainn meg Orechtaigh, dux Muintiri Raduibh, isin domhnach meodhanach don charccus, et sepultus est a r-Rus Comman.

Conchubhar Occ mac Aedha mic Diarmada, ri Moighi Luirg, ocus beithir ar beodhacht, do ecc eidir feil Micheil ocus samhain; ocus Tadhg mac Aedha meic Diarmada do rigad ina inad timchell na samhna iarsin.

Cormac Mac Diarmada do marbhadh ar imruagadh a Clainn Ricaird la marcsluagh Cloinne Ricaird ocus Tuadhmumhan archena, i cind mís don fogmar ceadna sin; ocus dob e sin an bainne ria frais do Moig Luirg .i. Cathal ria Conchubar.

Inghen .H. Chonchubhair Failghi .i. ben Gilla Padruicc .H. Mordha, quieuit.

Cathal mac Dondchaidh mortuus est i Purt Indsi ina longphurt fein, iar m-buaidh n-aithrighe; et sepultus est i Cill mic Callain.

Domhnall mac Enri Ui Neill do gabhail righi in choicidh.

Occisus est mac Aengusa mic Domhnaill Óicc mic Domhnaill la Dondchad h-Ua Cellaigh.

Gallra imdha ind Erinn, ocus galar na leptae co sundradhach, in hoc anno.

Murchadh Occ mac Conchobair mic Cathail mortuus est.

Occisus est Tomas .H. Cendetigh, lethri Urmhumhan, la Domhnall mac Pilip .H. Cendetigh.

Maidhm Atha Duibh la Gilla Padruig .H. Mordha, ri Laighsi, for Gallaibh, ocus moran do marbhadh ann, ocus eich imda ocus arm ocus édedh do bein dibh beos.

Dondchadh mac .H. Cendedigh Duinn do ecc hi lamhdichus ac a bhraithribh budhein in hoc anno.

Iarla Urmhumhan, cenn crodhachta na h-Erend, quieuit.

Mac Cathmhail, dux Cenel Feradhaigh, interfectus est.

Dondchadh Ban .H. Mail Chonaire, ollamh Sil Muiredhaigh Muilleathan re senchus, mortuus est.

Gilla Dubin mac Cruitin, ollamh Tuadhmhumhan re senchus, mortuus est.

Feidhlimidh .H. Tuathail, ri .H. Muiredhaigh, mortuus est.

Cerbhall Ua Dalaigh, ollamh dana Corcumdruadh, quieuit.

Fingen mac Eogain meg Carthaigh mortuus est.

Macraith .H. Suilleabhan mortuus est.

Domhnall mac Dondchaidh .H. Dalaigh, .i. bolg an dána, mortuus est.

Flann Occ mac Seoan Ui Domhnallain, ollamh Sil Muireadaigh i n-dán, mortuus est.

Cormac, mac Aedha, mic Feidhlimidh, mic Gilla Isa Ruaidh .H. Raighillidh, mortuus est.

Cocadh d'ergi eidir Mag Carrthaigh ocus .H. Suilleabhan Budhi, ocus clann Diarmada Meg Carrthaigh; ocus Toirrdhelbach Meith mac Mathghamhna ina longseoir ag Mag Carrthaigh in tan sin; ocus breith do ar .H. Suilleabhan ar fairrge ocus ar chlainn Diarmada dibhlinaibh, ocus .H. Suillebhan do bhathad, ocus Dondchadh mac Diarmada ocus Domhnall mac Eoghain do gabhail do beoss.

Andriu Baroid do mharbhadh la h-Ibh Murchadha.

Eogan mac Murchaidh mic Cathair .H. Conchobhair Falgigh do marbhadh la h-Iarla Chille Dara.

Nuala inghean Domhnaill mic Muircheartaigh .H. Conchobhair, ben Fergail mic Cormaic mic Donnchaidh, quieuit.

Uilliam .H. Deorain, ollamh breitheamhan na Caemhanach, mortuus est.

Ferghal mac Teboid .H. Mail Muaidh mortuus est.

Dond Cathaigh mac Muiredhaigh meg Senlaoich, brughaidh ceadach conaich do Corca Athchlann, ocus lán fer gradha do Ruaidhri .H. Conchubhair, do righ Condacht, ocus fer for arabhi cach uile sonas co a bhas, ocus fuair loghadh a pheacadh fa deoidh i cuirt an phapa, quieuit an la iar feil Micheil.

Kl. Enair for Dardain, ocus fiched fuirri; M.cccc. u.; xix. cicli lunaris; xiii. indictionis; xxu. cicli solaris.

Mors Ferghal mic Cormaic mic Donnchaidh, righdamhna .H. n-Oiliella, in hoc anno.

Risderd Butiler ris i raiti Cos Cruaidh do marbhadh la mac Fachtna .H. Mordha.

Cocadh mor ag Mac Murchadha re Gallaibh, co tainicc creach loscadh na Cundae Riabhcha; agus Cethurlach ocus Disirt Díarmada do loscadh leis.

Cathal mac Duind meg Samhradhain mortuus est in hoc anno.

Dondchadh Cam .H. Lochlaind, ri Corcumruadh, occisus est o clainn Mailechlaind .H. Lochlaind an eiric a n-athar fein.

Ristard Mag Raghnaill, adhbhar taisich na n-Eolusach, quieuit iar n-ól uisci betha go h-imurcach, ocus dob uiscce marbhtha do Risdard.

Diarmaid mac Dondchaidh .H. Chonchubhair Ciarraighe do marbhadh la Mac Muiris Ciarraighe.

Domhnall Occ .H. Ruairc mortuus est.

Milis Dalatun do mharbhadh las na Dalatunacha, ocus la cloinn Hoberd Dálatun.

Caislen nua .H. Findacain do blodhadh la Branachaibh in hoc anno.

Inghen Domhnaill .H. Briain, ben Pilip mic Mathghamhna Duind .H. Cennedigh, mortua est.

Gilla na Naemh mac Ruaidhri .H. Cianan, ollamh senchadha Fer Manach, do écc co h-oband a tigh mic Nedi .H. Mail Conaire hi Cairpri Gabhra, ocus a adhlacadh a mainisteir Lethratha.

Muircheartach .H. Duibhgindan quieuit.

Sluaghadh Artig la Tadg mac n-Diarmada, la righ Moighi Luirg, d'iarradh a tighearnais ar cloinn Conchubhair mic Taithlig ocus for lucht Artigh archena, amhail ro ba dual d'fhir a inait do ghres. Agus Mac Diarmada do chur a cumhcach ac Loch Laban i crich Artig uchtlethain mic Toimintin, d'U Conchobair Dond agus do Cloinn Muircheartaigh Muimhnigh .H. Conchobhair, ocus do cloinn Fergail mic Diarmada, ocus do lucht Artig budein, ocus do Cloinn Cethernaigh, ocus do Cloinn Concubair; ocus mar fuaratar imarcradh na nemhcharad Mac Diarmada im baeghal do dhoirtsed fair cend i cend; o ro badar fein da ored no tri ored do dhainibh re Mac n-Diarmada, do chuiredar chuci diblinaibh, ocus do dhortsedar caeraighechd .H. Conchubhair eidir chois ocus ech ina chend, ocus tucatar in fraiss do bhai is na bodhadh aibh diaraile, ocus do brisedh le Mac n-Diarmada forra, ocus la Dondchadh mac n-Domhnaill, consapla Mic Diarmada, ocus la Lochlainn colach Mac Caba, ocus la glaslaith Moighi Luirg archena, hi tus in lai for in cummascadh sluaigh sin ocus nemhcharad, ocus do marbhadh brotharsach mor do fodainibh la muintir Mic Diarmada; ocus cidhedh dob e sin in t-aithes co n-anaithes fa deoidh do muintir Mic Diarmada, oir doigh amh tuc fer éicin don debaidh frithroisc urchuir duaibsech do saighit fon inill moradhbhal do maithibh an morsluaigh do bai ic imditin ind ardflathai ocus aca anacal ar orchoitibh na h-irgaile, acus do sechnait lasin soigit sin doescursluagh di-main ocus fodaoine, ocus galgata gaiscidh ocus gaithlengaidh in sluaigh archena; ocus do benastar na goithne dubh diabhlaighi i corr braghatt na flatha co fiadhnach. Acht ata ní nama, a h-aithle na h-urbhadha sin can foirighthin agus 'na tubusti sin can turbhrodh fuaradar soerchlanna Slebhi Segsa ocus curaidh cnuic in Scail, occus tulchain Mael Ruanaigh Moir re n-abradh cach go coitchenn anosa, ut dixit in file, .i. Mac Coisi, Cnoc in scail a ainm ar tus, O re Nera fa e arus; Tulchan Maelruanaigh na rend Bidhe a ainm co ti an forchend, &ersir;rl. , do faccaibhset an tir iarsin, ocus tancadar da tigibh, ocus tucadh Tadhcc da adhnacal a n-otharlige a shensir; occus a h-aithle adhnaicthe Taidcc do righsat Ruaidhri mac Aedho mic Diarmada; ocus dar mo debroth nír bo cloch an inat uigi sin; ocus fo fel cros do ronadh an ro-gniomh sin amhail indisis in cronicae duin.

Maghnus mac Aedho Ui Uicind quieuit.

Aedh .H. h-Anlidhe, dux Cenel Dobtha mic Aenghais, quieuit in Cristo xui. Kl. August, et sepultus est hi Cluain Cairbthi for bru Sinna, fo coinne Beraigh.

Mor, inghean mic Goffraidh .H. Raighilligh, quieuit in Cristo ii. Kl. Martii.

Iohannes mac Mailmartain, uicarius Uillae templi, quieuit .u. Kalendas Martii.

Aine inghean Briain meg Tighearnan quieuit xuiii. Kl. Maii.

Kl. Enair for Aine, ocus aen uathaid fuirri; M.cccc.ui.; primus annus lunaris cicli; xiiii. indictionis; xx. sexto cicli solaris.

Laighsech .H. Nuallán, adhbhar righ Fothart, ocus Aedh .H. Tuathail adbhar righ .H. Mail, ocus Bran .H. Brain damhna rig .H. Faelan, ocus Domhnall mac Tomais Mic Murchadha, mortui sunt don plaigh in hoc anno.

Mael Ruanaigh mac Taidhg mic Dondchaidh, ri .H. n-Ailella, do écc ina thigh fein iar m-buaidh n-ongtha ocus n-aithrighe, et sepultus est a manistir na Bulli in hoc anno.

Maidhm dermar la Murchadh .H. Conchubhair, ri .H. Failghi, cona clainn ocus co na clannmhaicne budhein maroen ris, ocus Cathal Dubh ocus Tadc, da mac righ Connacht, buden becc marcach maroen ris beus, ar n-dol ar cuairt doibh a n-Uibh Falgi dochum .H. Conchobhair, for Gallaibh na Midhe ocus for Eogan mac ind abaidh .H. Conchobhair, ocus for cethernaibh congbhala Condacht maroen ris. Co n-deochadar na sluaigh sin dibhlinaibh ind uachtar Gesille, ocus co n-deochaidh mac ind abbaidh co Cluain im-Morruiss cona corachadh budhein, co baile in Gilla Bude mic Mael Corra, ocus dar mo debrodh ro ba ferr doibh na dechtais, co ruc forra annsin in Calbhach mac Murchaidh .H. Conchubhair ocus Cathal .H. Conchubhair, sesear marcach; co n-dubhairt in Gilla Buidhe, ocus aigin an Calbhaigh bai ar iasacht aige ag denamh lenna, ocus se ar muin oclaigh don t-sluagh, fograim h-aigin det a Chalbhaidh. Gaibhim lais ar in Calbhach. Do rad fer don toraig orchor aitheasach do cloich cur ben ar toin an aigin, cur moigh don t-sluagh asin fath sin, ocus cur marbhadh mac inn apaidh ar in monaid alla thuaidh don baile hisin; ocus ni h-edh amhain, acht nir lugha na tri cead do doinibh an esbaidh ota sin co Cluain Aine a Crích na Cédach, ut audimus o chách co coitchend; uair ro bas ag cur an air h-isin o Cluain Imorruis co Cluain Aine. Ocus do benad ard mindd Connacht uile dibh in lá sin .i. in Buacach Padraicc do bith an Oilfind. Sexto idus Iulii arai laithi mis greine; dia Sathairn, imorro, arai laithi sechtmaine, do ronait na gniomha sin, .i. in x. madh la do mi Iuil eside.

Tadhc mac Donndchaidh .H. Birn, dux tire Briuin na Sinna, obiit quarto idus Nouimber arai laithi mis greine; dia Cedain imorro arai laithe sechtmaine, .i. in la re féil Martain.

Toirrdhealbhach Ócc mac Aedha mic Toirrdhealbaigh, ri Condacht re da bhliadhain ar .xx. hi comhflaithios ocus .H. Conchobair Ruadh, do marbhadh la Cathal Dubh mac .H. Conchubhair Ruaidh, ocus le Seaan, mac h-Emainn, mic Hobert, mic sir Dabhid a Burcc ocus Mna Mumhan ingine mic Fedhlimidh, agus la Diarmaid .H. Tanaiden ler cuitiged co milita in mór echt sin, a tig Ricaird mic Seaain Buidhe mic Emaind mic Hoberd, isin Crecan re taeb Fidicen hi Cloinn Condmaigh; agus isse sin in tres righ do rigaibh Condacht do marbhadh a Cloinn Condmaigh, .i. Conchubhar Maenmaighi mac Ruaidhri mic Toirrdhelbhaigh Mhoir, ocus Ruaidhri mac Cathail Ruaidh, mic Conchubhair Ruaidh, mic Muircheartaigh Muimhnigh, mic Toirrdhealbaigh Mhoir, ri Erend; agus Toirrdhealbach Occ mac Aedha mic Toirrdhealbaigh Oicc, amhail adubhramar remhaind; u. idus Decimber arai laithe mis greine; dia Dardain imorro arai laithi sechtmaine, .i. in ui.edh lá déc ante festum natale Domini nostri Iesu Cristi.

Kl. Enair for Satharnn ocus aili .x. fuirri; M.cccc.uii; secundus annus cicli lunaris; .xu. indictionis; xxuii. cicli solaris.

Cathal mac .H. Conchubhair Falgi do marbhadh la Cloinn Feorais, nono Kl. Martii arai laithe mis greine; dia Luain, imorro, arai laithe seachtmaine .i. an t-aenmadh la fiched d'errach eside in dereadh bliadhna cicil in Coimhdedh, agus i tosach bliadna in cicil noidicda; conid sexto in t-annalach iar cicil an Tighearna ocus uii. iarsin cicil noidecda.

Seoan mac Taidc .H. Ruairc, adhbhar righ Breifne, do ecc i Muig Luirg, ocus a adhnacal a n-Druim Lethan, in hoc anno.

Mac Taidc mic Mathghamhna Duinn .H. Cennedigh, tighearna Urmhumhan Uachtaraigh, do marbhadh la .H. Cerbhaill.

Maidhm mor la Gallaibh, ocus le Sgrub, ar Gaidhelaibh Mumhan, du inar marbhadh Tadcc Ua Cerbhaill, ri Eli, ocus feicheadh coitchend do chliaraibh Erend ocus Alpan in Tadc hisin, ocus corro airchise Día día anmain.

Muircheartach .H. Cellaigh .i. ardespocc Connacht, sai na h-Erenn uile ind ecna ocus an derc ocus in doennacht, in Cristo quieuit i Tuaim Da Gualann, fo feil Michil.

Maidhm la H. Conchobhair Ruadh ocus la .H. Cellaigh, inar marbhadh drem do Cloinn t-Sithidh, ocus ni fetarsa a n-anmann.

Maidhm Cille Achaidh in hoc anno la .H. Conchobhair Ruadh, ocus la macaibh Maileachlainn .H. Cellaigh, ocus la Ruaidhri Mac Diarmada, righ Moigi Luirg, for macc Uilliam Cloinne Ricaird, ocus for Cathal mac Ruaidhri .H. Conchobhair, dar garmed gairm righ des .H. Conchubhair Duinn do marbhadh la Cathal Dubh mac .H. Conchubhair Ruaid, cur brisedh for Cloinn Ricaird, ocus for Cathal mac Ruaidhri, cur gabhadh ann Cathal mac Ruaidhri ocus Uilliam Burcc ann-side, ocus cur marbhadh ocus cur gabhadh moran eli ann beos; ocus fo feil Iohain Baitsi do ronait na morgniomha sin.

Caislen Tobair Tulsci do brisedh reme-side la Brian mac Domhnaill mic Muircheartaigh .H. Conchubhair, ocus la Cloinn Dondchaidh, ocus Cathal mac Ruaidhri do chor ar Carnn Fraich doibh. Conmac .H. Fergail mortuus est do bhas anabaidh.

Mortuus est Eogan mac Cathail, mic Aedha Breifnigh, mic Cathail Ruaidh .H. Conchubhair, et sepultus est hi Manisteir na Buille in hoc anno.

Adam mac Gilli Muire, ri .H. n-Echach, do marbhadh la h-Aedh mag Aengusa, ocus la Senic Oc.

Mael Mordha .H. Dimusaigh, ri Cloinni Mael Ughra, quieuit in hoc anno.

Seoan mac Cathail mic Cethernaigh mortuus est.

Mors Lochlainn mic Domhnaill la Fedhlimidh mac Ruaidhri .H. Chonchobhair.

Mac Uilliam Oicc .H. Cellaigh ocus mac Mathghamhna .H. Neachtain do marbhadh la Feradach .H. Cellaigh per dolum.

Donend dermar ocus dith mor for indilibh in hoc anno.

Kl. Enair for Domhnach, ocus tres ficheat fuirri; M.cccc.uiii; tertius annus lunaris cicli; primus indictionis; xxuiii. cicli solaris.

Amhlaibh mag Amhalgaidh, dux Calraidhe, mortuus est, et sepultus est an Ath Lúain.

Tomas mac righ Saxan do tocht an Erinn in hoc anno, occus Iarla Cille Dara do gabhail leis beus.

Sluaghadh la mac in righ i Laighnaibh iar sin, acus Hitsin Diuit do marbhadh for an t-sluaghadh sin, ocus dob anba an esbhad sin.

Pestilencia magna isin Midhe in hoc anno, ocus Scrub ridire ro crodha, ocus fer inait rí Saxan ind Erind, do ec don phlaigh sin.

Cathal mac Cethernaigh ocus Conchubhar mac Cethernaigh, ocus Seóan macc Seoan mic Cethernaigh, ocus Tomultach ocus Domhnall meic Finghein meic Cethernaigh, occisi sunt la Cloinn Muircheartaigh in hoc anno, in dighaltuis Maghnusa mic Muircheartaigh mic Cathail do marbadh a Cloinn Cethernaigh remhi sin.

Tomas, mac Hoberd, mic Emainn mic Hobert, do marbhadh do oen urchur fogha la Gilla na Naemh, mac Uilliam Gallda .H. Taidc an t-Eglaidh.

Creacha mora la Fedlimidh mac Ruaidhri .H. Conchobair, for Eogan mac .H. Conchubair Ruaidh, in hoc anno.

Cormac .H. Mailli occisus est a fratre suo.

Maghnus mag Samhradan do marbhadh don baethan Mac Gilla Ruaidh, d'orchor chuailli.

Milis Dalatun occisus est a fratre suo, ocus a chaslen do brisedh la sliocht Cathail .H. Ferghail iartain.

Eogan .H. Ruairc occus cland Duind meig Samhradain do dol hi Tir Chonaill do chogadh for Brefneachaibh.

Ferghal mac Concondacht Ui Fergail mortuus est in hoc anno.

Conchubhar mac Imhair .H. Anlide occisus est in hoc anno la Corca Athchlann, ocus la Cenel Dobtha budhein, for mona Cluana na Caillidh .i. Lá na m-Bruach n-Dubh, ocus do bo cruaidh in la sin do Chathal Dubh .H. Conchubhair ocus do cloinn Imhair .H. Anlide diblinaibh; et sepultus est a manistir Rosa Comman; toiseach in ghemhridh in tan sin.

Aedh Ruadh mac Tomais .H. Birn, ocus Dondchadh a mhac, ocus Brian Buidhe mac Amhlaibh Ruaidh, occisi sunt.

Kl. Enair for Mairt, ocus cethre uathadh fuirri; M.cccc.ix.; quartus annus lunaris cicli; secundus indictionis; primus annus solaris cicli.

In lubhra do gabhail righ Saxan, ocus a thásc do theacht a n-Erinn, ocus Tomas mac ind Iarla do facbhail Erend fo thásc a athar, iar lécan íarla Cille Dara as a gheimhiol dó.

Mael Sechlaind mac Briain Meg Tigernain mortuus est in hoc anno.

Ath-taisech do denamh do Maelsechlaind Mor Mag Eochacan, ocus Fergal mac Ferghail Ruaidh Mec Eochacan, mec Dondchaidh, ina inat iarsin.

Coss Risderd a Burcc do brisedh le coin do bai 'na rith, ocus a écc de sin go tubaisdech.

Creach Beoil Leci la Tighernan Ua Ruairc ar .H. n-Domhnaill, ocus ar Cathal .H. Ruairc, ocus for Eogan .H. Ruairc; ocus .H. Domhnaill ocus Cenel Conaill a foslongphort alla thall don ess, ocus Cathal ocus Eogan alla boss don es ceadna, ocus tucc in creich uadhaibh dibhlinaibh.

Sluaghadh la Brian mac Domhnaill mic Muircheartaigh .H. Chonchobhair, ocus la Conchobhar mac Dondchaidh, ri Tíre h-Oiliella, ocus la clainn Tighearnan .H. Ruairc in hoc anno, cur chuiretar lón ocus biadh d'andeoin Condacht o sliabh suas uile, ocus siad tinolti ar a chind uli eidir cois ocus ech ocus galloclach, hi caslen Rosa Coman, in luan iar feil Micheil archanghiol; acus do shaoileadar o sliabh sís co m-bétis Cland Ricaird ina fochair féin ag cur in bhidh sin a caislen Rosa Coman, ocus ni rabhatar, acht mac Uilliam buidhen becc marcach do tocht co Baile in Tobair ina coinne; accus do fuabratar locadh ann-sidhe o nach tancattar sluagha Cloinne Ricaird chuctha amhail ro gellsad; ocus a dubhairt Mac Donnchaidh nach locfadh no co tuited, no co cuiredh biadh isin caislen, ocus adubhairt re mac Uilliam anmhain andsin o nach raibhi lin trodai no tegmhala do thabhairt do Chondachtaibh; ocus da marbhthar sinne is maith linn tusa beó ag ar lenbaibh inar n-diaigh da co thaghadh. Cid tra acht, do gluais Mac Dondchaidh i r-remthus na slighedh, ocus nir an sé don réim ocus don ruathar sin no co rainicc co Ros Comman; ocus do chuiretar lón isin caislen; ocus nir marbhadh acht aen oclaech dibh, ocus ruccsad fein a chorp leó; ocus ni meinicc do rigned an Erinn riamh sibhal ba crodha ocus badh calma ina in sibhal sin.

Muinntir Chuirnin do marbhadh a cheile in hoc anno .i. Seoan agus Conla do marbhadh la Diarmait mac Muircheartaigh Ui Chuirnin, hi tigh .H. Duibhginnan Baile Choillte Foghair; acus Diarmait fein do dol co tech Conchobhair cruim mic Taidcc .H. Conchobair, .i. a thighearna agus a derbhchomhallta, ocus Conchobar da gabhail ina thigh budhein, occus a thidlacadh do Muinntir Ruairc ocus do Muintir Chuirnin; ocus a beith tuilleadh ocus coictigis i l-laimh, ocus a toitim la mac Seaain .H. Cuirnin fa déoidh.

Cathal mac Dondchaidh mortuus est xiiii. Kallainn Octobir; ocus ni demhin lem nach i so bliadhain in badh chóir Conchobhar mac Imhair .H. Anlide do chor sís.

Muircheartach mac Aedhacan, ollamh breitheamhan fer Teptha, mortuus est.

Kl. Enair for Cedain, ocus .xu. fuirri; anno Domini M.cccc.x.; quintus annus cicli lunaris; tertius indictionis; ii. annus cicli solaris.

Raghnall mag Raghnaill, dux Muintiri h-Eolais, mortuus est iar n-ongadh ocus aithrighe, ocus Cumscrach mag Raghnaill, dar gaireadh Mag Raghnaill ina inat, do écc i cinn coicthighis iar n-gabhail taisigheachta dó, ocus dob e sin in t-escur i m-beol airechtais.

Feidhlimidh Clerech, mac Aedha mic Feidhlimidh .H. Conchubair, do ecc coicthighis re feil Brighde in hoc anno.

Mac Ruaidhri Óicc .H. Chonchobhair do ecc in hoc anno; agus Tadc Carrach mac Toirrdhealbaigh Duinn .H. Conchobhair do écc beoss in hoc anno.

Maeleachlainn mac Eogain H. Ruairc occisus est o Conallchaibh, ocus caislen Duin Crimhthandain do blodhadh la Cairbreachaibh agus la Breifneachaib iarsin.

Domhnall Ua Flaithbheartaigh, righ Iarthair Condacht, do marbhadh lesin n-Gilla n-Dubh Ua Flaithbheartaigh, per dolum.

Domhnall Ua Neill, ri coicidh Uladh, do gabhail mar nar cubhaidh la Brian mag Mathghamna.

Tomas mac Mail Muire meg Craith, ollamh Tuadhmumhan, mortuus est.

Dondchadh Ua Duirnin mortuus est.

Sadhbh inghean Conchubair .H. Briain, uxor Uater a Burc, mortua est.

Domhnall mac Cormuic .H. Eghra, adhbhar righ Luighne, mortuus est.

Cormac Occ mag Carthaigh do ecc i n-geimhiol Meg Carrthaigh Moir.

Esbhaidh badh mo na cach esbhaidh do teacht a n-deiredh na bliadhna so, coicthighis tares na feli Micheil, .i. Tadc .H. Cellaidh, ri Ua Maine, an t-aen Gaidhel do ba mó tinnlaicthi ocus tabhartas do bai an Erinn ina aimsir, ocus an Alpain, do écc iar m-buaidh ongtha ocus aithrighe; agus cur airchisi Dia dia anmain in secula seculorum.

Emand mac Uillecc do ecc in samhradh ria Tadc .H. Cellaigh, ocus Tadcc mac Uilliam mic Conchobair mic Branan, dux Corca Athchlaidh fri ré nai m-bliadhan, do écc la samhna tar es Taidc .H. Cellaigh, ina tig fein a coilledh moir Cluana Sencha, iar n-ongadh ocus aithrighe n-dingbhala do Dia tar es a chinad ocus a thargabhala, et sepultus est hi manistir Rosa Cumman a n-otharligi a senathar ocus a athar.

Eogan mac Murchaidh .H. Madadhan, ri t-Sil n-Anmchadha, ocus Cobthach .H. Madadhan, damhna righ ocus espoicc, mortui sunt.

Dondchadh .H. Cellaigh, .i. mac Maileachlainn, do righadh post Taidhg.

Coic cead bo la cloinn .H. Conchobhair Duinn o muinntir .H. Conchobhair Ruaidh, o raith Brenainn, fo braigit na Samhna in hoc anno.

Muircheartach .H. Dimusaigh mortuus est in hoc anno.

Toirrdhealbhach ocus Tadhcc, da mac h-I Mail Muaidh, ocus Domhnall mac mic Hoibicin h-I Maoil Mhuaidh, do marbhadh la cloinn Maoil Ughra hi sex callaind August arai laithe mis greine; dia Domhnaigh imorro arai laithe sechtmaine.

Murchadh Ua Flaithbheartaigh do righadh tar eis Domhnaill .H. Fhlaithbheartaigh do marbhadh laisin Gilla n-Dubh.

Uilliam .H. Tomaltaigh, prioir tighi a n-Ath Luain, quieuit.

Maelechlainn Mor, mac Fergail, mic Fergail, mic Muircheartaigh Moir meg Eochacan, dux Cenel Fiachaidh mic Neill Nai Ghiallaidh, mortuus est i mis December na bliadhna sa.

Morianus filius Tathai .H. Birn submersus est .xiiii. Kallaind Octobir.

Kl. Enair for Dardain, ocus .xxui. fuirri; M.cccc.xi.; ui. annus cicli lunaris; quartus indictionis; tertius cicli solaris.

Sibhan inghean Iarla Desmhumhan, uxor meg Carthaigh Moir, mortua est.

Ag so bliadhain chóir Feidhlimidh Clérigh ocus mic Ruaidri Oicc.

Domhnall mac Conchobhair .H. Briain, righdamhna Tuadhmhumhan, do marbhadh lasan m-Barrach Mor.

Ua Suilleabhan do dhalladh dia bhraithribh budhein per dolum, ocus Conchubhar mac Gilla Mo Chuda .H. Suilleabhan occisus est a fratre suo per dolum.

Manistir Enaigh Dúin do loscadh in hoc anno.

Domhnall .H. Bechan, sai senchaidh, mortuus est.

Diarmaid, mac Gilla Isa meg Carthaigh, ollamh Tuadhmhumhan re dán, mortuus est.

Sadhbh inghean mic Murchadha, uxor Mic Gilla Patruic, mortua est.

Muircheartach mac Con Uladh .H. Neill mortuus est.

Indsaighidh le h-Emann a Burcc for cloinn Seoan Ua h-Eghra, ocus moran don tír do loscadh leis, ocus Art mac Muircheartaigh .H. Eghra do marbhadh la soigid in la sin.

Ben Mumhan ingen Aedha .H. Conchobhair, uxor Murchaidh mic Cormaic mic Donnchaidh, mortua est.

Domhnall mac Cathail mic Aedha .H. Ruairc mortuus est in hoc anno.

Taichleach Bude mac Seain .H. Eghra mortuus est.

Maidhm mor le mac Domhnaill na h-Alpan for Gallaibh Alpan, ocus mac Gilla Eoin do muinntir mic Domhnaill do marbhadh hi frithghuin an madhma sin.

Iarla Desmumhan do indarba la Semus mac Geroit, .i. a derbhrathair.

Serriam na Midhe do gabhail la .H. Conchobhair Falgi in hoc anno, ocus fuaslacadh mor do bhein as iarsin.

Ua Suilleabhan Mor do gabhail, ocus a mac do marbhadh, la Domhnall Dubh .H. Suilleabhan per dolum.

Caech na Mochergi, mac Taidhc, mic Diarmada meg Carthaigh, do marbhadh per dolum la Feidhlimidh mac Diarmada meg Carthaigh.

Mag Carthaigh Mor do innarbadh la h-Ua Suilleabhain in hoc anno.

Fergal mac Maghnusa tighearna Tire Tuathail, ocus a mac Aedh, do marbhadh per dolum do cloinn Ruaidhri mic Maghnusa, .i. Eogan ocus Muircheartach Cam; ocus tighearna do denamh d'Eogan iaramh for Tir Tuathail.

Cathal .H. Cuirnin, adhbhar ollamhan na Breifne, quieuit.

Maghnus mac Baethghalaigh mic Aedacan, prioir Slicigh, mortuus est.

Croch naemh Ratha Both do telccen fola tar a crechtaibh isin bliadhain sin, ocus mor do mirbhuilibh do denamh di, ocus galra ocus tedmanna imdha do choscc di.

Mal Mordha .H. Raighillidh, ri Muinntire Mail Mordha, mortuus est.

Cu Chonnacht Ruadh, mac Pilip mic Briain Moir mec Mathghamhna, do marbhadh do cloinn t-Seain Bailbh mic Briain Móir meg Mathghamhna, i l-Lurgain Fernmaighe, in errach na bliadhna sin.

Roberd Muntan, espog na Midhe, in Cristo quieuit.

Bellum Beoil na Muilleadh la Conchobhar mac Seain mic Branan, for cloinn Conchobair mic Branan, in samhradh des Taidc mic Branan, iar n-gairm da tighearna aca, .i. Conn mac Aedha, ocus Conchobhar mac Seaain mic Echmarcaigh, ubi occisi sunt Conn ocus Mane, da mac Aedha mic Conchubhair mic Branan, ocus Uilliam Finn mac Cuinn, et alii; dia Lúain arai laithe sechdmaine esidhe; ocus ruccadh Conn beoloitidhe for in n-grencha, ocus ni fetarsa a aoidhigh osin amach; et sepule&rmacr;t i manistir na m-brathar i r-Rus Coman; mí ria Lughnasadh do ronait na ro-gnimha sin, ocus do fhan an toisigheacht ag Conchobhar iar sin.

Caitilin inghean Tomaltaigh .H. Ferghail, uxor Maileachlainn Mhoir meg Eochacan, quieuit a mis Decimber na bliadhna sin.

Bean Mumhan, inghean Aedha mic Fedhlimidh .H. Chonchobhair, bantighearna Cloinne Connmaigh re linn trir tighearnaighi, mortua est.

Muircheartach Midhech mac Briain .H. Ferghail, tighearna in Chalaidh na h-Anghaile, fer na h-imdergadh riamh, quieuit in Cristo.

Kl. Enair for Aine, ocus sechtmadh h-uathadh fuirri; M.cccc.xii.; uii. anno cicli lunaris; quintus indictionis; quartus annus cicli solaris.

Ricard Bared do dol for indsaighidh i Cuil Cernada, ocus maithe an tire uile do breith fair ocus a chur dochom na Muaidhe, ocus a bathadh fuirri; ocus drong mor da mhuinntir do bhathad ocus do gabhail ann beus.

Tigearnan Oc mac Tighearnain mic Ualgharg .H. Ruairc, .i. degh adhbhar righ Breifne, do ecc in hoc anno a foirchind a .ui. m-bliadhan .xxx. eidir chaisc ocus belltaine.

Fergal .H. h-Eghra, adhbhar righ Luighne, mortuus est.

Domhnall mac Neill .H. Domhnaill do ecc in hoc anno.

Cogad ag .H. Ferghail re Gallaibh, ocus Fabar do loscadh léo, ocus daine imdha do marbhadh ocus do gabhail leo.

Baile na Gaillmhe do loscadh.

Sadhbh inghean Tighearnan .H. Ruairc, uxor Emaind mic Tomais mic Cathail .H. Ferghail, mortua est.

Coccadh eidir .H. Cathain ocus .H. Domhnaill, ocus clann Seaain .H. Domhnaill do bheith a rann .H. Chathan; ocus Ua Cathain ocus an clann sin do dol for indsaighidh for Ua n-Domhnaill, agus cethre fir .x. do muinntir .H. Dhomhnaill do marbhadh doibh fa mac Feidhlimidh .H. Domhnaill, ocus fo Cathal mac Raghnaill .H. Baighill. Dondchadh mag Bradaigh, tighearna Cuili Brighdin, mortuus est.

Mac Lochlaind .H. Ruairc, fris a raiti in Giolla Ballach, mic Dondchaidh mic Lochlaind, sai fíal oirdheirc aitheasach, mortuus est in hoc anno.

Delbh Muire Atha Truim do denamh miorbhuilidh mór.

Cúabha Mag Corman, fer gradha d'O Bríain, mortuus est.

Caitherfhina, ingen Maileachlainn mic Murgiusa mic Dondchaidh, uxor Mic Firbisigh, do bathadh do tuile retha ag dol dochum aifrinn an domhnaigh o a tig fein.

Aedh mac Enri .H. Neill do elodh a h-Ath Cliath o Gallaibh, iar na bheith deich m-bliadhna a laimh remhe-sidhe, ocus tug moran braghat as a m-broit leis in tan sin.

Eda a Leis ocus mac Iarla Cille Dara do thegmail re roile a Cill Mo Cellog, ocus a toitim re roile annsin.

Morsluaghadh la Brian, mac Domhnaill mic Muircheartaigh .H. Chonchobhair, fo bragaitt na Lughnasadh, co n-deachaidh a n-Gailengaibh ar tus, ocus as-sidhe a Cloinn Cuan, ocus i Cera ocus hi Conmaicne Chuili Tolaigh; ocus rucc leis Clainn Muiris na m-Brigh cona caeraigheacht isin chrich sin; agus do tinolatar clann Uilliam Burc, Ua Flaithbheartaigh ocus Muintir Maille, ocus Baredaigh, ocus Gaileangaigh, ocus Gosdelbaigh ocus Stondunaigh ar a cind, ocus ni tucsad sin troid no tachar do; agus do loisc Brian na cricha da n-aimhdheoin, ocus do mill a n-guirt uli, ocus do loisc a longphuirt .i. caislen an Bharraigh, ocus in Leth Innse ocus baile Locha Mesca. Ocus do chuir Clann Muiris cona caeraigheacht slan dá tighibh iaramh; agus do ben sidh a Gallaibh ocus a Gaidhelaibh Connacht don chur sin; ocus tainicc fein imshlan da thigh iarsin. Sluaghadh aile le h-Eogan mac Domhnaill mic Muircheartaigh Ui Conchobhair, fo machaire Condacht, fo toghairm cloinne Toirrdhealbaigh .H. Conchobair, cur millset cuid cloinne mic Feidhlimidh don machaire, ocus ruccsat bu ocus braighdi leo iarsin.

Emand Alamar mortuus est in hoc anno.

Ruaidhri mac Cathail .H. Ferghail do marbhadh a machaire Cuircne d'urchor t-soighdi.

ALC resumes here from H.1.19. For the differences of ALC with AConn, see AConn xxi-xxii. Kl. Ianair; tri bliadna .x. ocus .cccc. ocus mile ais an Tigerna.

Concubar O Docartaigh, .i. taisech Arda Midhair, ocus Tigerna Innse h-Eogain, ocus fear einigh coitceinn, d'ec an bliadain si.

Tuathal O Maille do dhul a cuigeadh Ulad ar buannacht, ocus a beth bliadain and; ocus teacht do tar ais lucht .uii. long, ocus gaoth mor d'eirghe doib, ocus a m-breth budh thuaidh laim re h-Alpuin, ocus Donnchad mac Eogain Connachtaigh mic t-Suibne do beth ann, ocus Domnall Ballach mac Suibhne Ghirr, ocus a m-bathad uile co na muinter etir mnai ocus fer; ocus Tuathal fein do teacht a tir ar eigin an Albain.

Kl. Ianair; ceitri bliadna .x. ocus .cccc. ocus mile ais in Tigerna.

Kl. Ianair; cuig bliadna .x. ocus cccc. ocus mile ais an Tigerna.

Saxanach do theacht a n-Eirinn an bliadain si .i. loard Furnamal, ocur do airg se moran d'oes dana Eirenn.

Kl. Ianair; se bliadna dhec ocus .cccc. ocus mile ais in Tigerna.

Gormlaith ingen Neill Moir I Neill, ben t-Seain I Domnaill, d'ec an bliadain si.

Mac Mathuna, .i. Ardghal mac Briain Moir meg Mathuna, do dul d'ec, ocus a mac .i. Brian do rigad for Oirgiallaib ina inad.

Kl. Ianair; seacht m-bliadna dhec ocus .cccc. ocus mile ais an Tigerna.

Mac Murchada, .i. ri Laighen, .i. Art mac Airt Chaomhanaigh, an coicedhach dob ferr einech ocus engnum ocus derc do bí 'na aimsir, dh'ec 'na longport feain an bliadain si, iar m-buaid ongtha ocus aithrighe.

Kl. Ianair; ocht m-bliadna .x. ocus .cccc. ocus mile ais an Tigerna.

Tigernan mac Ualairg I Ruairc, .i. righ Brefne, dh'ec an bliadain si. Brian Ballach mac Aodha mic Feilim I Conchobair, adhbar righ Connacht, dh'ec.

Tadg mac Cathal mic Taidg meg Fhlannchaidh, taisech Dartraighe, dh'ec in bliadain si.

Eogan mac Tigernain I Ruairc, .i. adhbhar righ Brefne, do bathad ar Loc Findmuighe an bliadain si.

Aodh Buidhe .H. Ruairc do ghabail righe na Brefne a n-diaidh a athar, .i. Tigernain Moir.

Kl. Ianair; nai m-bliadna .x. ocus .cccc. ocus mile ais an Tigerna.

Cogad mor etir O Neill, .i. Domnall mac Eanrí I Neill, ocus Eogan mac Neill Oig I Neill, ocus Eogan ar n-deanam cengail ris O n-Domnaill, .i. Toirrdhealbach, ocus O Domnaill ar cor t-sluaig moir ana inad, ocus dol a Tir Eogain, ocus an tir uile do milled doibh; ocus O Neill, .i. Domnall, do indarbad asin tir la neart Conallach ocus Eogain I Neill.

Sloigad mor le Brian O Conchobair don cur sin do thaob seolta I Neill a Tir Aodha, ocus Murbhach I Domnaill, .i. longport I Domnaill, do loscudh leais, ocus Tir Aoda do milled.

Tomas Bacach, mac mic Iarla Urmuman, do dul do congnam le righ Saxsan an bliadain si, ocus moran d'uaislib Erenn do dul leis annsa Fraing ar an cocad sin.

An Calbach O Conchobair, ri O Failghe, do ghabail a feall le mac Línebed a Frende, ocus a reic do re fer inaid righ Saxan, .i. loard Furnamal, ocus an trath do gabad é, an duine do bí na ghlas d'elod leis da tigh fein.

Fercert O h-Uigind dh'ec, .i. saoi re dan, ocus fer thighe n-aigid coitcend d'feraib Erenn. Mac Murchada, .i. ri Laigen, .i. Donnchad Coemanach, do ghabail re Galloib, ocus a breith a Saxanuib an bliadain si.

Muircertach mac Briain I Fhlaithbertaigh, ri Iarthair Connacht, dh'ec in bliadain si, .i. feichem coitcend do cliaruib ocus do damaibh Eirenn.

Sean mac Cathail meg Uidir do marbad an bliadain si.

Sluagh mor leais O Ceallaigh Maine ocus le Uilliam O Ceallaigh, ocus le mac Uilliam Burc, ocus le Cathal n-Dubh O Conchobair, ocus le Mac Diarmada Muighe Luirg, .i. Tomaltach an Inigh, mac Conchobair meic Diarmada, ocus Uilliam Garb mac Dabuith, tigerna Clainne Connmuigh; ocus a ceitherna gallóclaech do breth leo, .i. Mac Dubhghaill ocus Toirrdhelbach mac Domnaill; ocus a n-dul dun turus sin a Clainn Ricaird, da milled, ocus d'indarbad Mic Uilliam a Clainn Ricaird amach. Sloiged mor eile do bheath ag Mac Uilliam ar a cind, .i. Tadg O Briain ocus a brathreacha, ocus Domnall mac Suibhne, .i. Domnall na Madman. Tarla, umorro, an da t-sluag sin da ceile a m-Bel Atha Lighen, ocus tugadar troid dá roile annsin, ocus do marbad Mac Dubhghoill ann, ocus a dhis mac, ocus a n-gallóclaech uile, ocus Toirrdhelbach mac Domhnaill ocus a mac do dul as in troid sin slan; ocus a muinnter do marbad uile and; ocus do marbad il-umad daoineadh air in lathair sin; ocus do gabad O Cellaig ocus mac Dabith; ocus Uilliam O Cellaigh do dul 'na oenar asin maidm sin; ocus moran do maithib O Maine do ghabail ocus do marbad san ar sin. Ocus ni featar cinnedh na comhaiream ar mead an madma sin, no ar med eadala Clainni Ricaird ocus na Muimneach, d'echaib ocus d'eidedh, ocus do braighdibh maithe rl.

Aodh Buidhe O Ruairc, mac Tigernain, dh'ec an bliadain si a tus a ratha na longport fein, ocus Tadg mac Tigernain do righadh na inadh ar an m-Breafne an bliadain si.

Kl. Ianair; fiche bliadan ocus .cccc. ocus mile ais an Tigerna.

Uilliam mac Mailechlainn I Cellaigh, .i. adhbhar rig .H. Maine, dh'ec an bliadan si.

Kl. Ianair; bliadain ar .xx. ocus .cccc. ocus mile ais an Tigerna.

Kl. Ianair; da bliadain ar .xx., ocus ceitri ced ocus mile, ais an Tigerna.

Kl. Ianair; tri bliadna .xx. ar ceitri ced ar mile ais an Tigerna.

Bas Toirdhealbaigh an Fhina I Domnaill, ri Tire Conuill ocus Cineoil Moain, ocus Indsi h-Eogain, nech bud mo sean, ocus dob fearr uaisle ina aimsir, do dul dh'ec an aibid manaigh a mainistir Esa Ruaidh.

Caislen Bheoil Atha Senaigh do tinnscna in bliadain si le Niall O n-Domnaill.

Kl. Ianair; ocus cetri bliadna .xx. ocus cetri ced ocus mile ais an Tigerna.

Kl. Ianair; ocus .u. bliadna .xx., cetri ced ocus mile, ais in Tigerna.

Kl. Ianair; ocus .ui. bliadna .xx. ocus cetri ced, ocus mile, ais an Tigerna.

Kl. Ianair; ocus uii. m-bliadna .xx., cetri ced ocus mile, ais an Tigerna.

Kl. Ianair; ocus ocht m-bliadna .xx., ocus cetri ced ocus mile, ais an Tigerna.

Aodh mac Filip Meg Uidir do ég ag toighecht dia oilitri o Carraic San Sem; a eg a Cinn t-Sale, ocus a adhnacal a Corcaig, iar m-buaid ongtha ocus aithrighe.

Aodh Og mag Uidhir do marbad le Clainn Donnchada Ballaigh Megamrain.

Kl. Ianair; ix. m-bliadna .xx. ocus cetri ced ocus mile ais in Tigerna.

O Flannagain Tuaithi Ratha do marbad le clainn Aodha Meg Uidhir, for greis n-oidhche ino tigh sein.

Maidm Achaid Chille More la .H. Neill, ocus la .H. Raighallaigh, for Gallaibh. Is andsa m-bliadain so do rugadh Aedh Ruadh mac Neill Gairbh I Domnaill.

Kl. Ianair; ocus .x. m-bliadna .xx. ocus ceitri ced ocus mile ais in Tigerna.

Mag Uidir, .i. Gilla Dubh mac Pilip na Tuaighe, do éc in bliadain si, ocus a mac do rigad 'na inadh.

Kl. Ianair; ocus en bliadain dhec ar fiched ar ceitri ced ar mile ais in Tigerna.

Seaan mac Con Connacht mic Filib Meg Uidir do marbad le Teallach n-Eathach a feall.

Plaigh mor a Fearuibh Manach an bliadain si.

Eogan O Fialain dh'ec.

Domnall Ballach mac Briain dh'ec.

Kl. Ianair; ocus da bliadain dhec ar fhiched, ar ceitri ced ar mile, ais in Tigerna.

O Neill, .i. Domnall Bocc mac Eanri Aimreidh, do marbad la Cathanchaibh a n-Eanach, ocus Art Mac Cathmaoil, easpuc Clocair, do dul dh'ec in hoc anno.

Eoghan mac Neill Óig I Neill do righadh for Tir n-Eoghain.

Ingnadh mor d'fagsain a Feraibh Manach an bliadain sin, .i. muc do breith uain gil.

Uater a Burc, .i. mac mic Iarla Uladh, dh'ec. O Duibhgennain Chille Ronain .i. Matha Glas dh'ec; sai re senchus ocus fer tighi aided coitcinn ar feruibh Erenn.

Kl. Ianair; ocus tri bliadna dhec ar .xx. ar .cccc. ar mile.

Mac Maghnuis Meg Uidir, .i. Cathal mac Gilla Padraig, dh'ec la feili Miceil, ocus a mac 'na inadh, .i. Cathal Oc.

Eignechan O Domnaill do dhul ar creich ar a brathair fein .i. ar Donnchad. Donnchad do dul a toraighecht na creche, ocus Eigneachan do mharbhad do.

Samrad gortach an samrad so, ocus samrad na mer aithne do gorthai de.

Kl. Ianair; ocus ceitri bliadna dhec ar fiched, ar ceitri ced ar mile, ais in Tigerna.

O Domnaill, .i. Niall Garb mac Toirdhealbaigh an Fhina, do dul ar sluaiged sa Midhe, ocus breth air ocus ar began buidne tamall on t-shluaig, ocus a gabail re Galloib, ocus a cur co Manaind da coimed; ocus ar m-beth athaid a n-droch braighdeanus ann sin bas d'fagail do, ar m-beth en bliadain dec a tigernus Tíre Conaill ocus Ichtair Connacht; ocus Toirdhealbach mac Neill I Domhnaill do marbad an la cedna.

Sioc mor annsa bliadain si .i. seacht seachtmhuine re nodluic, ocus seacht seachtmuine 'na diaidh.

O Ruairc dh'ec, .i. Tadhg.

Cathal Boghur O Ruairc d'ec.

Kl. Ianair; ocus .u. bliadna dhec ar .xx., ocus ceitri ced ocus mile, ais in Tigerna.

Maidm t-Slebi Truim leas O Neill, .i. Eogan, ar Brian Óc .H. Neill ocus ar Conallchaib, ocus scathad Briain Oic co goirid 'na diaid sin an bliadain si; ocus Mac Conmidhe, .i. Conchabhar Ruadh, do theacht go Connachta fo an scathad sin Bhriain I Neill in hoc anno.

Niall mac Eogain I Neill do marbad le Cloind Chinath ar greis.

Donnchad mac Con Connacht mic Pilib na Tuaidhe dh'ec.

Glaisne mac Conchubhair I Raigilligh dh'ec.

Kl. Ianair; se bliadna dhec ar .xx. ar .cccc. ar mile.

Conchubhar mac Seain I Ragilligh dh'ec.

Kl. Ianair; seacht m-bliadna dhec ar .xx. ar cccc. ar mile.

Kl. Ianair; ocht m-bliadna dhec ar .xx. ar .cccc. ar mile.

Pilib mac Tomais Meg Uidir do gabail le na brathraib fein, .i. Tomas ocus Domnall ocus Ruadhri.

Kl. Ianair; ocus naoi m-bliadna dhec ar .xx. ar .cccc. ar mile.

Mag Uidir do gabail isin m-bliadain so la Domhnall m-Ballach, ocus Filib do leigean amach an la cedna.

Mag Uidir do leigean amach an bliadain cedna.

O Domnaill do ec ina laimdechus a Manaind isin m-bliadain si, .i. Niall Garb, ocus Nechtain do rigad for Thir Conaill.

Feradach, mac Duinn mic Con Connacht Meg Uidir, do marbad le h-Oirgiallaibh.

Kl. Ianair; ocus da .xx. bliadan ocus .cccc. ocus mile ais in Tigerna.

Brian mac Domnaill mic Mhuircertaigh I Conchobair, tigerna Sligigh, do dul dh'ec; ocus is tearc ma do bhi do Gaoidhealaibh Erenn sgeal budh mo na sin.

Maghnus Eoganach Mag Uidir dh'ec.

Maghnus mac Domhnaill meic Toirdhealbaigh an Fina do marbad.

Domnall O Breislen dh'ec.

Kl. Ianair; bliadain ocus da .xx. ocus .cccc. ocus mile ais in Tigerna.

Kl. Ianair; da bliadain ocus da .xx. ocus .cccc. ocus mile ais in Tigerna.

Brian mac Ardgail Meg Mathghamna, rí Oirgiall, do dul dh'ec.

Kl. Ianair; tri bliadna ocus da .xx. ocus .cccc. ocus mile ais in Tigerna.

Maghnus mac Ardgail Meg Mathghumna dh'ec.

Eimear Mag Mathghamna do marbad leis O Neill, .i. Eogan.

Kl. Ianair; cetri bliadna ar da .xx. ar. cccc. ar mile ais in Tigerna.

Aodh Buidhe mac Bríain Ballaigh I Neill, tuir einig ocus engnuma Ulad ana aimsir, ocus fer einig coitcenn da gach aon, do mharbhadh d'oen orchor fogha ar deiredh creiche a crich meg Aengusa, in hoc anno.

Kl. Ianair; u. bliadna ar da .xx., ar .cccc. ar mile, aois in Tigerna.

Ruaidri mac Tomais Meg Uidir dh'ec do bidhg.

Taiseach Muintire Peodachain dh'ec .i. Brían.

Mac Gafrada Ruaidh Meg Uidhir dh'ec, .i. Ardgal.

Kl. Ianair; se bliadna ar da .xx. ar .cccc. ar mile.

Mag Mathgamna dh'ec isin m-bliadain so, .i. Rugraidhe mac Ardghail.

Kl. Ianair; seacht m-bliadna ar da .xx. ar .cccc. ar mile.

O h-Uiccinn .i. Tadg Óg, sái re dan ocus cend sgoile Erenn na aimsir fein, do dul d'eg an bliadain si.

Domnall Ballach Mag Uidir do marbadh le macuibh Airt Meg Uidir, ocus le macaibh Mec Oirgiallaigh.

Mac Capa dh'ec, Cormac mac Gilla Crist.

Feidhlim mac Seain mic Filip I Raigilligh do ghabhail a fill le fer inait righ Saxan a n-Ath Truim, ocus a eg don plaigh iardain.

Kl. Ianair; ocht m-bliadna ar da .xx. ar .cccc. ar mile ais an Tigerna.

Kl. Ianair; naoi m-bliadna ar dá .xx. ar. cccc. ar mile ais an Tigerna.

O Raghilligh, .i. mac Seain da n-gorthai Eogan na fesogi, dh'ec.

Brian Óg O Neill dh'ec.

Kl. Ianair; deic m-bliadna ar dá .xx. ar .cccc. ar mile ais an Tigerna.

Mag Uidir, .i. Tomas Óg mac Tomais ele, do dul dochum na Roma do raith a anma.

Cathal, mac Tomais mic Tomais Meg Uidir, do marbad le Donnchad n-Duncathach mac Tomais Moir Meg Uidir, a fill.

Dondchad Dunchadhach do sgathad la h-Emand mac Tomais Meg Uidir an bliadain cedna,

Easpog Clochair dh'ec, .i. Piarras Mag Uidir.

Kl. Ianair; en bliadain dh'ec ar dá .xx. ar .cccc. ar mile ais an Tigerna.

Mag Uidir do thoighecht on Roim.

Mairgreg ingen I Cerbaill, bean I Conchobair Failge, .i. an Calbach, dh'ec.

Mainistir an Chabhain do loscadh leis an m-Brathair O Mothlain.

Kl. Ianair; da bliadain dhec ar da fiched, ar .cccc. ar mile, ais an Tigerna.

O Domnaill, .i. Neachtain mac Toirrdhealbaigh an Fhina, tigerna Thire Conaill ocus Cenel Muain, ocus Innsi h-Eogain, fer crodha cosantach ocus cinnlitir cogaid ocus sithe an tuaiscirt, ocus do chuir moran coicrich fa na chumachtaibh, do marbad le clainn Neill I Domhnaill, a derbrathair fein, a n-dubrail oidhchi feile Brenainn do t-sonradh, ar m-beth ocht m-bliadna dhec a tigernus Tire Conaill fa buaidh conaich ocus cosscair.

Kl. Ianair; tri bliadna dhec ar da .xx., ar. cccc. ar mile, ais an Tigerna.

Mag Mathgamna dh'ec, .i. Aodh Ruad mac Rugraidhe, ocus Feidhlim mac Briain Meg Mathgamna do rigad for Oirghiall.

Kl. Ianair; ocus cetri bliadna dhec ar da .xx., ar .cccc. ar mile, ais an Tigerna.

Rugraidhe mac Neachtain I Domnaill do mharbad co mirathmar, dean urchar do cloich a Caislen Innsi amach, do Domnall mac Neachtain I Domhnaill, ar m-beth da bliadain a tigernus Tire Conaill do Rugraidhe roime sin.

Brian mac Concubair I Raighilligh dh'ec.

Kl. Ianair; u. bliadna dhec ar dá .xx. ar .cccc. ar mile.

O Neill do rigad for Tir n-Eogain, .i. Enri mac Eogain mic Neill Oig.

Kl. Ianair; se bliadna dhec ar dá .xx., ar .cccc. ar mile, ais an Tigerna.

O Domhnaill, .i. Domnall mac Neill I Domnaill, do marbad le clainn Nechtain I Domhnaill a tigh Buidhin an bliadain si, ar m-beth da bliadain a tigernus Tíre Conuill fa buaidh smachta ocus riagla, ocus Aodh Ruadh mac Neill I Domnaill do gabhail an bliadain si, ocus righ do ghairm do Toirdhealbach Cairbrech mac Neachtain.

O Neill dh'ec .i. Eoghan mac Neill.

Kl. Ianair; seacht m-bliadna deg ar dá .xx. ar .cccc. ar mile ais an Tigerna.

O Conchobair Fhailghe, .i. an Calbach, an mac Gaoideal dob ferr eineach ocus uaisle, ocus fa treissi ar Galloib ocus ar Gaoidheolaibh do bhíth a n-Erinn, ocus is mo do mill umpu an aon aimsir ris, do dul dh'ec.

Mac Samradhain .i. Tomas dh'ec. O Ruairc .i. Lochlainn dh'ec.

Art mac Eogain I Neill dh'ec.

Maidm na Graine do thabhairt do Mag Uidir for Lochlainn mac Taidhg I Ruairc, .i. O Ruairc.

Kl. Ianair; ocht m-bliadna dhec ar dha fiched, ar .cccc. ar mile, ais an Tigerna.

Mac Uilliam Burc dh'ec, .i. Emann.

Barun Dealbhna dh'ec, .i. Semus Nuinnsinn.

Mac Diarmada Muighe Luirg, .i. Tomaltach mac Conchobair mic Aodha, dar chomhainm Tomaltach an Einigh, rogha Gaoidheal Erenn, dh'ec; .i. an fer naar diult daim na deoraigh do leith a chuil na h-oighthe riam in g-cein do mhair; beannacht lais.

Kl. Ianair; naei m-bliadna dhec ar da .xx., ar .cccc. ar mile, ais an Tigerna.

O Briain, righ Tuadhmuman, dh'ec.

Glaisne mac Chonchubhair I Raighilligh do marbad la clainn Rughraide Meg Mathgamna.

Kl. Ianair; tri fichid bliadan ar .cccc. ar mile ais an Tigerna.

Aodh Ruadh O Domnaill, righdamhna Cenel Conuill, do leigean as a laimdechos.

Mag Samraghan dh'ec .i. Eoghan.

Kl. Ianair; bliadain ar tri xxit, ar .cccc. ar mile, ais an Tigerna.

Maidhm mor do thabhairt a Cind maghair an bliadain si ar .H. n-Domnaill .i. Toirrdhealbach Cairbrech, do clainn Neill I Domnaill, ocus O Domnaill do gabail and, ocus a scathad na diaidh sin; ocus Aodh Ruad mac Neill Gairb do righadh na inadh do chomairle De ocus daoineadh.

Feidhlim mac Eoghain I Neill dh'ec.

O Conchobair Donn dh'ec, .i. Aodh. Tadhg, mac Cormaic mic Diarmada mec Carrthaigh, dh'ec.

Aongus Macraith dh'ec.

Mac Cathmail dh'ec, .i. Brian.

Kl. Ianair; da bliadain ar tri .xx. ar .cccc. ar mile ais an Tigerna.

Brian mac Pilip Meg Uidir do marbadh re Cenel Eoghain an bliadain sin.

Mainisdir prathar mionur do tionnsgnadh a Muineachan in hoc anno.

Kl. Ianair; ocus tri bliadna ar tri fiched ar .cccc. ar mile ais an Tigerna.

Iarla Desmumhan, .i. Semus, ceinnlitir Gall an deiscert, ocus comrair einigh ocus gaisgidh na n-Geraltach, dh'ec in hoc anno.

Tadhg mac Eoghain I Conchobair dh'ec an bliadain si.

Mac Donnchada Tire h-Oilella, .i. Tadg mac Tomaltaig Moir, mortuus est.

Enri mac Feidhlim I Raigilligh do marbad do Donnchad Mag Uidir.

Kl. Ienair; ceitri bliaghna ar tri fiched, ar .cccc. ar mhile, aois an Tigerna.

Conn mac Neill I Dhomhnuill, riodhamhna Chineil Conuill, ocus Aonghus mac Neill I Dhomhnuill do mharbadh le h-Eignechan .H. n-Domhnuill a bh-Fhinn Dhruim.

Tadhg mac Toirrdealbaigh Ruaidh I Chonchubair, leith ri Connacht, d'ég .i. duine do bá tuigse t-treighe a g-Connachtaibh iona aimsir fein.

Kl. Ienair; chúig bhliaghna ar tri fiched ar ceitri ced ar mhile aois an Tigherna.

Ir Magranuill, .i. mac Cathuil Ruaid, mortuus est in hoc anno.

Gormlaith Chaomhanach ingen mheic Murchadha, bean I Neill .i. Einri mheic Eoghuin I Neill, d'ég.

Mac Ribhertuigh d'ég .i. Cú Chonnacht.

Kl. Ienair. Sé bliaghna ar thrí fichit ar cheithri ced ar mhile aois an Tigherna.

Ri Tuaghmhumhun, .i. Tadhg O Briain, coinneal ghaisgidh ocus engnumha Leithe Mógha, mortuus est in hoc anno.

Maidhm ar Ghalluibh la O Conchubhair Fhailge, .i. Conn mac an Chalbaigh, ionar marbadh Seadhun mac mheic Tomais ocus moran eile.

Righ Oirghiall d'ég, .i. Feidhlim mac Briain mheg Mhathuna.

Kl. Ienair. Seacht m-bliaghna ar tri .xx., ar .cccc. ar mhile, aois an Tigherna.

Iarla Deasmhumhun, .i. Tomas mac Sémuis mheic Geróid Iarla, do mhilledh a n-Droicheat Atha leis an ///n-Giustis núadh.

Mac Donnchada Tíre h-Oilella, .i. Ruaidhri mac Conchubhuir mheic Donnchadha, mortuus est in hoc anno.

Mag Ranuill, .i. Cathul Og mac Cathuil Ruaid, mortuus est in hoc anno.

O Cathain .i. Maghnus ar an m-bliaghuin chédna.

O Ruairc .i. Tighernan, cinnlitir ocus coimhedaigh ///t-Slechta Aodha Finn, mortuus est in hoc anno.

An Gilla Dubh mac Cormuic Bhallaigh do mharbadh le Máoil Seachluinn mac Taidhg mheic Briain mheic Donnchada.

Mac Con Mara, tigerna Chloinne Cuilen, .i. Seadhun mac Meiccon mheic Síoda, mortuus est.

Cathul mac Cathail Ruaid Meggranuill mortuus est in hoc anno.

Domhnull O Mórrdha, righ Láoidhisi, mortuus est.

O Cinneidigh Donn, .i. Seadhun mac Tomais, leith ri Urmhumhun, mortuus est.

O Máille, .i. Tadhg mac Diarmada, mortuus est in hoc anno.

O Máol Chonuire, .i. Torna mac Maoilín, mortuus est.

Ri Oirghíall d'ég, .i. Eoghun mac Rúghruidhe.

Maidhm Croisi mhuighe Croinn la mac Uilliam Chloinne Riocuird, .i. Uilliog Ruadh mac Uilliog an Fhíona, air O Cheallaigh ocus ar Riocurd a Burc, dú ar thoitedur iomarcadh daoinedh.

O Ceallaigh Maine d'ég, .i. Aodh mac Briain.

O Raigilligh d'ég, .i. Cathul mac Eoghuin, caidhcís ria nodluig.

Kl. Ienair.; ocht m-bliaghna ar thri .xx., ar .cccc. ar mhile, aois an Tigherna.

Mag Carrtuith Mór, .i. Domhnull mac Taidhg mheic Domhnuill Óig, mortuus est in hoc anno.

Bean an fhir chédna, .i. Sadhbh ingen Uillic mheic Riocuird Óig, d'fhaghuil bhais.

O Ceallaigh tigherna O Maine, .i. Aodh mac Uillíaim meic Mhaoil Seachluinn, do éc.

Iarla Deasmhumhun, .i. Tomas mac Sémuis mheic Geróid, do ///dhí-cheannud a n-Droicheat Átha.

Mac Donnchada Thíre h-Oilella d'ég, .i. Rúaidhri mac Conchubhuir.

Magranuill .i. Cathul d'ég.

Baile I Raighilligh ocus mainistir an Chabháin do losgudh le Galloibh.

Torna O Mháol Chonuire d'ég.

O Cathan d'ég, .i. Maghnus.

Kalluinn Ienair; naoi m-bliaghna ar thrí .xx., ar .cccc. ar mhile, aois an Tigherna.

O Cerbuill .i. Donncudh mac Taidhg mheic Taidhg mheic Ruaidhri mortuus est.

Brian Maineach mac Donnchuidh mheic Aodha Mheg Uidhir do mharbhudh la Emunn Mag Uidhir agus le cloinn Filib Mheg Uidhir. Eogun mac Aodha Mheg Uidhir do mharbhudh la cloinn Filib chédna.

Sluaigheadh lá O n-Domhnuill, .i. Aodh Ruadh, a n-Iochtar Chonnacht, ocus a m-bráighde do ghabhail dó; ocus sluaigh Iochtuir Chonnacht do bhreith lais a g-cenn mic Uilliam Burc, ocus a n-dul assin a g-Cloinn Riocuird, ocus an Machuire Riabhach, ocus Baile an Chláir, .i. Baile Mheic Uilliam, do losgudh léo.

Mac Uilliam ocus O Briain do bhreith orrthu, ocus mac I Chonchubhuir Chorcumrúadh do mharbudh leo; ocus O Domhnuill do theacht da thigh fa bhuaidh.

O Gadhra d'ég .i. Eoghun mhac Tomultaigh, ocus Eogan Óg a mac d'ég.

Kl. Ianair; deic m-bliadna ar tri .xx., ar .cccc. ar mile, aeis in Tigerna.

Mac I Conchobair Fhailge, .i. Tadhg mac in Chalbaigh mic Murchada, do dhul dh'ec obann.

O Conchobair Corcumruad, .i. Conchobar mac Briain Oig, do marbad isin Leth Indse co droch comairlech le clainn a derbrathar fein, .i. le clainn Donnchada I Conchobair.

Pilip mac Tomais mic Filip Meg Uidir dh'eg.

Ruadhri Bacach O Neill do marbad a Tobran le cloinn Airt agus le cloinn Bhriain Óig.

Maidhm do thabhuirt do chloinn I Neill, .i. clann Einri, ar chloinn Airt agus ar chloinn Bhriain Óig, ionar marbhudh Einri mac Airt; ocus bí Airt I Neill ocus Toirrdhealbach Ruad mac Briain Óig.

Mac Donnchaidh an Choruinn do marbudh, .i. Brían mac Taidhg, la mac Donnchuidh Thíre h-Oilella, .i. Tadhg mac Briain.

Kl. Ianair; aen bliadain deg ar tri .xx. ar .cccc. ar mile ais an Tigerna.

Tadhg mac Toirdhealbaigh mic Murchada na Raithnighe, tigerna Aradh, d'eg.

Caislen na h-Oghmaidhi do gabhail leis O Neill, .i. Enri mac Eogain, ocus slicht Airt do chur a Tir Conaill.

Ruadhri mac Donnchaidh mic Aedha Meg Uidhir do mharbad le Colla mac Aodha Meg Uidir. Donnchad Óg mac Donnchaid mic Aodha do lenmuin Colla, ocus Colla ocus a mac do marbad.

Aodh, mac Briain mic Pilip na Tuaighe Meg Uidhir, dh'ec.

Kl. Ianair; da bliadain deg ar tri .xx. ar. cccc. ar mile aeis an Tigerna.

O Cathan, .i. Ruadhri mac Maghnais I Cathain, dh'ec.

Mac Suibhne Fanad do marbad a maidm an Tapadhain, .i. Maol Muire.

Clann Meg Radhnaill, .i. Concubar ocus Mael Sechlainn ocus Cathal Og, dh'ec.

Gofraidh O Cathan agus Cormac mac Uibhilin, ocus Rugraidhe mac Uibhilin, dh'ec.

O h-Eidirsgeoil Mor, .i. Fingean, do dul deg 'na tigh fein iar n-denamh oilethri san Seam, ocus a mac .i. Tadg mac Fingein dh'ec co h-aitirech ria cind mis iar m-bas a athar, iar teacht on oiletri cedna.

Baile na Gaillmi do losgudh.

Mac Feorais dh'ec, .i. Tomas. Mainistir na m-Brathar Minur do tinndscnam a Dun na n-Gall in bliadain cedna.

Kl.Ienair; tri bliaghna déug ar tri .xx. ar .cccc. ar mhile áois in Tigerna.

Donnchadh mac Aodha Mag Uidhir do dhol d'ég.

Ruaidhri mac Airt I Neill d'ég an bhliaghuin si, ocus foghmar an laoi dhuibh.

O Cinneidigh .i. Diarmait mac mheic Taidhg, tigerna Urmhumhan Uachtaraighe, d'faghuil bhais.

Mag Eochagan, .i. Cúchoigriche, tighearna Cheinil Fiachaidh, do marbhudh le ///cloinn Fherguil.

Mathghamhain, mac Toirrdhealbhaigh meic Briain I Bhriain, d'fhaghuil bais an bliaghuin si; riodhamhna Tuaghmhumhan.

O Conchubhuir Fhailge .i. Conn mac an Chalbaigh meic Murchaidh, uachtaran einich ocus engnamha ///ghaoidheal Laighean, d'faghail bháis iona longfport féin.

O Mathghamhna an Fhuinn Iartharuigh, .i. Conchubhar, mac Diarmada, meic Domhnaill, meic Fínghin meic Diarmada Móir, do dhul d'ég gu h-aithrigheach iona longfport fein an Ard an Tennail.

Mac I Eidirsgeoil Mhoir, .i. Diarmait, d'fhaghail bháis.

Mac Meg Carrthuigh Móir, .i. Cormac mac Taidhg mheic Domhnaill Óig, tanuiste Desmhumhan, d'fhaghuil bháis an bhliaghuin si.

Mac mheic Domhnuill na h-Albun .i. Gilla Esbuig mac Alustrainn mheic Domhnuill mheic Eoin na h-Ile, do ec in hoc anno.

O Conchubhair Connacht d'fhaghuil bhais an bhliaghain si, .i. Feilim mac Toirrdhealbaigh Óig, leithri O Muiredhaigh, do thuitim lé Síol g-Ceallaigh Atha Líag.

Kalluinn Ienair; ceithre bliaghna dég ar thri fiched ar .ccc. ar mhile áois an Tigherna.

O Madagan .i. Murchad mac Eoghuin, tigherna Shil n-Anmchada, d'faghuil bhais an bhliaghuin si.

Mac I Bhriain .i. Tadhg mac Conchubhuir, agus Diarmuid mhac an Easbuig I Bhriain, do thegmhail a g-coimeasgur re cheile, agus Tadhg do chur laimhe a n-Diarmuid da ghabhail, ocus tug Diarmaid builledh do chloidheamh do Thadhg gur lic a inchinn amach an ait an bhuillidh. Gabhuis Tadhg eisein agus aincios 'na dhiaigh sin é, ocus beiris leis a laimh é, ocus teasda Tadhg iarum, ocus crochuis O Briain Diarmaid a g-cionaidh marbtha a meic; ocus do ba do mhóirscéluibh Dal g-Cais an dis sin torchair.

Easbug Daire d'ég, .i. sair Niocol.

Kl. Ienair; cuig bliaghna dég ar thrí .xx. ar .cccc. ar mile áois an Tigherna.

Aaodh mac Neachtain I Dhomhnuill, riodhamhna Chineoil g-Conaill, do bhathut a g-coite ar bhun Bhanna.

Aodh mac Eoghuin I Neill do dhul d'ég an bhliaghuin si.

Mac Murchada, rí Laighean, .i. Domhnall Riabhach mhac Geruilt, d'fhaghuil easgair dar brisiudh a chos, agus a bhás do theacht de sin.

O Ferghuil d'eug, .i. Seadhun mac Domhnuill.

Kl. Enair; sé bliadnae .x. ar tri .xx.it ar cethri ced ar mile áiss an Tigernai.

O h-Uiccinn, .i. Brían mac Ferghail Ruaid, cend scoile Erenn ocus Alban, do dol dh'ec an bliadain si.

O h-Eghra Riabhach, .i. Uilliam mac an Esbuicc, dh'éc in bliadain si.

Kl. Enair. Seacht m-bliadnai .x. ar tri .xx.it ar .cccc. ar mile oeiss in Tigernai.

Sluaiged la h-Ua Neill a Tir n-Oedhai, ocus an tír do milled ocus do loscadh lais.

Oedh mac Donnchada mic Tomaiss Még Uidhir dh'ec.

Brien mac Concopair Óic mic Concopair Ruaid Mecc Uidhir dh'ec aighthe nodlacc.

Plágh mor do teacht a cuan Essai Rúaid, da n-dechaid moran doene a Tir Conaill, ocus co h-airighi Mac an Bhaird.

Kl. Enair; ocht m-bliednai .x. ar tri .xx.it ar .cccc. ar mile oeiss in Tigernai.

Corbmac Mag Carthaigh do spochad re cloinn ///Diermadai an Dúnaidh.

Mac an Baird Tiri Conuill, .i. Gofraid, do dol d'écc an bliadain sin don phláidh.

An barún Delbhnai d'éc don plaidh.

Goeth mor isin bliadain si co gar don nodluicc na díeigh.

Mac Rithbhertaigh, .i. Cithruad, d'ég.

O Cobthaig dh'ec, .i. Muircertach Bacach.

Eassaonta mhór do fháss etir Chloinn Maol Ruanaidh ocus Magh Luirc co h-uilidhe. Mac Diarmada, .i. Conchobar mac Conchobair mic Dhiarmada, ocus a braitri feissin, .i. slicht Conchobair mic Dhiarmada, ocus Ruaidri Óg mac Ruaidri Chaoich mic Dhiarmada .i. tanaisde Mhoighe Luirg an tan sin, do éirghe a n-aghaid a chéli, ocus an tír dob ferr do bhí an Erinn ar a méid féin do mhilled dhóibh dibhlínaibh. Mac Diarmada cona braitribh do tharruing mic Uillíam Búrc .i. Ricard O Cuairscidh ar chuid Ruaidri mic Diarmada don tír, ocus gan anmhuin a córaidh na a comtrom ris. An tir do mhilledh do Mac Uilliam etir chill ocus tuaith, ocus gan do mhaith do dhénum dhó isin tír acht a milledh, ocus a b-fhágbáil aimhréidh ag imtheacht dhó. Sligech do gabháil do Mac Uillíam don chur sin, ocus a mac d'fhágbáil na bardacht dó. Iar n-imthecht mic Uillíam, imorro, as Magh Luirg, ocus íar m-beth tri hoidhche an Ard Laodhach ag cnám ocus ag coimmilled egluse ocus aois ealadan mic Dhiarmada, tanic Ruaidri mac Diarmada don tír, ocus ro shuidhidh a caoraighecht im Ard Charna, ocus assin co Búill ar gach taoibh, ocus téid fein ar Cruachán ocus ro goired tigerna dhe ar beolaibh Conchobair mic Conchobair mic Diarmada. Ocus ro gabadh an charruic leis iarsin; ocus ro bhói a trén na tíre osin amach. Ocus ro marbadh, imorro, aon mac mhic Diarmada ar an carruic don chur sin, .i. Tadhc mac Conchobair mic Diarmada, d'urchor do shoighid.

Kl. Enair; noi m-bliedhnai .x. ar tri fichit ar .cccc. ar mile óiss in Tigernai.

Kl. Enair; cetri fichit bliadan ar .cccc. ar mile oeiss in Tigernai.

Eoghan mac Nell I Domhnuill, damhnai righ Tíri Conaill, do marbad re h-Eccnechán mac Neachtain Ui Domnaill, a c-Cluain Loegh an bliadain sin, i f-fell.

Mac Maghnussai in t-Senaidh dh'ec, .i. Cathal Og.

Rudhraidhe, mac Rudhraidhe mic Neachtuin Ui Domnaill, do marbad la clainn Nell Uí Domnaill.

Ferghal mac Eochada dh'ec.

Eogan mac mic Airt dh'ec.

Kl. Enair; bliadain ar cetrae .xxit, ar .cccc. ar mile, oeiss an Tigernai.

Toirrdhelbach Mag Uidhir do marbad a f-fell re cloinn Donnchaid Óicc mic Donnchaid Meg Uidhir.

Ua Neill .i. Conn do gabhail an bliadain so.

Mac Conmidhe, .i. Concobar Ruadh, sái re dán, do dol dh'ec an bliadain soin.

Brien mac Felim Uí Raighilligh dh'ec.

Slaine ingen Uí Briain, ben mic Uilliam Clainni Ricaird, .i. Uilleg Ruad mic Uillec in Finae, .i. feithem coitcend do dámhaib ocus do deoradhaib Erenn, dh'ec.

Kl. Ienair; da bliadain ar ceitri fichit, ar .cccc. ar mile, ais an Tigerna.

Conn mac Aodha Buidhe mic Bríain Ballaigh I Neill, richoinneall oinigh ocus daennachta, tinnlaicthe ocus tabartais an tuaiscert uile, d'faghail bais an bliadain se.

Diarmaid mac Uilliam mic an Easpuig I Eadhra do marbad le ///clainn I Eaghra Buidhe.

Donnchadh Óg Mag Uidhir do marbad d'urcor soighdi.

Kl. Ienair; tri bliadna ocus ceitri fichit, ocus .cccc. ocus mile, aois in Tigerna.

Easpog Clochair dh'ec, .i. Rossa mac Tomais Óig Meg Uidhir.

O Fialan dh'ec, .i. Seaan mac Eogain.

O Cianan d'hec, .i. Ruaidhri mac Taidhg.

O Domnaill, .i. Aodh Ruadh, do dhul sluagh a machaire Oirgiall, ocus Aodh Óg mac Aodha Buidhe do dul sluag ele ann; ocus an Sradhbaile do losgadh leo, ocus O Domnaill do teacht slan da tigh.

Kl. Ienair; ceitri bliadna ocus ceithri fiched, ocus .cccc. ocus mile, ais in Tigerna.

Maidhm Mona Lagradhi isin m-bliadain so.

Mag Mathgamhna, .i. Remann mac Rughraidhe meic Ardgail Moir, dh'ec a n-Droichet Atha a m-brathidenus fhada.

Murchad mac I Conchobair Fhailge, .i. mac Cathair, do marbad d'urchar do th-shuighid.

Easpag Daire dh'eg, .i. sar Nicol. mallacht ort a Nicolais I Siridain, tug oram mo leabhar do milliud re droch litir. Mesi Brian mac Diarmada, ocus tabhradh gach aon lefes bendacht ar m-anaim.

Kl. Enair; cúicc bliadnae agus cethri fichid, agus .cccc. ocus mile, óeiss an Tigerna.

Aedh Ócc mac Oedha Buidi Uí Neill, ridamnae slechtae Briain Ballaigh, dh'ec.

Ri Saxan, .i. Cing Risderd, do marbad a cath, ocus cúicc ced .x. do marbad h-imaille fris.

Maidhm na Muaidhe do tapairt d'Ua Domnaill, .i. Oedh Ruadh, for Galloib ocus Goedhelaibh cuiced Connacht.

Gilla Patraic Ua h-Uiccind mortuus est.

Mac Uilliam Burc, no Clainni Ricaird, dh'ec isin bliadain so, .i. Uillec.

An Barrach dh'ec.

O Suilleabain Berre dh'ec.

O Baighill do chur a tigernas de, ocus a mac do chur ina inadh, .i. Niall mac Toirrdhelbaigh.

Art an Bogain O Conchobair do marbad da derbhrathair fesin, .i. do Chathair.

Kl. Enair; se bliadnae agus cetri fiched agus .cccc. agus mile.

Mac Diarmada Muigi Luirg, .i. Ruaidri Óg mac Ruaidri Caich mic Oedhai, dh'ec .i. fer mor doeinech mor caithmech mor conaigh, dh'ec ar an c-carraicc; agus Concobar mac Corbmaic mic Tomaltaigh an Oinigh do righad na inadh.

Mag Radhnuill, .i. Tadg mac Cathail, dh'ec.

Moeileachlainn ocus Ruaidri, da mac Mic Donnchada Tire h-Oilellae, do marbad la clainn Domnuill Chaim mic Mic Donnchada.

Sean Buidhi mac Eoghain mic Nell Óig Uí Nell dh'ec.

Domnall Óg mac Cartain, sái n-oinigh, mortuus est.

An Barrach Mor do marbhadh.

Kl. Ienair; seacht m-bliadnae agus cetri fiched, agus .cccc. agus mile, oeis an Tigernai.

Ua Raighilligh, .i. Toirdealbach mac Seain mic Eoghain Ui Raigilligh, dh'ec.

Brien mac Briain Ballaich, mic Oedhae mic Felim Ui Concobair, dh'ec.

Ua Moel Conuiri, .i. Sigrad mac Seain Rúaid, dh'ec.

O Moel Sechluinn, .i. Laighnech mac Cuirc mic Corbmaic Ballaigh, do marbad la Conn mac Airt mic Cuinn mic Corbmaic Baillaigh Uí Moeilechluinn.

Brien mac Eogain mic Nell Oicc Uí Nell dh'ec.

Sean mac Conchobair mic Oedhugain dh'ec.

Aod mac Briain mic Ferghail Ruaid Uí Uiginn dh'ec.

Mac Goisdelbh, .i. Sean, dh'ec.

An Dalatúnach, .i. Emunn mac Pieruiss, dh'ec.

Kl. Ienair; ocht m-bliaghna agus ceithre fiched, agus .cccc. agus mile, áois an Tigherna.

Domhnall mac Domhnuill meic Neill I Dhomhnaill do chrocadh le h-Aodh mac Aodha Ruaidh an bhliaghuin-se.

Maol Muire mac Taidhg Óicc I Uiginn, sáoi re dán, d'fhaghuil bháis an bhliagain-se.

Domhnall Gorm, mac Alustruinn mheic mheic Domhnaill, do mharbadh ré cloinn an aba mheic Alustruinn.

O Cealluigh d'ég, .i. Maoil Seachluinn mac Aodha mheic Briain.

O Flannagan Tuatha Ratha, edhon Toirrdhealbhach mac Gilla Iosa, d'ég.

O Túathuil .i. Eumann do marbhudh le cloinn Taidhg I Chearbhuill.

Tadhg mac Aodha mheic Toirrdhealbhuigh Chárruigh I Chonchubhuir d'ég.

Mag Uidhir d'ég, .i. Eumann mac Tomáis Óig.

Righ Albun, .i. Sémus Stiobhard, do mharbhudh a g-cath le na mac fein, .i. Sémus Óg.

Brian mac Aodha Buide I Neill d'ég don ghalur bhreac.

Mac an Bhaird Oirgheall d'ég, .i. Núadha.

Kl. Ienair; nai m-bliadnae ocus cetri fiched, ocus .cccc. ocus mili, oeiss in Tigernai.

O Nell, .i. Enri mac Eogain, di dol dh'éc.

O Baighill, .i. Toirrdhealbach mac Nell Ruaidh, mortuus est.

Ua Fialáin, .i. Eogan Ócc, ocus Aithirne O h-Eoghusa, dh'éc.

Mac Uibhilín, .i. Sinicín Rúadh, do marbad la Ualtair mac Uibhilin.

Sethraigh mac Gilla Patraic, rí Osraidhe, d'écc.

Ua Cerbaill, .i. Sean mac Moel Roanaidh, dh'ec.

Mac Ui Conchobair Ruaidh, .i. Toirrdhealbach mac Felim Find, .i. fer a oessai as ferr do bui da chinet, do marbad le clainn Ruaidri Oig mic Ruaidri Caoich, .i. re Tadg ocus re Corbmac, a ///c-cairgín riebhuch ///clainni Faghartaig.

An Calbhach mac Ui Domnuill dh'ec.

Diermuitt, mac Taidg mic Domnuill Oic Meig Carthaigh, do marbad le h-Ierlai n-Desmuman, .i. Muiris mac Semuis.

Ua Fíaláin, .i. Eogan Óg mac Eogain, dh'ec.

Kl. Ienair, ocus deich m-bliadna ocus cetri .xxit ocus .cccc. ocus mile aoiss in Tigernai.

Toirrdealbach mac Toirrdealbuigh Ui Baighill d'faghail baiss ier na esccor in bliadain sin.

Mac Domnuill na h-Alban, .i. in tigerna ócc, an t-oen duiniu dob ferr ind Erinn na ind Albain a comaimsir friss, do marbad co mí-rathmar le fer tétt Erennach inda seomrai fein, .i. Diermaid Cairbrech.

In Dilmuinioch, .i. Emand mac Tommaiss mic Geroit, dh'ec.

Ua Concubair Ruad, .i. Fedlim Finn mac Taidg Uí Conchubair, fer cogtach cathardhai comtimarcctech crechlinmar, dh'ec in bliadain cednai.

O Catháin, .i. Sean mac Diarmadai mic Aibne, do gabail le luing tanic a h-Albain.

Kl. Ienair, ocus aon bliadain dhec ocus cetri fiched, ocus .cccc. ocus mile, aois an Tigerna.

Feidhlim mac Aodha mic Eogain I Néill do mharbad le Brian mac Remaind mic Rughraidhe Meg Mathghamna.

O Raighilligh dh'ec in sa m-bliadain si, .i. Sean mac Toirdhealbaigh, ocus O Raighilligh do gairm do Sheathan mac Cathail.

Kl. Ienair; agus da bliaghuin dég agus ceitre fiched .cccc. agus mile áois an Tighearna.

Barun Sláine d'ég do f-plaidh alluis, .i. Sémus Plemeann.

Cuid do chrann na croiche naomhtha d'fhaghuil isin Roimh adhlaicthe a d-talamh, .i. an chlár báoi os ceann na croiche iona raibhe sgriobhtha Iesus Nazarenus Rex Iudeorum; ocus do frith sgriobhtha san ionadh chedna gurub í Elena ro fholaigh é.

Ceann na sleighe lér loit Longinus corp Crist do chur chum na Romha isin m-bliaghain-se do thighearna na d-Turcach.

Finghin O Mathúna d'ég.

Mac Gilla Fhinnen dh'ec, .i. Toirdhealbach mac Bríain.

Magraith, comharba termaind Dabeog, .i. Diarmaid mac Marcais mic Muiris Meic Nicoil mic Andrias, dh'ec.

Tadhg Cam O Cleirigh, sencuidh cineil Conall, dh'ec.

Aongus mac an Ulltaigh, brathair minur, dh'ec.

Mac Con Mara, .i. Cu Mhedha mac Seaain, dh'ec.

An Calbach mac I Conchobair Fhailge, .i. mac Cathair, do mharbad le maistir Gart.

Seaan Buidhe mac Eogain Meg Mathgamna dh'ec.

Gofraigh O Cathain do marbad le Baltar mac Uibelin.

Cormac mac Diarmada meic Ruaidri Caoich, ocus Diarmaid Riabach a mac, do marbad le clainn Ruaidhri Oig mic Ruaidhri Caoich mic Aodha, a n-Garga na Coilleadh Amhreidhe.

Kl. Ienair, ocus trí bliadna dég agus ceitre fiched, agus .cccc. agus mile, áois an Tigerna.

O Néill, .i. Conn mac Einrí, do mharbhudh le na dhearbhráthuir féin, .i. Eunrí Ócc, agus Einrí Óg do ghabhail tigerntuis Thíre h-Eoghuin.

Finnguala ingen an Chalbhuigh I Chonchubhuir, bean dércach daonnachtach fa mó clú na h-aimsir, do dhol d'ég an bhliaghuin sin.

Mac Conmidhe, .i. Tadhg, mortuus est.

Brian, mac Neill ghalta mheic Briain Bhallaigh I Neill, do mharbhudh lé Brian mhac Muirceartaig Mheug Aonghusa, a n-dioghuil a athar.

Kl. Ienair; ceithre bliaghna dég agus ceithre fiched, agus .cccc. agus mile, áois an Tigerna.

Inghen I Dhomhnuill, .i. an inghen dubh, bean Néill mheic Cuinn, d'fhaghail bhais an bhliaghain se.

Sean mac Eogain mic Neill Ghairbh h-Í Domnaill, sáoi dhuine uasuil ar a chuladh féin, do ghabhail le sliocht Donnchadha I Ghallcubhuir, agus a thairbheart do Chonn mhac Aodha Ruaidh, agus a chrochad gan chairde le Conn.

Domhnall mac Eoghain I Chonchubuir, tighearna Sligigh agus ó shliabh anúas, do marbadh la cloinn Ruaidhri mheic Toirrdhealbuigh I Chonchubhuir a m-badhun chaislein Bhuana Finne.

O Ferguil d'ég, .i. Conmhac mac Seadhuin.

Eoin Bearnach mac Maol Mhuire meic Suibhne do marbhudh la Tadhg mac Cuinn meic Domhnuill I Néill.

Mac mheic Uilliam Burc do mharbhudh fa chaislén Sligigh an bliaghuin-se, .i. Uilliam mhac Riocuird mheic Eumuinn mheic Tomais a Burc.

Kl. Enair; .u. bhliaghna déug agus ceitri fiched, agus .cccc. ocus Mile, aois an Tigherna.

Maidhm an Cheidigh Dhraoinigh do thabhuirt ar thighearna Sligigh, .i. ar Fheilim mac Maghnuis I Choncubhuir, ris O n-Domhnuill, .i. ré h-Aodh Ruadh.

Mac Donchadha Thiri h-Oilealla, .i. Tadhg mac Briain meic Conchubhuir, do mharbadh leis O n-Domhnuill, .i. Aodh Ruadh mhac Neill Ghairbh, a m-Bel an Droichit. O Dubhda, .i. Eogun Caoch mhac Ruaidhri, do marbhudh ann fós; agus Brian Caoch mhac Taidhg mheic Eoguin I Choncubhuir, agus Tadhg mhac Domhnuill mheic Eoghain do marbadh ann fós. O Gadhra do ghabhail ann, .i. Diarmuid mhac Eoghain. Morán do mharbudh agus do bathadh ann do dheagh dháoinibh Iochtuir Chonnacht o sin amach.

Mac Uilliam Chloinne Riocuird do theacht a n-Iochtur Chonnacht, agus an mhéid nár mhill O Domhnuill roimhe sin do mhilledh do uile.

Tomultach mhac Cormuic Bhallaigh d'ég.

Ua Duibhgiodhnán Chilli Rónan, .i. Dubhtach mac Mhaoileachluinn mheic Mhatha Ghlais, sáoi re seanchus agus re filighecht, d'ég.

O Domhnuill do dhul gu teach righ Albun an bliadain sin.

Mac Samhraghain, .i. Feidhlim, do bhathadh, agus Mac Samhraghain do ghairm iona ionadh do Dhomhnall Bhernach.

Mac an Baird .i. Aodh dh'ec.

Kl. Ienair; se bliagna dég agus ceithri fichit, agus .cccc. agus Míle, áois an Tigherna.

Mág Uidhir, .i. Seadhan, do ghabhail a d-Tearmonn Mheugrath le Conn mhac Aodha Ruaidh I Dhómhnuill, agus a lán d'eachaib ocus d'édáil do bhúain d'Aodh .H. Dhomhnuill agus do Mag Uidhir don bhreisim sin.

O Mathghamna an Fuinn Iartharuigh, .i. Fingin, feicheamh coitcheann daonnachta agus oinigh iarthuir Mhumhun, ogus an fear fa treidhighe a laidin agus a m-béurla a g-comhaimsir fris, do dhul dég an bhliaghuinsi.

Glaisne, mac Remainn mheic Rughruidhe Mheg Mathghamhna, do mharbhudh lá Gillapadruic mhac Aodha Óig mheic Aodha Ruaidh, ag caislén Muineacháin.

O Dubhda Dubh, .i. Uilliam mac Domhnuill Bhallaigh, do ecc.

O Flannagán Tuaithe Ratha d'éug, .i. Gillibert mac Cormuic mheic Gilla Iosa.

Mac Samhradháin, .i. Domhnull Bernach mac Tomáis mheic Ferguil, do mharbadh a b-fheall.

Mac Suibhne Thire Boghaine, .i. Maol Muiri, d'ég.

Mac Saor Edbhaird Iustas d'ég, .i. Rolan.

O Ferghuil d'ég, .i. Rughruidhe mhac Cathuil.

O Ferghuil do ghairm do Chédach.

Kll. Enair for dhomhnach. Seacht m-bliadna dhec ocus ceitri fichit, .cccc. ocus mile, aois an Tigerna.

Eignechán mac Nechtain h-I Dhomnaill, ridhamhna Cineoil Conaill, ocus an fer is mó fuair do dhochur a dhúthaide leth re cendus fedhna, ocus is mó lér tuit dá naimdib, do marbadh le Conn mac Aodha Rúaidh h-I Dhomnaill a b-fhoslongport h-I Dhomnaill fein.

Aodh Ruadh .H. Domhnaill do chur a thigernuis de tré bhuaidhriud a chloinne féin.

Conn mac Aodha Ruaidh do ghabháil tigernuis Tire Conaill a n-ionadh a athar.

Sloiged lánmor la .H. n-Domnaill, .i. Conn, a g-Connachtaib, go maithibh Conaldach maille fris; acht chena ro eirighset slicht Briain Laighnigh go h-uilidhe leó tar Corrsliabh na Seghsa, ocus a Magh Luirg in Dághdha. Is annsin ro thinóil Mac Diarmada, .i. Tadhg mac Ruaidri mic Diarmada, a chinedh ocus a ///clann maicne fein as gach aird dá innsoiged, ocus an mheid fuair do Shíl Muireghaigh, ocus do thoeissechaibh thuath Connacht, ionnus go m-bói ocht g-cóirighthi dhéc do dh'egh slúaguibh do aon chomhairle; ocus tiaghuid ar cinn h-I Dhomhnaill a g-Coirr Shleibh. Acht chena nír chonguibh an coimthinól calma cath slúagach sin O Domnaill. Is annsin ro innsaighset in dá ard shocraide sin a cheli im Choirr Sléibh, ocus ní sguchad ó cheli do fhóbairset no go n-dorchair il-iomad da n-ánradaibh ocus dá n-aos gaiscid isin n-gleó sin. Acht chena ro brissedh ar .H. n-Domnaill don dul sin, gur ro marbadh ocht ced no ni budh mó dia mhuinter, ocus gur ro gabadh ann Féidhlim mac Maghnusa h-I Chonchobair, .i. leith rí Connacht ó Choirr Sliabh go Drobhaois; ocus ro gabad ann an dá Mac Shuibhne, ocus ni h-eitir a riomh iná ///ró airem ar benadh d'édáluibh airm ocus ech ocus éidigh, ocus dá gach cinél airm ocus erraidh o sin amach don dul sin; ocus ro imthigh .H. Domnaill fein ar toradh a eisiomuil ocus do nert a laime ass an maidhm sin. Ocus rug Mac Diarmada a bráighde ocus a bhuan édail lais iar m-buaidh g-cosgair; ocus isse fuaslucad ro bhen Mac Diarmada as Feilim mac Maghnusa h-I Chonchobair, .i. cuid Chlainni Mhaol Ruanaidh do chóiced Chuain Sligigh, ocus clann Taidhg mic Briain mic Dhonnchadha ina n-urraighibh aige frissin do comall dó a péin sé fichit loilgech.

Ocus fá chend aithghirre ina dhiaidh sin .H. Néill, .i. Enrí Óg .H. Neill, do thoighecht a Tir Chonaill sluaig dí-áirimh, ocus an tir do mhilledh go h-uilidhe lais; ocus O Domnaill do breith orra, ocus maidm Bhél Átha Doire do thabairt ar .H. n-Domnaill, ocus é féin .i. Conn do thuitim ann, ocus morán eli maille fris, ocus clann h-I Domnaill do ghabáil, .i. Domnall ocus Niall Garbh, ocus Niall d'fhagail bháis annsan glas; ocus Aodh Ruadh .H. Domnaill do ghabáil a thigernius fein in darna feacht do toil Dé ocus daoinibh.

Aodh mac Aodha Ruaidh do leigion ass a braighdenus an bhlíadain sin.

Mac Diarmada Mhoighe Luirg, .i. Conchobar mac Cormaic mic Tomaltaigh an Einigh, do marbadh la clainn Ruaidhri mic Diarmada ag Cuirrech O n-Guanradh.

Mac Donnchada an Choruinn, .i. Brian mac Mhaol Ruanaidh mic Tomaltaig, dh'éc.

Gorta mhór ar fedh Erenn in hoc anno.

Ailionora ingen Iarla Cille Dara, .i. ben h-I Neill .i. Chuinn mic Enrí mic Eogain, dh'éc.

Domnall mac Aodha Óig mic Aodha Buidhe do mharbadh lá Sean n-Dubh mac n-Domnaill.

Kll. Enáir; ocht m-bliadna dhéc ocus ceithre xxit, ocus .cccc. ocus mile, ais in Tigerna.

H. Neill, .i. Enrí Óg mac Enri mic Eogain, tigerna Chéneil Eogain, ocus fer lán do uaisle ocus d'ard rath, do marbad a n-Doirín in Fhiadha le clainn Chuinn h-I Neill, a n-digail i n-athar.

H. Cathain, .i. Sean mac Aibhne, fer einigh coitchinn d'eigsibh ocus d'aois ealadhna Erenn, dh'éc in hoc anno.

Domnall mhac Nechtain h-I Domnaill dh'ec don ghalar bhrec.

H. Briain, .i. an Gilla Dubh O Briain, dh'éc.

Maidhm na Croissi Caibhénaighe ar .H. Neill .i. Domnall mac Enrí mic Eogain, ocus Feidhlim mac Enri Óig do thuitim a b-frithghuin an madhma sin.

O Cúirnín, .i. ollam fer m-Breiffne dh'éc, Conchobar Carrach, .i. ard ollam .H. Ruairc ocus na Raghallach.

Kll. Enair; noi m-bliadna dhéc ocus ceithri fichit ocus ceitri ced ocus mile ais an Tigerna.

Gnim mor do ghenum lé righ Alban dár bhó comainm Sémus Sdíbhard, .i. Eoin Mór mac Domnaill, ri Indsi Gall, ocus Eoin Cathánach, ocus Alusdar Ballach do riaghad inn aon croich.

Mac Diarmada Mhoighe Luirg, .i. Tadhg mac Ruaidri Óig mic Ruaidri Chaoich, .i. fer cossanta clú a ardaicme fein d'uaisle ocus d'oinech ocus d'oirrdercus, ocus imdhídnightheoir Shiol Muireghaigh ocus fer g-Connacht, dh'éc iar m-breith bhuadha ó dhomun ocus o dhemun.

Cormac mac Domnaill mic Briain I Uiginn do marbadh go timpeisdech den urchur do shoighid lá Clainn Fheoruis in bliadain sin.

Ricard Óg mac Ricaird h-I Chuairsceith do mharbadh isin ló cedna, .i. an cedaoin iar g-cincis.

Kll. Enáir; cuig ced ocus mile bliadan aois an Tigerna.

O Ruairc, .i. Felim, do dhul dh'éc in hoc anno.

Tomáss mac Briain mic Filip na Tuaidhe Mhég Uidir do marbadh la clainn Tomáis Óig mic Thómáis Óig mic Tomais Mhóir Mhég Uidhir.

O Broin Láighisi do mharbadh .i. Catháir mac Dúnlaing.

An Barrach Mór do mharbadh le na derbráthair fein, .i. Dáibhith Barra.

Espuc Doire dh'ec, .i. Domnall .H. Fallamain, ocus brathair minúr.

Kll. Enair; bliadain ar .u. ced ar mile.

Maidhm Sleibh Betha la h-Aodh mac Rémainn Mhég Mhathghamhna, inar marbadh Tomás Óg mac Tomais Óig Mheg Uidhir co n-ár dí-airmhe uime.

Rugraidhe mac Cathair mic Cuinn mic in Calbaigh, .i. mac h-I Chonchobair Fhailghe, dh'éc.

Niall mac Airt h-I Neill dh'éc.

Caislén Sligigh do ghabáil le dreimire, .i. le clainn Ruaidri mic Toirrdhelbhaigh Charraigh h-I Conchobair; ocus an Calbach Caoch mac Domnaill mic Eogain do marbad ann, ocus Sean mac Ruaidri mic Toirrdhelbaigh do thuitim leis in g-Calbach an oidhche sin.

Aibhne mac h-I Chatháin do marbad la Brian Finn O Catháin.

Toirrdhelbach mac Cuinn mic Enrí mic Eogain h-I Neill do mharbad la Mag Mathghamna, .i. Rossa mac Maghnusa.

Kll. Enáir; da bliadain ar .u. ced ar mile.

Maidhm na Tulcha Finne do thabairt la clainn Neill h-I Bhaighill ar .H. m-Báighill. O Báighill féin, .i. Niall, ocus a dhias mac, .i. Rugraidhe ocus Domhnall Ballach, ocus drong mor dia muintir do marbad ann.

Dá ab do bhí a n-imressain fá abdhaine Essa Ruaidh, .i. Art O Gallchubair ocus Eoin O Loisde, d'fhaghail bháis fá aon ló con oidhche an bliadain sin.

Domnall mac Briain h-I Uiginn, .i. oide sgol Erenn re dán, dh'éc in hoc anno.

Kll. Enáir; tri bliadna ar .u. ced ar mile.

Mac h-I Domnaill, .i. Donnchad mac Aodha Ruaidh, do sgathad le na derbrathair féin .i. Domnall, do ched a athar fein ocus dá comairle.

Mac Uillíam Burc, .i. Tepóid mac Uáitéir, dh'ec.

Maidhm Bheoil Atha na n-Garbhán le Ricard a Búrc co na bráithribh ar Mac Uillíam Iochtair ocus ar Mhainechaibh, dú in ro marbadh Ruaidhri Mor mac Súibhni.

Kll. Enáir; ceitri bliadna ar .u. ced ar mile.

Maidhm Chnuic Thúagh do tabairt an bhliadain si .i. Geróid iarla, giúsdís na h-Erenn, do thinól Ghall ocus Gaoidel chúiged Laigen ocus Leithi Cuinn, ocus teacht a g-Clainn Ricaird, ocus Mac Uillíam Clainni Ricaird ocus O Briain do thinol shlúaigh mhoir eli, ocus teacht 'na g-coinne go Cnoc Thúagh, ocus cath do chur etorra ann inar marbad morán do maithibh Gall ocus Gaoidel, co nach d-tucadh a commór do chath isin aimsir dheighenach etir Ghallaibh ocus Ghaoideluibh.

Maghnus mac Briain mic Donnchada, .i. ab mhainisdrech na Tríndóide ar Loch Cé; comhrair ocus cisde coimhéta einigh ocus engnuma na h-Erenn an fer sin, ocus an t-aon duine is mo do tidhluic ocus do thoirbhir d'fhiledhaib ocus d'oirfidechaib, ocus do aos gacha cerda dá d-tánic o Thomaltach na Cairrge inuass, do h-éc a g-Cill Duibhdhúin, et sepultus est an Oilén na Trindóide ar Loch Cé; ocus is buille dí-chendta ar aois ealadna na h-Erenn an t-éc sin mic Mic Donnchada.

Conchobar mac Ruaidri mic Diarmada, .i. rigdamna oirrderc oirbertach a ard aicme .i. an mac righ bá treissi ocus bá tuaruscbhálaighe tánic dhá dhuthaidh re cian d'aimsir, do marbadh lá slicht Tomaltaigh an Einigh mic Conchobair mic Diarmada, a m-Bealach na n-Urmhointech.

Maoilechlainn mac Donnchada mac Murchada dh'éc in hoc anno.

Kll. Enair; u. bliadna ocus .u. ced ocus mile.

Aodh Ruadh mac Neill Ghairb h-I Domnaill, .i. an t-oen Ghaoidel is mo do ghabh nert ocus treisi dhá tánic do th-shlicht Neill .ix. Ghiallaigh, ocus ésga immlán einigh ocus uaisle an Tuaiscirt, fer dhár ghiallsat Fir Mhanach ocus Cenél Móain ocus Iochtair Chonnacht, do dul dh'éc an bhliadain si; ocus ni ró linn re radha nach raibhe re linn an Erinn Gall na Gaoideal do budh treisi ar Leith Cuinn ináss; ocus tri seachtmhuine ria Lughnasa fuair báss ongtha ocus aitrighe a n-Dún na n-Gall, iar m-beith ceithre bliadna ocus dá fhichet a tigernus Tire Conaill; ocus a mac do ríghad 'na ionad, .i. Oedh Dubh mac Oedha Ruaidh.

Findghula inghen Ruaidri Óig mic Ruaidri Choeich, .i. ben t-Sheain mic Taidhg mic Briain Mic Donnchada, dh'éc.

Mag Carrthaigh Riabach, .i. Fínghin, dh'éc.

Cairbri mac Briain h-I Uiginn dh'ec do bhiodhg.

Aindriass Mhág Craith dh'éc.

Seaan a Búrc do mharbadh le clainn Uillig a Burc.

Kll. Enair. Sé bliadna ocus .u. ced ocus mile aois an Tigerna.

Mac Uibhilín .i. Bhaltair, fer einigh choitchinn ocus cend fedhna ro mhaith, do marbadh an bliadain si la Domnall mac Seain h-I Chatháin ocus la Cloinn Bhloscaid.

Páidín .H. Maol Conaire .i. fithighir fer n-Erenn re filidhecht ocus re senchus, d'fhaghail bháis obuinn an bhliadain sin, .i. luidhe slán ar a leabaid ocus a fhagail marbh ar maidin.

Domhnall O Croidhén, .i. cendaighe saidhbheir daonnachtach, d'fhagail bháis obuinn an bliadain si ag éisdecht aiffrinn a mainistir Dhúin na n-Gall.

Conchobar mac Ruaidri mic Donnchada do marbadh lá h-Eogan mac Tigernáin h-I Ruairc, a m-Baile an Dúin an bhlíadain sin.

Kll. Enair. Seacht m-bliadna ocus .u. ced ocus mile aois an Tigerna.

Mac Conmidhe .i. Solamh, sói Erenn ré dán, ocus fer thighe aoided coitchinn ocus chonáigh mhóir, do dul dh'éc in hoc anno.

Mainistir Bhaile in Dúin do thinnscna la Tomáss O bh-Ferghail.

Félim Mag Uinnsionnáin dh'éc.

Mág Craith, .i. Tomáss dh'éc.

O Cuill, .i. Cend Faola, dh'éc.

O Dálaigh Finn, .i. Goffraid, dh'éc.

O Dálaigh Cairbrech, .i. Oenghus, dh'éc.

O Géráin .i. Sean: hi omnes poetae hoc anno in Cristo dormierunt.

Kll. Enáir. Ocht m-bliadna ar .u. ced ar mile aois in Tigerna.

Caislén Inis Sgeillionn do ghabháil do .H. Dhomnaill .i. Oedh Óg mac Aodha Ruaidh, ocus Pilip mac Briain Mhég Uidhir do brissedh a chaisléin fein ar egla h-I Dhomnaill.

Goffraidh .H. Catháin do marbad le slicht Maghnusa h-I Chatháin.

Espuc Ath Conaire dh'éc i. Tomáss O Conghaláin.

Espuc Cluana Mic Nois dh'éc, i. Uáiter a Bhlac.

Tigernán Óg, mac Eogain mic Tigernáin h-I Ruairc, do marbadh le Sean mac Tigernáin Fhinn I Rúairc.

Kll. Enair; ix. m-bliadna ar .u. ced ar mile aois in Tigerna.

O Néill, .i. Domnall rí Thire h-Eogain, dh'éc in hoc anno, ocus Airt mac Oedha h-I Neill do rigad 'na ionad.

O Baoighill, .i. Emon Buidhe mac Neill h-I Bhaoighill, do marbad d'én urchur do gha le Conchobar Óg O m-Báighill, a comescur oidhche a Luachrus da shunnrad.

Pilip mac Briain mic Philip Mhég Uidhir dh'éc.

Eogan mac Cuinn mic Aodha Buidhe dh'ec.

Art, mac Cuinn mic Enrí mic Eogain h-I Neill, do ghabhail le h-Airt in chaisléin mac Neill mic Airt, ocus a thabairt d'O Dhomnaill.

Kll. Enáir; x. m-bliadna ar .u. ced ar mile aois in Tigerna.

O Fialáin, .i. Fergal mac Eogain, súi re dán, d'fhaghail bháis.

Eogan mac Briain h-I Uiginn, oide fer n-Gaoidel re dán, dh'ég.

O Domnaill, .i. Oedh Óg mac Aodha Ruaidh, do dhul as lár a inmhe ocus a aoisi dochum na Rómha in hoc anno.

Sloigedh lá Geróid Iarla Chille Dara a cuigid Muman, go maithib Gall ocus Gaoideal Laigen lais, dar chumhdaigh caislen d'aindeoin Gaoidel Muman ag Carraig Cítal. Lenus .H. Domnaill é begán búidne tríd an Midhe, ocus assin don Mhumain, ocus tiaghuid ar siobal in Ealla, ocus gabhuid caislén Chinn Tuirc, ocus airgid in tír; ocus tiaghuid a n-Desmumain mhóir ocus gabaid caislén na Pailíse, ocus caislen Chois Mhainge; ocus tegaid slán tar a n-ais a g-condáe Luimnigh. Do niad aitinól slóig iarsin, ocus cruinnighid Geraltaigh na Muman im Shémus mac Iarla Dessmhuman, ocus Goill na Muman áirchena, ocus Mág Carrthaigh Riabach, ocus Cormac Óg mac Cormaic mic Thaidhg, ocus Goill ocus Gáidhel Mhidhe ocus Laigen. Tiaghaid go Luimnech. Tinólaidh Toirrdhealbach mac Taidhg h-I Briain ri Tuaghmuman, ocus Mac Con Mara, Sil Oedha ocus Clann Ricaird, mor slúag eli ina n-agaid, ocus teid in t-Iarla co na sluaig tre Bhealach na Fadhbaide, ocus tré Bhealach an Ghamhna, go ránic droichet crainn do righnedh lé .H. m-Briain ar Sionuinn; ocus brissder an droichet leó, ocus anaid a b-fhoslongport oidhche isin tír, ocus do ní .H. Briain foslongport ele re na taobh ann. Cuiris an t-Iarla ar ná mhárach a t-shlúagh a n-ordugad, ocus cuiris Gaill ocus Gaoidel na Muman a tús, ocus cuiris Goill na Midhe ar deredh a shlúaigh. Tuirlingis .H. Domnaill an begán buidhne do bhí a mesc Gall, ocus gabhus an aithghirre trí mhóin na m-bráthar dochum Luimnigh; ocus ionnsaighit na slúaga sin t-Shíl m-Briain na slóigh sin ele, ocus marbtar leo an barún Cint, ocus an Bérnmhálach, ocus daoine maithi eli; ocus ní raibhe annsin do Ghalloibh ina do Ghaoidelaibh én duine bud mó clu laime ná .H. Domnaill ag tabairt deridh an t-slúaigh Ghall sin lais.

Kll. Enáir; xi. ar .u. ced ar mile ais in Tigerna.

O Conchobhair Fhailghe, .i. Cathaoir mac Cuinn mic in Chalbaigh, féchem coitchend dh'écsibh ocus d'aois ealadhna, ocus cend fedhna ro mhaith for Ghalloibh ocus Ghaoidelaibh, do mharbadh le cuid dá chinedh fein, .i. le clainn Taidhg h-I Conchobair ocus le clainn t-Sheain Bhallaigh h-I Conchobair, laim re Mainistir Fheoruis.

Dubhtach mac Dubhtaigh h-I Duibhghendáin, sói Erenn re senchus, ocus fer saidhbhris mhoir, dh'éc in bhliadain si.

Sloiged leis O Neill .i. Art mac Aodha a Tír Chonaill, dár loisc Glenn Fhinne ocus ó t-Shuiligh anall; ocus benus braighde d'O Dhochartaigh.

Cénel Feradaigh do creachad le Mághnus O n-Domnaill an bliadain si.

Mac Donnchadha Thíre h-Oilella, .i. Sean mac Taidhg mic Briain mic Donnchada, coinneal ghaile ocus gaiscid Chlainni Mhaol Ruanaidh, ocus feichem coitchend congmhála dh'ecsibh ocus d'aois ealadna Lethe Cuinn, d'fhaghail bháis ina longport féin a m-Baile an Dúin; ocus ni h-imlán ro chaithestar an bhlíaduin sin a tigernus.

Fergal mac Taidhg mic Briain, .i. adhbhar righ O n-Oilella, do marbadh an bhliadain cedna sin le clainn Ruaidhri mic Diarmada.

Espuc an dá Bhreiffne, .i. Tomáss mac Ainntriú Mhég Brádaigh.

Clann Cathail mic Ruaidri mic Fhéilimidh Chleirigh do mharbadh a Tuillsge le clainn Taidhg Bhuidhe mic Cathail Ruaidh, .i. Ruaidhri Ruadh ocus Brían, ocus Tadhg ocus Cathal.

Kll. Enáir; dhá bliadain dhec ar .u. ced ar mile ais in Tigerna.

O Domnaill do theacht ón Róimh íar bh-forbadh a oilitri, ocus íar b-fhaghail onóra móire for a chuairt o rí Saxan.

O Cléirigh, .i. Tadhg mac Tuathail mic Taidhg Caim h-I Chléirigh, .i. sói re senchus ocus fer thighe aoided coitchinn, dh'éc iar n-ongad ocus n-aitrighe.

Niall mac Cuinn, mic Aodha Buidhe mic Briain Bhallaigh, tigerna Trín Congail, ocus fer enigh choitchinn, ocus médaighthe ord ocus egailsibh ocus gach maithessa áirchena, ocus ana oirrter Erenn, do dhul dh'éc in hoc anno.

Sloigedh lá Geróid Iarla Cille Dara .i. giúsdís na h-Erenn a Trian Congail, dár ghabh caisslen Bheoil Fersde, ocus dár bris caislén mic Eoin, ocus dár airg na Glinne ocus mórán don tír; ocus tuc mac Neill mic Cuinn a m-braighdenus lais.

Cogad mór edir O n-Domnaill .i. Oedh, ocus O Néill .i. Art mac Aodha, ocus cogad etir O n-Domnaill ocus Mac Uillíam Búrc, .i. Emonn mac Ricaird; ocus fosdais O Domnaill .u. ced dhéc tuadh a Tír Chonaill ocus a coiged Chonnacht, ocus a b-Feruibh Manach. Gluaisis O Domnaill ó Dhoire began sluaigh, ocus gabhus caislén Beoil in Chlair a g-cocrich Luighne ocus Gaileng; ocus fágbhus bharda ann, ocus teid tar ais a Tír Fhiacrach.

Cruinnighis mac Uillíam Búrc, ocus suidhis imón m-baile; ocus iar na clos sin d'O Dhomnaill ionnsaighis an baile doridhis, ocus fágbhus mac Uillíam in baile, ocus téid do chur lóin ocus bharda a g-caislen Eisgrech abhann a Tír Fhiacrach.

Kll. Enair; tri bliadna dhec ocus .u. ced ocus mile ais in Tigerna.

Mairghrég ingen Conchobair h-I Bríain, .i. ben h-I Ruairc, .i. an t-én bhen dob ferr do chend dámh ocus deoraid dá d-tánic o Brían Bhóruma anuass, do dhul dh'ec iar n-ongad ocus n-aitrighe.

Donnchad mac Conchobair h-I Briain, .i. in cend fedhna dob ferr do Dhál g-Cais na comaimsir a leith re laim ocus re h-uaisle, do mharbadh a n-greis oidhche le clainn Toirrdhealbaigh mic Conchobair h-I Bríain.

O Domnaill .i. Oedh do dhul ar cuairt a g-cend rí Alban an bliadain si.

Rossa mac Maghnusa Még Mhathghamna, tigerna Oirgíall, mortuus est.

Tadhc mac Maoileaclainn I Cheallaigh, tigerna O Maine, mortuus est.

Maighister Muiris O Fícheallaigh, doctuir diadhachta, ocus se 'na airdespuc a Tuaim, ocus an fer do bud mó clú crabadh ocus cléircheachta thoir iná bhus, do dul dh'ec an bhlíadain si.

Geróid Iarla Chille Dara, .i. giuisdís na h-Erenn, .i. an t-oen duine rob ferr clú, ocus ro bud mó nert ocus oirrdercus, ocus is mo do righne do ghabháltus ar Ghoeidhelaib, ocus do bris do caislenaibh na n-Gaoidel, ocus dob ferr smacht ocus recht ocus riagail, ocus is mo tuc da airnéis fein a toirbertus d'feraibh Erenn tanic do Ghalloibh a n-Erinn riam, d'fhagail bháis ola ocus ongtha ocus aitrighe a Cill Dara, ocus a annlucad a d-Tempul Crist a m-Baile Atha Clíath maille re tuirsi truim urmhóir Ghall ocus Gháeidel Erenn 'na dheoidh.

Slóigedh mor la .H. Néill, .i. Art mac Oedha, a Trían Congail, dár loisc Magh Line, ocus dár creach na Glinne; ocus rug mac Neill mic Cuinn ocus mac Uibhilín ar chuid don t-slúaig, ocus marbtar Oedh mac h-I Neill don troid sin. Tegmaid an slúag ocus an tóir dá cele íar na mhárach, ocus marbhtar mac Uibhilín, .i. Risderd mac Rúgraidhe, ocus drong dh-Albanchaib, ocus tig .H. Neill tar ais iarsin.

Slóigedh la rí Alban go maithibh Alban uime dá raibhe tri .xx. mile fer conganta a g-crich t-Shaxan, ocus loiscis an crioch ar gach taobh dhe. Cruinnighis loard Seomarlin ocus a mac, ocus cliár t-Shaxan ina n-agaid, ocus tucadh cath etorra, ocus maighid ar Albanchaib, ocus marbhtar rí Alban, ocus Mac Ailín, ocus an t-airdespuc, .i. sanct Aindrías, ocus morán do thigernachaibh Alban, ocus morán daoineadh eli.

Art mac Aodha h-I Neill, .i. tigerna Thíre h-Eogain gan imressain, b-faghail bháis ongtha ocus aitrighe a n-Dun Genainn. Art mac Cuinn h-I Neill do rigad ina ionad.

Art mac Néill mic Airt h-I Néill mortuus est.

Caislén Dúinliss do ghabáil d'Ua Dhomnaill ar chlainn Geróid mic Uibhilín, ocus a thabairt do clainn Ualtair mic Uibhilín.

Foslongport do dhenum la .H. n-Domnaill im Shligech o feil Brighde go cincís, ocus gan buadhachad dhó an uairsin.

Eogan .H. Máille do marbad lucht tri long a Tír Bhóghaine an bliadain sin.

Eogan Ruadh mac Suibhne do marbadh le clainn a derbrathar féin, ocus le Donnchad mac Toirrdhealbaigh h-I Bhaigill.

Niall mac Cuinn mic Aodha Buidhe dh'éc lá cásg do shundradh.

Kll. Enair; cethra bliadna dhec ar .u. ced ar mile ais in Tigerna.

Cathal Óg, mac Domnaill mic Eogain h-I Conchobair, do mharbadh a b-fhioll gránna do mac a athar fein, .i. Eogan mac Domnaill; ocus issé an Cathal Óg sin mac a aossa is mó tuc ocus fuair tanic do t-shlicht Bríain Laighnigh mic Toirrdhealbaigh Moir; ocus ni h-é sin amháin geall do bermaoisne iná lucht ar cerde dhó, acht nach tánic do chined Gáeidhil Ghlais ina comaimsir féin a commaith an uaisle, an aithne, ocus an einech, ocus is dillechta truagh an ealadan dá éis gan fer a h-iomchair iná h-altruim mar Chathal aice.

Eogan mac Domnaill mic Eogain do crochad leis .H. n-Domnaill fá cheann tri lá 'na dhiaidh sin.

Mac Uillíam Búrc .i. Emon mac Ricaird do mharbadh le clainn Uáiter a Búrc a b-fhioll gránna a mainistir Ratha Branduibh.

Caislén na Cuilentraighe do brissedh, ocus an choill mhór do gerradh ocus d'argain, d'Iarla Chille Dara, .i. Geróid mac Geróid, ar Laoighis h-I Mhórdha.

Mac Toirrdhealbaigh Óig mic Domnaill, consápla gallóglaech, do marbadh le Laoighis.

Caislen Chúile Rathain do brissed la .H. n-Domnaill.

Caislén na h-Oghmuighe do brissedh la .H. Neill in hoc anno.

Maidhm do thabairt d'Ua Néill ar chlainn Domnaill h-I Neill ocus ar clainn Airt h-I Neill, ocus morán d'echaib ocus do éidedh ocus do dhaoinibh do bhuain díbh.

Slóigedh le Geróid Iarla Chille Dara ar .H. Raighilligh, gur bris caislen an Chabáin; ocus O Raighilligh do madhmachad leis; ocus ro marbadh O Raighilligh isin maidhm sin, Aodh mac Cathail I Raidhilligh, ocus morán do maithib a muintire maille fris; ocus ro gabadh Mac Cába.

Slóigedh la Semus mac Iarla Dhesmuman ocus leis Uá Cerbhaill ar Phiarrus Buitlér, ocus loiscis an Trian Medhonach go h-imlán; ocus beridh Piarrus Buitler fair lion a t-shlúaigh, ocus clann Tomáis mic Iarla Cille Dara, ocus gallógláoich ocus gaiscedaigh, ocus il-imad marcslúagh do muinter an Iarla maille riú orra, ocus ro imghedar orra dia n-aimdheoin.

Crecha móra do dhenum dh'O Dhomnaill a n-Gaileng, dar loisg ocus dár airg an tir go Cruachán Gaileng; ocus marbhtar O Rúaán lais ann, ocus mórán eli maille fris.

Maidhm lá .H. Neill ar Aodh mac Domnaill h-I Neill, ocus ar Conn mac Neill mic Airt, dar marbh ocus dár ghabh morán dá muinter, ocus dar bhen a n-eich ocus a n-éidigh dibh, innus gur an tigernus Chinéil Eogain gan imressain aige osin amach.

Cogad dh'érghe etir .H. n-Domhnaill ocus .H. Neill, ocus moran do bhuannadhaib d'fhasdódh ar gach taoibh dhoibh; ocus a m-beith a b-fhad a b-foslongport ar aghaid a cheli; ocus sith do dhénum doibh, ocus tocht a g-cend a chéli ar droichet Arda Sratha dhoibh, ocus cairdes Criosd do dhenum ann. Inis Eogain ocus Cénel Móáin ocus Fera Manach do leigen la .H. Néill don dul sin, ocus a mac ro bhói re cian d'aimsir roime sin a laim ag .H. Domnaill do leigen amach d'innsoiged h-I Neill.

Clann Geróid mic Uibhilín do marbad a b-fhioll la clainn Ualtair mic Uibhilín, ocus an tír do creachad ocus do loscud do mac Neill mic Cuinn mic Oedha Buidhe tríd an n-gnim sin.

Sloigedh la Geróid Iarla Cille Dara isin Mumain, dár loisc h-I Chonaill ar mac Iarla Dhesmuman. Cruinnighis mac an Iarla lín a thinóil, ocus O Bríain go maithib Tuaghmuman do chongnum leis, ocus gidhedh ro immthidh an slúag go sénamail riasiú rugsat inait agallmha air.

Cobhlach do bhádaib ocus do longuibh faidi do tharruing d'O Dhomnaill ar Loch Eirne, ocus bheith na comnaidhe a b-fhad ar Inis Sgeillend. Airgis ocus loisgis oilén Cuil na n-Oirer, ocus do ní síth 'na dhiaidh sin riú, ocus tig slán dá thigh.

Kll. Enair; u. bliadna dhéc ar .u. ced ar mile ais an Tigerna.

Creacha móra do dhénum d'O Dhomnaill ar clainn Diarmada Ruaidh a n-imell Choillte Conchobair.

Slóigedh la .H. Neill a g-Clainn Aodha Buidhe, dár loisc ocus dár creach cuid mhór don tír, ocus tig mac Neill mic Cuinn a g-cenn I Neill, ocus gabhus tuarusdal uadha; ocus indtóis O Neill iarsin.

Crecha móra do dhenum d'O Domnaill ar sliocht Briain Mhég Uidir, ocus a n-ithe uile aca p-fein; ocus sith do denum riú ass a h-aithle.

Caislén Aine do ghabáil ar t-Shean mac Iarla Dhesmuman do t-Semus mac an Iarla; ocus suidhis annséin fá chaislén Loch Gair, ocus do bhí a cumgach mhór aige no gur cuiredar Síl m-Bríain ocus Sil g-Cerbhaill ocus Cenél Aodha uadha é.

Oedh, mac Neill mic Cuinn mic Aodha Buidhe h-I Neill, do dhul ar creich don Choill Ulltaigh, ocus crech do ghlacad dhó and. Lenus Niall mac Briain mic Niall Ghallda a d-toraighecht é, ocus marbhtar Niall mac Bríain, ocus airgter in choill go h-iomlán, ocus anaigh nert Trín Congail uile ag Oedh mac Neill don t-siobal sin.

Menma Mhág Carmaic, ro-ferleighinn do bhí 'na espuc a Ráth Bhoth, in Cristo quieuit.

Domnall mac Aodha Ruaidh h-I Dhomhnaill do mharbadh la h-Aodh m-Buidhe .H. n-Domhnaill, sa Tuaith Bhladhaidh, in bhliadain sin.

Kll. Enair; se bliadna dhéc ar .u. ced ar mile ais in Tigerna.

Caislen Sligigh do ghabáil le .H. n-Domnaill, iar m-beith athaid fhada a cogad ris; ocus is amlaid ro gabadh é .i. ridire francach tánic dá oilitri dochum purgadóra Patraic, ocus tuc O Domnaill onóir mhór ocus tidhluicthe dhó; ocus do chuir an ridire long lán d'ordonás, ocus gunna mór brisde caisléin uirrthi dochum h-I Dhomnaill; ocus suidhis fán m-baile, ocus brissis an baile sul fuair é, ocus do ber einech dona bhardaib. Ocus teid assin a Tir Oilella ocus gabhaiss caislén Cúl Mháile, ocus caisiol Locha Dergáin, ocus Dún na Móna; ocus fágbus bharda a g-cuid díbh, ocus do bheir braighde lais ón g-cuid eli; ocus do bhí Sligech trí blíadna dh'éc ag .H. Dhomnaill don dul sin no gur gabh Tadhg Óg mac Taidhc mic Aodha air é iarsin.

Mac Donnchada an Choruinn ocus mac Mic Donnchada do mharbadh ag teacht a g-cend t-slúaig h-I Domnaill le Donnchad mac Toirrdhealbaigh h-I Bháighill.

Caislén I Cerbhaill, .i. Leim h-I Bhánáin, do ghabáil lé h-Iarla Chille Dara, .i. Geróid Iarla, iar na shárugad fo a athair; ocus ní h-urusa go d-tanic isin aimsir sin caislen ro bud cruaidhe cosnum ocus congmáil ináss, no gur brissedh timchell na bharda é.

Maidhm mor do thabairt d'Emonn mac Tómáis Buitlér ar Phiarus Buitler, ocus ar mac mic Phiaruis, ocus mórán dá muinter ocus da m-buannadhaib do bhádhad ocus do marbadh.

O Dochartaigh .i. Conchobar Carrach O Dochartaigh mortuus est.

Caislen mic Shuibhni .i. Ráth Maolán do thuitim in hoc anno.

O Domnaill do dhul fá dhó a Tír Eogain ar sloigedh in bhliadain sin.

Mág Carrthaigh Mór, .i. Cormac Lagrach mac Taidhg, tigerna Desmhuman, an t-e is ferr fuair a thigernus ocus is mo fuair do chogad no go raibhe na thigerna gan imressain, ocus dob ferr do chend dámh ocus deoraidh, ocus dob fherr recht ocus riagail do righraid Leithe Modha, do dhul dh'éc.

Toirrdhealbach mac Briain Uaine h-I Ghallchubhair, comarba na Cairrge, mortuus est.

Mac Briain Chaoich mic Taidhg mic Eogain do marbad a b-fhioll do mac Taidhg na Tuaighe mic Fhélim mic Eogain, ocus do shliocht an Cherrbaigh.

Ben h-I Treabhair .i. Caiterína iní Criodacáin, ben dércech dhaonnachtach, mortua est.

Uilliam mac Donnchada h-I Fhergail, .i. espuc na h-Anghaile, dh'éc.

Kll. Enair. Seacht m-bliadna dhéc ar .u. ced ar mile ais in Tigerna.

Donnchad mac Toirrdhealbaigh h-I Bhaighill d'fhagail bháis dupusdig .i. lucht báid dá muinter ocus é fein do dhul go Toraich, ocus gaoth dia b-fhuadach fon b-fairrge siar, ocus nach b-fríth en fhocul dá sgeluibh óshin alle.

Sean mac Cuinn mic Enrí mic Eoguin h-I Neill dh'éc.

Pilip mac Toirrdhealbaigh Még Uidir dh'ec aoine chásg do shundradh.

Barún Sláine dh'éc a Saxanaib, .i. Crisdóir Plemenn.

Art mac Aodha mic Domnaill h-I Neill do marbadh le Niall mac Cuinn mic Neill mic Airt.

O Duibhghendain Chille Rónain, .i. Matha Glass mac Dubhthaig, dh'éc in hoc anno.

Kll. Enair; ocht m-bliadna dhec ar .u. ced ar mile ais in Tigerna.

Oedh Balbh, mac Cuinn mic Enrí mic Eogain h-I Neill, dh'éc.

Clann h-I Neill .i. clann Domnaill mic Enrí mic Eogain, do dhul ar creich ar Brían mac Cuinn mic Enrí, ocus Brian do bhreith orra ag Domnach an Eich, ocus maidhm mór do thabairt orra, ocus Oedh mac Domnaill do ghabáil and. Mac Cathmhaoil ocus morán do mhaithibh Chinél b-Feradhaigh do marbad ann.

An deganach Mhág Uidir, .i. Oedh mac Rossa mic Tomáis Óig .i. mac in espuic, dh'ec.

Mac Suibhne Fánad dh'éc, .i. Ruaidri mac Maol Muire, im chaisc do shunnradh.

Félim mac Briain mic Conchobair Óig Mhég Uidir dh'éc.

Kll. Enáir; ix. m-bliadna dhéc ar .u. ced ar mile ais in Tigerna.

Iusdaiois na h-Erenn .i. Geróid Iarla Chille Dara, .i. Geróid Óg mac Geróid, do dhul fó thóghairm righ Saxan iar na thochuired soir tre ionnlachaibh ocus tre edarchossaoidibh Ghall Erenn fair; ocus bá h-omhnach imeglach lá cách a thurus la h-iolar na n-aimleis ocus na n-iomchossaoidibh.

Pestilencia magna in hoc anno, ocus nuimer mor do Ghalloibh Atho Cliath do ég don teidhm sin.

Roiberd mac Tommais mhic in Iarla, .i. fer a aoisi fein ba ferr ainm ocus áirem ocus uaisle do Geraltachaibh Midhe, dh'éc don phláig sin.

Mac an t-Shadhbhaoisigh, .i. Raibhilín .i. fer fá mó oinech ocus ágh do Ghalloib Erenn ina aimsir fein olchena, d'ég íar ná thoffonad as a dhuthaid la cumhachtaibh Iarla Chille Dara, ocus lá forgall in prióra Mhég Aonghusa; ocus a thir go sescur sóinmech ag an prióir dia aimhdheoin go b-fhuair sium bás; ocus ní budh machtnad ge ma deolchaire a thíre no ghébad báss, .i. Trícha Ced na Soillsi. Emonn Tadhbhaois .i. a mac do ríghad 'na ionadh, gen go b-fhuair a dhuthaid go réidh; fer séin fa mó daonnacht ocus daigh einech do Ghalloibh Erenn acht ge ro bernadh fó na inmechus é.

Feidhlim mac Maghnusa h-I Conchobair, tigerna Iochtair Connacht, fer dércech daonnachtach fri damuibh ocus deóraighibh, do ég in hoc anno.

Mac Uillíam Clainni Ricaird, .i. Ricard Óg mac Uilléig a Búrc, .i. fer beothlasach buanchonáigh, mortuus est. Uilliam mac Uillig a Búrc do ríghad día éis.

Donnchad Caománach, fer rathmar ro chonáigh do lán mhaithibh Laigen, in hoc anno.

Maoilín mac Torna h-I Mhail Conaire, ollam Shíl Muiredhaigh, fer lán do rath ocus d'éxsi, ocus fer do thoghadar Goill Geraltach tar ollamhnaibh Erenn, fer do ghebadh seoid ocus maoine o gach aon d'uaislibh Erenn for a siredh, ocus do beredh sum go h-anoirches an ní no ghebhedh, a ég a Mainistir Derg a Tethbha.

Fercertne O Curnín, fer grádha Eogain h-I Ruairc, ocus cend egna ocus éixsi a fhine fein, mortuus est.

Domhnall Glas O Curnín mortuus est.

Comorbo Chlúano Conmaicne, .i. cend oinigh ocus daonnachta ocus aoidhedhchaire cell Conmaicne, iar b-forbudh a óisi no nís uille, quieuit in Cristo.

O Neill .i. Art Óg mac Cuinn h-I Neill mortuus est.

Conn mac Cuinn a derbrathair do righad 'na ionadh; acht chena nir bo h-inann mathair dhóibh.

Tadhg mac Briain mic Tomaltaigh h-I Birn, tanusde .H. m-Briuin Shionna, mortuus est.

Sámradh ocus fóghmar falcmar fír fhliuch an bhliadain sin; bliadain chalad chessachtoch, acht ger bhó cesnodach tedhmandach h-í.

Tadhc Ruadh mac Maoilechlainn h-I Cheallaigh, fris in abarthói Tadhc in Chaladh, mortuus est.

O Conchobair Ruadh, .i. Eogan mac Feilimidh Finn, rí go b-freasabra, in hoc anno.

Kll. Enair; fiche bliadan ar .u. ced ar mile ais in Tigerna.

Pláig mhór a tossach na bliadna sa an Erinn.

Iuisdís Saxsanach in Erinn, ocus Iarla Chille Dara a Saxanaibh bheós.

Mac Uillíam Chlainni Ricaird .i. Uilliam Burc dh'éc in hoc anno. Ricard a Búrc, .i. a dherbrathair eli, 'na ionadh; clann siein Uillig a Burc dibhlinaibh.

Mac Uilliam Burc, .i. Maoilir mac Tepóid, do mharbad per dolum la clainn t-Sheoinín Mhoir mic mic Sheoinín.

Muiris mac Tomais mic an iarla, rogha Gall n-Geraltach uile do mhéin ocus d'innsoighthe, do marbad la Conn mac Mhaoilechlainn h-I Mhordha et alii multi.

In gilla Dubh mac Uillíam mic Colla mic Dubhgáill, consdápla Maighe Luirg, mortuus est.

Uillíam mac Uilliam Mic Siurtán mortuus est.

In Gilla Dub Mhág Pilip mortuus est.

Mág Aonghusa, .i. Domnall mac Oedha mic Airt, mortuus est. Félim an Einigh Mhág Oenghusa, .i. a derbrathair eli, do righad ina ionadh.

Cairbre, mac Concobair mic Cairbri mic Cormaic h-I Birn, cónsal ocus cinnlitir maicne Mhuireghaigh, moritur in hoc anno.

Maidhm do thabairt ar Feraibh Manach le clainn t-Sheain mic Cathail h-I Raighilligh, inar marbad ocus inar báidhed deichnebar ar fichit im Pilip mac Emuinn mic Tómáis Mhég Uidir ocus imon a mac, ocus im Ghilla Patraic mac Pilip mic Toirrdhealbaigh cona braithribh, .i. Emonn ocus Toirrdhelbach mac Flaithbertaigh mic Tomáis Óig, ocus mac Gilla Ruaidh .i. Goffraigh, ocus mórán eli.

Kll. Enáir; bliadain ar fhichit ar .u. ced ar mile ais in Tigerna.

Maidhm mór do thabairt a Tír Mhaine Mic Echach ar .H. Conchobair Ruadh, .i. Tadhg Buidhe mac Cathail Ruaidh, ocus ar .H. Cellaigh .i. Maoilechlainn mac Uillíam, ocus ar Mac n-Dubhgaill .i. Donnchad mac Toirrdhelbaigh a cónsabal díbhlínibh. Is amlaid forcaomnagar sin, .i. dul dóibh for innsaiged ar shlicht Donnchada I Chellaigh, ocus creacha do ghabháil dóibh, ocus slicht Donnchada I Chellaigh cona coimthinól do breith forra. Cidh tra acht ro brissedh forra isin Iffernaigh do t-shinnrad. Ro gabadh O Conchobair ann, ocus ro marbad O Cellaigh ocus a mac .i. Tadhg. Ro marbad Mac Dubhgaill ann dno, ocus ro gabadh a mac .i. Alusdar, ocus ro marbad ann Conn Citech mac Oedha mic Eogain h-I Conchobair; ocus ni h-urusa a áiremh gach ar thuit ann edir mharbad ocus ghabáil. Il-imad ech ocus éidedh ocus erradh do bhéin díbh gan atghabháil forro.

Mag Oenghusa .i. Félim an Enigh mac Aodha mic Airt, cenn daonnachta slechta Conaill Cernaigh, mortuus est. Emonn Buidhe mac Aodha do righad 'na ionadh.

Rugraidhe mac Eignecháin h-I Domnaill do marbad la Galloib ag Dún Delgain, ocus é faré .H. Neill .i. Conn mac Cuinn.

Mag Mhathghamna .i. Remann mac Glaisni dh'éc.

O Cathán .i. Tomáss mac Aibhne dh'éc.

Maol Ruanaid mac Cormaic Mic Diarmada dh'éc in hoc anno.

Kll. Enair for Cedaoin; dá bhliadain ar fichit ar .u. ced ar mile ais in Tigerna.

Cogad mór ar n-eirghe a rann iartharach na h-Eorpa an tan sin etir chinedh na g-Criosdaigh, .i. Rómhánaigh ocus Edáilligh ocus Almáinnigh ocus Spainnigh ocus Saxsanaigh d'én rann ocus d'én comairle, i n-agaid rí Franc a aonur acht Albanaigh amháin i rann rí Franc, ocus morán cath ocus écht do iomluad etorra; ocus is amlaidh fuaromar o lucht sgaoilti sgél ocus chuartaighthi cuan gur ab ag Francachaibh do bhí búaid an chogaid sin a n-agaid na n-uile chinél.

Cogad adhbail ar n-eirghe a n-Erinn féin an bhliadain sin, ocus go h-áirighthe isin tuaiscert .i. etir .H. Neill ocus .H. Domnaill; ocus mac Uilliam Chlainni Ricaird ocus Gaill ocus Gaidel Chonnacht, ocus Síol m-Briain ocus Síl g-Cerbhaill ar g-cengal ris .H. Neill dochum in chogaid sin. O Neill do theacht sluag mór go maithibh Uladh, ocus fecht Albanach ocus mórán do Ghalloibh Midhe, ocus gallóglaech Iarla Cille Dara a Tir Chonaill, ocus caislén Bheoil Atha Senaigh do ghabhail dó, ocus Bun Drobhaoisi ocus Bél Leicthi do loscud, ocus imthecht slán don chur sin; ocus teacht slúag mór go gar 'na dhiaidh sin doridhis a Tír Chonaill, ocus breith ar creich a Cinn Mhaghair, ocus a lán don tír do mhilled.

O Domnaill ocus Maghnus .H. Domnaill do cruinniugad shlúaig mhóir an aen áit, ocus a n-dul a Tír Eogain, ocus creacha mora ocus marbhtha do denum dhoibh.

O Neill do cruinniugad shlúaig mhóir an aoin ionad, ocus mac Uillíam Clainne Ricaird .i. Ricard mac Uilleg mic Uillig mic Uillig an Fhiona, ocus Goill ocus Gaoidel Connacht, ocus O Cerbhuill ocus clann h-I Briain do cruinniugad ina comdháil; ocus ro gealladar a g-coinne a cheli a Tír Chonaill; ocus tánic an sluag Connachtach sin go Sligech, ocus tánic O Neill go Cinél Móáin ocus fecht Albanach aige fá mac Mic Dhomnaill, .i. Alustar, ocus fá mhóran do Ghalloibh Midhe ocus do gallóglaechaibh Laighnecha. Dala h-I Domnaill ocus Chinel Conaill, o nach rabadar comtrom daoined re cechtar don da t-shlúaigh sin, issí comairle do rinnedar innsoiged oidhche do thabairt ar .H. Neill; ocus do righnedar coisighe da marcshlúagh maille re na g-cóirighthibh. Ocus do bhi O Neill a b-fhaslongport ag Cnoc an Bhobha, ocus ro innsaighedar Conallaigh a h-én comairle iad gan chongnum coigcrich aca; ocus do brisedar ar O Néill an oidhche sin, ocus ro marbad móran dá muinnter etir Albanchaib ocus Erennchaib, ocus go h-áirighthi moran do Ghalloibh Midhe ocus do gallóglaechaibh Laighnech, ocus do Chlainn t-Shíthigh; ocus O Neill d'imthecht a g-coir mhadhma íar n-dithugad a mhuinntire; ocus O Domnaill d'fhilled iar m-búaid g-coscair maille re h-iomad édalaibh ech ocus éidigh ocus airm; ocus gan comnaide do dhenum doib no gur ghabhadar foslongport ag Beinn Ghulbain; ocus an dá mac Uillíam, ocus an dá O Conchobair, ocus Mac Diarmada, ocus O Cerbhaill ocus clann h-I Bhríain do bheith sluag ro mhór a timchell t-Shligigh, ocus mar fuaradar derbh sgéla an mhadhma sin do thabairt ar O Néill, ger mhór culad ocus daoine ambói ann, ro inntódar tar a n-ais día tírib; ocus ní fess d'O Domnaill a n-imtecht no go n-deachadar tar Coirr Sliabh; ocus ro turnad an chombáidh chogaid sin don dul sin.

Rúgraidhe mac Goffradha mic Aodha Gallda, ocus mac Mhég Cellaigh na Breiffne, do marbad lé sluag h-I Neill a n-ucht Sgairbhe Indsi in Fraoich.

Mac Suibhne Thíre Bóghuine, .i. Brían an Chobhlaigh, ocus Diarmaid mac Taidhg Caim h-I Chleirigh, ocus Aodh mac Mic in Bhaird, ocus a lán eli fós do mharbada g-caislén Bheoil Atha Senaigh le slúag h-I Neill.

Domnall mac Donnchada I Ruairc, sói dhuine uassail 'na dhuthaid féin, do marbad le clainn Feilim h-I Ruairc.

Domnall mac Seam h-I Chatháin, saormacaom a chinedh féin ocus fer einigh choitchinn d'eicsibh ocus d'aois eladhna, do marbad an bhliadain si.

Mag Cormán .i. Maoilechlainn, an t-é dob ferr tuicsi ocus tech n-aoidhed don aos grádha, dh'éc in hoc anno.

Domnall Cleirech mac Seain mic Aibhne h-I Chatháin, .i. cenn einigh ocus engnuma in tuaiscirt a teisd ocus a tabartus, ocus a tuaruscbáil, do mharbad la clainn Gilla Phádraic mic Mhaghnusa h-I Chatháin .i. a altronna ocus a chairdi-ssidhe Criost.

Rugraidhe mac Aodha Óig mic Aodha Ruaidh Mhég Mhathghamna dh'ec in hoc anno.

Kll. Enáir for dhardaoin. Tri bliadna fichet ar .u. ced ar mile ais in Tigerna.

Doinend mhór a tús na bliadna sin, ocus cogad ádhbail ar fedh na h-Eorpa ar muir ocus ar tír, ocus go h-áirighte etir O Neill ocus O n-Domnaill, ocus O Domhnaill do bheith ar edh an erraigh sin a b-fhoslongport a n-Glionn Fhinne, ocus Maghnus O Domnaill do dhul go h-Albain, ocus tocht slan iar criochnugad a chuarta.

O Domnaill do dhul fá dhó a Tir Eogain an bhliadain sin, ocus tocht slán iar milledh mhoráin, ocus síth do dhenum dhóibh deredh bliadna, ocus gan écht oirrderc do dhenum etorra acht mar sin.

O Catháin, .i. Donnchad mac Seain h-I Chatháin, an t-í budh mó clú einigh ocus uaisle dá chinedh fein a comaimsir ris dh'éc, ocus dá thigerna do ghairm a n-aghaid a chéli 'na ionad, .i. Sean mac Tomáis h-I Chatháin ocus Goffraidh mac Goffradha h-I Chatháin, ocus íad araon a cogad ocus a n-imressain, ocus ag milled an tíre ar gach taobh fan tigernus.

Mac h-I Briain .i. Tadhg mac Toirrdhelbaigh, fer a aossa dob ferr enech ocus uaisle ocus rér mhó egla a escarad, ocus dob ferr do chend dámh ocus deoraidh, ocus is lugha do dhiultfed re dreich n-duine um ní dhá n-iarrfed, do marbadh go mí-rathmar d'én urchor do ghunna leisin n-Giuisdís .i. Piarrus Ruad Buitler, mar is gnath sói d'fhagail anasc.

Mac Gilla Eain, .i. Lachluinn Mór mac Echainn, do mharbadh a b-fhioll leisin ridire mac Mic Ailín a m-baile rígh Alban in hoc anno.

Mág Thigernain, .i. Fergal mac Gilla Iossa Óig, mic Gilla Isa mic Briain, dux Thellaigh Dhúnchada, fer dércech daonnachtach, d'fhaghail bháis ina bhaile féin, ocus a derbrathair do ghabhail a ionadh dhá éis.

Eogan, mac Fédhlim mic Dhonnchada Óig mic Thigernain Óig h-I Ruairc, do bháthad ar loch Glenda Éda in hoc anno.

Rossa, mac Ruaidri mic Briain mic Fhélim Mhég Uidir, d'fhagail bháis a m-braighdenus ag an g-comarba Mhág Uidir, .i. Cu Connacht.

Aodh mac Airt h-I Thuathail, an mac a aoisi budh mó clú enigh ocus uaisle da fhine féin, do marbad le Brannachaib an bliadain sin.

Mac Conmidhe, .i. Maoilechlainn mac Seain mic Solaim, ollam h-I Neill, mortuus est.

Sloigeadh adhbail la h-Iarla Cille Dara, .i. Geroid Óg mac Geróid, ocus la Galloib Midhe, ocus la .H. Neill, .i. Conn mac Cuinn mic Enri mic Eogain, ar .H. Conchobair Fhailghe ocus ar Conall O Mordha, ocus ar Ghaoidelaibh Laigen. Na Gaidel sin uile d'anmain ar síth h-I Neill etorra ocus an t-Iarla, tar eis árnaidh na n-Gaoidel sin do chur ar laim h-I Neill, ocus O Neill do chengal na síthe; ocus géill ocus braighde na n-Gaoidel sin d'fhaghail d'O Neill na urláimh, a n-geall re gach agra da n-dingnadh an t-Iarla orra do mholadh h-I Neill, ocus a sgarthain reidh síthech re chéli an tan sin.

O Máille, .i. Cormac mac Eogain h-I Mhaille, féichem coitchend enigh ocus uaisle Iarthair Connacht, mortuus est. Domnall mac Tomáis h-I Maille do gabháil a ionadh.

Indsoiged le .H. n-Domnaill, go g-comaonta thíre ocus choigcrice, go Breiffne h-I Ruairc. Gach nech do b'innsluagad dá raibh isin tír ar a chinn do chuadar le na g-creachaib a n-diamraibh ocus a n-immdhorchaib dá n-imchumdach. O Domnaill d'imtheacht an tíre go h-uilidhe, co nár fhaguibh ní ar bith gan milled dá bailtibh ocus dá h-arbhonnaibh don dul sin.

Kll. Enáir for Aine, ocus bissex fuirre; ceitri bliadna .xx. ar .u. ced ar mile ais in Tigerna.

Doinend mhór ocus ár for sbréidh a tús na bliadnu.

Dis mac h-I Dhomnaill, .i. Niall Garb ocus Eogan, do chengal combágha re cheli i n-aghaid h-I Dhomnaill, ocus a m-beth tamall mar sin ag buaidhred an tíre, no gur cuired futha fein dul i n-agaid a cheli, ocus Eogan do ghabáil bhaile Neill, .i. crannóg Loch Bethad, ocus h-í ar a inchaib p-féin, ocus Niall d'fágbáil an tíre; ocus innsaighed fada do thabairt ar an m-baile dhó, ocus celg do dhénum a g-comfhogus dó. Eogan d'fagail a fessa sin, ocus Niall d'innsoiged dhó; ocus a n-dul fá cheli annsin, ocus Eogan do marbad don láthair sin, ocus Niall do lot, ocus a dhul dh'éc don lot sin fá chend aimsire girre 'na dhiaidh sin; ocus ni h-urusa a radha go tánic lucht a n-aosa do Cheniul g-Conaill budh mo d'échtaib ina an dias sin. An ced mhí do t-shamradh do righned na marbtha sin.

Sémus mac Briain Uaine h-I Ghallchubhair, adhbur comhorba na Cairrge, dh'ec in hoc anno.

Diarmaid mac an Gilla Duibh h-I Bhríain, fer a thigernuis fein dob ferr 'na aimsir do chenn dámh ocus deoraidh, ocus do bud mo muirer ocus dob fhír áidhbhle enech, ocus dob fherr d'fer reidhighthe carad ocus escarad, ocus is mo do saoiled d'anmain re h-inmhe a dhuthaidhe, ocus is mó do budh compánach coitchend don aois ealadna, d'fhaghail bhais ongtha ocus aithrighe a m-Baile Mhég Dubhda, ocus bennacht lais docum nime.

Sloiged lá .H. n-Domnaill a Tir Eogain, dar loisc ocus dár imthig in tír, ocus teacht slán iarum.

Sloiged leisin n-giuisdís, .i. Geróid Óg mac Geróid Iarla Chille Dara, ocus leis O Neill .i. Conn mac Cuinn, a Tír Chonaill dochum h-I Domnaill a mí medhóin fhóghmhair, ocus slóiged eli ag .H. Domnaill na n-oirchill do cosnum a críche fein, ocus moran Albanach ar teacht chuige fón am sin, .i. clann Eoin Chathánaigh, ocus mac Domnaill Gallógláech, ocus daoine uaisle eli as Alban. In giusdís ocus .H. Néill do ghabáil fhasslongpuirt a Port na Tri Námad, ocus O Domnaill co na shlúaig do dhul go Druim Lighen; ocus geallad buailti do bheith etorra ar na mhárach. Maghnus .H. Domnaill ocus Albanaigh do dhul do chaithed shlúaig Ghall an oidhche sin, ocus mac h-I Bruin do mharbadh leó, .i. an Calbach mac Bruin mic Thaidhg, écht mór na dhúthaid fein; ocus cuinne t-shíthe do shnadhmadh etorra ar na mhárach, co n-derna an giúsdís sith eidir .H. Néill ocus .H. Domnaill, ocus é féin a slanaibh etorra; ocus do ríghnedh síth ocus cairdess Crist mar an cedna eidir an n-giusdís ocus .H. Domnaill; ocus iar b-fhilled don ghiúsdís ocus d'Ua Néill fuaradar Aodh mac Neill mic Cuinn mic Aodha Buidhe, mic Briain Bhallaigh h-I Neill, slúag mór ag milledh thíre h-Eogain; ocus ó d' chuala sidhéin na slúaga sin ele do bheith chuige do cuir a th-shlúaigh fein roime lé na chrechaib ocus lé na n-édálaibh, ocus do an féin a b-fad na n-diaidh ar begán daoinedh, no go rug trom an t-shluáig eli fair, ocus gur innsaighedar é iar na fhaghail a m-baogal, gur marbadh leó ar an lathair sin é; ocus ní thánic do Chinél Eogain re h-aimsir fhada a commaith a n-uaisle ocus a n-einech, ocus a g-clú do chosnum ós cinn a chlainn mhaicne, ocus is lugha do léig luidhe dhá escairdibh air, ocus is ferr do chossuin a crích dhúthaid féin gus an uair sin. Oir dob eissidhéin cinnliter a chinidh ocus fír thopur na féli, ocus cend uidhe an uird fhilidh, ocus rélta t-solus t-shoinenta t-shlechta Oedha Buidhe h-I Neill; ocus fóss ní forbonn linn re radha nar fháguibh sé an Erinn d'uaislibh Gall ná Gaoidel díghbáil budh mó den aois ealadhna na an t-Aodh sin mac Néill mic Cuinn, et rl.

Mac Uibhilín, .i. Cormac, ocus mac Seain Duibh Mic Domnaill, do lot ocus do ghabáil a h-aithle an mharbhtha sin le muinnter h-I Néill.

Inghen h-I Domnaill .i. Gormlaith ingen Aodha Rúaidh, ben Aodha mic Neill mic Cuinn, .i. ben einigh choitchinn ocus clu t-shaoghalta do chosnum, ocus do bud mó cumaoin ar órduibh ocus ar aois ealadhna, do dhul dh'éc a mí mhedhóin earraigh; ocus amail tucadar an lánshamuin sin coimidecht daonnachta ocus clú dhá chéli isin t-shaogal co h-aimsir a m-báis, go d-tucuid a n-anmanna coimidecht glóire dá cheli a b-fhlaithius Dé.

Mac Donnchada Thíre h-Oilella, .i. Ruaidri mac Tomaltaigh mic Briain, d'fhaghail bháis, ocus cogad mór edir Clainn n-Donnchada fá thigernus an tíre, ocus Mac Donnchada do dhénum do Chormac mac Taidhg mic Briain.

O Conchobair Ciarraidhe .i. Conchobar mac Conchobair do dhul ar creich a n-Dúthaid Ealla, ocus Cormac Óg mac Cormaic mic Thaidhc do bhreith fair, ocus brissedh ar .H. Conchobair ocus é féin do lot ocus do ghabáil ann; ocus Conchobar mac Diarmada mic in Ghilla Dhuibh h-I Briain do mharbadh ann, ocus Diarmaid mac Cormaic h-I Mháille, .i. écht mór na dhuthaid fein, do marbad ann fós.

Mág Carrthaigh Riabach, .i. Domnall, mac Fínghin mic Diarmada, do dul ar siobal creiche a n-Glionn Fhleisce, ocus breith co h-anordaighthi air ag fágbáil an ghlenna; ocus é fein do ghabáil, ocus cuid dá dhainibh do bhuain de.

Mag Raghnaill .i. Cathal Óg mac Cathail do marbad a b-fhill ar faithche a bhaile fein la clainn I Mhaoil Mhiadhaigh.

Mac Suibhne Thíre Bóghuine, .i. Niall mac Eogain, an cónsopul dob ferr lámh ocus do bud cruaidhe coscur, ocus dob ferr tech aoidhed ocus budh mó muirer ocus muinter, ocus is lía dho briss do bernadhaibh baogail dá chlannmaicne fein, do dhul dh'éc iar n-ongad ocus iar n-aithrighe na caislén féin .i. a Rathain.

Inghen h-I Bhríain .i. Mór ingen Toirrdhealbaigh mic Taidhg h-I Bhríain, ben Donnchada mic Mhathghamna h-I Bhríain, ben tighe aoided coitchinn, do dhul dh'éc in hoc anno.

Aibhilín ingen Ridire in Ghlenna, ben h-I Conchobair Chiarraidhe, deighbhen dércech daonnachtach, do dul dh'éc.

Toirrdhelbach mac Félim Buidhe h-I Conchobair do marbad per dolum la Toirrdhelbach Ruadh, mac Taidhg Bhuidhe mic Cathail Ruaidh.

Kll. Enair for Dhomnach; u. bhliadna ficet ar .u. ced ar mile ais in Tigerna.

H. Domnaill .i. Aodh mac Oedha Ruaidh, ocus .H. Neill .i. Conn mac Cuinn, do dhul docum na comairle móire a g-cend an ghiusdís a tús na bliadna sin, ocus égnech ocus iomthagra mhór do dhenum dóibh ré 'roile, ocus filledh dhóibh aimréidh d'aimdheoin a g-cairdibh Gall ocus Gáidel díbhlínaibh; ocus mórán do mhilled etorra don chogad sin.

Síth do dhénum doibh iarsin a tús fóghmhair mar aderadh an Giúsdís ocus Maghnus O Domnaill.

Gnim uathmar granna do dhenumh a n-Erinn in bhliadain si .i. easpug Leithghlinne do marbad a mebail la Mac an Abaid Mac Mhurchada, ocus é faris féin maille ré gradh mór ocus re síthcháin, ocus an chuid ar a rug Iarla Chille Dara do lucht lamhaighthi an ghnioma sin, rug leis íad gus an áit a n-dernadh an droch comairle sin, ocus tuc fódera a b-fhendadh beó ar tús, ocus a n-abaighe ocus a n-ionathar do bhuain asda, ocus a loscad ina b-fhiadhnuse díbhlínaibh.

H. Catháin .i. Sean mac Tomáis do marbad do chuid dá chinedh fein .i. mac Ruaidri an Rútta h-I Catháin ocus mac Goffraigh h-I Chatháin, oidhche lúghnusa do shunnradh.

Easpuc Cille Dalúa .i. Toirrdhelbhach mac Mathghamhna h-I Briain dh'éc, .i. an Gaoidel is mó fuair ocus is ferr tuc uadh é diambui a comaimsir fris, ocus fer einigh choitchinn comoirderc da gach oen an t-espuc sin, ocus fer chosanta a chóra a tír ocus a g-coicrich do dheoin ocus do aimdheoin, ocus fer slúaig mhóir do chur a g-cend a chéle go minic do milled a escarad ocus do chendsugad a bhídhbhad, conách raibhe a g-comfhogus dó na dhuthaid fein iná i n-duthaid eli na comfhogus mac Gaidel nar ghabh a thuillmhe ocus a thuarusdal uadh; ocus ní ele fós do b'é an t-espuc sin .H. Briain an t-écht ós gach echt ocus an esbud os gach esbudh da d-tarla re h-ealadan an én aimsir ris.

An deganach mac Briain Ruaidh Mic Conmidhe, fer thighe oeided coitchinn dá gach oen, ocus a mac .i. Cerbhall Mac Conmidhe, dh'éc in hoc anno.

Inghen h-I Dhuibhgendain .i. Caiterfhina do dhul dh'éc iar n-ongad ocus iar n-aitrighe im fhéil Coluim Cille, ocus a h-annlucad go h-onorach a mainistir Duin na n-Gall in hoc anno.

Kll. Enair for Luan. Sé bliadna .xx.et ar .u. ced ar mile ais in Tigerna.

Mac h-I Ruairc .i. Tadhc mac Eogain do marbad a meabail lá muinter a derbráthar fein.

O Néill .i. Conn ocus Maghnus O Domnaill do dhul a g-cend an ghiúsdís do dhenum shíthe Conaldach ocus Eoganach, ocus iar tinól mhórain do mhaithib Gall ocus Gaoidel da sídhugad nír bheidir a sídugad annsin, ocus tancodar aimreidh dá tighibh.

H. Raighilligh .i. Eogan do dhul dh'éc, ocus cogad mór etir a chinedh fá tigernus an tire, no gur goiredh .H. Raighilligh d'Fergal mac Seain do mholadh an ghiúsdís ocus mhóráin do mhaithibh Gall ocus Gaoidel, ge dho bhadar daoine bu shine ná h-é ag cur chuige.

Cogad mór ar n-eirghe a n-Iochtar Chonnacht an bhliadain sin, ocus a n-urmhór uile do chengal re chéli i n-aghaid h-I Dhomnaill, fa Brian mac Félim h-I Conchobair ocus fá mac Cathail Óig h-I Conchobair, ocus fa t-shliocht Cormaic mic Donnchada, ocus Iochtar Cairbri do creachad leo; ocus O Domnaill do brissedh na Gráinsighe, ocus dul a Muigh Luirg do 'na dhiaidh sin ocus an tír do mhilledh ocus do loscud lais. An t-Shíl Conchobair ocus an Chlann n-Donnchadha sin do bhí ar an g-cogad do cruinnechadh ocus teacht go Sligech dhóibh, ocus cur go maith dochum an chaisléin no gur marbadh duine maith da muinter .i. Ruaidri Ballach mac h-I Airt. Imthecht dóibh an lá sin ocus cruinneachad doibh fá chend gairid arís, ocus teacht co Sligech do mhilled gort ocus do chur dochum an bhaile, ocus O Domnaill d'fhagail sgéla a m-beith mar sin, ocus a ghluassacht chucu ocus breith orra, ocus a madhmugad lais, ocus cuid mhór dá n-dáinedh do bhuain díbh, ocus édáil mhór ech ocus airm ocus eidigh.

O Neill .i. Conn do theacht slúag mór do toirmesc oipri caisléin do thinnscuin Maghnus O Domnaill do denum a Purt na Tri Namad, ocus Maghnus do thegmháil re tús an t-slúaig, ocus mac Seain h-I Neill .i. Enrí do ghabáil leis, ocus O Neill d'imthecht a g-coir mhadhma.

O Catháin .i. Goffraigh mac Goffradha do marbadh a n-ucht Bealaigh in chamáin le mac h-I Neill .i. Niall Óg, an ced mhí do t-shámradh, ocus Niall féin do ghabáil fá chend athghairid iarsin leis O Neill, ocus a bheith 'na chimidh.

Sean mac Oedha mic Diarmada, an bheithir bheodha bhith oirrderc, do marbad le slicht h-I Conchobair Ruaid iar ná fhagail a m-baogal for Mullach Croiche.

Slóigeadh lá h-Iarla Chille Dara fa machaire Chonnacht ar forgall h-I Conchobair Ruaid, gur ghabhustar Baile Thopair Bríghdi ocus Caislén Riabach Chlainni Faghartaigh, ocus ro thídlaic d'O Chonchobair Ruadh iad.

Lommargain h-I Conchobair la clainn Ruaidri Mic Diarmada ag Cuirr in Droichit, ocus cúigfer no t-sheisfer da muinter d'fhágbáil dóibh-siom.

Argain t-shlechta Taidhc Mic Branáin ocus Tuathla .H. Conchobair na chinadh síeín, ocus Ruaidri mac Cuinn Mic Branáin do mharbadh la clainn Eachmharcaigh Mic Branáin.

Mors Mhég Amhalgaidh la h-Ua Maoil Sechlainn, dar sarugad an Iarla.

Slóigedh la Brian O Ruairc a muinter Eoluis, gur gabh nert fer g-Conmaicne ocus Chinél m-Bibhsaigh don dul sin.

Mac h-I Chatháin .i. Goffraigh mac Donnchada, adhbar tigerna a thíre féin, do dhul ar siobal creiche a n-Glend Choncadhuin a mi Enáir do shinnradh, ocus é fein d'fhagbail, ocus nach b-fríth én fhocul dá sgélaibh no go b-fríth a chorp an t-shechtmhuin déighenach don chorghus ar a chinn; ocus Enrí mac Neill mhic Briain, tigerna Baile na Brághad do marbad ann, ocus mórán eli do marbadh ocus do lethad ann maille riú dá muinter.

Maidhm do thabairt do mac mic Piaruis Buitiléir ar chlainn Emuinn mhic Tomáis Buitileir, dú inar marbad Conchobar Óg mac Conchobair Choeich h-I Dhomnaill, do bhí na chónsabal gallóglaech ocus na láimh maith go minic, ocus go h-airighthi an lá sin, oir nir leic a nert ocus méd a menma ocus febhus a laimhe dhó anacal do ghabáil iar ná thaircsin dó, ocus do tuit imat do dhaoinib móra maithi sa maidhm sin do mharcshlúagaib ocus do ghallóglaechuibh.

O Dochartaigh .i. Echmharcach, tigerna Innsi h-Eogain, dh'éc a n-err a aoissi in hoc anno, ocus cogad mor etir a chinedh fá thigernus an tíre, ocus tigherna do dhenum do Geralt mac Domnaill mic Fhélim h-I Dhochartaigh.

Sloiged la .H. n-Domnaill a Tír Amhalgaid do chongnum lé slicht Ricaird a Búrc, ocus Caorthannán ocus Cros Mhaoilína do ghabáil leis, ocus a m-brissedh dhó, ocus bráighde ocus édála imdha do tabairt asda sin, ocus síth d'fhagbáil etir shlicht Ricaird a Búrc ocus Bairédachaibh; ocus foslongport do dhénum dhó ar a fhilledh fá chaislén Cúl Mhaile, ocus síth ocus bráighde do bhuain do t-shliocht Cormaic Mic Donnchada annsin, et reliqua.

Kll. Enáir for mhairt. Seacht m-bliadna fichet ar .u. ced ar mile ais in Tigerna.

Mac Donnchada Thíre h-Oilella .i. Cormac mac Taidhg mic Bríain do dhul dh'éc, ocus cogad mór idir Chlainn n-Donnchadha fá thigernus an tíre 'na dhiaidh, no gur goiredh Mac Donnchada d'Eoghan mac Donnchada mic Murchada.

Brian mac Félim mic Maghnusa h-I Conchobair dh'éc in hoc anno.

Domnall mac Félim mic Thoirrdhelbaigh Charraigh h-I Conchobair mortuus est.

O Cleirigh.i. an Gilla Riabach mac Taidhg Caim, sói re h-eladhain ocus fer saidhbris mhóir, d'fhaghail bháis a n-aibíd san Fróinséis a mí mhedhoin in erraigh.

Domnall mac an Espuic h-I Ghallchubair do marbad le cuid do t-shlicht Aonghuis h-I Ghallchubhair an bhliadain si.

In Doctúir mac Eogain I Duinnshleibhe, sói re leighes ocus annsna h-ealadhnaibh eli durmhór, ocus fer conáigh mhóir ocus tighe aoided, dh'éc an tress lá ría b-fhéli Froinsias.

Mag Uidhir do dhul dh'éc an bhliadain si, ocus tigerna do dhenum don chomhorba Mhág Uidir 'na ionadh .i. do Chú Connacht mac Conconnocht mic Briain.

Toirrdhelbach mac Eignecháin I Dhomnaill mortuus est.

Félim mac Goffradha mic Seain Luirg h-I Domnaill mortuus est.

Sloigedh leis O n-Domhnaill a Mágh Luirg, ocus an tír do mhilled etir arbhar ocus fhoirgnem, ocus an caislén mór ocus caislen an Bennada do ghabáil dó, ocus caislén an Chalaidh, ocus Baile na h-Uamha, ocus an Caislén Riabach do ghabáil dó; ocus a m-brissedh iarsin, ocus marcach maith do marbad do muinter h-I Domnaill a n-ucht an Bhelaigh Bhuidhe .i. Oedh Buidhe mac an Dubhaltaigh h-I Gallchubhair.

Caislen Liffir do thinnscna le Maighnus O n-Domnaill in cedoein iar b-fhéil Brénainn, ocus a crichnugad le cuid don t-shamhrad sin etir obair crainn ocus cloiche, ocus cogad h-I Neill fair.

Maghnus O Domnaill do dhul ar siubal creichi a n-Glionn Fhéile ar Oedh m-Buidhe O n-Domnaill, ocus creach do thabairt lais, ocus dias marcach dá muinter do marbad .i. mac Domnaill mic Fhélim mic Aonghusa Óig h-I Ghallchubair, ocus mac Briain Chaoich mic Domnaill mic in Deganaigh.

Tommás mac Maghnusa Mhégg Uidir dh'éc .i. soi chléirigh ocus dhuine thuicsigh tréighighe re Laidin ocus re Gaoidilige, ocus dob ferr cóip leabar Laidne ocus Ghaoidilge a comhgar dhó, ocus fer muirir mhóir d'iomchur ocus tighe aoidhed do chongmáil.

Ruaidri mac Murchada mic t-Shuibhne do marbad da bráitribh p-fein in hoc anno.

Uilliam mac Aindriass Mhég Craith .i. fer saidhbris mhóir ocus biatach maith, ocus a bhen, dh'ec an én ló con oidhche in bhliadain sin.

Caitilín ingen Chuinn mic Domnaill h-I Neill, ben craibhtech dheigh einigh do bhí ag fheraibh maithi .i. ag O Raighilligh ar tús ocus ag O Ruairc 'na dhiaidh sin, d'fhaghail bháis an bhlíadain si iar n-ongad ocus n-aithrighe.

Iarla Chille Dara ocus mac Iarla Urmhuman do dhul a Saxanaibh tré imthnúth ocus tre innlach a chéle, ocus a inadh fein a n-Erinn do fhágbáil ag barún Delbhna, .i. giusdís na h-Erenn an tan sin in t-Iarla sin Cille Dara.

Domnall mac Fergail mic Domnaill h-I Birn, dux in leithe síos do thir Briúin, ocus a bhainchele .i. Lassairfhíona ingen t-Sheain mic in Prieóra, mortui sunt. Tadhg mac Cairbri mic in Prieóra h-I Birn do ghabáil na taoisighechta tar éis Domnaill ar bélaib shinnser shlechta Cormaic h-I Birn, amail is dú do dhegh airilniudh, ocus Maoil Sechluinn O Birn a brathair eli do ghabáil na tanaisdechta.

Mor ingen Mhaoilechlainn Mhic Cápa, uxor h-I Ainlighe .i. an bhen dob ferr tánic a g-Cenel Doffa mic Oenghusa re cian d'aimsir, buime dhámh ocus dheoraidh na h-Erenn, aithghin Mhóire Muman ar chlú ocus ar crabadh ocus ar chaondúthracht, ben is mó tuc d'offráil ocus d'almsanaibh bídh ocus édaigh do bhochtaibh ocus d'aidhilgnechaibh an Choimdidh ocus dá gach aon no rigedh a less a fhaghail, a h-ég ar lár a longpuirt féin a port Locha Leisi, et sepulta est a n-Oilfinn fá dhíden Dé ocus Phádraic.

An Prióir Óg O Fergail .i. Tomáss mac Emuinn mhic Rossa, tigerna Chalaidh na h-Anghaile, ocus an cúiged cuibhrendach dob ferr do bhói do Chlannuibh Rugraidhe, do marbadh la clainn Emuinn h-I Chellaigh ocus le slicht Félim mic Gilla na Naom h-I Fergail, ocus a triur mac maille friss per dolum.

Forbhuise chúig seachtmhuineadh no assé la clainn Ruaidri mic Diarmada, ocus lá clainn Taidhg mic Ruaidri mic Diarmada, ocus la Mac n-Dubhghaill ocus le slicht h-I Conchobair Ruaid, ocus re slicht Félim Fhinn, ocus le slicht Taidhg mic Branáin, for Chaislén Riabach Chlainni Faghartaigh, ocus muc ingnad crainn do dhenum chuige dhoibh do h-shailghibh degh dhaingne daracha, ocus sailghe fada fír mhóra ar luth fúithe.

Diarmaid mac Taidg Ruaid, ocus marcach maith do bhunadh Chlainne Maol Runaid, do mharbad amach assan g-caislén, ocus an mhuc do gherradh fá dheoidh la Tuathal Ruad.

Kll. Enáir for Cedaoin; bissex fuirre. Ocht m-bliadna fiched ocus .u. ced ocus mile aois an Tigerna.

Inghen h-I Briain .i. Finnghuala ingen Conchobair, an bhen is mó do chossuin do chlú a comaimsir ría do thaobh chuirp ocus anma, do dhul dh'éc iar g-caithem a h-aoissi ocus a h-inme re h-oinech ocus re daonnocht ar tús, ocus iar m-beith bliadain ar fhichit a n-aibíd an tress uird ag denum crábadh ocus daonnachta ocus degh oiprighthe do thaobh Dhé ocus an t-shaoguil.

H. Bríain .i. Toirrdhelbach mac Taidhc, an Gaoideal dob fhaide re h-uaisle ocus re h-enech a Leth Modha uile, ocus oigri díles Briain Boruma ar chongmhail chogaid re Galloib, d'faghail bháis iar n-ongad ocus iar n-aithrighe, ocus a mac do rigad na ionad .i. Conchobar mac Toirrdhealbaigh.

Mac Diarmada Mhoighe Luirg .i. Cormac mac Ruaidhrí mic Diarmada, féichem coitchenn ar einech ocus ar fhéile d'aois ealadna, ocus mír cruadha cogaid ocus cothaighthi Connacht an Cormac sin, ocus fer chosanta a criche fein ar a essgcairdibh é, ocus a ég iar n-ongad ocus iar n-aithrighe a n-err a aoissi; ocus a dherbráthair .i. Diarmaid do ghabháil a ionad dia éis.

Conn mac Neill mic Airt h-I Neill, cennfedhna maith do Chinél Eogain, do mharbad la mac Airt Óig h-I Neill, ocus dias mac h-I Neill .i. Enrí ocus Cormac, do bhí a láimh ag .H. Neill a b-fad roime sin, do thabairt do clainn Cuinn mic Neill, ocus clann Cuinn do crochad na deisi mac righ sin.

Caislén Cúl Mhaoile do ghabhail ar Mac n-Donnchada da dherbrathair fein .i. do Muircertach Mac Donnchada mac Murchada, ocus Mac Donnchada fein ocus a mac .i. Murchad do ghabhail fá chend goirid 'na dhiaidh sin leis O n-Dubhda, ocus le Muircertach Mac n-Donnchada, ocus mac eli do Mac Donnchada do mharbad ann .i. Donnchad.

Sloiged leis O n-Domhnaill maille re h-Albanchaib móra fa Alusdar mac Eóin Chathánaigh a Muigh Luirg, ocus an Bealach Buidhe do gerradh dhoibh, ocus cíos ocus bráighdi d'fhaghail on tír, ocus teacht slán.

O Ruairc .i. Eogan mac Tigernáin, tigerna na Breifne, ursa chothaighthe einigh ocus uaisle t-shleachta Aodha Finn, d'fhaghail bháis an bhliadain sin a n-aibíd san Froinséis iar n-ongad ocus iar n-aithrighe.

Mac Suibhne Fanad .i. Domnall Óg mortuus est iar g-cur aibíde an uird Muire uime la fhéli Muire isin n-geimhredh.

Gaoth mhór isin m-bliadain si an aoine ria nodlaic, ionnus gur leg mórán d'oiprechaibh crainn ocus cloiche ocus iomad do crannuibh, ocus go h-áirighthi do bris mainistir Dhúin na n-Gall, ocus do bris ocus do fhuadaig a lán d'arrtroighibh ar muir ocus ar tír.

Muiris mac Dhonnchada h-I Bigleighind, sói re leighius, d'fhaghail bháis an bhliadain sin.

O Maoil Mhíadhaigh .i. Cathal mac Domnaill mic Uaithne Bhuidhe, taissech Theallaigh Cerbhallain, mortuus est.

Kll. Enair for Aoine. Nói m-bliadna fiched ocus .u. ced ocus mile ais in Tigerna.

Conchobar Óg O Baighill, tanusde a thalman féin, do mharbadh lá clainn h-I Bhaighill in hoc anno.

Iarla Dessmuman, Semus, an t-aon mac Goill fá mo clú oinigh ocus uaisle do bhí an Erinn, ocus do bhoi 'na ursain cogaid re Galloib ocus re Gaoidhelaibh, ocus dob ferr do chend dámh ocus deoraid, dh'éc a lár a aoisi ocus a inme do ghalur opann thrí n-oidhche im fheil san Seain.

Félim mac Conchobair h-I Bháighill do mharbad la clainn h-I Bhaighill in hoc anno.

Mac mic Dhubhghaill na h-Alban do mharbadh la h-Aodh m-Buidhe .H. n-Domhnaill a n-dorus chaisléin Chúile mhic an Tréin d'én bhúille cloidhem.

Caislén Chúil mic an Trein do gabáil fá chend gairid 'na dhiaidh sin le Mághnus .H. n-Domnaill, ocus a brissedh ass a h-aithle do thoradh na comairle.

O h-Uiginn .i. Domnall Cam, saoi re dán ocus re foghluim, dh'éc in hoc anno.

Mac h-I Uiginn .i. Aodh mac Glaisne, sói re dán, mortuus est.

Brian Ballach mac Neill mic Cuinn do mharbad le Cormac Mac Uibhilín, ocus ó ar mhuinnterus Briain féin, ocus síad ag fagbáil Chairrge Ferghuis.

An Cosnamach mac Fergail mic Donnchada Dhuibh Mic Aodhagáin, .i. an fer fá h-uirrderca a b-feinechus ocus a b-fhilidhecht re breithemnus tuaithi a tíribh Gaoidel, mortuus est et sepultus est a n-Oilfinn.

Domnall mac Eoin mic Domnaill mic Birrthagra, adhbar olloman Tuaiscert Uladh re bérla feinechuis, mortuus est et sepultus est ag Carraig Ferghuis.

Sémus mac Ruaidri mic Birrthagra, mac fhuirmhigh a ealadna fein, mortuus est.

Mac Ailín .i. Cailín mac Gille Espuig, én rogha a n-oirir ghaoidhelaibh uile ar engnum ocus ar einech, dh'éc.

Domnall mac Aodha mic Domnaill Mic Aodhagáin .i. Mac Aodhagáin Urmhuman .i. cend éigsi Leithe Modha ar eigsi ocus ar fhilidecht, mortuus est.

Mac Fheoruis Dhúin Móir .i. Maoilir mortuus est.

Muirchertach mac Maghnusa Mic Diarmada Ruaidh ocus Conchobar mac Giolla Marrtain do marbad an Oilfind, ocus Ruaidri Buidhe mac Donnchada Dhuibh ocus Emann mac Dubhghaill do gabail ann leis O Conchobair Ruadh.

Kll. Ienair for h-shatharn; x. m-bliadna xx.et ocus .u. ced ocus mile ais in Tigerna.

Caitilín ingen Murchada mic t-Shuibhne, ben I Dhochartaigh, mortua est.

Roiss ingen h-I Chatháin, ben Fhélim I Dhochartaigh, do dhul dh'éc in hoc anno.

Slóiged leis .H. n-Domnaill a mí mhedhóin t-shamrad a coiged Connacht, dár gabadh lais trid choilltib Conchobair ar fad ocus assin a n-Uachtar Thíre, ocus tar Búill budhdhess, ocus tríd an tánuisdecht a Moigh Luirg, ocus tar Cara Dromma Ruisc soir doridhis; ocus Muinter Eoluis do mhilledh ocus do loscud lais, ocus cuid dá dhaoinibh do buain de im chaislen Liathdromma .i. Maghnus mac Firdhorcha Mic Shuibhne ocus mac Mic Coilín .i. Toirrdelbach Dubh, ocus gabáil assin ariss tar Sinuinn siar, ocus do mhachaire Chonnacht, ocus do droichet Atha Modha tar Suca, ocus Clann Chionnmaigh do creachad ocus do loscud lais .i. bailti Mic Dáibhíth .i. Glinnsce ocus Cill Chrúáin, ocus édála imdha do thabairt assan tír. Baile an Topair do mhilledh ocus do loscud don dul sin lais, ocus cíoss cossanta d'fagbháil ar .H. Conchobair Ruad .i. sé pinginne isin g-cethromain dá dhúthaid; ocus filled tarais don Bhealaigh Buidhi iar milled Muighe Luirg, ocus gan díghbhail do dhénum dhó.

Sorcha ingen Aodha Óig mic Aodha an Einigh mic Neill mic Cuind, uxor hi Neill .i. Cuinn mic Cuinn mic Enrí, mortua est.

Mac Artáin dux Chineoil Fhoghartaigh mortuus est.

Mac Domnaill Gallóglaech .i. Colla mac Colla, consapal tire h-Eogain mic Neill, mortuus est.

Cathal mac Ruaidri Óig mic Ruaidhri Caoich Mic Dhiarmada, sáoi chinnfhedhna do chrechairecht ocus do chendsugad a escarad ar gach taoibh dhe, mortuus est.

Cumsgraich mac Maol Ruanaidh mic Conchobair Mhég Rághnaill mortuus est.

Teach crandghaile dob ferr do bhí an Erinn ag Mac Conshnama ar Loch Aillinne do loscud lais O n-Domnaill, ocus an Bhreiffne uile ó t-shhlíabh siar do mhilledh dhó.

Creach mhór do dhénum d'Aodh Bhuidhe O Dhomnaill a n-Gaileng.

Sloiged eli leis .H. n-Domhnaill a mí mhedhóin an fhoghmhair ar mac Uillíam Búrc, dár milledh cuid don tír, ocus síth do shnadhmad doib iarsin, ocus teacht slan acht óg mharcach maith don t-shlúaigh .i. Aodh mac Conchobair Riabaich h-I Dhuibhidhir.

Rugraidhe, mac Eogain mic Aodha Bailbh mic t-Sheain h-I Dhochartaigh, écht mór 'na dhuthaid féin, mortuus est.

Mac Uilliam Chlainni Ricaird .i. Ricard mac Uilleg Finn mic Uilleg Ruaidh mic Uilleg an Fhína, cinnlitir Gall ocus Ghaoidel Uachtair Connacht, ocus an t-é dob ferr oinech ocus uaisle, ocus bhudh daingne recht ocus riagail tánic do t-shliocht Uillíam Cuncúr re cian d'aimsir, d'faghail bháis do ghalur aithgherr an mhí déighionach don errach.

Caipidil na m-brathar mionúr a n-Dún na n-Gall an bhliadain sin, ocus O Domnaill dá d-tabairt amach uile ó thús co déredh ar a chosdus fein maille re caithem mór ocus re sochraidhecht adhbail ónorach.

Espuc Oilefinn .i. an t-espuc Grégech d'faghail bháis, ocus ni h-oilbheim don daonnacht an t-ég an espuic Grégaigh.

Comhfhorba Choluim Cille a n-Glionn Cille .i. Donn mag Niallussaigh mortuus est.

Iarla Chille Dara .i. Geróid mac Geróid do bhí a fhad fá ríasd ag righ Saxan do theacht a n-Erinn ocus Giuisdis Saxanach do thocht leis, ocus iad ag milled mhóráin fá Ghaoidhealaibh. O Raighilligh do ghabáil dóibh ocus é ar teacht 'na g-cenn fein.

Inghen Mic in Bhaird .i. Una dh'ec.

Inghen h-I Bhaighill .i. Róis ingen Toirrdhelbaigh mic Neill Ruaid, ben dércach deighenigh, mortua est.

Síle ingen h-I Fallamain uxor Cairbri mic in prióra h-I Birn, ben dércach dhaonnachtach deigh dealbha nar dhiult dámh na deoraidh, mortua est.

Kll. Enáir for Domnach; en bliadan dég ar fichit, ocus cuig ced ocus mile ais in Tigerna.

O Siaghail ollam leighis Innsi h-Eogain mortuus est.

Caislen Bheoil Leice do ghabáil d'Aodh Bhuidhe O Dhomnaill, ocus buaidhred an tíre do theacht ass sin go mór.

Donnchad mac Toirrdhelbaigh mic Taidhc h-I Briain, tánusde Tuadhmhuman, cennfedhna maith ocus fer d'énmha einigh ocus uaisle, dh'éc in hoc anno.

Mag Carrthaigh Riabach .i. Domnall mac Fínghin mic Diarmada, tigerna óg Cairbri, ocus fer einigh coitchinn d'éigsibh ocus d'aois ealadna, ocus tigerna do bu ro mhaith reacht ocus riagal, ocus tuc gairm scoile d'feruibh Erenn, do dhul dh'éc in hoc anno.

Mac h-I Dhochartaigh .i. Niall mac Conchobair Charraigh mortuus est.

Diarmaid mac Seain mic Aodha mic Mhaol Ruanaidh .i. an t-é dob ferr uaisle ocus daonnacht día choirpfhine fein, dh'éc.

Cogad mór a Tír Conaill an bhliadain sin idir O n-Domhnaill ocus a mac .i. Mághnus. O Domnaill do chur t-shlúaigh mhóir an aon áit ocus dul a n-dúthaidh Mhaghnuis, ocus an tir do mhilledh dhó; ocus mac Donnchada Choeich Mhég Uidhir, duine uassal maith d'Feruibh Manach do mharbadh ar an slóiged; ocus Maghnus do theacht a tír Aodha ocus morán do mhilledh innti, ocus araile.

Mac Mic Uibhilín .i. Cormac, cend fedhna maith ocus fer einigh choitchinn, d'fhagail bháis co h-obann in hoc anno.

Sloiged leisin n-giuisdís t-Shaxsanach .i. Uillíam Sgemeltún a Tír Eogain, ocus O Domnaill do dhul 'na g-conne, ocus caislén Cinnaird do brissedh ocus an tir do mhilledh; ocus Brían mac Lochluinn mic t-Shuibhne, consapal Iarla Urmhuman, do mharbadh a m-bruighin ar an sloiged sin fein.

Iollann Buidhe mac Mhaoilechlainn mic Iollainn Mic in Legha Ruaidh, sói na ealadain fein, dh'ec an bhliadain sin.

Síle ingen Chairbre h-I Birn, ben a h-aossa féin dob ferr do bhaintoisseachaibh Shíl Muireghaigh ina coimré, d'fagbail bháis, ocus a h-adhlucad a Ross Chommáin a n-othurlighe a sinnser.

Tuathal O Domnalláin ó Mhachaire Mhaonmhoighe mortuus est.

Gilla Padraic mac Adhuimh Mic in Bhaird mortuus est.

Kll. Enáir for Luan: dhá bhlíaduin dhéc ar fhichit ocus .u. ced ocus mile.

O Domnaill do dhul a g-cend an ghiuisdís .i. Uillíam Sgemeltún an bhliadain si, ocus rann ocus cengal do dhenum ris, ocus an giuisdís Sacsanach do thocht a Tír Eogain, ocus Dun Genuinn do brissedh dhó, ocus an tir do mhilledh.

Iarla Chille Dara .i. Geróid mac Geróid do thocht ass Sassanaibh ocus é 'na ghiuisdís ón rí.

O Domnaill do dhul a Muigh Luirg ocus Mac Domnaill leis .i. Alusdar mac Eoin Chathánaigh, ocus creacha ocus loiscthi do dhenum dhoibh, ocus sith do dhenum go luath 'na dhiaidh sin dóibh.

Clann h-I Neill .i. clann Airt Óig .i. Domnall ocus Tuathal, do bhói a b-fhad a m-braighdenus ag O Néill, do crochad lais in hoc anno.

Eogan mac Thigernain mhic Eogain h-I Rúairc, sói dhuine uassuil ar a chulaidh fein, do mharbad le clainn I Mhaoil Mhiadhaigh a m-baile na m-bráthar a n-Druim Dhá Eithíar.

Mac Mhég Fhlannchaidh .i. Toirrdhelbach do mharbad dia dhias derbráthar féin a n-dorus baile Mhég Fhlannchaidh, ocus Brian O Ruairc do mhilledh mhoráin a n-Dartraighe trídsin.

Inghen Mhic Shúibhne Fhánad .i. Máire, .i. ben h-I Bháighill, d'fhagail bháis go h-obann .i. a h-escur dá h-each a n-dorus a baile fein.

O Maol Conaire .i. Torna mac Torna mortuus est, ocus O Maol Conaire do ghairm na ionad do Conchobar mac Domnaill Rúaid h-I Mhaoil Conaire, ocus a dhul dh'éc go luath 'na dhiaidh sin.

Caislén Aird na Riadh do ghabáil le clainn h-I Dhubhda ar mac Seain a Búrc, ocus cogad etorra p-féin ocus sliocht Ricaird a Búrc, ocus mórán creach ocus marbhtha do denum etorra in hoc anno.

O Cerbhuill .i. Maol Ruanaidh, an Gaoidel do b'uaisle ocus do b' oirrderca a Leth Modha, ocus is mó do mhill fá Ghalloibh ocus do lessaigh fá Ghaoidelaibh, d'fhagail bháis in hoc anno.

Comorba Fídhnacha .i. Brian mortuus est.

Mac Uidhilín .i. Ualtar mac Geróid do mharbadh a n-egluis Dhúin Bó, ocus Conchobar mac h-I Chatháin, fer toictech tromchonáigh, do loscud, ocus Mac Con Uladh .i. Sémmus mac Airt Mic Con Uladh do ghabail ann. Clann Domhnaill Chleirigh h-I Chatháin do ríne na gnioma sin.

Mac iarla Urmhuman .i. Tomáss mac Píaruis Ruaid do marbad a n-Ossraighe le Diarmaid mac Gilla Phádraic, adhbar righ Ossraighe; ocus ní mór nar bhé sin écht Mhaoil Mhóire, daigh nír bho cian íarsin gurro tairbhreth Diarmaid lé na derbráthair féin, .i. lá Mac Gilla Phadraic, don Iarla Urmhuimnech, ocus ro cenglad Diarmaid lás an iarla a n-díghuil a mhic ocus gach uilc airchena da n-dernadh le Diarmaid roime sin riam.

Dubhchabhlaigh, inghen Conchobair mic Ruaidri Bhuidhi .i. ben Conchobair Óig mic Muircheartaigh Mic Diarmada Rúaid, mortua est.

Kll. Enair for Mairt; tri bliadna dég ar xx.it ar .u. ced ar mile ais in Tigerna.

Mac Diarmada Mhoighe Luirg .i. Diarmaid an Einigh mac Ruaidri Óig mic Ruaidri Chaoich Mic Diarmada, do mharbadh per dolum la clainn Eogain mic Thaidhg mic Ruaidri Mic Diarmada, .i. bráithre Mic Diarmada féin, ocus fá mór an t-écht sin, óir ní raibhe a comaimsir ris a n-Erinn fer a thigernuis do budh mó oinech ocus uaisle, ocus dob ferr do cend dámh ocus deoraidh, ocus ann gach uile mhodh duine mhaith ináss; fer lán do aithne ocus d'eolus ocus d'eladhain, ocus da gach maith áirchena; lá fhéile Brénuinn ros-dí-chendad a Lios Aodháin a crich Airtigh, ocus Eogan mac Taidhg Mic Diarmada do rioghadh ar crích Chlainni Mhaol Ruanaidh 'na dhiaidh.

Caislén Sligighh do ghabáil le Tadhg Óg mac Taidhg mic Aodha h-I Chonchobair ar indsaiged oidhche, íar bh-faghail th-sheolta ocus chuir amach air ó chuid do lucht coiméta in chaisléin fein.

Caislen Aird na Riadh do ghabáil lé clainn Tommáis a Búrc ar chlainn h-I Dhubhda san oidhche mur an cedna.

Crech mhór do dhénum d'O Dhomnaill ar .H. n-Eghra m-Buidhe idir dhá abhuinn.

Niall mac Murchada Mic Shuibhne do mharbad ar droichet Sligigh .i. an t-óg macaom dob ferr do t-shliocht Donnchada Mhóir, in hoc anno.

Muircertach mac Feilim mic Toirrdhelbaigh Charraigh do chrochad la .H. n-Domhnaill ar faichthi caislein Enaigh, ar n-diultad an bhaile do thabairt ass dá chloinn ocus dá bráithribh fein.

Maol Ruanaidh Óg mac Mhaol Ruanaidh I Cherbhuill dh'éc in hoc anno.

O Maol Mhuaidh .i. Domnall Caoch mac in Chosnamaigh do mharbadh a b-fhioll le na derbráthair fein, ocus le mac a derbráthar, ar faichthi Loinn Eala, ocus O Maol Mhuaidh do ghairm dá dherbráthair .i. do Chathaoir.

Emonn mac Cuinn mic Néill do mharbadh le clainn Mhég Uidhir.

Feilim Bacach mac Néill mic Cuinn dh'éc in hoc anno.

Kll. Enáir for dhardaoin; ceitri bliadna deg ar fichit ar .u. ced ar mile ais in Tigerna.

Mac Diarmada Mhoighe Luirg, .i. Eogan mac Taidhg mic Ruaidri Mic Diarmada, d'fhagail bháis an bliadain sin ar Cairrig Mic Dhiarmada iar n-ongad ocus n-aithrighe, ocus Aodh mac Cormaic mic Ruaidhrí Mic Diarmada do ghabháil tigernuis Mhoighe Luirg 'na dhiaidh, ocus é 'na ab a mainisdir na Búille; ocus Cairrig Mic Dhiarmada do ghabáil le clainn Taidhg mic Ruaidri Mic Diarmada an uair sin .i. do Ruaidri ocus do Thomaltach. Cogad ocus imressuin d'fhás isin tír dhe sin.

Mac mic Eochada .i. Donnchad mac Mhaol Muire mic Eochada, adhbhar ollaman Laigen gan immresuin ocus fer a t-shaothair fein dob ferr ann gach uile ghné don ealadhuin, ocus dob ferr do thighessach, do marbad go tupaistech den urchur do gha le derbraithribh a mathar féin .i. clainn I Tuathail.

Toirrdhelbach Dubh O Dimusaigh do mharbad a b-fhioll le na bráthair féin .i. le Muircertach Óg O n-Diomusaigh ar slánuibh Dé ocus Eibhín naoim.

Muircertach Óg féin do mharbadh go luath 'na dhiaidh sin le .H. Mórdha tre chumachtuibh Dé ocus Eibhín.

Eogan mac Aodha Buidhe mic Neill mic Cuinn, an mac righ dob ferr do shliocht Aodha Buidhe, do mharbad le h-Albanchaib d'en urchur do t-shoighid ar Loch Cuan.

Iarla Chille Dara, .i. Geróid mac Geróid mic Thómmais, do dhul a Saxuibh fá thoghairm righ Saxsan, ocus an t-Iarla do chur dochum báis .i. an t-aon mac Goill do budh mó do sgél do bhí a n-Erinn 'na aimmsir féin; ocus mac an Iarla .i. Tomáss do milled mhuinnteri righ Saxsan a n-Erinn le cogadh .i. gach uile duine dhá raibhe ag muinechadh ass ri Saxsan ar fedh na Midhe a m-bailti do brissedh ocus a m-bráighde do bhuain díbh; ocus airdesspacc Bhaile Atha Clíath do marbadh le mac an Iarla ar an cogad sin. Ocus giuisdís Sassanach do theacht a n-Erinn on rí, ocus bailti mic an Iarla do brissed d'urmhór, ocus an Mhidhe uile do milled etir chill ocus tuaith, ocus uilc imdha do dhenum etorra; ocus Magh Nuaad do ghabáil leisin n-giuisdís h-Shacsanach, ocus echta móra do muinter mic an Iarla do mharbad ann.

O Conchobair Ruad .i. Tadhc Buidhe mac Cathail Ruaidh d'fhagail bháis an bhliadain sin, ocus O Conchobair do ghairm do Thoirrdhelbach Ruad .i. dá mac 'na ionadh.

Brian mac Seain I Mhaoil Mhuaidh do mharbadh a b-fhioll le cuid dá chinedh féin.

O Gallchubair .i. Emmonn mac Eoin mic Tuathail d'fhagail bháis obuinn in hoc anno.

Cormac mac Fergail Mic in Bhaird, sói re dán ocus duine dob ferr tainic dá chinedh fein do thaobh dheirce ocus dhaonnachta, d'fhaghail bháis do ghalur obann iar n-ongadh ocus n-aitrighe.

Kll. Enair for Aoine; u. bliadna dh'éc ar xx.it ar .u. ced ar mile.

Tommás mac Iarla Cille Dara do cengal re Gaoidhelaib Deiscirt Erenn an bhliadain si, ocus é a n-aghaid an ghiuisdís, tar éis a mhainér ocus a bhailte do bhuain do mac an Iarla don ghiuisdís, ocus é féin ocus araibhe do rann aige d'innarbad asan Midhe, ocus a g-cur a n-ucht Shíl m-Bríain ocus h-I Chonchobair Fhailghe; ocus cogad mór maith agá dhenum aige. Is annsin tánic duine cumachtach do muinter rí Saxsan a n-Erinn .i. Loard Lionard, ocus tanic a g-cend mic an Iarla, ocus tuc ceilg uime, ocus do gheall pardún a h-ucht an righ cuige, ocus ruc lais a Sassanaibh é.

Gabtar mac an Iarla, ocus cuirther a Tur an righ é a m-braighdenus, ocus tánic Loard Lionard a n-Erinn arís tar ais, ocus fuair an giuisdís do bhí abhus a n-Erinn bás .i. Uillíam Sgemeltún; ocus gabhus Loard Linard fedhmantus an rígh a n-Erinn chuige, ocus tuc clainn Iarla Mhóir Chille Dara chuige for a inchaib fein .i. clann Géróid mic Tomáis .i. Sémus ocus Oliuer, Sean ocus Risterd; ocus iar m-beth dhóibh for taobadh ocus for inchaib Loaird Línaird, ocus siad na coimidecht féin, ro gabadh a n-aoineacht leis; ocus do chuir d'indsaiged ri Saxan íad, ocus cuirter a Tur an rí íad mur araibhe oigri na h-iarlachta .i. Tomáss mac an Iarla. Iar m-beith imorro tuilled ocus bliadain a laim dhoibh p-féin ocus do Tomáss a Tur an righ do cuiredh chum báis iad a b-fhiadhnuse luchta na catrach; ocus ní thanic do Ghallaib Erenn riam fer a aossa fein do budh mó do ghníom ocus d'écht do thaobh uaisle ocus oinigh ocus chenduis fhedhna iná an Tomáss sin mac an iarla; ocus ní mó senmoir da d-tánic a n-deiridh aimsire ná a ghirre do bhí sliocht na h-iarlachta dhá sgrioss a h-Erinn, ocus trén na h-Erenn uile aca re fada d'aimsir roime sin.

Muircertach mac Donnchada, mac Murchada, ocus a dhiass mac .i. Sean Glass ocus Fergal, do mharbad le .H. n-Eghra m-Buidhe ar ná chur amach go meabhlach do neoch dhá mhuinnter fein a Maigh Imleach in hoc anno.

Mac Suibhne Bághuine .i. Maol Muire, mac Neill Mic Shuibhne, do mharbhadh a b-fhioll le na derbrathair féin .i. Niall Mac Suibhne la fhéile Poil ocus Pedair, a n-dorus chaisléin Mic Shuibhne féin .i. Rathuin.

Eignechán mac Domnaill h-I Domnaill do mharbadh le clainn h-I Bhaighill mur an cedna go nem-maith.

Maoileachluinn mac Cairbre h-I Birn do mharbadh le clainn Chathail mic Ruaidri Mic Diarmada, ocus fa mór an t-écht é, oir is terc má dho bhí a n-Erinn mac taoisigh a inmhe dob fherr a n-egna ocus a n-oinech ocus a n-oirrdercus ináss.

Conchobar mac Eogain mic Dhonnchada, ocus Aodh mac an Chanánaigh do marbad le clainn Taidhg mic Ruaidri Mic Dhonnchada ó Chuil Deghaid a Cill Fhraiss.

Inghen h-I Neill .i. Siubhan ingen Chuinn mic Enrí mic Eogain, ben Mhaghnusa I Dhomnaill, d'fhagail bháis a lár a h-aoisi ocus a h-inme ocus a maithiusa an bhliadain sin, ocus a h-adhlucadh go h-onorach a mainistir Dhúin na n-Gall.

Maidhm mor do tabairt do Mac Amhlaoibh an bhliadain si dú inar marbad tigerna na Claon Ghlaisi ocus Mac Gibún, ocus córugad mór do Chloinn t-Shíthaidh, ocus marbhthar ann bhós mac Maol Muire mic Briain Mic Shuibhne consabal Mic Amlaibh a tosach an imbualta.

Kll. Enair for shatharn. Se bliadna dhéc ar .xx. ar .u. ced ar mile ais in Tigerna.

Bliadain ghalrach eslán an bliadain sin, ocus il-tedhmanna innte .i. pláidh coitchend ocus galar brec, ocus pláigh bhuindech ocus galar na leaptha co h-imaircech.

Echt is mó na gach eile echt na aimsir fein, ocus esbad is mó na gach esbad eli a n-Erinn isin m-blíadain si, .i. Cormac Óg mac Cormaic mic Thaidhc Mheg Carrthaigh .i. aon rogha Ghaoidhil Leithi Modha Nuadadh, d'fhagail bháis iar m-breith bhuadha ó dhoman ocus ó dhemun, et sepultus est a g-Cill Chré

Mac Dáibhíth .i. Tomáss mac Dáibhíth mic Emuinn dh'ec in hoc anno.

Mac Goisdelbh .i. Sean Dubh dh'éc in hoc anno.

Tommáss .H. h-Uiginn, .i. oide Fer n-Erenn ocus n-Alban re dán, dh'éc an bhliadain si.

O Cellaigh do marbad in hoc anno, ocus Donnchad mac Emuinn 'na ionadh ar Thír Mhaine.

Maithe Iochtair Chonnacht .i. Tadhc Óg mac Taidhg mic Aodha, ocus Tadhc mac Cathail Óig h-I Conchobair, ocus Clann n-Donnchada ocus clann h-I Dhúbhda, do dhul ar t-shlicht Ricaird a Búrc ar tarruing in espuic Bairéd; ocus caoraighecht an tíre do dul rompadh a d-termann Oirimh, ocus an t-espuc dá lenmain ar an termann, ocus an chaoraighecht do thabairt do d'innsoiged an t-shlúaigh; ocus gan aisec do thabairt uathaib a n-onóir naoim na neimidh dhóibh.

Mainistir Dromma Dhá Eithiaghar do loscud san oidhche iar collad do chách, ocus mórán do mhilledh innti.

Feidhlim mac Feidhlim h-I Ruairc d'fhagail bháis a n-geimhil ag Brian O Ruairc, mac Eogain mic Thigernáin.

Comhorba Dromma Oirbhealaigh .i. Cathal mac Seoinín mic th-Sheain h-I Mhaoil Mho Chéirghe, fer beothlusach buan chonáigh, d'fhagail bhais an bhliadain sin.

O Conchobair do ghairm do Tadhg Óg, mac Taidhg mic Aodha mic Thoirrdelbaigh Charraigh h-I Chonchobair; ocus nír bh'é sin an t-ainm ba gnath leisin t-é bhudh tigerna a n-Iochtar Chonnacht do t-Shíol Conchobair, acht Mac Domnaill mic Mhuirchertaigh do gairthí don t-é bá tigerna ar Iochtar Chonnacht díbh; acht chena is d'fhoruaisliugad a aicme, ocus do dherrscnugad dona righuibh roime, do róine sium an claochlódh comanma sin do ghairm dhe.

An t-Ua Conchobair núa sin, ocus mac Cathail Óig h-I Chonchobair, do dul ar siobhal innsoiged a g-Clainn Ghoisdealbh, ocus co rucadar na slúaga sin a timcheall Chille Cholmáin .i. baile mic Rugraidhi mic Goisdelbh; ocus tánic fein ar láim h-I Conchobair ass an m-baile, maille re luirech comhfhromtha do bhí aige .i. lúirech Mic Fheoruis. Ocus tuc Ua Conchobair an bráighe sin leis co Sligech; ocus ni mor do creachuibh fuaradar acht sin amháin. Ocus fuair a lán fhuasclad ass in m-bráighid sin.

Conchobar Garbh mac Cathail Mic Dhiarmada do mharbad le mac h-I Birn ar an g-Coill Áimhréidh.

O Ruairc do thairring do Ruaidri mac Taidhg Mic Diarmada a timchell chaisléin Chendmhoighe, ocus an baile do brissedh dhóibh, ocus na bharda do mharbadh .i. Cathal mac Cormaic Oig, ocus Fergal mac Briain, ocus ambói ann ó sin amach.

Ruaidri na d-Tulán mac Diarmada mic Ruaidri Mic Diarmada, ocus clann Chathail mic Ruaidri Mic Diarmada, do ionnarbad ass Magh Luirg le Ruaidri mac Taidhc Mic Diarmada, ocus cuid do chur a Tuadhmhumain díbh, ocus cuid eli a Tir Conaill, tre mharbad Mhaoil Seachlainn h-I Birn do bhói na derbh comhdalta ag Rúaidri Mac Diarmada.

Cogad suthuin sirbhuan eidir .H. n-Domnaill ocus maithi Iochtair Connacht acht Brian O Ruairc amháin, gan a chongnum re nechtar dhíbh an tan sa.

Slúag mór le .H. n-Domnaill .i. Mag Uidhir ocus mac h-I Neill .i. Niall Óg mac Airt, ocus mac h-I Raighilligh .i. Aodh mac Mhaoil Mhórdha, co n-éirghe amach h-I Raighilligh; ocus ní thánic clann h-I Domnaill ann bhudheisin; ocus ro ansat a timcheall Maghnusa h-I Domnaill, oir ní thánic isin trom shocraide sin, óir do bhí a n-esaonta re na athair. Ocus tangadar clann t-Shuibhne, ocus O Baighill, cona b-fhianlach áigh ocus irgaile isin tinól sin h-I Domnaill, amail bá bés dóibh. Gluaisis an slúag sénta so ullamh sin am deoigh laoi o Áth Senaigh, gur ghabhadar sossad ocus sith longport eidir dhuibh ocus Drobhaois; ocus tar éis a tomhaltuis do chaithed dhóibh, do chuiredar lucht foraire ocus fuirecruis do choimhét an t-slúaig ar ceist ammuis longpuirt do thabairt orra do t-Shíol Conchobair cona tinól; óir do bhadar cruinn an éin ionadh a Sligech, ocus geallad buailti aca d'O Dhomnaill. Ocus issé do chúaid isin fhoraire ar tús O Baighill, oir do budh dóigh lais co b-fuighedh sé drem éigin da lucht imresna ocus iomarbhágha, a n-Iochtar Chonnacht, ag teacht do tabairt amuis longpuirt ar an slúaig sin h-I Dhomnaill. Ocus do chuaidh muinnter Aodha Buidhe h-I Dhomnaill a b-foraire mur an cedna; ocus do buailedh O Baighill ocus iad fein fá cheli a g-creapuscal na maidne moiche; ocus do innsaigh muinter mic h-I Dhomhnaill a g-coinne ocus a g-comairrchis h-I Bhaigill cona mharcslúaig, a richt droinge éigin d'Iochtar Chonnacht. Ni ar bhuga na ar bhuan teithed do ghabh O Baighill chuige a ionnsoiged da esgcairdibh, oir bá derbh deimin leis gurab íad do bhói chuige. Acht chena rucusdar O Baighill bann diochra deghthapaid na g-coinne ocus na g-comairrchis, ocus nír an ar a n-einech gan dul ina mesc go nem-choimédach, go b-fhuair a oighed co trochamhail tupaisdech lé na fior chairdibh bhudhéin; ocus is lán mhór an uiresbudh do bhochtuibh ocus daidhilgnechuibh, danbfhannibh ocus dollamhnaibh an t-écht sin .i. Níall O Baighill. Acht chena nír toirmisc an t-aird écht sin triall na tindscedal an t-shligedh sin um .H. n-Domhnaill, ocus téid iar tocht an laoi dá ionnsoiged co Findír, gur ghabh comnaidhe ocus comoirisemh isin maighin sin go h-eirghe ghreine iar ná mhárach. Teid marcsluagh mic Cathail Óig, .i. muinter Airt, ó Shligech d'innsaighed Braghad Cuillídh. Gabhuid cuid do mharcsluaig an t-sluaigh, ocus tiaghuid a g-cóir iomruagad ré roile a m-Bealach Dhúin Iaruinn. Marbhthar marcach do muintir Airt isin tachur sin, ocus dealaighid re cheli. Anuidh .H. Domnaill na foslongport féin an oidhche sin, ocus eirghis isin maidin ar ná marach, ocus téid co Fersat Ranna an Liagáin do dhul tairis a Cúil Irra. Do bhí O Conchobair cona thinól a Sligech ag ordughad a muintire do dhul a g-coinne h-I Dhomnaill go Fersuid Randa in Liagáin, mar ar marbadh Liagán laochmhilidh do Fhomhorchaib le Lugh Lamhfada, ag teacht d'innsoiged chatha Moighe Tuired, mar a rabhadar Fomoruigh ag saiged a g-cís chána for feruibh Erenn re cian d'aimmsir roime sin, conidh uadha do h-ainmnighed an fersat sin. Ocus an fedh do bhói an lán mara isin b-fersuid do bhí na sluaga sin ag breith breithi ar a cheli, ocus issí comairle do rinne O Conchobair o nach raibhe coimlion daoinibh re .H. n-Domhnaill gan tachur fris ag an b-fersuit, ocus ar n-dul d'O Dhomnaill a n-ordugad, ocus ar suidhiugad a ghonnadh mór re h-ucht na feirste, no gu fagad co neamh-fuirithe ó a n-ionud eile. Teid .H. Domhnaill tair an bh-fersait íar na fágbháil gan chosnamh gan chothugadh, agus téid dréam do maithibh iochtair Chonnacht d'iarradh iomruagtha ar mhuinnter I Dhomhnuill. Ní h-íomchomhaireach do freagradh an t-iaratus sin an úair do ionnsuigheadar co meanmnach mí-cheillidh a cheile. Marbhthar eucht adhbhul mhór do Chloinn Dondchaidh ar an iomruagadh sin .i. Máoileachluinn mac Taidhg mheic Ruaidhri; agus d'urchur do ghonda ro marbhudh é. Marbhthur marcach eile do mhuinnteir I Dhomhnuill d'urchar do gha ann .i. Semas Ballach mac Neill mheic Seain. Dealaid ré roile. Téid O Dómnuill a n-dúthaidh shlechta Briain I Chonchubhair, agus do bí trí h-oidhche aig milledh arbha agus ag losgudh bhailtibh agas mhonaibh. Do bí O Conchubhair ag Bél an Droichit a bh-fhaslongport. Téid O Domhnaill tair traigh síar a d-Tír Fhiachrach Mhúaidhe, agus millidh móran arbha agas bailedha, agus dá ghach earnail maitheasa archeana innte, óir do bí an tír ar a g-comus féin acht cuid da caislénáibh; agus do rug air mhóran do chaoruidheacht an tíre timcheall t-Shleibhe Gamh. Tiagaid tar Múaidh síar ar tarruing th-sleachta Riocaird a Burc, andíaígh choda do chaoruidheacht Chloinne I Dhubhda. Gabhthur ingen Bhaitéir a Burc leó .i. bean Eoghain I Dhubhda mailli re na creich. Do bí dá mhéd d'édaluibh agus d'aircibh fúair O Domhnaill, co d-tabharthaoi mart nó dha mart ar aon bhonn ann, agus nach faghtháoi sin féin orra. Mac Diarmada agus clann Taidhg mheic Diarmada agus clann mheic Daibhi do teacht do chongnamh ré h-Iochtar Connacht a n-agaidh h-I Dhomhnaill. Triallaidh O Domhnaill tar a ais íar n-dénamh a thosga agus a thuruis isin tír sin amhuil ba lonn lais; agus do bí a n-urlaimhe ag na maithibh sin iochtair Chonnacht gu d-tiobhradáois tachur d'O Dhomhnaill ag teacht tair a ais dho, agus ní thugadar acht líamhan iomrúagaidh, oir nír fhuiridh O Domhnaill ó dho fhág Tír Fhiachrach no co n-deachaidh co Drúim Chliabh, agus do bí a g-coirithibh a g-comhnaidhe ar an g-comhfhad sin. Marbhtur marcach do muinntir mic Cathail Óig I Chonchubhair ar an íomruagadh sin ag dul tar Fersait Ranna in Liagain don t-sluaigh .i. Aodh mac Briain mheic Aodha, ocus mac Mic Diarmata do thrómlot and .i. mac Eoghuin mic Taidhg. Téid O Domhnaill da thigh gan umhla gan orraim d'fhaghail ó mhaithib iochtair Chonnacht don dul sa amhuil ba neamhgnáth.

Mac Donnchada do ghairm do Dhondchadh mhac Taidhg mheic Ruaidhri meic Conchubhair mheic Taidhg mheic Tomultuigh meic Muirgheasa meic Dondchadha, agus gan Mac Donnchadha féin dég, agas sé a n-éarr a áoisi íar na dhalladh .i. Eoghan mac Donnchadha meic Murchadha; agus cogad ac cloinn Eoghain re Mac n-Donnchadha fan ainm sin, agus gan ní súaithnidh do mhilledh eaturra fós.

An Giolla Dubh mhac Aodha mic Rúaidhri Bhallaigh mic I Chonchubair d'faghail bháis an bhliadhain sin.

Slúaighedh le .H. Conchobair Sligigh ocus le .H. Ruairc ocus le mac Cathail Óic .H. Conchobhair, ar tarruing Mic Diarmata agus chloinne Taidhg Mic Diarmada, ar Thóirrdhealbhach Ruad annsna Túathaibh, agus Muinntir Ainlighe do thabhuirt bhragat dóibh agus gan a milledh dhóibh eidir chill is tuaith; agas a n-dol assin a Maineachuibh, agus gach aon fa caruid d'Ua Chonchubhair dhibh do mhilledh acht arainic mac I Ruairc, óir ní do mhilledh neach do chuaidh, acht dá fhechuin an b-fedfadh síothchain do dhénamh eidir Mac n-Diarmada guna bhraithribh agus O Cunchubhuir Ruad guna rann cogaid don dul sin. Gabhuit an sluagh sin caislén an Turraic agus brisid é. Tig Donnchadh mac Emainn I Cheallaigh chuca do bhraghait deagla a dhuthaidhe féin do mhilledh. Triallaidh an sluagh sin iar n-denamh a d-turuis amhuil bá luinn leó, agus berur na bráigde sin co Sligech .i. mac I Ainlighe agas mac I Cheallaigh; agus do bheirid leo comhla bhreac an chaisléin sin do ghabhudur chunn na cur re caislen Sligigh.

Sluagh eile an bhliaghuin si leis an n-gibhsdis t-Saxanach annsa Mumhain síar, dar gabh Carruic O g-Coinneall agus dar bhris droicheat Murchaidh I Bhriain; agus mas fíor do bi cuid do Dhonnchadh mac I Briain andsna gníomhaibh sin.

H. Ruairc do ghairm do Bhrian mac Eoghain mic Tigernáin.

Caislen an Cairthe do leagadh an bhliagain si lé .H. Rúairc.

Mac Uilliam Chloinne Riocuird .i. Sean mhac Riocuird mhic Emainn dég an bhliagain si, agus cogad mór eidir Chloinn Riocuird fan tigerntus; agus da mac Uilliam do ghairm isin tír .i. mac Uilliam do ghairm do Risderd Bhacach mhac Uilliam, agus mac Uilliam eile do ghairm d'Uillioc mac Riocuird Óig; agus Uillioc na Cenn ac congnamh le Risdeard m-Bacach.

Donnchadh Dubh mac Conchubhair mic Ruaidhri Bhuidhe, fear saibhreis agus tighe oidedh coitchinn, d'fhaghail bais ongtha agas aithrighe.

Mag Fhlannchaidh taoisech Dartraighe .i. Ferudhach mhac Uilliam, sgél mór don daonnacht agus don einech, d'fhaghail bhais.

O Raighilligh .i. Fearghul mhac Seuin mheic Cathail, rí .H. m-Briuin m-Breifne agus Conmaicne, fear fíal firinneach foighidnech, dég íar comaoin agus th-shacarbaic.

Domhnall mac Donnchadha I Cheallaigh, cennfeghna maith agus tanuisde O Maine o Charuidh gu Grein, agus mac a dearbrathar mailli ris .i. Eigneachan mac Maoileachluinn mic Donnchadha I Cheallaigh, a m-marbhudh a bh-fhill maraon lé Maoileachluinn mhac Uilliam Mheic Máoileachluinn I Cheallaigh ó fhedhuibh baile Atha Luain, ar furcongradh chloinne Taidhg mic Donnchadha I Cheallaigh .i. clann derbhráthar Domhnaill budhdhéin.

Clann mic Uilliam Chloinne Riocuird .i. Seun Dubh agus Rémonn Ruadh, edhon días mac Riocuird mic Uilliog, do marbadh lé cloinn Riocuird Óig mic Uillig Ruaidh Mheic Uillig an Fhíona an Achadh Draoinín, ar m-breith a d-tóruighecht forru a h-aithle chreach an tíre do theghlomadh dhóibh.

Mac Goisdealbh .i. Seun mac an Ghiolla Dhuibh, neach deirluictech daonnachtach deigh chennuisfeghna, do marbadh do f-Píarrus Mac Goisdealbh agus do chuid do lucht Airtigh in hoc anno.

O Conchubhuir Fhailghe .i. Brian mac Cathair do dibeirt as a dhúthaidh, agus a chaisléin uile do bhrisedh, agus móran da muintir do marbhudh inntibh leis an n-gibhstís t-shaxsanach .i. Loard Linard; agus fos tré fhormut agus tre imdheall derbhráthar I Chonchubhair fein .i. Cathair Rúadh, do rinne sin uile.

Kalluinn ghénair for Luan; bisech fuirri; seacht m-bliaghna .x. ar fhichit agus cúig ced agus mile áois an Tigherna.

Taisech mhuinntire Cionaith, .i. Tadhg mac Aodha mic Aodha mic Contshnamha, d'fhaghail bhais in hoc anno.

O Gadhra .i. Eoghan mac Diarmata mheic Eoghuin, tigherna Chúil O bh-Fhinn, dhec in hoc anno.

Mac Uilliam Burc .i. Teaboid mac Uillic mic Eumainn in Cristo quieuit, agus cogudh fa na inbhe da éis.

Sluaigedh leis O Neill .i. Conn O Neill, ar Thrían Conguil, dár mhill agus dar chreach móran don tír, agus mac I Néill do ghabhail a m-Bél Feirste ar deiredh an t-sluaigh, agus O Néill do theacht dá thigh iarumh; agus tigherna thrín Conguil .i. Níall Óg mac Néill mic Cuinn d'fhaghuil bháis gu h-obunn fón ám sin; agus O Néill do fhilledh arís a d-Trían Conguil. A mhac do bí a láimh d'faghuil dó, agus imresuin fa thigherntus Thrín Conguil.

Mac I Raighilligh .i. Brían mac Ferghuil, eucht mór agus duine úasul maith, do marbadh le muinntir an giuisstis, ar teacht doib ar chreich a c-cloind Mhathghamhna.

Mac Mic Shuibhne .i. Mael Mhuire do marbadh le cloind Murchada Mic Shuibhne sa bliadhoin sin.

Coccadh idir Aedh Bhuidhe Ua Domnaill agus Maghnass O Domnaill agus cland I Baeidhill, agus caislen Dúin na Gall d'faghbail d'Aedh, agus a bheth na buaidhriud mor a t-Tir Conuill; agus cuid do shliocht in esbuic I c-callchubhair do mharpad le cloinn I Baeidhill .i. mac Toirrdhelbaigh Óicc mic Briain, agus diass mac Eogain Ballaigh mic Briain, co t-tuilled maille friu.

Sluaigedh lasan giuistiss a n-Ib Failge, agus caislen in Daingin, .i. in t-en baile do ba daingne ionadh agus ordughad i n-Eirinn do bhrisiodh dó, agus échta agus edála móra d'facchail annsin; agus bailte I Conchobair uile do bheith ar a comus, agus in tír do milledh doibh.

O Domnaill .i. Aed Dub mac Aedha Ruaidh, mic Néill Ghairb mic Toirrdhelbaigh in Fhíona, tigerna Tíre Conuill agus iochtuir Connacht, agus Fer Manach agus chineoil Moáin agus Innsi Eogain, agus do chuir a lán do tigernusuibh eile fa smacht, mar tá Mag Luirg agus machaire Chonnacht, agus Clann Connmaigh, agus tír Amalgaid agus Conmaicne cúile, agus Goistealba agus Cúil O f-Finn, ocus don taebh thoir mar in cedna .i. clann Aedha Buidhe acus in Rúta, occus Oirecht I Chatháin; or ni raibhe ein tír aca sin nár cenduichc co minic é, maille re cíoss díoc co umhal. Acus ni h-éidir a ríom na a fhaisneiss gach andernaid do crechaib ocus do madhmannuibh ar a esccairdibh conuicci sin; ocus do saeiledh gur b'é an t-Aedh Eanccach do tairngedar fáidhi ocus fissidh é. Ocus ni tanuic do sliocht Ghaeidhil Ghlaiss na coimaimsir neach as mó do tinnlaic d'éigsibh ocus d'ollamnaib ocus dorttaibh Dé na an t-Aedh sin; ocus in cuigedh lá do mí Iuil fuair sé báss, ar n-dol a n-aibid san Froinsias a maineistir Dúin na Gall, da toil ocus da aentaidh féin maille résún maith; ocus Dardaein ar aoi laiti seachtmaine ternó ont shaechcal iar na ongadh, occass iar n-aitrighe do moladh na h-eglaisse; ocus a mac .i. Machcnus O Domnaill do ríchcadh 'na ionad do chett occus do chomhairle Chonallach acus comarbad Coluim cille, amhail fa dual dó.

Sluaigedh laiss O n-Domnaill .i. Machcnus i n-iochtar Connacht, a mí mheadhoin fhochcmoir, dar mill mórán arbha acus dar loisc accus dar imthigh ichtar Connacht .i. Tír Fhiachrach acus Cairbre, occus in dá Luichcne, acus in Corand, acus Tír Oilella roime anuass. Ocus gabhtur baile I Eghra Riabhuichc laiss don dul sin, acus tuc eineach d'O Eghra féin ar m-beith for a chomus, cu tucc laiss a m-braigdenus é.

Mág Uidhir .i. Cú Connacht mac Con Connacht mic Bhriain, tigherna Fer Manach, fer dércach daennachtach, do bá mó clú láimhe ocus uaisle ocus einech da d-tainic do sliocht na c-Colla re cian d'aimsir, ocus do cuir o Chluain Éis co Cael Uisqi fa umhla ocus fa smacht; ocus do ba maith in smacht sin, oír ní tainic na duthaid féin re treimse d'aimsir tigerna dob ferr recht ocus riacchail ocus ass mo do choisc bitbenuichc occus aess uilc, ocus do chuir na tírta na suidhe co socair sithchanta, ocus as mó dár eiridh sonus ocus saibhres re a linn. A marbad a b-fioll a c-Creachán for Loch Erne le slicht Tomáiss Még Uidhir ocus le slicht Toirrdhelbaigh Méig Uidhir an bliadain sin; ocus a adhlacadh ar t-túss i n-Daiminis, ocus a thócbáil a c-cionn athaid iar sin leis na bráitribh mionura, ocus a tabairt co mainister Dúin na Gall, ocus araile.

Mac Aedha mic Neill mic Cuinn mic Aedha Buidhe .i. Niall, adbar tigerna trin Concchail, ocus fer d'énmha uaisli ocus einicch, ocus ler cosmuil lenmain luircc a shinnser a c-clú ocus a c-caithemh a leth le díl damh ocus deoraidh, égess ocus aess ealadna, ocus ar einech ocus ar uaisle; a m-marbadh le Albanchaib.

O Conchobair Failge do gabail a duthaide féin do nemthoil in giuistiss ocus a braitrech féin .i. clann I Conchobair; occus cuid da n-daeinibh do buain díbh, ocus treisie a thíri féin uile do ghabail dó amail bud cóir.

Barún Dealbna .i. Risderd mac Cristoir mic Tomais, sgiath didin ocus cliath ghaeithe Ghall re Gaeidheluibh, ridire cródha cogthach, do dhul deg na baile fein ier m-buaidh ongtha ocus aitridhe; acht gerb iomdha guasacht gliadh as ar ternó conuicce sin.

Mac I Maeileaclainn, .i. Sémus mac Murchada, do marbad le mac I Conchobair Fhailge, neach bud mo clú ocus caithreim na comaeis do Cinel Fhiachaidh mic Néill.

Mac I Raighilligh .i. Cathaeir Modardha, mac Seáin mic Caithail, do marbad a t-tóraidhecht le Saxanchuibh.

Mac I Dochartaigh .i. Niall Caech, mac Gerailt mic Domnaill mic Feilim, do marbadh a n-greiss oighche le Rudraidhe mac Feilim I Docartaigh, a m-Baile na g-Cananach for termann Doiri; ocus aderid nach maith frioth é.

O Flannacain Thuaith Ratha .i. Giolla Isae, ocus a mac, do marbadh leisin c-cuid oile da cinedh co nemmaith, ocus uilc iomdha do beth da n-denam a b-Feruibh Manach a h-aitle baiss Méig Uidhir.

Creacha ocus loscad do denadh don Calbach O Domnaill ar clainn Amlaeib, ocus crech eile do dhenam ar O Cathain dó.

Kl. Ianair for Mairt; ocht m-bliadna dec ar .xx. acus cuig ced acus mile aoiss in Tigerna.

Cogad ar n-eirge etir Mac n-Diarmada, .i. Aedh mac Cormaic Mic Diarmada, ocus Ruaidhri mac Taidhg Mic Diarmada. Ruaidhri do ghuidhe d'oirseoiredh an baile, ocus seoladh d'faghail uatha ar an m-baile do gabháil; ocus as amlaid do cumadar dó teacht docum in baile san oighche, ocus dréimeredha do chur leisin c-carruic; ocus do chuadar asttech ocus do gabhadar Mac Diarmada ocus a mac .i. Mael Ruanaidh. Ocus do bádar leth bliagain a laim, ocus do cuaidh foirm etorra, ocus así foirm do cuaidh etorra .i. O Conchobair Donn ocus O Beirn, ocus maithe na tíre maille friu; ocus as amlaid do rinnedar sin leth tigernais, ocus an carraic co na saeirsi o Aedh Mac Diarmada do Ruaidhri Mac Diarmada ar fed a betha fein.

Mac I Domnaill .i. Aedh Buidhe mac Aedha mic Aedha Ruaidh, ridamna tíre Conaill, neach lán d'aithne occus d'eineach ocus d'eolus an ealadhanuib, occus dob ferr do baránta laime a n-gortaibh gliadh ocus a m-bernadhuibh baedhail, ocus ass mó do saeiled do rochtain tigernaiss a tíre fein do reir airgenadh ocus tréghe tigerna, da t-tucadh dia saeghal dó, ar b-faghail baiss in bliadhain sin do galar aithgerr a c-Cill O d-Tónair, ier c-comaein ocus corp Crist, in aeine ier b-féil Pádraic.

Niall mac Cuinn mic Airt I Neill, mac rígh maith ar a raibhe uaisle ocus eineach, do marbadh le mac Neill I Neill ar greis oighchei a g-Caislen na Omuidhe, ar b-faghail sheolta cora amach air o cuid éigin da muintir féin; ocus Niall O Neill do brisiodh in caislein na diaidh sin, ocus beth andiaid an marbta sin ar a mac fein.

Mac Meg Clanncaigh, adhbhar taisigh Dartraidhe .i. Cathaeir, mac Feradhaigh mic Uilliam Meg c-Clanncaidh, mortuus est a n-Dun Gairbri a mi Mai.

Sloighed las O Domnaill .i. Maghnus i n-ichtar Connacht, dar gabhad caislen Sligidh leis co áithesach, do bi fa sheol maith bardad ocus ordonáis, ocus do bí a b-fad roime sin a gabháil re na athair gan gabháil; ocus ar n-gabháil in caislein sin téid O Domnaill a Moigh Luirg, ocus millter in tír leis gu léir; ocus iar b-filledh tar a aiss dó, ar t-teacht timcell caislein I Gadhra .i. Ruaidhri mic Céin, marbhtar mac maith I Domnaill co tubuistech d'urchor do ghonna, .i. Niall Garbh, mac Maghnusa mic Aedha mic Aedha Ruaidh; ocus tángadar slán acht sin, iar milledh Moighe Luirg ocus ichtair Connacht acht in cuid tanuic le umla docum I Domnuill díbh, ocus ruc

Dealb Muire ro miorbuilech do bi a m-baile Atha Truim, dar creidedar Eirennuigh uile le cian d'aimsir roime sin, do shlánuidhed doill ocus bodhair ocus bacaigh, ocus gach ainches archena, do losgadh le Saxanchuibh; ocus an Bachall Iosa, do bi a m-Baile Atha cliath, ag dénamh feart ocus miorbuile iomdha i n-Eirinn o aimsir f-Padraic gus an ré sin, ocus do bi a laim Criost féin, do loscadh le Saxanchaib mur in cedna; ocus ni h-eadh amáin, acht ni raibhe croch naomh na dealb Muire, ná iomáig oirrdirc i n-Eirinn, ar a n-deachaid a c-cumachta, gan losgadh, ocus ni mó do bí a c-cumachta ar ord dona seacht n-orduibh nar sgrisiodar. Ocus in pápa ocus in eglais toir ocus abus do beth a coinnelbáthad na Saxanach trid sin, ocus gan suim na toradh do beth aca san air sin, ocus araile; ocus ni derb liom nach ar an m-bliadhain am diaidh thúas atá losgadh na mionn sin.

Brian mac Eogain mic Conchobair mic Ruaidhri Buidhe dh'ec in bliadain se.

Kl. Enáir for Cédaein; nai m-bliadna deg ar .xx.it u. ced mile aeis in Tigerna.

O Briain, ri Tuad Muman, .i. Conchobar mac Toirrdhelbaigh mic Taidg, d'fagháil báiss in bliadain si iar treimsi a d-tigernus Túad Muman, ocus in tír gu toictech trom conáigh le na linn; ocus Murchad mac I Briain, .i. mac Toirrdhelbaigh mic Taidhg, do righadh na h-inad amail do tuill a h-airilledh feisin conuige sin.

O Neill .i. Conn do beith i n-Dun na Gall an bliadain si im cáisg, ocus caithem socrach onórach do dénamh d'Ua Domnaill le a lind, amail do bud cughuidh; ocus O Néill ocus O Domnaill do denamh cach uile cengal da daingne ocus da tairissi annsin, et cetera.

Sloigedh leis O Néill .i. Conn. Slóigedh leis O n-Domnaill .i. Machcnus, do comairle a chéile sa Midhe, ocus in tír do milleadh ocus do loscadh leo co Temraig, ocus nar tionóilsed Gaoidhil co Gallaib en sluaiged as mó leir milledh do maithes na Midhe na in sluaighiod sin, ocus dop aidhble édála óir ocus airccid ocus uma ocus iaruinn, ocus cach uile maithes archena; ocus co áiride in Umamá ocus baile Átha Firdiadh do lomarcain leo, etir innmass ocus uradh ocus cach uile maithes archena. Ocus iar b-filliodh dona sluadedh sin ocus iad lán duaill ocus do diomus, do len in giuistis iad .i. Loard Linard lertinól na m-bailtiodh mór, ocus na Midhe etir cill ocus thuaith, ocus araibe do Saxanchaib i n-Eirinn, ocus ambui do coblaighuibh ar na cuantaibh cacha taob dib .i. coblach ro mór do bí ar Cairlinne co airithe. Ocus beirid na tinoil sin in giuistis ar an sluaig Gaeidhelach in Oirgialluibh .i. a b-Ferna do shunnradh .i. a m-Beol Átha h-Oa; ocus ni rainic leisin sluadh Gaoidhelach dul a n-orduchad amail bud coir, na ermasin ar comairle a n-deg daeine do denam le cosnam na le cothugadh, acht imtecht co anorduighthe, ocus mórán da n-édáluib féin ocus d'édalaib Gall d'fácbail and sin ag sluaig in giuistiss; ocus can a becc d'echtuib oirrderca d'facbail doibh ge do imthigsed co anorduigthe; conid é Maol Muire Mercech mac Eoin Mic Shuibhne scél as mó ro fácbad do Conallchaib ann.

Mag Aoncusa .i. Muircertach do ghabail le cuid d'Oirrciallaib, iar na b-facbáil co h-uaite ar n-deghail le a muintir ar an siobhal sin; ocus a beth tamall a laim cos ioseal, no co n-dernad meabhal fair iarum ar comairle coda da cinedh fein, .i. cendac do ghabáil do cinn a cora cum báis, et cetera.

Niall Óc O Baoighill do marbad le Conchobar mac I Baoighill, et cetera.

Kl. Enair for Dardaein, da xx.it bliadan ocus cuig ced, mile aois in Tigerna.

Diass mac Uaitéir mic Riocaird do marbad an bliadain sin .i. Risderd ocus Tomás.

Maineistir Cluana Ramfhada do tabairt dona bráitribh bochta de opseruansie in bliadain sin, ar folairem I Briain ocus maithe Tuadh Mumon, ocus do chet ocus do comairle uachtarán in da ord sin .i. san Froinsias ocus de opseruansie.

Saxanuigh do beith a dibirt iarsma na n-ord sin ar fud Eirinn cach áit ar cuirset a c-cumachta, ocus co airithe mainistir Muinechán do milledh doib, ocus gairdian in baile maille morán dona braitribh do ditcennadh doib.

Caislen Liathroma do denam in bliadain si las O Ruairc .i. la Brian mac Eoghain I Ruairc, ocus morán coguid cach taob air .i. a Moig Luircc ocus a Muinntir Eolais, ocus a m-Breithne I Raigilligh, ocus a mac féin ocus cuid d'feruibh Breithne a c-cogad riss foss; ocus do rinne in caislen re h-aimsir athgheirr, ocus do mill mórán fa Moigh Luirc ocus fan lucht cogaid, et cetera.

Dias mac I Baoighill .i. Niall ocus Conchobar do coimthuitim in bliadain si le céile .i. Niall do dul d'iarradh Conchobair a Luachrus, ocus cealc oighche do denamh dó a d-Tempall Seancáin, ocus Conchobar do teacht ar fud na tíre ier na marach le na gnothaiguibh fein, ocus Niall co na muinter deirge na diaidh asin tempall. Ocus o'd-chonairc Conchobar chuicce iad beith ar imdecht do tar tráig Luacrais siar; ocus a muinter do sgaradh leis, ocus Niall da lenmain co ro gér roim a cuidechta fein, ocus breth ar Conchobar da aimdheoin, ocus Conchobar d'fuirech le Niall; a c-coimescar ann sin co beodha laidir, ocus bualadh a céile can coicill doibh, ocus Niall do marbadh ar in lathair sin ar tús, ocus Conchobar do beth buailte. Ocus muinter Neill do teacht ar in lathair, ocus Conchobar do tuitim leo; ocus nir bo bás iar midlaochus etir, connach raibhe da fine fein le treimhsi roime sin dias ocmacaem do ba mó décht ináid in clann sin I Baoighill.

Foslongport d'Ua Domnaill fa cronnóic Locha Betha sa samhrad, ar clainn I Domnaill .i. Donnchadh ocus Rudraidhe, ocus saothair iomda do dénamh chuca, ocus nar buaidhigedh in uair sin ortha, et cetera.

Clann Uilliam mic in Esbuig I Gallcabair, .i. Aod Gruama ocus Uilliam Óc, do marbad le clainn I Baoighill .i. le Domnall ocus le Toirrdhelbach, a n-dígail marbtha a n-athar.

Sloiged leis O Domnaill .i. Maghnus a c-cuigedh Connacht in bliadain sin, dia n-deachaid a Moigh Luirc ocus a Clainn Conmaig, ocus dar mill ocus dar loisg na tírta roime .i. Mag Luirc ocus Clann Conmaigh, ocus dar in Corrsliabh, ocus toigecht slán ier m-buaid c-cosgair.

Sloiged eile las O Domnaill in bliadain cedna fa mac I Néill .i. Niall mac Airt Óic, tanaste Tíri h-Eogain, ocus fa mac Domnaill na h-Alban .i. Colla mac Alusdraind, maille re mórán Albanach; ocus a imtecht ar tóss a Feruibh Manach, ocus morán do milledh sa tír, ocus geallta d'fagail re na riar ieramh. Ocus gabhail tre Breithne I Ruairc ocus roime co Corrsliabh, ocus foslongport in Corrsleibhe do denamh dó no cur gerr sé in Bealac Buidhe; ocus Cland Maol Ruanaid do teacht cuige na diaid sin, ocus braigdi gill do tabairt dó le na breith fein osin suas; ocus impo slán iarum can dibail.

Clann I Domnaill .i. Donnchad Cairbrech ocus Séan Luircc do beth a c-cogad ar O Domnaill, ocus crandóc Locha Betach do beth aca, ocus iad ac buaidred in tire co mór aiste; ocus O Domnaill da gabhail araon; ocus do gabadh Eignechan mac I Domnaill ambaile na Congmala, ocus Sean O Domnaill do crochadh dó, ocus Eignechan ocus Donnchad do cor a m-braigdenus fa daoirsi ocus fa docar mor; ocus crannóc Locha Betach do milledh d'Ua Domnaill.

O Dochartaigh .i. Gerailt mac Domnaill mic Feilim, fer cu n-uaisle ocus co n-einech ocus co n-deilb socrach, d'fagail baiss in bliadain sin ier g-caithem a aeisi nadura le maith ocus le daonacht conuige sin.

O Baeighill do denamh do Domnall mac Néill I Baoighill in bliadain sin.

In giuistis do bi i n-Eirinn .i. Loard Linard do dol a Sasain fa chuiredh righ Sassan, iar milledh ord ocus oifrionn ocus mhinn miorbuiligh Eirend uile, ier n-denamh olc n-iomda pudh fada le a innisin, ocus giuistis eile do cor na inad .i. Hanndalin Salesder.

Ri Alban ar c-cor garma ar maithib na coda abus d'Albanchaib, ocus teacht chuige ar in c-cuan araibhe sé; ocus a d-tabairt chuige sa luing araibhe féin, ocus a n-gabail etir Gall ocus Gaoidhel; ocus a Goill do leigen amach a g-cionn tamoill na diaidh soin, ocus mac Mic Domnaill .i. Semus do connmháil a láimh dó, ocus an méid fuair ar foghnadh maille fris da cinedh ocus da daeinib do beth a m-braigdenus mur an cedna, ocus dibert ón rígh ar araibhe fa réir aca ieramh.

Seáan mac Cuinn I Domnaill do marbad le clainn Murchada mic Mic Shuibhne na t-tuath in hoc anno.

Una ingen Maol Ruanaidh mic Cormaic Mic Diarmada dég.

Tadhc mac Briain mic Maghnusa Mic Diarmada Ruaidh do bathadh sa Banna, ocus é ar sluaighed a b-fochair I Ruairc.

Cairm sgoile do tabairt do Ruaidhri mac Taidc Mic Diarmada ocus da mnaei f-pósta .i. ingen Mic Uilliam, .i. Sadhbh a Búrc, ingen Riocaird Óic, ben dob ferr da cinedh féin na do cinnedh eile na coimaimsir, ocus ni raibhi a barr aice o Ruaidhri, ar dáil iolmaeinedh imdha d'éigsib ocus d'ollamnaib, ocus d'aoss caca eladna archena; ocus tánuic docum na garma sin mac Diarmada .i. Aodh mac Cormaic mic Diarmada, ocus O Birn .i. Tadc mac Cairbri, ocus O Flannacain .i. Emann mac Uilliam, ocus Mac Diarmada Ruadh .i. Cathal mac Maghnusa, ocus clann Briain mic Maghnusa. Sliocht Conchobair mic Ruaidhri Buidhe do teacht and .i. Ferghal mac Conchobair, ocus clann Donnchada Duibh mic Conchobair .i. Ruaidhri buidhe ocus Maoilechlainn Donn ocus Maghnus Caoch. Tangadar ann clann Conchobair Óic mic Muirchertaigh .i. Tadc ocus Ferchal ocus Brian. Tanuic ann clann Chathuil mic Aodha, Aod ocus Diarmaid. Tánaic clann Ruaidhri Glais mic Briain Caoic, Brian Caoch ocus Art. Tangadar clann Uilliam I Maoilenaichc .i. in Giolla Dubh ocus Diarmaid, Tadc ocus Muirghios. Tanuic ann Tomaltach mac Aodha mic Conchobair. Tanuic ann tigerna Airtidh, Cathal mac Taidc Óic Mic Diarmada Gall, co maithibh Airtigh laiss. Tanuic Conn mac Briain mic Eogain I Ruairc, ocus Tomaltach mac Taidhc Mic Diarmada, ocus Ruaidhri na d-Tolán Mac Diarmada, ocus cland Cathail Mic Diarmada, ocus mórán oile nach éidir d'innisin, oir tángadar éixe ocus ollaman Eiriond co ucsanfport einigh ocus engnama cúicedh Connacht .i. co cairic Locha caomsrotaigh Cé; ocus fuaradar cach en drem aca toil a mhenman ocus a h-aiccenta féin do réir a uaisle ocus a ealadan sa b-féil uasail onoraigh soin .i. fa nollaic. Ocus tabrad cach aen léigfius so beannacht ar anmain na deisi daenachtuichc sin a dubramar romainn.

Cond mac Briain mic Eogain I Ruairc do marbad affioll le cloinn mic Maghnusa Tíre Tuathail, ar furailemh a athar fein, a d-Tamnaigh Bó Chaoice, et cetera.

Kll. Enair for Satarn; bisix fuirre; bliadain ocus da .xxit. ocus cuig ced ar mile aois in Tigerna;

ocus doinend dermair a d-tús na bliadna sin etir shioc ocus shneachta, nar leig treabadh do denam i n-Eirinn.

Tuathal Balb mac Seáin mic Ruaidhri I Gallcobhair, saoi duine oirechta, dég.

O Domnaill do dol a c-cend in giuisdis connuige in Caban, ocus ceangal ocus sith do denam re ceili doib, maille re onóir móir ocus roberens d'fagail d'Ua Domnaill, et cetera.

Maidm mór do tabairt do Mac Aibilin ar cloinn Aodha I Néill, dú ar marbadh Aongus mac Donnchada mic Maol Muire Mic Shuibne, ocus morán do galloclaechaib Conallach maille fris; ocus do marbadh mur in cedna córuchad galloclaech do clainn Domnuill Galloclaech, ocus a lán eile ar cach taob nach airimter annso;

ocus Mac Uibilin do dul sluag fa cend gairid na diaid sin ar cloinn Aoda I Neill, ocus clann Aodha .i. Conn ocus Domnall do marbadh leis.

O Cerbaill .i. Fer can Ainm mac Maol Ruanaid do marbad a b-fioll ocus é dall, re clann Donnchada mic Seáin I Cerbaill, ocus re mac I Maoil Muaidh .i. Séan mac Domnaill Chaoich I Maoil Muaidh; ocus ge do bi sé dall di-radhairc annsin, do rinne cosnam ocus cungnam, ocus lámh maith do cuaidh a c-clú ocus a n-áiremh dó, ar lucht in marbtha.

An crandóc oirterach ar loch Glinne Alláin do gabail do clainn Domnaill mic Donnchaidh I Ruairc ar Donchadh mac Donnchaidh I Ruairc; ocus fa cend gairid na diaidh sin tucadar clann Donnchaidh I Ruairc .i. Domnall ocus Fer can Ainm innsaididh ar in c-crannóc, ocus do losgsad in baile can fhioss. Ocus mothaigter ied ocus lentur sa loch ied, ocus beirid clann Domnaill O Ruairc orra. Marbtar Fer can Ainm mac Donnchaidh; gabtar and Domnall, ocus crochtar ierum le clainn Domnaill I Ruairc.

Sloiged las O Domnaill .i. Maghnus mac Aedha Duibh mic Aedha Ruaidh, a g-coinne in giuistis a d-Tír Eogain, ocus in tír do mhilledh leo don toisg sin. In giuistis d'imdecht ar a agaid sa Midhe, ocus O Domnaill d'filled tar a ais co Tír Connaill, ocus gan tachar na tegmáil d'fagail do ag gabáil tre Tír Eogain ag teacht no ag imteacht in uair sin.

O Domnaill do dul fa cend gairid na diaid sin don taob soir do loch a b-Feruibh Manach, ocus Cuil na n-Oirer ocus an taob toir do loch do milledh leis do tír ocus do loch don dol sin, oir do bádar baid ocus artruidhi aige ac milledh i n-oilén, ocus in sluagh ac milledh in tíri, cur fhágaibh ar dioth arba co mór in bliadain sin iad.

Sloiged oili las O n-Domnaill .i. Maghnus a b-Feruibh Manach, don taob tiar do Loch Eirni; .i. do chuir a báid ocus a arthraide ar an loch, ocus do c-cabh féin a shlúaigh do tir, co ro millsed a c-coinn a chéile do loch ocus do tír, no co rancadar Innis Sgéithlend; ocus do brisiodar ocus do legadar caislen Innsi Ceitlionn don dol sin; ocus tancadar slán iar c-cosgar.

Domnall mac Neill Gairm I Domnaill do marbad leis O m-Baoighill in bliadain si, ar n-dol do Domnall do congnadh le Toirrdhelbach mac I Baoighill a n-aghaid I Baoicill; ocus ruaig do tabairt d'O Baoigill doib ar tús, ocus O Baoigill d'filledh orrta san, ocus ruaig do tabairt doibh, ocus brisiodh orrta; ocus in mac sin Neill I Domnaill do marbadh ar in ruaig sin.

Mac in Baird Tíri Conaill .i. Conchobar Ruadh mac Ferghail .i. saoi fhir dána a b-focclaim ocus a b-feracht dána, ocus fer thighe n-aoidhidh do commail suas da cach n-dae archena, décc in bliadain sin.

Hanri Buidhe mac Dathbhi mic Emainn .i. tigherna cloinde Connmuigh, do marbad do Toirrdhealbach Ruad mac Taidhg Buidhe meic Cathail Ruaidh.

Kll. Enair for dhómhnach; da bhliadain ocus da .xx. ocus cuig ced ocus mile aois an Tigerna.

Sadhbh inghen Ricaird Oig mic Uilleg Ruaidh mic Uilleg an Fhina .i. ben pósda Mhic Diarmada .i. Ruaidri mic Taidhg mic Ruaidri Óig mic Ruaidhri Choeich, ocus mathair a chlainne, d'fagail bhaiss ar Cairrig na Righ .i. longport oinigh ocus oirrdercuis clainni Maol Ruanaidh; ocus is terc ma dho thainic diarsma Uilliam cuncur riamh ben a h-aossa dob ferr ináss d'fheile ocus d'ionnrucus, do connla ocus do craibhdhighe, do dheirc ocus do derlucad. Dardaoin mandáil rus deghuil a h-anum ocus a corp re roile iar m-búaidh ongtha ocus aithrighe.

Slóigedh do dhenum do mac Uilliam Chlainne Ricaird fa Machaire Chonnacht, ocus ro thairringset clann Taidhg Mic Diarmada a timcell Bhél Átha Uachtair e; ocus ro brissedh an baile leó don dol sin, ocus ro marbad ann cenn giomanach Mic Uillian, ocus a galloglaeich cúlcoimeta. Teid Mac Uilliam tar sliabh sios don dol sin, ocus tuc bráighde iochtair Chonnacht lais don chur sin .i. braighe Taidhg Óig mic Taidhg mic Aodha, ocus bráighe Taidhg mic Cathail Óig, ocus iochtair Chonnacht;

Ocus tesda Maol Muire mac Colla Mic Shuibhne isin m-braighdenus sin a g-Clainn Ricaird.

O Conchobar Ruadh .i. Toirrdhelbach Ruad mac Taidhg Bhuidhi do ghabáil le Ruaidhri mac Taidhg Mic Diarmada in hoc anno.

Comforba termuinn Mhég Craith .i. Toirrdhelbach mac Aindriassa Mhég Craith mortuus est.

Mac Conmidhe .i. Brian Dorchu mac Solaim .i. saoi re dán ocus re foghluim, ocus fer toictech tromchonaigh thighe aoidhed coitchinn do chach, dhec do ghalur obann aithgerr um fhéil Coluim Chille do shunnrad.

Cormac mac Diarmada h-I Chleirigh, .i. an brathair minúr dob fhoirfe egnaide na aimsir, dhéc isin fheil Coluim Cille cedna.

Sloiged mor leis O n-Domnaill .i. Magnus mac Aodha Duibh a n-iochtar Chonnacht, go n-derna crecha mora ar Mac n-Donnchada an Choruinn. Reitech d'O Dhomnaill ocus d'Iochtar Connacht re roile, ocus filled d'Ua Dhomhnaill iar m-buaidh g-cosgair, ocus íar n-ícc a chiossa ris.

Slóigedh ele leis O n-Domnaill ocus leisin g-Calbach O n-Domnaill, ocus le h-Ua Ruairc .i. Brian mac Eogain I Ruairc; ocus dul doibh sin uile ar Mac Uibhilin. Dá chuid no tri do dhenum don t-sluaigh re h-ucht na Banna. Mac Uibhilín iliomad daoinedh don taobh araill don Bhanna; gidhedh chena teid O Domnaill ocus O Ruairc tar an abhuinn dia n-aimdheoin. Acht chena ro baidhed Tadhg mac Bríain mic Mhaghnusa Mic Diarmada Ruaidh, .i. fer a oessa dob' arrachta oirrderca a maith ocus a laimh dia chinel feissin, ocus do mhorán eli. Ní h-eidir a riomh no a áiremh a b-fhuair O Domnaill co na slúaigh d'airgnibh ocus d'édalaib ar fedh an tire co h-uilidhi, iar milled mhórain nach eidir d'airemh. Tanic Mac Uibhilin a g-cenn I Dhomnaill, ocus tuc a bhreth féin d'echaib ocus d'édedh ocus do bhuaibh dho, ocus do níad síth ass a h-aitle, ocus tic O Domnaill iar m-búaid g-coscair don chur sin.

Mac Uibhilín .i. Rughraidhe mac Ualtair do dhul ar siubal creiche ar Ua g-Cathain. Crech mhór do ghlacad dhó. O Cathán .i. Maghnus mac Donnchada do bhreth orra a toraighecht, ocus buannadha móra chlainne Suibhne maille ris. Brissed dhoibh ar Mac Uibhilín ocus ar Albanchuibh badar maille ris, ionnus gur fágbad ár mór daoinedh díbh fa mac Alusdrainn Mic Domnaill, ocus fa mac Mic t-Sheain, ocus fa mhorán eli nach airimhter ro baithed ocus ro marbad dibh.

Maol Muire mac Eogain Mic Shuibhne do mharbad le clainn Moel Muiri mic Colla, ocus e ag iodhlucad chlainni I Dhubhda; ocus fa cenn raithi na dhiaidh sin iad fein d'ionnorbad ocus a m-bailte do bhrissedh; ocus fer dibh p-féin do marbad, ocus moran da lucht lenmhuna.

Félim Dubh mac Aodha h-I Neill do mharbad in hoc anno.

Ferghal mac Pilip h-I Dhuibhghennain .i. soi Erenn re senchus dh'ec.

Dáibhíth mac Athairni h-I Dhuibhghennáin dhéc in hoc anno.

Ingen mic Dabhi .i. ben Taidhg Meic Diarmuda dhec; ocus uaidhe dertha sliocht ingeine mic Dabhi, ocus Siubhan a h-ainm.

Kll. Enair for Luan; tri bliadna ocus dá fhichett ocus cuig ced ocus mile aois an Tigerna.

Comairle na h-Erenn edir iarla ocus bharún, ocus urmhor ghaoidel Connacht ocus an Gaill ar an g-comairle sin .i. an dá Mac Uilliam, ocus na tri Ua Conchobair, ocus Mac Diarmada .i. Ruaidri mac Taidhg Mic Diarmada. Lethbhaile Chluana senmaoil, ocus lethbhaile Chille na Manach do ghnodhachad do Ruaidri Mac Diarmada ar an g-comairle sin ón airdessgob, ocus ó na h-essgobaibh eli ro bhadar ann, ocus ón n-giuisdíss; ocus tuc Ruaidhri a lethbhaile fein don mhainisdir do ridhis ar gradh do Dhía.

Mac Mic Shuibhne Fhánad .i. Moel Muire mac Domnaill Óig do marbad le clainn Mic Shuibhne Fhánad, .i. le clainn Toirrdhelbaigh mic Ruaidri mic Maol Muiri.

Mac Mic Suibhne tire Bóghaine, .i. Eoin mac Neill, d'fhagail bhais a tús a aoissi ocus a inmhe an bliadain si.

Mac I Bhaoighill, .i. Brían mac Neill mic Thoirrdelbaigh, do marbad a b-fhioll le clainn Neill Oig h-I Bhaoighill, ocus iad ar a mhuinnterus ocus ar a thuarusdail fein aige.

Easpuc Ratha Both .i. Emonn mac Bríain mic in espuic I Ghallchubair do ég ar b-fhaghail choinntinne moire a timcell a thigernuis.

O Domnaill .i. Maghnus do dhul docum na comairle moire, ocus a braitri do bhí a laim aige re fada roime sin do bhreith lais dó, ocus a leigion do comairle an ghiuisdís ocus Ghall, ocus a techt fo shíth ocus fó reitech.

Conn O Domnaill do bhí a b-fad a n-Galloib roime sin do rédhugad re h-Ua n-Domnaill mur an cedna; ocus Conn do dhul a Sagsanaibh a cenn an righ iar sin, ocus O Domnaill do fhilled slán ar n-denum shochraidechta moire caithme don chur sin.

Muirghess mac Paidín h-I Maol Conaire .i. sói Erenn re senchus ocus d'fhilighecht, ocus fer go d-toice ocus go d-trom conách, dhéc an blíadainsi.

Rí Alban do dol dhéc an bliadain si a tús a oeissi ocus a inmhe, ar m-brissed mhadhma moir ar Sacsanachaibh reimhe sin, ocus gan oigri d'fhágbáil ina dhiaidh achtmad aon lenam inghine a g-cinn a h-ocht seachtmhuine; ocus ri Sacsan ar n-gabail neirt ar Albain a h-aithle baiss rig Alban fein.

Mac I Dhochartaigh, .i. Catháir mac Gerailt mic Domnaill mic Felim, do mharbad le clainn I Dhochartaigh .i. Rugraidhi ocus Sean, clann Felim mic Conchobair Charraigh; ocus mac Aodha Gruamma h-I Dochartaigh do marbad leisin clainn cedna sin I Dhochartaigh.

O Domnaill do dhul slúag mor a n-Inis Eogain do dhíghuil na marbhtha sin, ocus milled mór do ghenum dho; ocus braighde an tíre d'fhagail ina dhiaidh sin dó.

Slicht Eogain Mic Suibhne ocus slicht Cormaic Mic Donnchada do dul ar siubal creiche ar O n-Eghra m-Buidhe.

O Conchobair .i. mac Taidhg mic Aodha ocus O h-Eghra do breith orra, ocus maithe na clainni Suibhne sin do ghabail .i. Ruaidhri mac Dubhghaill, ocus clann Maol Muire mic Eogain; ocus marbtar ann cuid do slicht Cormaic ocus do mhuinntir clainni Suibhne.

O Maoileachlainn .i. Félim Óg do marbad le Mág Eochagáin.

Mac Suibhne na Túath ocus a mac .i. Brian do ghabáil le cobhlach o iartar Connacht ar innsi mic Duirn, ocus a m-breth leo a l-laimh.

Cogad mor etir Mhág Uidir ocus slicht Toirrdhelbaigh Mhég Uidir, ocus slicht Toirrdhelbaigh do dhul a Tir Chonaill, ocus milled mor do ghenum ar Mhág Uidir a h-ucht h-I Dhomnaill dóibh.

Mag Uidir do dul a g-cend I Domnaill a g-cinn athaid iar sin, ocus sith do dhenum dhó ris O n-Domnaill; ocus Mág Uidir dá thabairt fein ocus a thíre d'O Dhomnaill, ocus O Domnaill do thabairt Tuath Rátha ocus Luirg do Mhág Uidir, ocus iad aige re fada reimhi sin.

Mac Uilliam Clainni Ricaird, .i. Uilleg na g-Cenn mac Ricaird, d'fagail baiss an bliadain si, .i. tigerna go n-diomus ocus go n-uabair, ro traoth ocus ro thoirbir moran do Ghaoidhealaibh fo mhamus feissin;

ocus cogad mór ar n-eirghe a g-clainn Ricaird día éis, .i. Mac Uilliam do ghairm do Uilleg mac Ricaird Oig, ocus a lan do thír ocus do choicrich na aghaid le mac Mic Uilliam .i. Tomás mac Uilleg na g-Cenn.

Ocus a tús na bliadna sin do chuadar urmhór uaislibh Erenn a Sagsuin a g-cend ching Handrai; .i. téid O Neill .i. Conn mac Cuinn I Neill, ocus mac Uilliam Chlainni Ricaird .i. Uilleg na g-Cenn, ocus Murchad mac Toirrdhelbaigh I Bhríain .i. O Briain, ocus na tri h-iarladha .i. iarla Desmuman ocus iarla Ur Muman ocus iarla Cille Dara, ocus Donnchad mac Conchobair I Briain. Iadsin uile d'fhagail onora moire on rí, ocus iarla do dhenum d'O Neill ocus d'O Bríain ocus d'Uilleg na g-Cend; ocus cóiced na Gaillmhe do bhuain d'Uilleg na g-Cend ar an g-comairle sin, ocus é féin d'fhagail bháis a n-deredh na bliadna sin.

Maghnus mac Muirchertaigh Mic Diarmada Ruaid dhéc in hoc anno.

Kll. Enáir for Mairt; ceitri bliadna ocus da fichet ocus cuig ced ocus mile aois an Tigerna.

Iarla Desmuman .i. Semmus mac Seain d'fagail bháis iar b-fhagail a lán do chogad ocus d'imresuin a tosach a tigernuis, ocus iar cosg a lucht imresna ocus esaonta a tír ocus a coigcrich.

Mac I Domnaill. .i. an Calbach do dhul a g-cenn an ghiuisdís, ocus caiptín no dhó Sagsanach go n-daoinedh mora do thabairt leis a Tir Chonaill; ocus dul leo um chaislén Lithber, ocus braighde shlechta Aodha h-I Ghallchubair do bhí ag O n-Domnaill fada reimhi-sin do bhreth umon g-caisslén dona Sacsanachaibh, .i. Cathaoir mac Tuathail, ocus Toirrdhelbach mac Felim Fhinn; ocus marbtar Sagsanach imon m-baili don ced sgathad, ocus marbhuid na Sagsanaigh Cathair mac Tuathail ina ghlassaib p-fein; ocus tuc Aodh O Domnaill ocus an chuid eli do slicht Aodha h-I Ghallchubhair an baile as mac Felim Fhinn, ocus as mac eli Tuathail do bhí a laim, ocus fágbhuid na Sasanaigh an tír ar n-íc thuarustail mhóir d'O Dhomnaill riú.

Mac I Néill .i. Niall mac Airt Óig ar b-fhagail bháis an bhliádain si .i. an t' én mac righ is mo d'fhulaing do bhuadh ocus do dochur cogaid etir Chinel Eógain ocus Cinél Conaill dá d-tanic do slicht Eogain mic Neill riam, ocus soidech dingmhála do righe Chiníl Eogain dá roiched í .i. fer lán d'aithne ocus d'ealaduin leth re léghthoreacht ocus re litir gaoidhilge, ocus re fonn beoil ocus laime.

Sluaiged leis O n-Domnaill don Rúta gur gabadh bailti iomdha do chaislénaibh ocus do crannógaibh lais inte, ocus go b-fhuair edála iomdha; ocus toighecht slán doridhis.

Mac Suibhni Fánad .i. Toirrdhelbach mac Ruaidri mic Maol Muire .i. fer lan do bheodhacht ocus do croidhe, do mharbad le clainn Domnaill Óig Mic Suibni, ocus triar eli do chlainn t-Shuibhni do thuitim maille ris; ocus Mac Suibni do ghairm do Ruaidri Carrach mac Domnaill Óig 'na dhiaidh.

Cogad etir O n-Domnaill ocus O Neill an bliadain si.

Clann Domnaill .i. Semus ocus Colla do teacht fecht Albanach a n-Erinn ar tairring mic Uibhilín, ocus milled mor do ghenum ar O g-Catháin do dhaoinibh ocus dairnéis.

Murchad mac Mic Shuibhni na Túath, .i. soi a n-einech ocus a n-uaisli, dh'ec.

Donnchad mac Mic Suibni a brathair eli dhéc, ocus cogad mor is na Túathaibh dia n-éis.

Kll. Enair for Cedaoin; cuig bliadna ocus dá fhichet ocus cuig ced ocus mile aois an Tigerna.

O Conchobair Sligigh .i. Tadhg Óg mac Taidhg mic Aodha do mharbad le slicht Cormaic mic Ruaidri Mic Diarmada a n-Ath Chinn Lacha, ocus do bud terc Gaoideal do b'oirrderca a n-enech ocus a n-uaisle náss.

Mac Goisdealbh .i. Bhaiter mac Uilliam Mic Goisdealbh do dhul ar siobal go Bun an Fhedáin ar clainn h-I Conchobair, go goirid déis a n-athar do mharbad. Clann I Conchobair do bhreth orra, ocus cuid do chlainn t-Shuibhne, a toraighecht. Mac Goisdealbh ocus a mac .i. Rugraidhe do mharbad, ocus maidhm do thabairt orra; a Rúscach na Gaoithi ro brissed forra.

Sluaiged leis O Ruairc .i. Brian mac Eogain mic Tigernáin, no go rainic Dun Mór Mic Fheorruis, ocus gurro loisc an baile co b-fhuair bráighe; ocus tuc braighde Mic Daibhíth chlainni Connmaid, ocus Mainech uile leis don t-shluaigedh sin.

Báiter fada a Burc do mharbad a b-fheall le Domnall O b-Fhlaithbertaigh .i. an mac righ do b'uaisle árrachta a n-urmhor Erenn na aimsir féin.

Teabóid Riabach mac Bháiter a Burc do marbad le sliocht Uilleg a Búrc.

Maoil Sechluinn mac Bríain h-I Cheallaigh do marbadh isin Turrac le clainn Maoilechlainn mic Uilliam h-I Cheallaigh, ocus le Moel Ruanaidh mac Ruaidri Mic Diarmada, ocus an tir do chrechad dhoibh.

Tadhg mac Ruaidhri mic Cormaic Meic Diarmada do mharbhadh le cloind Eogain Meic Diarmada a Certhruin na Capall, ocus fa coir do Dia sin a tuitim, is olc do fuair se O Conchobair Sligigh do marbhadh a feall ag Ath Chinn Lacha fur Loch Tead.

Fergal mac Aodha meic Tomaltaig Bhuidhe meic Cormaic Óig dh'ec.

Brian mac Maghnusa Meic Diarmadu Ruaidh dh'ec ar Indsi na Suarach, ocus a adhnacail a Mainistir na Buille; ocus ba mor in t-echt sin.

Kll. Enair for dhardaoin; se bliadna ocus dá fhichet ocus .u. ced ocus mile aois an Tigerna.

Bráighde Chlainni Maol Ruanaid do thoigheacht o Clainn Ricaird .i. Brian mac Ruaidri Mic Diarmada ocus Tadhg mac Tomaltaigh Mic Diarmada, ocus ocht b-fhichit marg do dhul asda.

Tomas Farránta mac Uilleg na g-Cenn, ocus Donnchad Riabach mac Taidhg Dhuibh h-I Cheallaigh do dhul ar siobal go Siol n-Anmchada, ocus crech mor do ghlacad doibh, ocus toir trom do bhreith orra. Marbtar Tomass Farránta d'urchor do ghunnai, ocus do budh d'échtaibh mora a fhine dhó. Brister orra ass a haithle, ocus bentar a g-crecha dhíbh, ocus tig Donnchad riabach ocus urmhór a mhuintire ar éigin.

Feall do dhenum do chlainn Alusdroinn Mic Cába ar O Ruairc ina bhaile féin .i. an Baile Núa. An feall sin d'fhilled orra p-féin, ocus a marbad aroen .i. Sean ocus Maoil Sechlainn.

An t-O Ruairc cedna sin .i. Brían mac Eogain I Ruairc do dhul ar sgeimhlibh go Sligech, ocus mac h-I Raighilligh, .i. Toirrdhelbach mac Fergail h-I Raighilligh, do marbad don sgeimliud sin le bardaib Sligigh.

O Conchubhair Dond .i. Carbri mac Eogain Caoich d'fadhail bhais.

Kll. Enair for Aoine; seacht m-bliadna ocus dá fhichit, cuig ced ocus mile aois an Tigerna.

Mac Mic Diarmada .i. Brian mac Ruaidri mic Taidhg do lott le Siurtán m-Buidhe mac Seain mic Bháiter Mic Goisdealbh; ocus is amlaid do rinnedh sin .i. Siurtán Buidhe do thoighecht a Magh Luirg ocht n-diolmhunigh dhég d'iarrad gada, ocus Brían do bhualad uime aon sheiser amháin. Do tromloitted Brían; de sin téid an bhuidhen fó láimh, ocus do tromloitted an Giolla Dubh mhág Pilip le Brían féin.

Gort na Tighedh do chrechadh ocus do loscad le clainn Ruaidri Mic Diarmada in bhliadan si.

Clann Ruaidri Mic Diarmada mur an cedna, ocus clann Mic Dhabhíth do dhul ar siobal a g-Crúthonn O Maine, ocus an tir do loscad ocus do chrechadh dhóibh, ocus tóir mhór do bhreith orra. Ro marbad leo Hanraoi mac Seain mic Uilliam mic Emuinn, ocus Uilliam carrach mac Emuinn mic Thommáis, ocus morán eli; ocus tangadar fein ar éigin.

Prindsa Sagsan ocus Erenn .i. cing Hanri d'faghail bhais, ocus is deimin nach tanic a n-eiredh aimsire righ dob ferr na in righ sin, ocus do rigad a ingen na inadh .i. cing Maria.

Kll. Enair for shathorn; ocht m-bliadna ocus dá fhichit ocus cuig ced ocus mile aois an Tigerna.

O Concobair Donn .i. Diarmaid mac Cairbri mic Eogain Chaoich, ocus Mac Diarmada .i. Ruaidri mac Taidhg Mic Diarmada, ocus Tomaltach mac Taidhg Mic Diarmada, ocus Clann Mic Diarmada, .i. Maol Ruanaid ocus Brían, íadsin uile ocus cuid do ghallóglaechaibh clainni Suibhni ocus chlainni Dubhghaill, ocus morán do dhaoinib eli nach áirimhter sunn, do dhul ar siobal sluaiged a g-Clainn Mhuiris, ocus Ricard mac Muiris do mharbad leó .i. an t-ab óg, ocus caislén Mic Gerailt .i. an Caislén Caol do ghabháil, ocus ced no dho duine do bhássugad etir an dá bhaile sin; ocus tucadar a noei no a .x. do ceduibh bó ocus .x. n-eich leo; ocus tancodar fein slan.

Loch na Cuan Fadha do ghabhail, ocus an tir do loscad, le h-Ua Ruairc ocus le Mac n-Diarmada, an mhí cedna.

Aonghus mhac Toirrdhelbaigh mic Colla Mhég Dhomhnaill do mharbad le Moel Ruanaid mac Ruaidri Mic Diarmada, ar Bealach an Dairín, ocus tuc crech o Chlainn n-Domnaill isin ló cedna.

Mor ingen Maol Ruanaid meic Seain I Cerbhaill, in ben is ferr do bhi a n-en aimsir ria fein a n-Erinn .i. in ben do bhí ag Iarla Des Muman, dh'ec.

Clond Taidg Bhuidhe meic I Conchobair Dhuinn do mharbhadh a n-Uaran le sliocht Feilimi Chleirigh I Chonchobair .i. Seain ocus Feilimi.

Kll. Enair for dhomhnach; noi m-bliadna ocus dá fhichet, cuig ced ocus mile ais an Tigerna.

Aodh mac Cormaic mic Ruaidri mic Diarmada, ocus ab na Buille, ocus tigerna Chlainni Mhaol Ruanaid a n-aon persuin, d'fhaghail bhais comna ocus t-shacarbuic iar n-guasachtaibh iomdha on fhine féin ocus ó esgcairdib eli. Acht chena nir bhó ró diamad leis tigerntus Connacht, d'aidhbhle a oinigh ocus a uaisle, ocus do mhéd a thidhluicthi ocus a thuarusdail; Dia dha íoc ren anmuin.

Ruaidri mac Taidhg mic Ruaidri Oig Mic Diarmada do righad na ionad; acht ger mhór re h-innisin maith Aodha nír bho cloich an ionad uighe Ruaidri 'na ionad.

Gairm sgoile do thabairt do Mac Diarmada .i. do Ruaidri a nodluic na bliadna sa, ocus ni h-eidir a riomh ina ro áiremh ar thídhluic sé d'eigsibh ocus d'ollamnaibh ocus d'aois ealadna Erenn, ocus da gach duine airchena.

Mac maith do Mac Diarmada .i. Maol Ruanaidh mac Ruaidri Mic Diarmada do thabairt na garma cedna, ocus ioliomad do maithess an t-shaogail do sgaoiled ar feruibh Erenn ar lorg a athar.

Ro dhaingnigh ocus ro dheghshocraidh an Ruaidri sin Mac Diarmada fo na thigerntus ocus fo na troim chios moran do na tirib a g-cian ocus a b-fhogus, oir do bhen sé da ced bó don da Mhag Raghnaill, ocus ced bó do Mac Donnchada an Choruinn, ocus tri fichit bo d'Ua Ghadhra; ocht m-ba ocus dá fhichet d'Ua Ainlighe, ocus ocht m-ba ocus dá fhichet o Mac Branáin; ocus cetra ba fiched o Ua Fhlannagáin, ocus cetra ba fichet o Crúthonn O Maine; ocus cethra ba fichet ó t-shlicht Toirrdhelbaigh Charraigh I Conchobair, ocus fiche bert bhuandachta ó t-shlicht Taidhg mic Briain mic Donnchada, ocus fiche sgillinn do chíos gacha bliadna maille risin; ocus cioss ar t-shlicht Ruaidri Mic Donnchada a g-Cúil Degha; ocus cioss ar t-shlicht Aodha Buidhe ocus ar shlicht Muirghessa; ocus císs ar slicht Dubhghaill Gruama.

Crecha móra do dhenum do Mac Diarmada ar slicht Donnchada h-I Cheallaigh, ocus a g-cuid tíre do loscud; ocus trí fichit bo ó Mac Goisdealbh an bliadain cedna. Crecha móra ó Chlainn Filip ina raibhe da ced dhéc bó ocus deich n-eich díla maille rú; ocus iadsin uile do thindlucad a n-en lo d'ollamnaibh ocus d'egsib Erenn .i. la fhel Sdefain.

Cathal Óg mac Cormaic Meic Donnchada do marbad le Mac Donnchada in Choraind, .i. le Cairbre, ar Sith Riabhach.

Caislen do dhenam a Leim na Girra do clainn Donnchada Dhuibh mic Conchobair, ocus do budh maith in congnam Ruadhri mac Taidhg mic Diarmada ocus a clann, .i. Maol Ruanaidh ocus Brian, dochum in chaislein sin do dhenamh.

Kll. Enáir for Luan; x. m-bliadna ocus da fhichet, .u. ced ocus mile ais an Tigerna.

O Conchobair Donn .i. Aodh mac Eogain Chaoich d'aithriogad d'Iarla Chlainni Ricaird .i. Ricard Sacsanach, ocus tigerna do dhenum do Diarmaid mac Cairbri mic Eogain Chaoich.

Kll. Enair for mhairt; en bliadain dég ocus dá fhichet, ocus cuig ced ocus mile, ais an Tigerna.

Iarla Chlainni Ricaird do theacht co Ros Comáin d'iarrad Rossa Comáin ar clainn Taidhg Bhuidhe h-I Conchobair; ocus ní b-fhuair an baile; ocus teid roime co Topur Ailbhe cona sluaigh, mur araibhe foslongport Mic Diarmada .i. Ruaidri mic Taidhg Mic Diarmada, ocus ro lethnoighed an slúag sin an Iarla ar fedh fhoslongpuirt Mic Diarmada dhá lo co n-oidhche. Acht chena is terc má dho bhí a n-Erinn foslongport inar lía ba ocus eich, eidedh ocus ordanáss, ceol ocus fion, ina in foslongport sin Mic Diarmada; óir ní raibhe ó Chul Mhaoile co Sliabh Buidhiunn, na o Bhel Atha h-Achaidh co Sionuinn, aon duine nach raibhe isin bfoslongport sin Mic Diarmada.

Fágbhus an t-Iarla an foslongport ass a h-aithle, ocus beriss Mac Diarmada allaim leis co Clainn Connmaid, ocus téid mac Dábhíth .i. Uillec mac Tomáis do brághaid ass, ocus réidhighter gan ro dhíghbháil iad aroen.

Muilenn Adam do ghabhail do mac Mic Diarmada .i. Brían mac Ruaidri Mic Diarmada; ocus cuiris techta ar a bhraithrechaibh eli .i. Cormac ocus Maol Ruanaidh, ocus do niad crecha móra a g-Corann; ocus tic Cormac ocus Maol Ruanaidh lé na n-edáil, ocus anus Brían isin mbaile.

Ro gabh an fiabhrus é; do niad a mhuintir seacht g-creacha an fedh do bhi sé fein na luidhe; ocus tuc Tadhg Carrach mac Mic Donnchada an Choruinn ced marg ass an m-baile sin do clainn Ruaidri Mic Diarmada; ocus tangadar fein slan edalach as.

Lochlainn mac Paidin mic Lochlainn mic Maoilechlainn mic Thanaidhe .H. Mhaoil Chonaire, .i. ard ollam t-Shiola Muiredhaigh, d'fhagail bhais an bhliadain sin, ocus a adhlucad a n-Oilfinn, iar m-breith bhuaide o dhoman ocus o dheman.

O Briain dhéc .i. Murchad mac Toirrdhealbaig; ocus ni tainic do t-sliocht Bríain mic Cindeidigh re fada riam sgel budh mo na h-e.

Maidhm na Muinchinde Uachtair do thabairt ar th-Shiurtan m-Buidhe mac Seain mic Uateir mic g-Coisdealb, re sliocht Muircertaigh Mic Diarmada Ruaidh, du and ar tuit fiched no do, ocus do marbadh in la sin Domhnall O Laimin ocus Cathal O Mochain le Siurtan.

Kll. Enair for Cedaoin; dá bliadain dhec ocus dá fichet, ocus cuig ced ocus mile, ais an Tigerna.

O Conchobair Sligigh, .i. Tadhg mac Cathail Oig h-I Conchobair, d'fhagail bháiss; ocus aderaid aroile gurab terc má thainic do slicht Briain Laighnigh tigerna do b' ferr féile ocus foighide, dealbh ocus denum ináss.

Rugraidhe mac Taidhg Bhuidhe mic Cathail Ruaidh do mharbad le Mac Diarmada, ocus caislén Tulcha do brissed.

Bél na Muilnedh do bhrissed, ocus a bharda do mharbad le Mac n-Diarmada ocus le na chlainn.

Ruaidri mac Felim mic Mhaghnusa do righad a n-ionad h-I Conchobair .i. Thaidhg mic Cathail Oig.

Clann Donnchada Dhuibh mic Conchobair, .i. Ruaidri Buidhe ocus Maoilechlainn Donn, d'fhagail bháis an bhliadain si.

Cogad mór do eirghe etir O Conchobair .i. Ruaidri mac Félim mic Mhaghnusa, ocus mac h-I Conchobair .i. Domnall mac Taidhg mic Cathail Óig; ocus do bhadar clann Maol Ruanaid ina dhá rann a n-aghaid aroile maille ris an t-shiol Conchobair sin; .i. do bhi Mac Diarmada ocus a chlann, ocus Mac Donnchada Thire h-Oilella, ag mac h-I Chonchobair, ag Domhnall, ocus do bhí clann Eogain Mic Diarmada ocus Mac Donnchada an Choruinn ag O Conchobair; ocus ni h-eidir a riom iná áiremh gach ar milled ar an g-cogad sin.

Maol Ruanaidh mac Taidhg mic Eogain mhic Diarmada do mharbad d'urchor do ghunna le cuid dá chinedh fein .i. sliocht ingine Meg Ragnaill.

Cormac Carrach mac Eogain Mic Diarmada d'faghail bhais a tigh a muine ar Corrsliabh, ocus fa mor in fer millte ocus uilc do ghenamh in fer sin, oir do marbh se Diarmaid an inigh mac Ruaidri Meic Diarmada a feall ar lios Aodhain.

Tadhg mac Taidg mic Eogain I Ruairc do marbhadh a feall a m-Bothaigh I Fhialain don Dauine mac Lochluind.

Kll. Enair for dhardaoin; tri bliadna dhéc ocus da fichet, ocus cuig ced ocus mile, ais an Tigerna.

O Conchobair Ruadh .i. Toirrdhelbach Ruadh mac Taidhg Bhuidhe mic Cathail Ruaidh do tharraing bharamhuin Dealbhna ar Mhagh Luirg, ocus crecha nach eidir do ríomh do dhenum ar shlicht Maoil Sechlainn Duinn, du ina rabhadar da ced dhec bo uel amplius; oidhche fhele crois do rinnedh na crecha sin.

Maol Ruanaid mac Ruaidri Mic Diarmada, .i. an mac righ do b'oirrderca d'fer aossa d'oinech ocus d'uaisle ocus d'oirbert, do mharbhad d'urchur do ghunna le na brathair fein .i. Tadhg mac Eogain Mic Diarmada, in hoc anno. Acht chena nir bho ró maith dia n-dingnad an t-é rus-torchair annsin, oir ni raibhe a g-Coiged Chonnacht mac athar ocus mathar dob ferr oldáss in gach uile maith, do troime thidhluicthi ocus tabartais ocus tigerntuis, d'fhele ocus d'iocht, d'oinech ocus d'fhoighide .i. Ruaidri mac Taidhg mic Ruaidri Óig, ocus Sadhbh inghen Riocaird Óig mic Uilleg Ruaidh mic Uilleg an Fhiona. Acht chena do ni Mac Diarmada sith a h-aithle bháis a mheic, acht ger dhoilig lais a dighuin lé na charaid ocus le na comfhoigsibh féin.

Crech mor do dhenum do Brian mac Ruaidri Mic Diarmada ar cloinn Loeissigh mic Dhubhghaill an bliadain sin.

Crech eli le Siurtan m-Buidhe mac Seain mic Bháiter ó chuid do mhuinntir mic Mic Diarmada .i. Brian, ocus nir bo guin gan chumaoin sin.

O Briain dhec .i. Donnchad mac Conchobair .i. rogha Gaoidel Erenn.

Cing Edbhord .i. prionnsa Sagsan ocus Erenn, do éc iar m-beith ocht la ocus ocht mí ocus se bliadna na thigherna dhó, ocus an seissedh la do mhí mhedhoin t-shamhradh rus-dealaig anam ocus corp re roile aige; ocus sé bliadna roime sin rus-torchair a athair .i. cing Hannraoi; naoi m-bliadna ocus ceitri ced ó thainic iarla O Sdrangbo go h-Erinn, ocus ocht m-bliadna edir sin ocus a ég; ocus issé an t-iarla sin táinic le Diarmaid Mac Murchada go h-Eirinn, ocus tuc sé a inghen ocus cuid da dhuthaid dó.

Tomaltach mac Mhaoil Ruanaidh meic Cormaic Mic Diarmada do marbhadh le clainn Eogain Mic Diarmada, ocus le Siúrtan m-Buidhe mac Seain meic Uater, a feall air Luing Airtigh Uchtleathain.

Tadhg mac Ruaidri I Chomhdhain, .i. ollam Erenn ocus Alban re sinm, d'eg.

Ingen I Domnaill .i. Siuan, .i. in ben do bhí ag Tadhg mac Cathail Óig, dh'ec.

Kll. Enair for Aoine; ceitri bliadna dhec ocus dá fhichet, cuig ced ocus mile aois an Tigerna.

Crech mhór do dhenum do clainn Mic Diarmada ar Siurtán m-Buidhi mac Seain mic Bhaiter Mic Goisdealbh. Albanaigh ocus gallóglaech d'fhasdó don chloinn cedna sin Mic Diarmada.

Dún Neill ocus an Grainsech Bheg do crechadh do Chormac Mac Diarmada, ocus Brían do dhul ar shlicht Conchobair Mhég Raghnaill, ocus crechadh ocus marbta do ghenum dhó orra, ocus an tír do loscad achtmad beg.

O Flannagáin cona chinedh do thabairt innsoiged ar Bhrían mac Mic Diarmada siar go h-iorchán, mur araibhe cuid dá mhuintir, ocus ní tharla dhédail riú acht míassa ocus taipliss Bríain. Téid na sgéla sin go Brían, ocus do bhí sé fedhan cruinn ar Sgiath na b-Fert mun am sin. Ro len Tomaltach mac Taidhg Mic Diarmada, ocus Brían ocus slicht ingine Mhég Raghnuill na miassa sin, ocus an taiplis; ocus tucadar dá fhichit dhec bó o bhel Atha Iomdháin a n-díghuil na taiplissi.

Ro creachsat muinter Fhlannagáin clainn an persúin Mic Mhuirghessa ar bhuaile an t-shoilchéin, ocus íad ar cádhus h-I Conchobair Dhuinn boi na comdhalta aca; ocus ro bhói tri ced bó co b-fhuilliudh isin greich sin cona n-dioll capall.

Tadg mac Ruaidhri Bhuidhe, ocus Brian mac Maoil Sechlainn Duind, do mharbhadh leis O Flannagain, .i. Emand mac Uilliam I Flannagaind do roinde an marbhadh.

Baile na h-Uamha do thionsgna le Brian mac Ruaidri Mic Diarmada, iar na bhrisedh roime sin d'O Domnaill, oir do bhain se tri ceathruna as.

Kll. Enair for shathorn; u. bliadna dhéc ocus dá fhichet, ocus cuig ced ocus mile, aois an Tigerna.

Clann Ruaidri Mic Diarmada do dhul ar innsoiged a g-Cruthonn O Maine, slúag doáirmhe, .i. Cormac ocus Brían, ocus tucadar crecha móra leo, ocus ro loiscset an tir go h-uilidhe; ocus tangodar go Fuaran Mhoighe h-Oi a b-fhoslongport an aghaid sin. Ro ghabh galur a éga Cormac mac Ruaidri mic Diarmada an oidhche sin, ocus fuair bass a g-cinn t-sheachtmhuine ass a h-aithle; ocus do budh do sgélaibh móra Connacht an mac sin Mic Diarmada alleith uaisle ocus innsoigte, oinigh ocus oirberta.

Cathal Óg mac Eogain Mic Diarmada d'fhagail bhais, ocus do bud mór an sgel sin.

Cogad dh'eirge etir chlainn Eogain Mic Diarmada ocus Mac Diarmada cona chlainn.

Mainistir na Buille do ghabhail do Brían mac Mic Diarmada ar clainn Eogain, ocus ab na Buille do ghabail ann .i. Tomaltach mac Eogain Mic Dhiarmada.

Nír bo cian doibh iar sin gurro loisced an baile cedna ar Brían le clainn Eogain Mic Diarmada, ocus rucsat seacht n-eich leo.

Teid Brían fo na Rennaibh doridhis, ocus tuc tri fichit capoll lais, ocus ro ghab Muirchertach Og O Maoilenaigh. Ro crech Coill Feachtna mur an cedna; ocus téid Brían mac Eogain Mic Diarmada ar láimh Mic Diarmada le na bhreith féin do sith ocus do reitech, a h-aitle ar milled etorra dibhlionaibh.

O Flannagain do thairring clainni Oilefer mic an Iarla ocus mhic h-I Fergail Bhuidhi .i. Loeisech O Fergail. An t-shochaide throm sin do theacht ar Mac n-Diarmada, ocus sgemealta do leigion uatha no co rangadar Tochur an Cába. Mac Diarmada ocus a mac .i. Brian do bheith a n-Disert Núdhan mun am sin. Gabháil dóibh ocus na h-airgthe do bhuain amach do c. neichibh dóibh. Brissed ar an slúag ass a h-aithle, acus maidhm do beith orra ó Ath Mharbhtha Cathail go Bél Atha Uachtair; ár dí-áirmhe d'fhágbháil dóibh um mac I Ferghail .i. Loaisech, ocus um mac maith I Fhlannagain .i. Emonn Óg mac Emuinn mic Uilliam I Fhlannagáin, ocus um ced fer go fuilliud maille riú.

Domhnall mac Mhaoil Sechluinn h-I Cheallaigh d'fhaghail bháis a g-caislén an mhagha, .i. aon rogha shleachta Maine mic Echach alleith oinigh ocus adhbchlossa, ocus a ádhnocal a Ros Chomáin.

Emonn Buidhe mac Tomais Bhacaigh a Burc do thuitim le clainn Oiluérus a Búrc, ocus Eoin mac Dhuiphsíth do thuitim maille ris.

Sean Glass mac h-I Dhubhda d'fhaghail bháis an bhliadain si.

Sean mac an Phríóra Mic Dhábhíth d'ég.

Mac Goisdealbh .i. Píarus do mharbad do chuid dia bhráithribh p-fein a b-fhioll a g-caislén Manuinne.

Meadhbh ingen Domnaill mic Eogain I Chonchubhair dh'ec, in ben is ferr do bith a n-Erinn na h-amsir fein.

Aodh mac Eogain mic Conchubair mic Ruaidri Buidhe dh'ec.

Kll. Enair for Domnach; sé bliadna dhec ocus da fichet .u. ced ocus mile ais an Tigerna.

O Conchubair Donn .i. Diarmaid mac Cairbri, ocus mac Diarmada .i. Ruaidri, ocus Tomaltach Mac Diarmada, ocus Brian mac Mic Diarmada, do dhul sluag mor ar an b-Popal g-Caoch; ocus ni h-étir a riom gach a n-dernsat do crechaibh ocus do loisctib, ocus a tucsad d'édail léo.

An coimthinól cedna do dul ar O Rúairc .i. Brian mac Eogain I Ruairc, ocus crecha mora do tabairt ó Mhullach Thuir, ocus o Ghlend Buidhi dhoibh; ocus an Breifne do loscud co h-uilidhi.

Diarmaid O Maeilenaigh dhéc in hoc anno.

Foslungport do ghenamh do Domhnall mac Taidhg mic Cathail Óig ar in Grainsith, ocus Semus mac Seain mic Ruaidri ocus a mac do tabairt as an m-baile, ocus braighde t-Sleachta Briain do breth as in baile.

Kll. Enair for Aoine; seacht m-bliadna dhéc ocus dá fichet, cuig céd ocus mile, ais an Tigerna.

Brian mac Eogain mic Thaidhg Mic Diarmada do mharbad le Mag Shamhradhain, ocus le cuid do shlicht Tomaltaigh an Oinigh Mic Diarmada, do thairing ocus do thóscnadh a n-ionnsoiged; ocus robud mór an sgél an t-é rus-torchair annsin, óir is terc ma dho bhói fer a aossa is mó ro thoirbir ocus ro thídhluic d'eícsibh ocus d'ollamnaibh, ocus do lucht iarrata athchuinnge.

Cogad mor d'eirghe etir O Ceallaigh .i. Donnchad mac Emuinn ocus Brian mac Mhaoil Sechlainn I Cheallaigh, ocus ro fhasdó Brían Dolaidh .i. Risderd Usdás, cetra fichit giomanach.

Ro Loisced Lios Dá Lon lais .i. baile I Cheallaigh, ocus ro marbad a chonsabal lais .i. mac Dubhghaill .i. Toirrdhealbach mac Loeisigh Mic Dubhghaill, ocus ro milled an tir o Shuca co Sionuinn.

Cuiris O Ceallaigh tairing ar clainn Cathail mic Ruaidri Mic Diarmada, ocus ar Ruaidri na d-Tulán mac Diarmada Mic Diarmada .i. a bráithrecha féin, ocus tigid don tir marcslúag mór. Ocus éirghis O Ceallaigh ocus a mac .i. Aodh a g-cuinne na fedhnach, ocus tiaghaid an comdháil do Chnoc an Daingin ocus do Bhóthar na Tachaltaigh. Ocus ro buailedh Brían O Ceallaigh ocus iad féin fá chéli, ocus tucadar troid d'ároile; ocus ro brissedh ar Bhrían, ocus ro marbad Concobar O Nechtain ocus fiche duine maille rissin; ocus ro gabad Risderd Usdas.

Crech mhór do ghenum do Brián mac Ruaidri Mic Diarmada ar mac Goisdealbh, ocus Tulach Shrutháin do loscadh. Tóir mor do bhreth air, ocus a thocht slán édalach air eigin uatha.

Mac Diarmada .i. Ruaidri do ghabháil día charaid féin go n-emhmaith, .i. Brían mac Mhaoilechlainn h-I Cheallaigh; ocus do gabad ann Toirrdhealbach mac Eogain Mic Diarmada, ocus cuid dia marcsluaig maille riu. Acht chena nir bhó crech gan tóir an ghabháil sin Mic Diarmada ó na charuid ocus ó na mhuinntir feissin. Ro len O Conchobair Donn ocus Mac Dábhíth, ocus galloglaech Clainni Dubhghaill, Mac Diarmada go Mainechaibh a g-cionn tri n-oidhche iar ná ghabháil, ocus ro bhensat ass caisslén nua Cobhthaigh h-I Fhallamhuin ar éigin h-é; ocus do rinnedar marbhta ocus loiscthi ann, ocus tucadar tríar brághad as Mac Diarmada degla a loiscthe isin m-baile; ocus ni dérnadh a n-deredh aimsire tóraighecht budh ferr iná an tóraighecht sin.

In Gilla Coluim O Clábaigh .i. comarba Padraicc ar Magh Aói .i. fer toictech trom chonáigh tighe aoidhedh coitchinn, dh'ec in hoc anno.

Kll. Enair for mhairt; ocht m-bliadna dhec ocus da fichet, ocus cuig cet ocus mile, ais an Tigerna.

Mac Diarmada ocus a mac .i. Brían do dul ar innsoiged ar Brián O Ceallaigh. Mac Diarmada ocus bun an t-slúaig d'anmhuin a m-Baile an Mhuilinn. Teid Brían ocus an chuid eli don t-shlúaigh tar Bruighél astech, ocus tuc crech ocus groidh Chobhthaigh I Fhallamhain leis. Do chuaid suas a teithed ocus ro loisc an tír go h-uilidhe o Bhruighél suas; ocus tigid slan édalach.

Baile h-I Choinchenainn do chrechadh ocus do loscad le Brian Mac Diarmada mar an cedna .i. an Fedan.

Kll. Enair for Cedaoin; naoi m-bliadna dhec ocus da fichet ocus u. ced ocus mile ais an Tigerna.

O Conchobair Ruad, .i. Toirrdhealbach Ruadh mac Taidhg Bhuidhe mic Cathail Ruaidh, mortuus est; ocus do bu do sgélaibh mora Erenn na aimsir é; ocus a mac .i. Félim Ruadh do righadh 'na ionadh ar Chluaintibh chlainni mic Fhélim.

Mac Diarmada ocus a mac, .i. Brían, do dhul ar Mac Donnchada an Chorainn, ocus an tir do loscad leó, ocus tech a templa do chrechadh.

Clann Fhuadach do chrechadh ocus do loscad le h-O Conchobair n-Donn, ocus le Brían mac Ruaidri Mic Diarmada.

Maidhm Atha na Beithighe allaníar do Lioss Bhallghaile do thabhairt le Tomaltach mac Taidhg Mic Diarmada, ocus le Brían mac Ruaidri Mic Diarmada, ocus ro marbad ann Eoin mac Mhaol Muiri mic Colla Mic Shuibhne, ocus Colla Mac Suibhne, ocus daoine iomdha eli; ocus tangadar fein slán co n-édáil iomdha leó, ocus crech Baile na g-Cloch acca; ocus air O Chonchubhair Sligigh .i. Ruaidhri mac Feidhlim mic mic Maghnusa, ocus ar Mac Donnchada in Choraind tugadh an maoidm sin.

Murchadh Gránna, mac Ruaidri Mic Suibhne, dh'ec in hoc anno.

Kll. Enair for dhardaoin; tri fichit bliadan ocus cuig ced ocus mile aois an Tigerna.

Tadhg mac Briain mic Eogain mic Tigernain I Ruairc do bathad ar Loch an Chlochair, .i. fer a aosa is mó oirbert ocus oirrdercus, oinech ocus uaisle, do slicht Tigernain re cian d'aimsir roime, ocus adbhar rígh Uá m-Briúin gan athcheo díamad cían a ré.

Felim Ruad O Conchobair do crochad le Tomaltach mac Taidhg Mic Diarmada, ocus le slicht Conchobair mic Ruaidri Bhuidhe.

Ruaidri na d-Tulán, mac Diarmada an Oinigh mic Ruaidri Mic Diarmada, d'fhaghail bháis an bhliadain si; ocus do budh mor an sgél sin .i. mac ingine h-I Bríain, ocus an t-é do bud mó a méin ocus a méid, ocus a n-gniom ocus a láidirecht, da d-tainic do slicht Mhaoil Ruanaid Mhóir re fada roime; ocus ro h-adhlucad a n-othurlighe a shen é .i. a Mainisdir na Buille.

Crech mhór do dhenum do slicht Felim Fhinn I Conchobair ar Brían mac Ruaidri Mic Diarmada.

Creach eli le Brían féin o Shiurtan Bhuidhe mac Seain mic Bháiter Mic Goisdealbh, ocus clann Hanrái h-I Grádaigh do marbad leis.

Crech eli le Brían ó Chnoc na Síthe, ocus creach o mhuinntir Fhlannagáin, ocus seacht n-eich.

Ath Gallda do brissed le h-Ua Conchobair n-Donn, ocus lé Brían Mac n-Diarmada.

Maidhm ádhbail a Tuadh Mumain ar Iarla Tuadhmuman, ocus ar Iarla Chlainni Ricaird, le h-Iarla Desmuman, ocus le Tadg mac Murchada h-I Bhríain; ocus ro marbad annsin Emonn mac Ruaidhri Moir Mic Shuibhne, ocus Emonn Óg a mac, ocus Colla mac Murchada mic Ruaidri Mhóir, ocus clann Murchada Mic Shuibhne, ocus consabail Thúath Mhuman go h-uilidhi; ro fagbad nói m-bratacha do t-Shlicht Domnaill na Mádhmann, et alii multi.

Hannri mac Uilliam meic Tomais mic Daibíth mic Emaind dh'éc; ocus fa mor in t-echt an mac sin meic Dábíth a leith uaisle ocus inigh.

Kll. Enáir for Aoine; bliadain ocus tri fichit, .u. ced ocus mile, aois an Tigerna.

Tadhg mac Cairbre I Birn .i. O Birn, d'fagail bháis a n-Echanach, ocus is terc ma dho bhí a n-Erinn sgél bhudh mó ináss do mhéid ocus do mhaisi, do dheilbh ocus do dhegh cuma, d'egna ocus d'ealadhuin, d'oinech ocus d'oirrdercus, ocus in gach uile ghné bhudh cosmail do dhuine mhaith; bennacht lé n-anam.

Maoil Sechlainn mac Tuathail h-I Dhomnallain dh'éc .i. ollam urmhóir Connacht re dán, ocus fer thoighe aoidhed do gréss.

Felim Buidhi mac Cairbri mic Aodha mic Fhelim Fhinn do marbadh a Tuillsci le Brian mac Ruaidri mhic Diarmada, ocus le clainn Tomaltaigh Mic Diarmada.

Crecha móraidhbhle le Mac Diarmada .i. Ruaidri mac Taidhg Mic Diarmada, ar Mac Donnchada an Choruinn.

Brian mac Mic Diarmada ocus clann Tomaltaigh Mic Diarmada, ocus a g-cuid slúag, do dul go Baile an Mhúta, ocus ar n-dul fón m-baile dhoibh mac Tomaltaig Mic Diarmada do mharbad d'urchor do ghunna .i. Cathal Mac Diarmada; ocus marbhtur Eogan mac an fhir dhorcha Mic Diarmada ruaidh d'aon urchor do ghá isin ló cedna.

Siurtán Buidhe mac Seain mhic Bhaiter Mic Goisdealb do mharbad le clainn Dábhith Bháin a Búrc a m-Baile Locha Deala a Tír Amhalgaid, ocus fa h-uasal aidhmillte an fer sin.

Aodh mac Eogain Mic Diarmada do mharbad do slicht ingine Mhég Raghnuill .i. clann Cathail Mic Diarmada a g-Cluain na Mónadh.

Maoil Sechluinn, mac Aodha mic Thaidhg mic Tomaltaig an Oinigh Mic Diarmada, do mharbad le Clainn Fhir Gan Ainm mic Conchobair Óig Mic Diarmada, a Port Inis Dóighre.

Foslongport Mic Diarmada, .i. Ruaidri mic Taidhg Mic Diarmada, do bheith um Sgeithín na g-Cenn, ocus um Fhuarán Mhoighe h-Oi, ag milledh na g-cluaintedh ocus Mhainech, o bhealltoine co feil Míchil, óir nír fhagaibh sé tech gan loscad, ina gort gan gerradh, ó thochur Choille an Chairn co h-Oilfinn dar bhen re slicht Donnchada h-I Cheallaigh, na re slicht Cathail Ruaid I Conchobair; ocus ni h-eidir a riom ina ro fhoillsiugad gach ar bhen sé dh'airgnibh ocus d'édalaibh dibh; ocus ni roibhe a n-Erinn foslongport inar lía eich ocus éidedh, feoil ocus fíon, aos ciúil ocus oirfidigh ocus ealadhna, galloglaech ocus giomanaigh ocus Albanaigh, iná in foslongport sin Mic Diarmada.

Mac Dabhíth Chlainni Connmaidh, .i. Uilliam mac Tomáis mic Dabhith mic Emuinn, dh'ec in hoc anno; (a lot a Ros Chomain).

Maoil Sechluinn Balbh mac Uilliam h-I Cheallaigh, .i. mac inghine h-I Bhríain, do mharbad isin Pubal g-Caoch, ocus fa mor an t-écht.

Naoisse mac Cithruaidh, an t-aon dhuine is binde do bhí a n-Erinn, do bhadhadh ar loch Gile, ocus a ben, ingen Mic Donnchada, ocus Athairne mac Matha Ghlais; ocus fao mor in sgél mac I Duibhgeannain.

Maidhm Sligigh do thabairt air Cathal Óg Ua Chonchubhair d'O Domhnaill .i. d'Aodh mac Maghnussa; ocus do marbhadh andsa maidhm sin an Dubhaltach mac Taidhg in Triubhais Meic Donnchada, ocus Eogan mac Maoil Muire Mic Suibhne, ocus Toirrdealbach Caoch mac Toirdhealbhaigh Óig, ocus Dubhgall mac Emaind mic Shuibhne, et alii multi.

Kll. Enair for shathorn; da bliadain ocus tri fichit, u. ced ocus mile, aois an Tigerna.

Clann Eogain mic Taidhg Mic Diarmada d'fhasdódh dholaid mhóir a n-aghaid Mic Diarmada .i. Ruaidri, gan fhis dó féin, óir tucadar Clann Alusdrainn Ghallda Mhég Dhomnaill Mhóra, ocus Brian Óg mac Briain an Chobhlaigh Mic Shuibhni, ocus ro bhadar tri ced Albanach ocus gallóglaech. Ro thairrngedar an dolaidh sin ar Mac Diarmada, ocus ro loiscset ocus ro crechsat ar bhen re seicréid Mic Diarmada don tír; ocus ro loiscset an longport co h-uilidhi, ocus Baile na h-Uama, ocus ar gach taobh dhé; ocus ro marbad Murchad mac Briain Choeich .i. marcach maith do mhuinnter Mic Diarmada leó isin Chlochair; ocus ni h-eidir a riom na innisin gach ar millsed d'echaib ocus do bhuaibh, do chaiplibh ocus dá gach uile édail airchéna. Ro bhói an dolaidh sin lá ocus seachtmhuin ar fedh an tíre agá milled, ocus Mac Diarmada ar an Cairrig na Comnaidhe ar an bh-fedhsin. Ar mothughad an tíre do mhilled do Mac Diarmada .i. do Ruaidhri, ro chuir tairring ar Domhnall mac Murchada Mic Suibhni, ocus ar slicht Emuinn Mic Shuibhne; ocus tuc lais tar Coirr Sliabh bhudh thuaidh a tri no a cethair do cedaibh lúirech, cona n-díol giomanach léo. Do b'é sin uair ocus aimsir ro bhádar clann Eogain Mic Diarmada cona n-dolaidh ag filledh ass an g-cenn tuass don tír iar milled mhoráin innti, ocus do ronsat iornaidhe bheg a m-Baile Mheic Murchada; acht chena ruc sgéla orra ocus tiaghuid a n-ordugad. Beirid páirt do tosach sluaig Mic Diarmada orra ag dul tar Cara an Fedha dhóibh. Tomaltach mac Taidhg Mic Diarmada, ocus Brían mac Mic Diarmada, do chor greamma orra don taobh thall do charaidh, ocus brissed orra ass a h-aithle, ocus an maidhm sin do bheith orra no go rangadar Bratt Sliabh. Brian Óg mac Bríain an Chabhlaigh Mic Suibni d'fhágbail annsin, maille ré dá ced fer maroen ris.

Mainisdir na Búille do ghabháil do Mac Diarmada isin ló cedna don chur sin.

Cluain Muiredhaigh do bhrissed le Mac n-Diarmada, ocus Domnall mac Taidhg Óig ocus seiser dá mhuintir do mharbad innte.

Mac Eochaid ocus O Fallamhuin do crechadh le Tomaltach mac Taidhg Mic Diarmada ocus le Brían Mac Diarmada.

Mac Dabith .i. Uilliam mac Tomais dhec, ocus Teaboid mac Uilleag do rigad na inadh, ocus a eg sa bliaghain cedna sin.

Tomás Óg mac Tomais mic Daibith mic Emaind do rigad 'na ionad sin; ocus fa h-athbail na h-echtta sin.

Kll. Enair for Domnach; tri bliadna ocus tri fichit, cuig ced ocus mile ais an Tigerna.

Slicht Felim Chleirigh, ocus slicht Donnchada Dhuibh mic Conchobair, do dhul ar na puiplínibh, ocus ar n-urnaide doibh ann slicht Cathail Ruaid I Conchobair ocus muinter Fhlannagáin do theacht futha, ocus brissedh orra sios go Cill mic Coimsi. Dias mac Cairbri mic Bríain ruaid do mharbadh ann .i. Felim ocus Aodh, ocus Diarmaid mac Cairbri Chiottaigh, ocus Brian mac Donnchada Dhuibh mic Conchobair, d'fágbáil ann maille riú.

Crech mhór do dhenum do clainn Oilbérus a Burc a n-Airtech, dú na raibe x. ced bó, ocus ro mhillset muintir Briain Mic Diarmada go h-iomarcach don ruathair.

Mác I Chonchubhair Duind .i. Conn mac Diarmada mic Corbri do marbad le Brian O Ceallaigh, a Cluain Etir Dá Ath.

Kll. Enair for Luan; ceitri blíadna ocus tri fichit, u. ced ocus mile aois an Tigerna.

Cogad d'erghe etir O Conchobair Ruad ocus Mac Diarmada .i. Ruaidri.

Ros Chomáin do ghabháil do chlainn Taidhg Óig mic Thaidhg mic Thoirrdealbaigh I Conchobair ar O Conchobhair n-Donn, ocus tucadar an baile iar ná ghabáil d'O Conchobair Ruad .i. Tadhg Óg mac Taidhg Bhuidhe, ocus ro milled mórán ar fedh Connacht uile iomón n-gabhail sin. Brian mac Ruaidri Mic Diarmada, ocus clann Tomaltaigh Mic Diarmada, do dhul a g-cealgaibh a tímcell Rossa Comáin daoine iomdha. Conchobar mac h-I Chonchobair Ruaid d'eirghe amach as an g-cuirt an lá sin, ocus na cealga sin d'eirghe dhó fein ocus dá mhuinntir ar gach leith, ocus a cur docum na mainisdrech, ocus a n-eich do buain re h-ucht an doruis díbh, ocus iad féin do dhul don chlogáss. Acht chena nír bho díon dóibh an t-ionadh sin; ro lensad cách iad, ocus tainic Dia fo chend a saogal, oir gér dhaingen an t-ionad for a rabhadar do benadh a g-cinn uile díbh. Ro marbad Conchobar mac Toirrdhelbaigh Ruaid h-I Conchobair annsin, ocus aon duine dhec da mhuintir maille ris; ocus ro benad deich n-eich díbh. Satharn domhnaigh Padraic do rinnedh na h-échta sin. Téid Brian mac Mic Diarmada an Luan ina dhiaidh sin ar Mac n-Donnchada an Choruinn, go Bun an Fhedáin, ocus ro loisced an baile go dorus lais; ocus tuc dá ced bó ass, ocus do rinne marbta ann.

O Neill .i. Sean mac Cuind do teacht sluagh di-airmhe go Fine Ghall, ocus Goill do cruindachad na agaid, ocus ruaig do thabhairt d'O Neill ar na Galloib don taoibh atuaith d'Ard Mhacha Brege, ocus Ainndriu Buidhe Diud, ocus Brunach Chille Padraig, ocus se tigernaoi deg maraon riu do maithuibh Gall do tuitim and.

Hoiberd mac Fergusa mic Emuind, tigearna clainni Conchobair, dh'ec; ocus annsa challaind so fum ata bas Hoiberd mic Fergusa.

Kll. Enair for mhairt; cuig bliadna ocus tri fichit, cuig cet ocus mile aois an Tigerna.

Maidhm Ghlenna Seisg le h-O Neill .i. Sean mac Cuinn h-I Neill, ar chlainn Mic Dhomnaill na h-Alban, inar thuitsed dias mac Mic Domnaill .i. Sémus ocus Alusdrann Uaibhrech, et alii multi.

O Conchobair Donn ocus Brían mac Ruaidri Mic Diarmada do dol go Moigh Fhinn a tír Mhaine, ocus fiche ced bo do thabairt dóibh ó Ard na g-Clog ocus ó Tochur Choille an Chairn; ocus ro loisgset an tir go h-uilidi; ocus ro benadh fer brattaighe Bríain Mic Diarmada díbh .i. Conn mac Bríain Choeich.

Crech mhór le clainn Tomaltaigh Mic Diarmada ó Ua Conchobair Ruadh, do Sliabh Badhna. Ro bhói nert clainni Taidhg Mic Diarmada ar fedh urmhóir Chonnacht .i. o Bhaile Atha an Rígh co ró Drobhaois, d'iomad a n-ech ocus a n-éidigh, a n-doine ocus a n-indile, ocus do treissi a g-carad in gach ionad.

Dun Gar do thionnscna le Brían mac Ruaidri Mic Diarmada do toil Mic Diarmada Gall ocus a chinedh go h-uilidi.

An Diudach .i. Ricard Diúid dh'ec, ocus ba mór an sgél sin.

O Raghallaigh .i. Maol Mórdha mac Seain mic Cathail, an t-oen duine is ferr tanic dá chinedh fein riam, ocus is ainminic tánic do slicht Gaoidel Ghláis nech ba ferr ináss do reir aithni ocus eóluis cháigh air, .i. fer dár thoirbhir Día na subháilche co h-iomlán ar tús .i. buaidh n-dealbha ocus n-dénmusa, búaid n-innscni ocus n-urlabra, buaid n-aithni ocus n-eolusa, búaid ceille ocus comairle, búaid n-oinigh ocus n-engnuma; ocus nirb ingnad rath do bheith a coimlenmain fhir na m-buadh-sin, gur toghad do druim na n-adhbar sin na airdrí ar Ibh Raghallaigh é, gur iomruis bás fair ocus é a láimh ag Galloibh.

Kll. Enáir for Cedaoin; se bliadna ocus tri fichet, ocus .u. ced ocus mile, ais an Tigerna.

Tomaltach mac Taidhg mic Ruaidri Óig mic Ruaidri Chaoich Mic Diarmada do dul a g-Clainn Connmaid, ocus a mac maróen ris .i. Maol Ruanaid; ocus ar n-dol don tír dhóibh ro thaithmhighset ó roile .i. ro an Tomaltach a n-Dún Iomdhan, ocus teid Maol Ruanaid .i. a mac go Cill Begnad allastech do Geimhis, ocus uathad dhá dhegh muinnter maille ris. Ar d-tornad do Mhaol Ruanaidh ocus dá mhuinnter ar an b-fion fuaradar isin m-baile, gursat mescdha medhorchaoin íad, ni ro airighset aon ní gurro tuirlingset a n-escairde ar na d-oirrsibh acu .i. Brían mac Maoil Sechlainn h-I Cheallaigh, cona fianlach áigh ocus iorgaile na fhochair. Ro éirigh Maol Ruanaidh co na uathad degh daoinedh, ocus ro briss for a bhídhbadaibh, ocus ro imthigh ar eigin orra do nert a laime, no gur d'eglaigh a mhuinntir ris o iomad an b-fhorluinn ocus o merughad na meisce; gur ro marbad Maol Ruanaid ann, i. fer a aossa do b'árrachta a n-uaisle ocus a n-oinech ocus a n-oirrdercus, ocus is mo do chuir ar ollamhnaib ocus ar aois ealadhna na aimsir; ocus do marbadh ann maille ris Diarmaid Riabach mac Cathail mic Aodha, ocus Emonn an Mhachaire mac Maoil Sechlainn Duinn mic Donnchada Dhuibh, .i. fer a aossa is mó do derluic do dháimh ocus do dheóraighibh na aimsir féin do mac fir lenmhuna, ocus Eogan mac an Bhaird .i. maor Mic Diarmada; ocus ro benadh eich ocus édalacha iomdha díbh ann.

Tomaltach mac Taidhg Mic Diarmada féin d'faghail báis athghairid an seisedh lá dhéc a h-aithle bháis a mic; ocus aderaid aroile gurab do chuma a mic ocus a muinteri torchair; dé Domnaigh ocus lá féli san Seain ar aon lá, is ann torchradar na truim échta sin.

Fer Gan Ainm mac Bríain Mic Diarmada Ruaidh d'faghail bháis an bhliadain si .i. sói dhuine in gach uile mhaith.

Crech mhór le Mac Diarmada .i. Ruaidri, ocus le na mac .i. Brían, ó Brían mac Maoil Sechlainn h-I Cheallaigh; ocus ro fágbhadar marcach maith día muinntir isin Cuirrech m-Buidhi d'urchur do ghunna .i. Felim mac Bríain Choeich; ocus ro h-adhluiced Domnach na Trinóidi é a mainisdir na Trinóide fein.

Brian mac Mhaoil Sechlainn h-I Cheallaigh .i. rogha dhuine uasail a g-cennus fedhna ocus a crechairecht, ocus fer íslighthi a escarad, dh'éc in hoc anno.

Crech mhór le Brian mac Mic Diarmada ó Ath Líag an bhliadain si.

Clann Dubhgoill meic Donnchaidh Chaim, ocus clann Giolla Esbuig mic Dubhgoill mic Aillin, do marbhadh le Iarla Cloinde Riocaird; .i. le Ricard Sagsanach tugadh in maidhm sin, ocus do tuit and ocht g-ced Albanach; ocus air Risdert inn Iaraind do tugadh an maidhm sin a Cluain Í ag Traigh Bhain na n-Eanighedh; ocus fa h-adhbhal díth Albanach andsin.

Kll. Enair for Aoine; bisex fuirre; seacht m-bliadna ocus tri fichet, cuig ced ocus mile, ais in Tigerna.

Maidhm Feirste Móire ós loch na Súilidhe ar O Néill .i. ar Shean mac Cuinn h-I Neill, le h-Ua n-Domnaill .i. Aodh mac Maghnais mic Aodha h-I Dhomnaill; acus ní h-eidir a riom iná innisin ar fágbad ocus ar báithed ann.

O Néill .i. an Sean cedna sin mac Cuinn .i. tigerna an Chóiged Ulltaigh, ocus adhbar rí Erenn gan fhressabra, ocus an fer as mó ro tidhluic ocus ro thoirbhir a n-Erinn, do mharbad a bh-fhioll d'Albanachaibh, iar ná dhul uathad daoinedh ar a n-ionchaib fein ina b-fhoslongpuirt chuca.

Mac Diarmada .i. Ruaidri mac Taidhg Mic Diarmada do ghabháil do muintir Fhlannagáin, ocus aderaid aroile gurab ar sith do rinnedh an gniom-sin. Muinter Fhlannagáin día shechadadh d'O Conchobair Ruadh, ocus O Conchobair da sechadadh do Murchad mac Taidhg mic Domhnaill h-I Fergail, go clainn Amhlaoibh, dia choimed. Nír fuilnged na gnioma sin le mac Mic Diarmada .i. le Brían mac Ruaidri Mic Diarmada; .i. ro ghabh for buaidhredh ocus for bithmhescad a bhidhbhaidib, ocus ag foghuil go fír arrachta for a escairdibh, andiaidh a athar, gurrus crech ocus gurrus loisc Muinter Fhlannagáin go h-iomlán, ocus na Cluainti co h-uilidhi; oir ni ro fhágaib gort gan gerradh iná tech gan loscad ar sliabh Bádhna iná ar gach taobh dhe.

Ar milledh ocus ar mórarguin na g-crioc ocus na g-cinnedac sin do mac Mic Diarmada, ro thairring mac h-I Ruairc .i. Brían mac Bríain mic Eogain h-I Ruairc lais ar Chlainn Amhlaoidh. Ro loisced ocus ro crechad an tír uile léo, ocus ro marbad Cathal mac Taidhg mic Domhnaill h-I Fergail leis, ocus mac mic I Fergail Bhuidhe, ocus morán eli maille rú. Ro fhillset iar m-buaidh coscair.

A g-cionn athghoirid na dhiaidh sin tanic O Raighilligh .i. Aodh mac Maolmhórdha I Raighilligh, ar ionnsoiged ar O m-Birn co h-Ua m-Briúin na Sionna. Ro chrech ocus ro loisc an tír, ocus ro mharbhsat cuid dá daoinedh.

Rug Brían mac I Ruairc ocus Brían mac Mic Diarmada a toraighecht air, ocus ro lensat co Móin lesc é. Do benadh a chrecha d'O Raighilligh annsin, ocus do benad ced ech maille rú, ocus cuid mhór dá n-daoinedh.

Mac Diarmada d'fuaslucad dia mac fein .i. Brían, d'eis ar milled na thimcheall isin m-bliadain cedna, oir tuc sé tri ced bó ass, ocus síth sídhruidhthi, ocus do budh d'airnéis na g-Cluainti fein leth an fuasluicthi sin.

Feall do dhenamh do Maighistir Framsa, ocus do Macomais ocus do Saxsanachaib, air Muircertach O Mordha ocus air a muinntir; ocus ase inadh a ndernadh in feall sin a raith mor mhullaidh Maisden; ocus do marbhadh andsin Muircertach, ocus ceithre dhuine dhec ocus tri fithid; ocus ni dernadh a n-Erinn riam gnim budh grane na sin.

Maghnus mac Cormaic mic Domnaill Mhaoil I Laimin, .i. feadhmanntach Ruaidri Mic Diarmada, do marbad le sliocht Eogain Mic Diarmada, ocus le sliocht Cormaic Mic Diarmada, a feall ar an Moloig.

Cormac mac Taidhg Mic Diarmada .i. mac Táidhg mic Ruaidri, do marbad do Cathal mac Maoil Ruanaidh Mic Diarmada.

Droichett Atha Luain for Sinuinn do dhenum isin m-bliadain sin leisin m-bainrigan Shaxanach, ocus sir Handrai Sidneigh na ghiuisdis a n-Erinn, ocus Eilísdabed ainm na banrigana sin.

O Conchubhair Sligigh do dul go Saxsanaibh .i. Domhnall.

Kll. Enair for Dardain; ocht m-bliadna ocus tri fichit, cuig ced ocus mile, ais an Tigerna.

Bliadain fhuar ainfinech esbadach an bhliadain si, ocus as beg an t-ingnad sin, oir is innti adbath Mac Diarmada .i. Ruaidhri mac Taidhg mic Ruaidri Óig .i. rí Mhoighe Luirg ocus Airtigh ocus tire Tuathail, ocus airdtigerna ar crich chlainni Mhaol Ruanaidh go h-uilidhi, ocus araill do criochaib ocus do caom thuathaib Connacht, a g-cill ocus a tuaith; rí ro chaith ocus ro chossuin Cruachan co na caomoireraibh, ocus cúiged Connacht airchena; ri nach b-fhuair aon rí dá d-tanic da aicme roime riam, go Maol Ruanaidh Mór, oired inmhe ocus ard fhlaithis ris a tuaith ocus a n-egluis; conadh dia mholadh a h-aithli a bháis ro raidh an fili na focail se, d'fhoillsiughad a einigh ocus a aithne ocus a eslabra fair, conebirt, Geg iothmar fhínemhna na n-éigius ocus na n-ollaman, Craobh cumra chnuaiss na g-cliar ocus na g-cerrbach, Dóss diona na n-dámh ocus na n-deoraidh, Bile buadha buan fhoscaidh na m-brughaid ocus na m-biattach. Indeoin forais an engnuma ocus an einigh; féige forórdha na féle, an flaith fial foirglidi fireolach; colamhan cosanta cirt ocus córa Clainni Mhaol Ruanaidh do reir a sochair ocus a senleabar. Cormac ua Cuinn cet cathaigh d'fhios ocus d'eolus ocus d'ealadhnachaibh; Cuchulainn criche Connacht re cosnum ocus re cathbhuadha ar bhídhbadaibh, ocus ar bhith dhanaraibh; Guaire duassach degh oinigh t-slechta Muireghaigh Mhuillethain; Laoch Liathmhuine Leithe Cuinn ar fhéile, ar fhirinne, ar oinech; fer do coiméid a chlú ocus a ainm, ocus a áiremh, a dheirc ocus a dhaonnacht ocus a dheghaithne, o aois n-aoidhentacht go h-ionmhaidh a éga, ocus a nam an égai feissin, gan aoir gan imdergad, gan égnach gan escuine, gan oirbire gan athiomrádh, ro chaith a ríghe ocus a ro flaithes, a shaidhbhres ocus a shior inmhe, do réir mhenman a mhór croidhe bhudhéin. Acht chena, ger bhádhbhal re fhaisnóis ocus ger lionmar re lánfoillsiugad, ocus gidh nár bhéidir a ríom re na ro eolchaib treissi a thigernais ar na criochaib ocus ar na caomthuathaib ar fedh urmhóir Chonnacht a cill ocus a tuaith, ni ro fhágaibh luach én bhuinn doighrecht, acht amháin ro thuill bennachtain ocus buidechus érlomh ocus egoilsech, fhiledh ocus ollaman, bhocht ocus bhaintreabhtach, dheoraidh ocus dhíllechtadh, anbhfann ocus oilithrech, aossa martra ocus mórghalair, aoidhed ocus ionnorptach, dhó féin ocus dá iarsma ocus dá oighredhaib. Fuair fós tabartus ocus tidhlucadh tromadhbail on Trinóid thoghaide tre persanaigh .i. galar gan accais gan anbfhorlonn, gan ghuaiss gan gráin, a chiall ocus a chuimne, a ressún ocus a ro-thuicsi féin ar a chommus, go b-fhuair aithrighe iodhan ocus aithrechus adhbail ina chionaid, iar g-caithemh ochtmhodha bliadhan achtmad suaill, ocus trí fichid bliadan dibh-sin na ab ar oilén na Trinóide for Loch Cé ocus for Loch Uachtair, ocus bliadhuin is lugha nó fiche na airdtigerna ar criochaib Clainni Mhaol Ruanaidh go h-uilidhi, ocus leth gach aon bhliadna dhibhsin a b-fhoslongport ar machaire Chonnacht, d'aimhdheoin moráin do Ghalloib ocus do Ghaoidhealaib Erenn ocus gach comarsan áirchena; nó gomad dá bhliadain ocus dá fhichet ro chaith Mac Diarmada ar an ordugad-sin; ocus issé ionad ina m-bidh a fhoslongport ar an b-fhedhsin go gnathach .i. um sgeithín na g-cend ocus um fhuarán n-Gar, ocus um iomaire Moighe h-Oi, ocus ar gach taobh dhíbh. Acht chena ro diormuis an teidhm tar nach d-tíaghar, ocus ar nach eidir iomgabáil fair, co b-fhuair bass comna iar n-aiffrenn ocus iar b-proigept, Dardaoin mandáil ar cairrig Mic Diarmada, ocus gurrus ádhlucadh a corp go h-uasal onorach a n-adhbha na naom ocus a n-iomdha na n-érlum .i. for oilén na Trinóide, amail ro ordaig fein a chur a n-adhlucad na n-ab roime, do admháil ocus do fhoillsiugad a egna ocus a eoluis, ocus do dhiultagad don diomus, ocus do mhédugad onóra na h-egluisi na dhiaidh. Ro asgnám a anum íarsin ar an g-caisc g-coitchinn gan chrich gan fhoirchend in sécula seculorum amen; conidh dó ro ráidh an t-uchdar an rann, Ocht m-bliadna sescu derbh dham, Cuig ced is míle bliadan, O ghein Crist, oiris fada, Báss Ruaidhrí Mic Diarmada. Acht chéna, do righnedh cruit gan chéis ocus ceall gan abad, ocus tír gan tigerna, do thír Mic Diarmada ahaithle bháis Ruaidhrí Mic Diarmada, óir tangadar uilc iomdha iar na ég .i. díth ocus dilghend Chlainni Mhaol Ruanaidh fo na nert conuige sin. Ro maoladh a menma ocus a meisnech; ro bochtaighed a brughada ocus a biattaigh ocus a baintreabhthaigh; ro h-ionnarbad a h-érloim ocus a h-ollamain ocus a h-oirchinnigh; ro mughaigedh ocus ro marbad morán dá macaibh righ ocus deghdhaoinibh.

Ro fháss cogad coitchenn etir Ghalloibh ocus Ghaoidhealaibh, Albanchaib ocus Saxanaibh, Siol Conchobair ocus clainn Maol Ruanaigh, taoissigh ocus túatha, tar éis an ard fhlatha. Ro fássoiged Magh Luirg ocus Magh Aoi ocus Airtech, ocus túatha Connacht co h-uilidhe o Loch Aillinne go Camshruthán. Ro fháss, imorro, fuacht ocus firgorta, goid ocus eigion, slad ocus sárugad, indliged ocus édualang, sechnoin na g-crioch ocus na g-cennadach. Ro h-ionnarbad ocus ro h-eisréidhed íad uile etir shaor ocus daor a g-críochaib ciana comaightecha .i. a Tír Amhalgaidh ocus a Tir Fiacrach, a n-iochtar Connacht ocus a Mainechaib, a clainn Connmaidh ocus a clainn Ricaird. Araill eli .i. Toirrdhealbach mac Eogain Mic Diarmada do riogad ina ionad, do thoil chille ocus tuaithi, eglaisi ocus ollaman.

Cundaois Chlainni Ricaird .i. Mairghrég, ingen Donnchada mic Conchobair h-I Briain .i. an ben is ferr do bhói a n-Erinn ina h-aimsir féin, dh'éc an bhliadain sin.

O Conchubhair Sligigh .i. Domnall do theacht a Saxsanaib, ocus paitent do thabhairt leis ar a duthaid o in banrigan.

Kll. Enair. Noi m-bliadna ocus tri fichit, cuig ced ocus mile, aois an Tigerna.

Crecha aidhbhle oirrderca do dhenum d'O Ruairc .i. Maghnus mac Briain mic Eogain h-I Ruairc, ocus do Mhág Uidhir .i. Cu Connacht Og mac Con Connacht, ar Mac Diarmada .i. Toirrdhealbach Mac Diarmada, cuig mile bó cona n-diol capall ocus da gach edáil eli, ionnus gur milled ocus gur mórbhuaidhred Connacht ocus Magh Luirg go h-uilidhe don creich sin, ler marbadh dá n-oiremhnaibh ocus da n-ardtreabhthachaibh, ocus dá lucht foghanta. Crecha móra eli do dhenum do Mac Diarmada ar O Rúairc mar an cedna. Morán uilc do dhenum an bhliadain sin a n-Erinn, ocus a Connachta go h-áirigthi.

Ross Chomain do tabairt d'O Chonchubhair dond don ghiusdis, ocus ase Diarmaid mac Cairbre meic Eogain chaoich in t-O Conchubhair, ocus sir Hanrigh Sinie ainm in giusdis.

Kll. Enáir; deich m-bliadna ocus tri fichit, ocus coig ced ocus mile, aois an Tigerna.

Cogadh mor d'eirghe etir chlainn Mic Diarmada .i. clann Ruaidri mic Taidhg Mic Diarmada, ocus Mac Diarmada .i. Toirrdhelbach mac Eogain Mic Diarmada cona bhraithrechaib, gur fassaighed na tírthi ocus na treabha, na h-íatha ocus na h-aicmedha na comhgar. Ro fhósdodar clann Eogain Mic Diarmada tri ced Albanach a n-aghaidh chlainni Ruaidri Mic Diarmada; ocus do cuiredh clann Ruaidri asan tír go Cloinn Connmaidh, ocus go Mainechaibh. Ro milled morán a Muigh Luirg leis na h-Albanachuibh sin a cill ocus a tuaith; ocus an la deighenach tar éis a n-aimsire do tabhairt dona h-Albanachuibh sin, tánic Brían mac Ruaidri mic Diarmada cona braithribh .i. clann Tomaltaigh mic Taidg mic Diarmada, as cloinn Connmaidh d'féchain an tíre, ocus ro leigsed sgeimealta uatha fo na n-esgcairdibh ar g-clos Albanach d'imtheacht; ocus ro marbad leo Díarmaid Riabach mac Eogain mic Taidhg Mic Diarmada don reim sin; ocus ro budh mor an sgél an t-e do ror-chuir and .i. an mac righ dob ferr d'urmhor dia coirpfhine feisin, d'oinech ocus d'oirbert ocus d'oirrdercus. Do righnedar na h-Albanaigh sin ro bhaoi ar fasdódh ag clainn Eogain Mic Diarmada crecha móra a Moigh Luirg isin ló cédna .i. an tres lá do t-shamradh.

In préisidens .i. Edbhard Fetón do thoighecht a Connachtaibh an samradh sin, ocus armáil na bainrighna leis, maille re h-érghe amach Connacht an mhéid fa h-umhal dó dhibh .i. iarla Clainni Ricaird ocus slicht Uilleg an fiona uile, ocus Siol g-Ceallaigh ocus clann Domhnaill an t-Sleibhe Ruaidh, ocus caiptín Coiléir ocus Paidricín Ciomsóg, ocus eirghe amach na Gaillmhe, ocus morán ele nach roich linn d'áiremh; ocus tiaghaid sin uile do ghabháil chaisléin Sruthra. Mac Uilliam a Búrc cona braithribh ocus cona chomhfogus, ocus clann Oilbhérus a Búrc, do cruinniughad slúaigh mhoir d-Albanachuibh,This word concludes fol. 27b in the Clar. fragment, where a deficiency occurs. The next entry in it belongs to 1577.

The events of this year are contained in the MS H.1.19, fol. 98b, the date '1561' appearing over the entries; but this date has been properly corrected to 1571. Kll. Enair. En bliadain dhec ocus tri fichet, u.ced ocus mile, ais an Tigerna.

Preisidens choigid Connacht a m-baile Atha Luain an tan-sa. O Conchobair Donn .i. Diarmaid mac Cairbri mic Eogain choeich h-I Conchobair do dul na chenn, ocus a ghabhail leisin preisidens ar a iocht fein. A mac féin .i. Aodh O Conchobair, ocus Aodh mac h-I Chonchobair Ruaidh, ocus aroile do dhaoinibh toghtha, do dhul go baile Atha Luain lucht arrtraigh. O Conchobair d'f a thigh ósda allamuigh don chuirt dóibh. Tucsat O Conchobair ar athaid ó Ghalloibh leo. Ar teacht h-I Conchobair ó Ghalloib amlaidh sin ro fhasdó ocht ced Albanach, ocus ro cengail se fein ocus clann Eogain mic Diarmada re cheli. Tiaghaid ar siobal slúaiged a n-Uachtar Connacht. Loiscid an popul coech ocus Crúthon, ocus cethroma, ocus tucadar crecha móra leo, ocus tangadar slan.

An preisidens do teacht ar machaíre Connacht sluag mor. Baile an Topair ocus an Caislen Riabach do ghabháil leis, ocus ro bris an Caislén Riabach, ocus ro fhill ar aiss íarsin. O Conchobair Donn ocus a Albanaig do bheth a Madh Luirg na g-coinne ag togbáil bertenn with overstroke fhor gach leith, ocus ar Mag Luirg co h-airighthi, oir do bhói ced Mic Diarmada aca chuice. Ní raibhe Brian mac Ruaidri, ina a bhraithrech, ocus O Conchobair d'én sgél mun am sin, ocus ní raibhe a fhis ag Brian, O Conchobair do bheith a n-anbrath do no gur derbh fein a anbrath .i. gurro ghabh Diarmaid mac Ruaidri mic Diarmada, ocus Tomaltach Og mac Tomaltaigh mic Diarmada, íar thaobadh mhuinteri h-I Conchobair dhóibh, ocus gur benad a n-eich ocus a n-eidighe dibh. Ro elodh Tomaltach Og a g-cionn athaid iarsin; ro benadh fuaslucad ass Diarmaid. A groidh ocus cuid da chaoraighecht do bhuain do Brían mac Diarmada dona h-Albanchaib sin h-I Conchobair ina dhiaidh. Ro bhói Brían fein ina luidhi a tinnes ar an b-fhedh sin uile. Iar n-eirghe ass a luidhe dhó ro bhen ba ocus eich d'O Conchobair. Ro marbad fós le Brían don chogad sin mac Conchobair mic Cathaoir h-I Conchobair, ocus cethror da muintir maille ris. Foslongport do dhenum do Brian mac Diarmada, ocus do clainn Tomaltaigh mic Diarmada, um ráth Bhrénuinn, ocus ó sin co Camsruthan. Crecha móra do dhenum ar ab na Buille doib, ocus crech eli ar Mac Donnchada an Choruinn. Inis Floinn umorro, ocus Inis mic Dábhíth, do loscad leo isin bliadain cedna.

An pressidens do teacht co Ross Chomáin, ocus a bheith seacht seachtmhuine na comnaide innte. A fhilled tar ais doridhis, ocus ro fagaib braighde. An preisidéns do theacht a Connachtaib doridhis armáil mhór do mhuintir na bainrighna, ocus dul doib a g-clainn Ricaird. Iarla Clainni Ricaird ocus an sluag Gall sin do dhul a g-Cúilecha, ocus a dho no tri do bhailtib caislen do ghabhail doibh. O Domnaill, .i. Aodh mac Maghnuis h-I Domnaill, do theacht a n-iochtar Connacht, ocus clann Eogain mic Diarmada do dhul na chuinne co Baile Essa Dara, ocus cengal re roile dhóibh a n-aghaid a n-escarad dibhlionaibh. O Domnaill do fhilliud a n-Ullthoib doridhis. Cuid mor dia muinntir do teacht le clainn Eogain, maille re na n-daoinib féin, ocus ro innsoighset foslongport Bríain mic Diarmada a g-clainn Faghartaigh, ocus ro bhenadar fiche ced go b-fhuilliud do bhuaibh, cona n-diol do chaiplib de, ocus tangodar slán. An preisidens do bheth a g-Cuilech mun am sin. Teachta do dol na chend ó Brían do chossáoid na n-gniom sin ris. Nir faillighed na sgela sin lasin preisidens cona Ghalloib, oir ni dernat oirisiom ina comnaidhe no go tanic a g-Clainn Chonnmaidh. Teid Brían mac Diarmada ocus clann Tomaltaigh mic Diarmada na choinne a Clainn Chonnmaidh, ocus do leig se Brian roime ar ais a Maid Luirg, do brath Mic Diarmada ocus Albanach, ocus do roighne fein comhnaide na dheoidh a g-Clainn Connmaidh an aghaid sin; ocus ro ghabhsat ionad coinne re roile ar na mhárach a Ráth na g-cléirech. Do freagradar an t-ionad coinne sin leth ar leth, ocus ro bhói Mac Diarmada ocus a chlann, ocus Tadhg mac Cathail mic Diarmada a g-Cluain na ceaa n-Uachtar tíre. Acht chena nir faillighed le Brían cona braithribh an tairring sin, oir ro treoraighset an slúag d'aon uighe o fe Machaire Connacht co Bealach na nurmhointe os cionn Droichit mic Muanaigh. Do rónsat began scísad ocus comnaidhe annsin. Teid Brían ocus Sean mac Tomais mic Ricaird , ro bhói na shirriam mun am sin, ocus fedhan dona Gaoidhelaib maille rú, rías na Galloibh ar innsoiged na Buille.This is the last legible word in fol. 98 b; but it is plain that the entries for the year 1571 did not end here. The next page of the MS H. 1, 19 (which is the last page but one of the MS) begins, also imperfectly, with entries of events belonging to the year 1577; of which it contains several that are not to be found in the Clar. fragment. [...]

Mac h-I Ghadra, .i. Cian mac Diarmada mic Eogain h-I Ghadra, dh'ec.

O Conchobair Donn ocus O Conchobair Ruadh, ocus slicht Toirrdhelbaigh Laighnigh meg Dhomhnaill, do dhul ar ionnsoiged ar Mac Donnchadha an Choruinn, ocus crecha mora do dhenam dhóibh. Cathal Og mac h-I Conchobair Sligidh ocus Albanaigh dia lenmain a g-Coirrsliabh ocus tre Mag Luirg, ocus assin co Tuillsci, ocus gan breth orra no co rangodar Clochan na Rigraidhi. Began greamma do beith do marcsluagh na tóra orra annsin. Filled orra do bhun na fedhna, ocus Ruaidri Glass, mac Briain Choeich mic Ruaidri Ghlais do thuitim den buille ga le Brian mac h-I Fhlannagain, ocus a rochtain fein slan cona crechaibh.

O Conchobair Sligigh ocus Brian mac Diarmada do dhul a g-cend caiptín Mailbie .i. tigerna Chonnacht ó Ghalloib, ar na fhagail dóibh a Ros Comain, ocus fa forbhaoilidh an caiptín rompu dibhlionaibh; ocus ro iarradar sluaig fair do buain Buna Drobhoeis d'O Dhomhnaill. Ro fagbhadar an sluag benta na n-diaidh. Teid O Conchobair dia bhaile fein, ocus ro fhaguibh Brian re h-aghaid an t-sluaig do thairring chuige. Iar tinól a shluaig imorra don caiptin, ro ghluais roimhe an ced lá no co ráinic Cuil Cessra an ucht Bhuille, ocus teid ar na mharach tar Coirrsliab budhthuaidh no go ranic Baile an mhúta. Tanic O Conchobair Sligigh ocus mac Uilliam Burc chuca annsin, ocus maithi Connacht uile acht O Ruairc amháin, ocus a coimchinél. Tiaghaidh rompu go Bun Drobhoeis ass a h-aithle. Ro gabadh an baile gan fhuirech leo. Ro marbad mac Cathail Chleirigh d'én urchur ga do mac I Domnaill .i. Aodh Og mac Aodha Dhuibh I Dhomnaill. Ro loitted ocus ro marbad ochtar do Sacsanchaib imon m-baile sin, ocus ro fagaibh an caiptin an baile ag O Conchobair don dul sin.

Clann Duiphshith na h-Alban .i. Domnall Óg ocus Ferdorcha, cona m-braithribh, ocus cona coimchinel Albanach ocus Erennach, do dhul ar O Conchobair n-donn ar siobal innsoiged, ocus crech do buain de doibh. O Conchobair fein, ocus sirriam Rossa Comáin, do bhreth orra began daoinedh. Filled orra d-Albanchaib, ocus do maithibh Chlainni Suibhne do mharbad ann .i. Aodh mac Mhaol Muire, ocus Maol Muire mac Toirrdhelbaigh choich, mac Ruaidri dhuibh mic Maol Muiri Mic Shuibhni.

Sloigeadh le h-Ua n-Domnaill .i. Aodh mac Maghnusa a n-iochtar Connacht. Crecha mora do ghenum dho a t-tir Oillella, ocus milled mor tighed ocus arbhonna do denum d'O Domnaill don t-sloiged sin a tír Oilella, ocus a Luighni ocus a g-Cairbri.

Sirriam chundae Sligigh, .i. Risderd mac Teaboid Buidhe meg Seoinin, do mharbad a Sligech le h-Ua n-Domnaill ag filled don t-sloigedh sin, ocus a imteacht fein slán.

Peitidech an Mhuilinn Chirr .i. Geroid dh'ec.

Foslongport do dhenumh d'O Dhomhnaill fo bhun Drobhoeis. O Conchobair Sligigh do thairring chaiptin chuigid Connacht go sluag mór Gall ocus Gaoidel maille ris, mar ataid Siol Conchobair ocus Clann Maol Ruanaidh ocus Sil g-Ceallaigh. Ticidsin uile co Mainisdir na Buille a n-ucht Coirrshleibh. Tiaghaidh tar sliabh síos ar na bharach, ocus ro gabad Cuil Deghaid leo. Assin co Baile an Tochair dóibh, ocus ro ghabhsat e mar an cedna. Assin co Bun Drobhaois doibh, ocus ro ansat ceitri lo con oidhche ag cur chosduis ann iar n-athchur I Dhomhnaill. Ro fhillset co Sligech iarsin, ocus do reidhighset re h-Ua Ruairc. Ro crechsad cuid do Chloinn Diarmada Ruaid na g-Coillte, ag filled tar a n-ais doibh. Ticid a Mag Luirg ass a h-aithle. Baile na h-Uama do tabairt ar iassacht don chaiptin do Brian mac Diarmada. An caiptin da fhagbail ag Eoin Odhar mhaig Néill re h-aghaid chogaid Albanach.

Uaithne mac Aodha I Dhiomusaigh do marbad le cuid do Shil Mordha a b-fioll.

Caiptin Harant ocus mac maigistir Framhsa do ghabhail do Rugraidhi Og O Mordha. Ionnsoiged fhoslongpuirt do thabairt do Sagsanchaib ar Rugraidh Og, ocus breith ar Chormac mac h-I Conchobair Fhailgigh isin foslongport sin. Diass chlainni Rugroidhe Oig, ocus a bhen .i. ingen Aodha mic Seain mic Remuinn, ocus Cormac O Conchobair, do marbadh isin bh-fhoslongport le Sacsanchaib, ocus caiptin Harant do bhreith leo dhoibh ocus e lethmarb.

Ferdorcha mac Dhuibhsith .i. rogha a chinidh fein d'uaisle ocus d'urradus, do marbad le h-Eoin Odhar mhaig Neill, ocus crech mhor do thabairt leis do.

Baile an Muta do ghabhail do Sacsanchaib a bh-fhioll, ocus Mac Donnchada do ghabail leo ann .i. Aodh mac Cairbri mic Taidhg, tigerna an bhaile fein, ocus Cormac mac Taidhg an triubhais .i. Mac Donnchada Tire h-Oilella.

Sean Salach mac Aodha mic Seain mic Remuinn do marbhadh le Galloibh.This is the last word legible in the MS H.1.19, the page which follows (the final one) being totally defaced. The remainder of the text is therefore altogether taken from the Clar. fragment, in which this entry, and the three next, are added in the handwriting of Brian Mac Dermot.

Conchobar Carrach mac I Chathain do marbhadh leis O Cathain.

Baile an Muta do ghabhail le sliocht Tomaltaig Meic Donnchada, ocus le sliocht Dubhghoill gruamgha eir Sagsanachaib.

Cend mainisdreach na Trinoide, ocus obair baghdhuin Duna gar, do bheth ar siubhal an aoinfhecht eig Brian mac Ruadhri Meic Díarmada, oir dob e in Brian sin uachtaran na mainisdrech, ocus tigerna na carrge.

Tadhg mac Murchada meic Toirrdhealbaigh I Bhríain, ocus Toirdhealbach mac meic Mathgamna, d'fhaghail bháis a n-deiredh na bliadnasa; ocus ni roibhe a n-Eirinn na n-amsir fein fleasgaidh budh mo in sgel na iad and gach uile chail.

Robert Sabhuis .i. suthsirriam chuindae Sligigh do mharbhadh, ocus seisser da mhuinntir maraon ris, le Mac Donnchada in Choraind.

Eumand mac Murchada I Fergail ocus Conchobar Og Mag Ranaill d'faghail bhais.

Kll. Enair for cheidin, ocus asi aois in Tigerna in tansa ocht m-bliadna deg ocus tri fichet, cuig ced ocus mile.

Mac I Néill do mharbhadh d'aon urchor do gha le mac I Gallchobhair .i. Enri O Neill, ocus fao mor int eacht sin mac Toirdhealbhaigh Loinigh mic Neill Chonallaigh.

Uasal shagart Oilein na Trinoide .i. Sean Buidhe O Sergoid do bhadhad ar Loch Ce la casg.

Tigerna Lubha .i. Crisdoir Pluingced do lenmhuin Meg Mathguna a toraighecht, ocus a crech roime. Mag Mathuna do thabhairt ruaga doibh, ocus tigerna Lubha, ocus mac Meg Aonghassa .i. Brian, do mharbhadh don ruaig sin, ocus cuigfer marcach maraon riu; ocus fa mor in t-echt sin do roinne in la sin.

Seathan mac Donnchada meg Uidir do chrochad le na derbhraithrib fein .i. le Brian ocus le Donnchad Óg, ar tegasg Meg Uidir .i. Cu Connacht.

Siarriam conndaoe Muighe dh-Eó do mharbhadh le Emann a Burc, mac Tomais in Machire .i. Muilirre mac Uater; ocus fa mor in sgeal sin; ocus a Caislen na h-Eille do roinde in t-echt sin.

O Conchobair Sligigh .i. Domhnall mac Taidhg meic Cathail Oig, ocus mac mic Dhíarmada .i. Brian mac Ruaidhri mic Dhíarmada, do dul go Baile Atha Cliath air in comhairle moir, ocus bheith doibh cuig sechtmaine ar in g-cuirt sin, ocus onoir mor d'faghail doibh o chomhairle na h-Erenn, ocus a teacht slan.

Liatrouim Muinntire h-Oilais do gabhail le Saxanachaib ar Brian mac Briain I Ruairc, ocus cuigfhir dheg do marbhadh innte, ocus iumad da gach uile édail do bhreth este. Mac I Ruairc .i. Brian do dhul a g-cend in giustis, ocus réudh dó re Galloib, ocus a baile d'faghail dó .i. Liatrouim.

Rudhrigh Og O Morgha do mharbhudh le Brian Og mac Giolla Phadraig ocus le Galloib, ocus ni roibhe a n-Eirinn fer millte eir Ghalluibh bhudh mo na in fer sin; ocus fa ro mhor in t-eacht he.

Bun Drobhuis do thabhairt do Uadh Domnaill don giustis, ocus da ced deg marg do buain de as uel amplius; ocus adeirmúid gurab olc do fri baile shleachta Briain Luighnigh do reic ris O n-Domnaill da leiged inn egla duinn a indi-sin.

Rightegh mor na carrge do tinnsgna do Brian mac Ruaidri Meic Díarmada, ocus do bhí sin ocus cenn mainistrech na Trinoide, ocus babhuan Duna Gar ar siubhal an aoinfhecht aige; ocus ni roibhe tigernus na taniuistecht aige an uair sin.

Uasal sagart Bhaile na Cille a cloind Chondmuigh d'faghail bhais, .i. Tadhg O Tonaire, etir da fheil Muire san obhfur.

Mac I Conchobair dhuinn .i. Tadhg Buidhe mac Conchobair I Chonchubhair, ocus a dhias mac .i. Feilim ocus in Dubhaltach, do mharbhadh le Tomas Udis a fioll eir Caisseall na h-Oilidhe, ar bru Churraidh chind eitte.

Dolbh mac Dubhthaigh I Dhuibhgennain .i. O Duibhgennain d'faghail bhais.

Mag Flannchaidh .i. Cathal Dubh d'faghail bhais.

This part of the Clar. fragment has been written by the scribe who copied the portion of MS H.1.19, containing the events of 1568, &c.Kll. Enair for dhardaoin; noi m-bliadna dhec ocus tri fichet, ocus u. ced ocus mile ais an Tigerna.

Sean O Maolmhocheirghe .i. comfhorba Droma Oirghialla .i. sói Erenn a n-oinech thighe aoidhed coitchinn d'feraibh Erenn ocus an domain, an mheid no roiched é dhíbh, dh'éc.

O Gadra .i. Diarmaid mac Eogain h-I Ghadra, ocus an Gilla Dubh mháig Philip .i. tigerna na Litri, dh'ec a n-aon mhí ocus an comarba.

Crecha moraidhbhle do ghenum a Magh Luirg ar Bhrían mac Ruaidhri Mic Diarmada do chloinn Donnchada Mhég Uidhir, .i. dia chairdibh bunaidh feisin, ocus d'Albanchaib .i. Eoin mac Aongusa mic Gille Esgaib Bháin mhég Domhnaill, ocus do chlainn Duiphshíth.

Aodh mac Seain mic Remuinn o ghlionn Malura do éc in hoc anno; ocus do budh do sgélaib mh'ora Erenn dó alleith uaisle ocus einigh. Rolond Iustais d'faghail bhais mur an cedna, ocus fa déchtuibh móra choiced Laigen an dias sin.

Eoin Odhar mhaig Neill do mharbad la clainn Eogain Mic Diarmada a Lathaigh Bhrendrumai a n-ucht Choirrsleibh, ocus móran da muinter do marbad a tois an loi cedna la Galloib Rossa Comáin ar machaire Connacht.

Sadhb ingen Tomaiss mic Ricaird Óig a Burc, .i. ben posda Taidhc mic Uilliam h-I Cheallaigh, .i. an ben dob fherr ocus dob fhoighidighe na h-aimsir fein, mortua est, ocus a h-adnacal a Cill Conaill.

Mac Muiris Duibh mic Iarla Dhesmuman do thoighecht i n-Erinn isin m-bliadain sin, ocus began Spaindech maille ris. Do ghabhsat Dun in Óir isin Mumain; ocus o ro chuala giuisdis na h-Erenn sin ro thinoil sluag mor .i. iarla Chilli Dara ocus caiptín Malbie .i. tigerna choiged Connacht mun am sin, ocus morán do Ghaoidelaibh Connacht, ocus coiged Laigen cona armáil, ocus morán do Mhuimhnechaibh. Orro chuala, imorro, clann Iarlai Dessmuman .i. Sean mac Semuis, ocus Sémus na tinól a bhrathair eli, Semus mac Muiris duibh do thoighecht co h-Erinn, ocus na Sbainnig maille ris, ro thogbhodar comfhuasma cogaid fria Galloib Muman, ocus ro marbad preisidens da choiged Muman, ocus ochtor do mhaithibh na n-Gall maille ris ina n-oirecht fein. Semus mac Muiris Duibh do theacht ar siubal a g-crich Chlainni Uilliam. Clann Uillíam na Siuire .i. iarsma an Iarla Ruaidh do breith fair. Tachar fria roile dhóibh. Mac Muiris Duibh do thuitim ann, ocus triar do Chlainn Uilliam do thuitim ris. Acht chena fa mor do anrodh mara ocus tíre fuair conuigi sin sechnóin na Spainne ocus na Fraince, ac denum indill ar a escairdibh, ocus fa mor do ghaiscid ocus do ghniom dílmhuintis do righne isna coicrichaib sin, tar cenn a críche ocus an chreidimh.

Teid in giuisdís an tinól adhbail sin adubhromar don Mhumain, ocus ni h-eidir a ríomh no áiremh gach ar milled isin Mumain don dol sin do bailtibh, ocus d'arbhonnuibh, ocus d'airneis.

In t-espuc .H. h-Elidhe .i. sói egnai ocus crabaidh in domuin uile, ocus mac h-I Ruairc .i. Connbrathor mac Briain mic Eogain h-I Ruairc, do thoighecht assan doman anoir tar eis a leighti ocus a turais. Giuisdís na h-Erenn do bhreith orra, ocus a g-crochad araon dar sarugad Dé ocus daoine; ocus ba truagh an gniom sin .i. espuc onórach ardcraibhtech, ocus bráthair mionúr d'fhuil úasuil, do bhássugad mar nár chubaid. Acht chena do roighne Día firt fiadhnach follus ar an n-giuisdís .i. ro gabh doigh a chend an la ro crochad an dias sin, ocus ní ro dhealaig an doigh sin fris co b-fhuair bass di a cinn bhegain aimseri.

Tadhg mac Cuinn Chiotaigh mic Aoda mic Eogain dh'eg.

Risdérd Ustáis ocus Risderd Brís, co n-imad sluaig maille friú, do dhul ar siubal ar clainn in Iarla ina n-daingnidhibh pfein. Clann in Iarla ocus daoine mic Muiris Duibh, a h-aithle a bháis féin, do bhreith forra. In dá Risderd sin do marbhadh, ocus dá ced eli maille friu, uel amplius. Risderd Domnall d'faghail bháis; ocus fá mór an díth do Goeidelaib Erenn na tri Risderd sin do marthain.

Treisiréir na h-Erenn .i. Edbhord Fitón, d'fhaghail bháis a m-Baile Atha Cliath an la deighionach do mi medhoin in t-samhradh, ocus ní thánic re fada do Galloib Saxan sgél bud mó ináss, alleth uaisle ocus oirrdercuis.

Mac Donnchada Thíre h-Oilella do mharbad le Maol Ruanaidh mac Cathail mic Eogain mic Donnchada, ocus an tir co h-imbresnech na deoidh etir Clainn n-Donnchada.

O Briain .i. Domhnall mac Chonchubhair I Briain d'faghail bhais, ocus fa mor in sgel sin.

Onorra ingen Donnchada mic Chonchubair I Briain d'faghail bhais.

Tomas mac in Bharuin Nuindsend d'eg.

Mairgreg ingen Briain meic Diarmada Ruaidh, an ben do bhi ag Cathal mac Eogain meic Donnchada, d'eg.

Righ Portigel do marbhadh leis an Turcach a cath, ocus da fiched mile fer maraon ris, ocus la lunasa tugadh in cath sin. Rig na Peirse do teacht ar in Turcach sluagh di-airme, andíghail a charad rig Portigel do tuit leis, ocus do cuiredh cath etorra, ocus do tuit fithe mile do muinntir in Turcaidh, ocus do thérnaigh righ na Turcach asin cath slan tar éis a muinnteri do mharbhadh.

Donn Seon Ausdrie .i. derbrathair cing Filip righ na Sbainne, in t-aon dhuine uasal is ferr tainic san Criosdaoigheacht riam, d'fhaghail bhais in cuiged lá don céd mí don fhogmar. Oighre cing Filip d'faghail bhais in dara mi.

Maoidhm an Aonaigh Bheg do thabhairt ar Shemus na tinol, ocus ar th-Sean mac Semais, le captin Malbie, dú atorchuir Eogan mac Emaind meic Sithigh, ocus moirsheisser da cheinedh d'uaisle chlainde Sithigh, ocus fiched no do maraon riu.

Kl. Enair for Aoine, ocus dob e aois in Tigherna .i. M. ocus cuicc ced ocus cethra .xx.

Mac Uilliam Burcc .i. Sedhán mac Oilberus, cend uaisli ocus oinigh ocus oirrdercais coiccidh Connacht, do éucc isin bliadain se.

In t-esbucc a Burc, .i. Rolont mac Remaind do eug, cend ecailsech Connacht.

Maidm Glenda Molura do tabairtt ar Saxanchaib, inar básaighed .ix. caiptin, ocus ced mailli risin caiptín aca, do cloinn Roloin Iústtás ocus d'Fiacha mac Aedha mic Sedhain mic Remaind.

Eoghan mac Felim Ruaidh mic Airtt mic Aodha h-I Néill, diarba comhainm 'Fuath an Airgid', d'fhaghail bais a m-Baili Atha Cliath.

Maol Ruanaigh mac Cathail mic Eoghain mic Donnchada, adbor righdamhna O n-Oilella gan imresain, d'fagháil bais a Cul Maeile, iar m-breith buada o doman ocus o deamon; ocus fa scel sochair ocus suilbireachta dia esccairdibh in bás sin mic Mic Donnchada, ocus fá mana morchumhadh dia cairdib.

Baili Locha Riach do gaphail do cloind an iarla ar Saxanchaib.

Morán millti do denamh do Brian O Ruairc ar Muigh Luirg, ocus Brian Mac Diarmada do denamh in cedna ar thigerntus h-I Ruairc. Mac Uilliam do gairm do Risderd an Iaraind.

Séumas na tinól, mac Iarla Desmuman, do básughad don giúisttis a Corcaidh. Ath Sceittin do gabáil don ghiúisdis cedna, ocus barda do cor ann. Carruicc an Puill do gabail don fhior cedna, ocus aroibhe and do marbhadh, ocus an baile do brissedh.

O Birn .i. Tadhg Occ mac Taidhg I Beirn d'faghail bhais a mí mharta, ocus fa mor in t-echt sin.

Moubhda Dioluin, ben I Fhergail, dh'ec.

Sbainidh do teacht go h-Eirinn a cuig no sé do cheduibh go Dun an Oir, ocus a tuitim uile leis in giuisdis.

Rossa mac Condla Meg Eochagain do marbadh le na derbrathair fein go n-emmaith, ocus ba mor in t-echt sin.

Tadg Riabhach O Dubhda do tuitim do bharr Caislein Conchobair, ocus a marbhadh go timpeisdeach.

Loch an sguir do gabail le Cathal Dubh mac Bríain Mic Diarmada, ocus Maol Sechlainn mac Meg Ranaill do marbhadh and. Crech do genamh do Brían Mac Diarmada air Mag Ranaill, ocus losgadh fós.

Kll. Enair for dhomhnach, ocus isi aeis an Tigerna in tan so bliadain ocus cetra .xx. ocus cuig ced ocus mile.

Iarla Tuadhmumhan .i. Concubhar mac Donnchada I Briain, dh'éc an bliadhain si.

Máoilechlainn mac in aba I Cheallaig, ocus Seaan mac Uillíam Oig mic Uilliam mic Concubair, ocus Diarmaid O Mainnín, do mharbad le Domnall mac an Aba I Cheallaigh .i. a derbrathair fein, ocus le h-Emann Dorcha mac Domnaill Mic Shuibhne.

Creach do dhénamh do Shasanchaib ar Tadhg mac Eogain Mic Diarmada.

Gerailt mac Oilefeir mic an Iarla dh'éc.

Domnall mac in Gilla Duib mic Eoghain Caoich, o Lethrus, d'faghail bhais co teimpesteach a Sligech, ocus a adhnacal ann.

Cobhthach Ruadh Mag Samhradhain on Lergain d'faghail bhais in bliadain si.

Baile an Tobair do bi ag Saxanchaib do tabuirt don Dubaltach mac Tuathail I Concubair.

Tadg Og mac Cathuil Oig h-I Conchubair do marbad le h-Albanchaib an blíadain cedna.

Semus mac Uateir Nuinnsenn, o dhún uabuir, d'faghail bais an bliadhain se.

Ailín mac Briain Mic Suibhne .i. consabal I Conchubair dhuinn dég.

An Calbhach mac Domnaill mic Taidg mic Cathail Oig h-I Conchubair, oighre Sligidh ocus ichtair Connacht gan imresain, d'fághail bais in aoine idir da cáisc na blíadna so, ocus is do sgélaib mora na h-Eirenn an t-én mhac sin Domnaill I Conchubair ocus Moire ingine I Ruairc; ocus ni táinic do shlicht Briain Luighnigh riamh fer a aosa bud mo do scel na é, ocus ni doig co ticfa; ocus do chráidh in sgel sin croidhedha Connacht, ocus co h-airithe do chráidh se éiges ocus ollumhain cuiged Connacht, ocus do comhroinn se mo croidhe féin na da chuid. Uch, uch, is truagh mar taim a n-deoigh mo cheile ocus mo companaigh, ocus an t-i ba tocha ocus do ba tairisi lem ar bith. Misi Brian mac Diarmada do sgribh sin ar carruig Mic Diarmada, ocus is samhalta me anois re h-Oilioll Olom andiaidh a cloinne, ar na marbad a b-fochair Airt Einfir mic Cuinn Ced cathaigh a cath Mhuighe Mucruimhe le Mac Con mac Maicniadh mic Luighech, no re Deirdre tar eis cloinne h-Uisnech do marbad a bh-feall a n-Eamuin Macha, le Concubar mac Fachtna Fathaigh, mic Rosa Ruaidh mic Rudhraidhe. Oir atáim gu dubach dobronach di-bragoidech domhenmnach, a n-dubhaighe ocus a n-doghaillsi; ocus ní h-etir a ríomh na a innisin mar atáim aniu andiaidh mo companaigh do dhul uaim .i. an Calbach, ocus an la deigenach do mhí mhárta do h-adhlaicedh a Sligech é.

Fer Caogad O Duibhgennáin .i. mac Fergail mic Pilip d'fagail bháis a g-cluain I Bhráoin.

Brian Caoch O Coinneagain, saoi cleirigh ocus fer tighe aoidhedh coitchinn, d'fagail bháis, ocus isi roimh annlaicthe do thogh se fein dó .i. a adhlucadh ag dumha Baile an Tobair, ocus isé mhesmaoid nach o droch creidemh do rinne Brian Caoch an togha sin, acht mar nach b-fhacaidh sé seirbhís De da dénamh a néin eaglais na fhochair san aimsir si.

O Cerbaill, .i. Uilliam Odhar mac Fhir gan Ainm mic Maol Ruanaidh mic Seain I Cerbhuill, do marbad le Sil Conchubair fhailghe ag teacht o Baile Átha Clíath do.

Tomas an t-Sléibhe mac Risderd Mic Goisdelbh d'fhaghail bháis.

Mac Iarla chloinne Ricaird, .i. Uilliam Burc, do dhul go Gaillimh do dhénamh síthe re Galluibh, ar cor ocus ar slanaibh in maora ocus an baile moir archena; ocus do bí roimhe astigh fer uilc ocus urbhuidhe do dhenamh ar cloinn Ricaird .i. Uilliam Og Mairtín, ocus da bhanna shaighdiuir maraen ris; ocus tar eis mic an Iarla do dul asteagh do fheall Uilliam Og Mairtín ocus na Sasanaigh air, ocus do gabadar é fein, ocus do crochadh fer ocus ochtar da mhuinntir, ocus do cuiredh e fein a prisún do neamh-toil an mhéra ocus an baile mhoir. Ocus ni fada 'na díaidh sin an úair do crochadh mac an Iarla ocus Toirrdelbach mac Donncaidh h-I Bhriain; ocus is Dardáoin áluinn do crochad mac an Iarla, ocus ar na mháruch do crochadh mac h-I Bríain.

Ar t-tuitim rígh Poirtengél annsa cath ro rémhráidhsem, do chuir cing Pilip .i. rí na Sbáinne a oide fein ocus armáil maraon ris gu Lisbúinn, ocus ni raibhe oighre ar righ Poirtengél acht derbráthair basdaird, ocus Donn h-Anntaine ba h-ainm dó; ocus do cuiredh cath idir Donn h-Anntuine ocus diúice o Dalbhuighe .i. oide rígh na Sbáinne; ocus do brisedh in cath ar Dhonn h-Anntuine, ocus do marbad a trí nó a cethair do mhíltibh fer fa dhon h-Anntuine; ocus do imthigh sé féin asan cath; ocus do gabhudh Lisbúinn air; ocus tainic cing Pilip gu Lisbúinn, ocus ata in chathair aige ocus a righacht.

Armáil mhor Albanuch do chur do caiptaein Malbie a n-Ichtar Connacht .i. clann Domnaill Ballaig Mhég Domnaill. O Conchubhair Sligigh ocus Cathal Og O Conchubhair do chruinniugad rompa, líon a t-tinóil do mharcshlúagh ocus do galloglachaib ocus do ghímánchaibh; ocus na h-Albanaigh do beth a g-Corrann ag Loch na b-fhidhnach a b-fhoslongport, ocus iad féin ocus O Concubair do beth ar adhuidh a chéile; ocus do cuiredar na h-Albanuigh sgiath tar lorg orrtha on loch suas docum Chúile O b-Finn, no gu rangadar móin in doire dharaigh; ocus do thuirling Cathal Óg ar an mónaigh sin, ocus na maithe sin maraon ris .i. Maol Rúanaidh mac Toirdelbaigh Mic Dhíarmuda, ocus Maol Mórra mac Maoil Muire Mic Suibhne, ocus O h-Edhra Buidhe .i. Conn mac Ruaidhri h-I Eadhra, ocus mac Tomaltaigh (.i. Tomaltach Óg) mic Maol Rúanaidh Mic Díarmada, ocus mac Bríain mic Eiremhóin Mic Suibhne; ocus do fágbadh Cathal Óg O Concubair ocus na maithe sin uile araon ris, ocus morán eile nach áiremhthar annso, le h-Albanchaibh an lá sin; ocus is mór an díth ocus an dílghenn do Gaoidhelaibh Eirend, ocus gu h-airithe do Gaoidhealaibh chuigidh Connacht, in bas sin Cathuil I Conchubair. Aodh mac Diarmada mic Cairbre h-I Conchubair .i. mac h-I Conchobair Dhuinn, ocus adhbur h-I Conchobair, do anocol ann; a bhreith a laim ass an maidhm sin. Caislén Mhaighe h-I Ghadra do loscud dh'Albanchaib isin ló cedna, ocus Diarmaid Óg mac Cein h-I Ghadra do bhássugad ann, ocus Tadhg Mhág Ruaidri, et alii multi.

Baile núa h-I Ruairc, ocus Druim dhá Eithiár .i. longport gnatach h-I Ruairc, do coimbrissedh a n-oen aimsir le .H. Rúairc fein d'egla Shaxanach do shuidhe ionnta.

Sluaiged la caiptín Mailbie .i. tigerna chóiged Connacht go h-Iochtar Chonnacht, go raibhe tri h-oidhche a Sligech ocus dá oidhche a n-Druim dhá eithiár; ocus braighde h-I Conchobair Sligigh ocus Ichtair Connacht do thabairt lais don dol sin dó. Sloiged eli lasan caiptín cedna sin a n-Ulltoib no go ranic Leithbhir, ocus do brissedh an baile sin lais.

An t-Sraith Bhán do brissedh la .H. Neill d'egla Sasanach do shuidhe ann; d'furtacht h-I Dhomnaill do chuadar na Saxanaigh sin a n-Ulltoib don dula sin. Maidhm la .H. Neill for .H. n-Domnaill isin m-bliadain cedna sin, dú andorchair Mac Suibhne Bághanach ocus a dhiass mac, ocus dias mac Aodha mic Neill Óig, ocus Niall Modarrdha mac Néill Óig, ocus inar gabadh Mac Suibhne na Tuath ocus mac Murchada Maill Mic Shuibhne, ocus inar marbad dá ced no trí go tuilledh; ocus bá do-áirimh ar thuit isin maidhm sin la .H. Neill, ocus is imhealt re ríom iad bhóss. Toirrdhealbach Luinech mac Neill Chonallaigh an t-.H. Neill sin.

Acht chena fa h-adhbail re innisin uilc ocus égaoine na bliadna sin a rann na h-Eorpa uile, ocus a n-Erinn co h-áiridhe. Mac Diarmada Gall .i. Eogan Caoch mac Cathail mic Thaidhg Óig dh'éc in lá ría b-fheil Muire Mór.

Brian mac Gilla Phadraic, .i. Mac Gilla Padraic, dh'ec a m-Baile Átha Cliath, ocus sé a laim ag an n-giuisdís; ocus do budh d'échtuibh móra Erenn dó.

Sirriam chundáe Sligigh .i. Brian mac Taidhg mic Briain mic Eogain h-I Ruairc, do dhul ar innsoiged co Breiffne h-I Ruairc, ocus Erenduigh ocus drong do Shacsanchaib do dhul lais. Crech mhór do thabairt do na Sasonchaib leo, ocus breith ar na Gaoidelaibh ar deredh na n-Gall, ocus brissedh ar na Gaoidelaibh, ocus marbad mór do dhenum orra.

Príóir Bhaile Atha an Rígh .i. Uilliam .H. Cinaodha mortuus est.

Armáil mhór do dhul ó thigerna chúigid Chonnacht .i. caiptín Mailbie, a n-Ichtor Chonnacht re h-aghaid chogaid an tuaiscert ocus h-I Ruairc; ocus issíad so dob ferr don armáil sin, días mac Domnaill Bhallaigh mic Domnaill d'Albanchaib, ocus Tomás Oidis .i. caiptin uassal do Shassanchaibh, ocus Uilliam Clithbhard, ocus caiptín Morna, ocus sirriam chundae Sligigh .i. Brian mac Taidhc h-I Rúairc; ocus a cúig no a sé do ceduibh Albanach maille re cloinn Domnaill Bhallaigh mic Dhomhnaill; ocus inambói do Shagsanchaib maille fris na caiptínibh sin do dhul a conndáe Slicigh uile. H. Conchobair Sligigh dia lethad ar an conndáe. Gairid ina dhiaidh sin an tan do ghuidh .H. Conchobair Slicigh ambói do chaiptínib Sacsanach annsin dochum a m-beith ar aon scél fris fein. Maithe ocus moruaisle Iochtair Connacht uile, maille re .H. Conchobair Sligigh ocus ris na Sasanchaib sin, d'innsaiged Albanach ocus clainne Domnaill Bhallaigh, ocus Alusdair mac Domnaill Bhallaigh Mic Domnaill .i. an mac Albanach is dóchuissidhi bharamhlaidhe, ocus dob oirbertaighi urramhanta, tánic a Connachtuibh re cian d'aimsir, do mharbadh ann a m-bun an fhedáin la .H. Conchobair Sligigh ocus lá Sasanchaib, a n-díghuil Chathail Óigh I Conchobair, ocus a n-dighuil ar marbadh maille fris gairid roime sin. Acht chena torcradar ced no dhó go tuilledh dona h-Albanchaib don breissim sin, in gach ionad ambádar ar fedh na condáe; ocus ro imthigh Domnall Gorm mac Domnaill Bhallaigh ass an sgathad sin, ocus ni heidir a riomh iná roáiremh ar benadh amach annsin d'echaib ocus d'éidedh, d'armoibh ocus d'ordonás, ocus da gach édail eli airchena; ocus ge deruid aroile gurab olc do fríth an gniom sin ní h-éidir a radh nach maith fuair .H. Conchobair a chuid féin de, óir nír fhuaradar a fholta friu iar tuitim a dherbráthar ocus a chónsopal ocus a dhaoinedh maithi roime sin friú, ocus gan síth iná gealladh etorra ina dhiaidh; oir is annsa Cedaoin ria n-Dardaoin álainn chuirp Chrisd torchuir Cathal Óg cona m-bói maille fris, ocus eidir Nolluic ocus fhéil Bríghdi torchradar Albanaich ocus mac Domnaill Bhallaigh inn, gidh nár bhéruic i n-aghaid aroile íad.

Maidhm adhbal mhór do thahairt d-Iarla Dhesmuman ar Iarla Urmhuman ocus ar t-Shasanchaib, du atorcradar tri ced go tuilled do Ghalloib ocus do Ghaoidelaibh, etir marcslúaig ocus glasláith, ocus inar benadh imad édála dhíbh.

Caor thinntigh do thoighecht co caislen nua t-shlechta Bressail h-I Cheallaigh, ocus Sean Ruadh mac an fhiledh do mharbadh dhi, ocus eich ocus airnéis do mharbadh ann. Bend thempuill chille O Sgópa do brissedh dhi.

Ruaidri mac Enna h-I Uiginn dh'ec a Suidhe b-Fhínaín, ocus a adhlucad a cluain Senmhaoil. Geróid clapach .i. duine uasal do Geraltachuibh, ocus fer millti moráin, do bhássugad la Sasanchaib.

Maghnus mac an Persúin mic Mhuirghessa dh'ec a n-err a aoisi ar Loch Lábáin, iar n-denum maithiusa móire do dheirc ocus do dhaondacht thighe aoidhed conuige sin, ocus a adhnacul a Cluain Senmhaoil.

Clann t-Sheain mic Cuinn mic Enri h-I Neill do thocht ar innsaige a m-Brefni h-I Raighilligh. Pilip mac Aodha h-I Raighilligh .i. mac h-I Raighilligh co na braithrechuibh ocus co na lucht lenmana do bhreith orra, ocus Sean Óg mac h-I Neill do mharbadh ann, ocus mac eli h-I Neill do ghabáil, ocus cethrár dá marcslúaig maith do marbadh ann bhós.

Inghen h-I Domnaill .i. Mairgrég ingen Aodha Duibh mic Aodha Ruaidh, ocus ben Mhaoil Mhórdha mic Seain mic Cathail h-I Raighilligh, ocus an bhen bá mó clú ocus oirrdercus i n-Erinn ina h-aimsir fein, dh'éc isin Chabhán in hoc anno.

Ocht n-oighredha dég do mhaithibh Gall na Midhe do chur dochum báis a m-Baile Atha Cliath do ghiuisdís na h-Erenn in bliadain sin.

Kll. Enair for Luan; anno Domini M.ccccc. ochtmhodha ar dhá bhliadain.

Mag Fhlandchaid .i. Cathal Óg mac Cathail Duibh do mharbadh dia dherbrathair féin .i. do Thadhg Óg mac Cathail Duibh, ocus tigerna do dhenum de fein 'na ionad an bliadain sin.

Sean mac Iarla Desmuman .i. an mac Iarla dob fherr oinech ocus uaisle ocus oirrdercus dá táinic do Gheraltachuibh riamh, ocus gan oighrecht aige acht a ghniom feissin, do marbadh le Saxuibh a mí ghenáir na bliadna sin.

Clann an Gilla Dhuibh Mic Goisdealbh, .i. an Gilla Dubh Óg ocus Egnechán, do mharbadh la Mac Donnchada an Choruinn per dolum.

Diuiqi o Dalbhuighe .i. oide ching Pilip rígh na Spainne, do ég iar m-brissed ar mhorán do chathaib ocus do choimhthegmhalaibh a h-ucht a dhalta, ocus d'fheabhus a laimhe conuigi-sin, ocus iar b-fhorbadh sé fichet bliadan d'aois.

Uillíam mac an Bharúin Dealbhna do dhul go h-Albain ar innarbhadh o Sagsanaibh.

Bainfheis righdha ro-mhór thigherna na Cairrge ocus a mhna, .i. Meadhbh inghen Domnaill h-I Conchobair .i. inghen h-I Conchobair Sligigh, do dhenum a coimhnénecht do Bhrian mac Ruaidri Mic Dhiarmada, dú inar bronnadh ocus inar bithsgaoiledh il-imad da gach cenél cruidh ocus dá gach arnáil innmhuis ocus édala, do réir a n-áilghis, dá gach aon d'fheruibh Erenn ocus Alban dá tánic da h-iarrad ar fedh na blíadna sin.

Barun Dealbhna do bheith a láimh ag Saxanchaib in bhliaduin sin, ocus morán dá thír do mhilledh.

Seision d'fhógra do chaiptín Rossa Comáin in tan sin .i. caiptín Prapasdún, ocus maithe na conndae do dhul dochom na comdhála sin. A n-dul go tor na n-gáinnedh, ocus gíosdáil an tuir do thuitim fútha ocus an caiptín fein conambói do dhaoinibh malle fris don t-shoilér O Flannagáin .i. Toirrdealbach an t-shleibhe mac Uillíam h-I Flannagáin, ocus a bháss do teacht don escur sin.

O Ruairc do denum creiche ar muinter Airt, ocus braighde do buain esde dho. Crech eli do dhenum don t-shirriam O Ruairc ocus do Shaxanchaib maille fris ar chlainn Mic Thigernáin na Breiffne, ag Loch Roda, ocus a mná do breith ambroid uatha.

O Dúbhda .i. Cathal Dubh mac Conchobair h-I Dhubhda .i. aonrogha t-shlechta Dháthi mic Fiacrach, do hec in hoc anno. Emonn .H. Dúbhda do rígad 'na ionadh.

Niculás mac Crisdóir mic an bharúin do chur dochum báis isin muilend cerr, ocus Niculás Cimhsóg do chur docum báis maraon fris, ocus Seon Cimhsóg do chuir an t-aimles rer milled araibh dóighredaib maithi chlainni Gall ar na m-bássugad roime sin.

Clann mic Gilla Padraic .i. Domnall ocus Cellach do mharbhad do mac h-I Mhaoil Mhuaidh .i. do Dhomnall mac Tepóid h-I Mhaoil Mhuaidh, a b-fhioll ina thigh fein, ocus do marbadh Domnall fein co dlúith na dheghaid sin a n-Dúrmhagh Choluim Chille do Shíl Conchobair Fhailge.

Da mac Rugraidhe Óig h-I Mhordha do chur dochum báis le Galloibh, ocus mac Feidhlimidh h-I Tuathail do bhásugad maille friú.

Clann Uáiter Fhada do dhul ar siobal innsoiged a tír Amhalgaid, ocus crech do dhenum dhóibh. Aos óg t-shlechta Ricaird a Búrc do bhreith a toraighecht orra, ocus cur chuca dhóibh. Filled do clainn Uaiter Fhada friu, ocus brissedh ar an tóradh re h-imad na lámh ag mám an ghair a n-Glend duibh, don taoibh óthess do Neimhfinn. Ricard mac Emuinn mic Uilleg ó chaislén an Bharraigh do marbadh ann, ocus Emonn Allta mac Risderd mic Oilberus do marbadh ann fós. Amérus mac Dábhíth Bhain, ocus Oilbérus mac Seain mic Dábhíth Bháin do thromlot ann, ocus cuid mhór dá lucht lenmana maille friú. Brian mac Eogain Mhaoil h-I Dhomnalláin .i. sói Erenn re dán ocus re foghluim d'fer aosa fein, d'fhagbáil ann, ocus flesgach ealadhna do muinntir Dhálaigh máille fris; ocus an chreach do bhreith leó dhóibh iarsin.

Crimhthann mac Murchada mic Muiris Caomáin do marbad le Gallaibh.

Mac Diarmada Ruadh, .i. Tadhg mac Conchobair Óig mic Muircertaigh, d'fhagail bháis in cethromad lá andiaidh fhéile Brenuinn ar innsi achaidh in chairthe, ocus a adhlucad a mainistir na Búille.

Caiptín Macafort do mharbadh la Cathal mac h-I Conchobair.

Mac Ailin na h-Alban d'ég in bliadain sin.

Mac Uilliam Burc, .i. Risderd an Iarainn mac Dabi mic Emainn mic Uilleg, d'fagail báis in tres lá don caisg in bliadain si.

Mairi a Burc ingen Oileueruis, ben an Abaid Caoich, dh'ec.

Da banna Saxanach do muinnter Iarla Irmuman do marbad le h-Iarla Desmuman in bliadain si. Mac Uilliam do gairm do Risderd mac Oilueruis in bliadain cedna.

O Raghallaigh .i. Aodh Conallach d'ég.

Aodh mac Fedhlimidh Bacaigh Uí Neill, ocus da cétt Saxanaigh do Saxanchaib maraon ris, do marbad sa Rúttai le Samairle m-Buide Mac Domnuill ocus le na chineth.

Dubraith do tinnsgna le Brian mac Briain mic Eogain Ui Ruairc.

Mac Ui Concobair Duinn .i. Toirrdhelbach mac Diarmada mic Cairbri dég, ocus a adnacal a t-tempall dúmha na Romhanach; ocus do bí sin ar échtaibh mora Erenn do mac righ.

Espog Saxanach do bi a n-Oilfinn dég a mí medoin in t-samradh. Tomas Sestar a ainm; ocus a Cill Liathain do fuair bas.

Brian mac Fir gan Ainm mic Concobair Óig Mic Diarmada d'ég.

Tadhg mac Maoilechlainn mic Hoiberd Meg Raghnaill do marbad le Brian mac Ruaidri Mic Diarmadai, ar Cnoc na carad laimh re Caisel Tobair in t-Serbain.

Ingen Ui Concobair Duinn, .i. Medb ingen Concobair mic Eogain Caoich, dh'ec.

Semus Nuinnsend mac Cristorai mic in Baruin, ocus Emann mac in Baruin Nuinnsenn, do tuitim re cheili, ocus seiser no cuiger maraon riu.

Concubhar mac Cormaic mic I Concubair .i. mac Uí Concobair Failghi, ocus Tadg mac Gilla Pattraicc I Concobair, do dol hi c-cómracc re cheili a n-Ath Cliath, ocus Concobar do tuitim sa comrac sin.

Cathal mac Maoilechlainn Oig Meg Raghnaill d'eg.

Diarmaid mac Meg Carrthaigh Moir do dol ar creich, ocus banna saigdiur lais, ar O Súillemháin. Domnall O Suillemhain do breith orrthai, ocus maidhm do tabairt ar Diarmaid, ocus e féin ocus a Saxanuigh do tuitim, et alii multi.

Aodh Dubh mac Murchada Uí Flaithbertuigh, ocus Uisdiun Máig Domhnaill, do gabail a f-feall lé Sean mac an Iarla Ricardaigh, .i. Ricard Saxanach, ocus iad ac filledh on c-croich naoim, ocus tucc se iad do caipdaen Malbie do bi os cinn Connacht; ocus ni fada do leicc Dia ocus in croch naom sin re Sean.

Crecha mora do dénam do cloinn an Iarla Ricardaigh .i. Uilleg ocus Sean, ar slicht Uilleg a Burc, ocus ar Muinntir Uiginn in Termuinn. Fell granna do denam d-Uilleg mac in Iarla, ocus do Rémann mac Uilleg na g-cend, ocus do Remunn mac an esbuig, ar Sean mac an Iarla, oir tugatar an da Rémann cuiredh do, ocus rugatar co bél atha Finntuinn é, ocus do tairrngetar in t-Iarla .i. Uilleg asteach air, ocus do marbad e a finghuil, ocus Eoin mac Aoda Mic Suibhne, ocus Sean mac Briain mic Gillacellaigh, ocus Fingin Buidhe mac Maoiltuile, adhbar maith legha, maraon ris; ocus o do marbad Naoisi mac Uisnech a fell an Emhuin Macha ni dernad a leitheit si d'fhinguil; ocus nir marbad fer a aoisi fein do mac Goill bud mo sgel na he. Caipden Malbie ocus a raibi do Gallaib a Connachtuib do dul a cloinn Ricaird fa toichim na felli sin, ocus an t-aonmad la .x. do Nouimbir do ronad in gnim sin.

Sdibard Iarla Chilli Dara d'ég .i. Mailir Huse, a t-tosach na bliadna so.

Esbagoidecht Oilefinn do tabairt d'Aindriu O Craidhéin do comairle na h-Erend a n-Ath Cliath.

Iarla Desmuman re n-abarthai Geróid na secaidhe do marbad le bardaib Caislein na Maingi, ocus a cenn do cur co Saxanaibh; ocus ni raibi a n-Erinn echt nar commor sin d'uaisle ocus d'oinech ocus do cumachtuib, ocus is mo ler tuit di Saxanchaib, ocus do cuir costus ar in m-banrigan.

Síli ingen I Domnaill d'ég, an ben do bí ag Tadg Og mac Taidg mic Aedha.

Fer gan Egla mac Maoil Muiri Meg Shuibhne d'eg.

Fear gan Egla mac Domnaill mic Feidlimid mic Toirrdealbaig Carraigh I Concubair d'ég.

Saxsanuidh do shuidhi a d'Tuillsci ocus a g-Cluain Muiredhuidh, ocus a g-carrgid Doiren, ocus a b-Ferann na Darach, ocus an Imliuch Mór, ocus an Uarán, ocus a g-Cluain O g-Carmacain, ocus sa b-Fotannuidh, ocus tighes do denamh dóibh sna áitibh sin.

O Gallcabhair do marbadh leis O Néill.

Mag Aodha in Móintidh, .i. Séan, do marbadh le muintir na h-Eilli.

Uilliam Búrc mac Maoilir Báin d'ég.

Orláim Moighi Luirg do tabairt do Brian mac Ruaidhri Mic Diarmada in bliadain sin.

An cuach do gairm aghaid nollag ag Ard mic Graini, a b-fhiadnaisi Roiberd Dilmain ocus Diarmada meg Duibh, ocus fa mór an t-ingnad sin.

Iarla O Susaic .i. Tomas in Uisgi, ocus do bi se na giuisdis fada d'aimsir ar Eirinn, ocus a h-eg fa cincís.

Kl. for Cettain; aoiss in Tigernai in tan sa mile bliadan ocus cuic cet, cethri bliadnai ocus cethri .xx.

Fer togbala císsai na banrighna a Connachtoibh do ég in bliadain si; Antune Fiton a ainm.

Domnall Glass mac Taidg Ruaidh h-I Airt, ocus Eoin mag Carmaic .i. saccart tempaill Eoin, tri la ria feil Beraigh a ég.

Mairgrecc ingen Mic Donnchada, ben Ui Duibgendain, d'eg.

Brian mac Donnchaidh még Uidir ocus Domnall óg O Dobhoilén d'ecc.

In Gillae Glass Ruad mac Maol Ruanaid find d'eg; a mi Febrai do egattar sin.

Mac Ui Gallchuibair .i. in Fer Dorcha mac Eogain do marbad le Manachaib co timpistech.

Sir Nicalass Malbie do bi na caipdin os cind Connacht d'eg in tress la do mí Marta, ocus ni tanic a n-Erinn a comaimsir fris na go menic riam do Galloib, duine uasal bud ferr ina se, ocus do cuir se cuicced Connacht uili fo doeirsi; ocus ni fetur a rim no a áiremh gach ar mill in fer sin ar fedh Erenn; ocus do rinne sé moran oibrech ar cuirt baile Atha Luain ocus Rossa Commain do sunnradh.

Crech mor do dhenamh d'Aedh Ruadh mac I Domnaill, ocus d'U Ghallchobhair, ar mac Taidg I Ruairc a g-Cnoc na gaoithe.

Mac Samhramáin .i. Brian Óc mac Brian d'ég in bliadain sin.

Cill Midáin do losgadh in bliadain sin.

Mac in Fhiledh d'eg in bliadain sin .i. Gilla Criost mac Séfraidh.

Mac in esbaig a Búrc, .i. Remand, do marbad le Diarmaid Riabach mac Aodha mic Donnchaidh, a n-dioghuil Seáin a Burc.

Ingen mic Diarmada .i. Sadbh inghen Eogain, in ben do bi ac O Gadhra .i. Diarmaid mac Eoghain I Gadhra, d'ég.

In giustis .i. Semus Dudal d'eg in bliadhain sin.

Cathal mac Rudhraidhi mic Ir Micc Radhnuill d'eg in bliadain sin la fhéili Brenuinn.

Eásboc do denamh do Séan mac Semais a Línsi a n-Oilfinn in bliadain sin, ocus Aindriu O Cridhain do chur ar c-cúl.

O Radhallaigh do denamh do Sean mac Aodhae Conallaigh do Galloib, ar belaib clainni Maoil Mordai Ui Raighilligh do bud sine inas e, ocus do milletar clann Maoil Mordai in tir uili trid sin.

Giuistiss do teacht co h-Erinn an bliadain cedna, sir Seon Piroid a ainm. Tigerna do teacht ar Connachtuip maraon ris; Risderd Bingiam a ainm. Teacht do na Galloib sin ar teacht a n-Erinn co Ross Commain, ocus Aod mac Ui Concobair duinn do gapail doib; ocus do redhighetar a caraid é co h-aitgerr .i. O Concobair Sligigh ocus Brian mac Ruaidri Mic Diarmada, ocus Tomaltach Og mac Tomaltaigh Mic Diarmada; ocus is amlaid do reidigetar é, tri mili punt do sgribad ar an triúr a m-bannaidhib re h-anamain a sith do, ocus Brian mac Domnaill Mic Suibni, consabla da muinnter, d'fagbail a Ros Commain an iarnac as Aodh. Dul dona Galloib sin co Gaillim, ocus mac Uilliam do teacht na g-cend, ocus braigdi do buain do mac Uilliam ocus da cinedh. Assin doib co Luimnech.

Sluaiged le Risderd Bingiam .i. lesin tigerna sin cuiged Connacht, a n-Ichtar Connacht, dar ben bráighi d'Ua Ruairc, ocus dar gab Baili in Múta, ocus dar crech in Corann, ocus da rug Cathal Og mac Cathail Duibh mic Donnchaidh leis do brágad tar eis ar milledh a Corainn; ocus Aod mac Cairbri meig Donnchaidh fa tigerna ar Corann in uair sin.

In giuisdis do dola a n-Ulltuib .i. sir Seon Piróid, ocus mac Uí Néill .i. Toirrdelbaich Luinigh, do tabairt lais do bragad. Eire uile ar na gabáil le Gallaibh in bliadhain sin, innus c-cur cuirset oinech ocus uaisle fer n-Erenn ar g-cul.

Atiat-so tigernadha Connacht in bliadain si .i. Donnchad mac Concopair mic Donnchada ina iarla ar Tuad Mumain, ocus Uilleg mac Ricaird Saxanaigh 'na iarla ar Cloinn Ricaird, ocus Aod mac Donnchada Ui Cellaigh ar Tír Maine; Hoiberd Buidi mac Uilliam mic Tomáiss ar Cloinn Connmaid; Diarmaid mac Cairpri Uí Concobair ar Cloinn Toirrdelbaigh. Tadg Óg mac Taidg Buide ar cloinn mic Felim. Brian mac Ruaidri Mic Diarmada ar Magh Luirg. Brian mac Briain Uí Ruairc ar in m-Brefne, ocus Domnall mac Taidg mic Cathail Óig ar Ichtar Connacht; Risderd mac Oliuerus a Burc ar crich clainni h-Uilliam; ocus ni h-eidir a rim no a airoim no a faisneis cech anderrnatar Goill dolcaib ocus dainlettrom ar na feraib sin. An Fer Dorcha mac Muirgesa ar Tir Aililla; Aod mac Cairbri ar in c-Corann; Cormac O h-Eghra ar Luigne Buide. Fergal Carrach ar Luigne Riabach; Eman O Dubda ar Tir Fiachrach Muaighi. Acsin tigernadain cuigid in tansa.

Tadg mac Aodhagain, ollamh slechta Ricaird Oig a Burc re feinechus, d'eg in bliadain si.

Mac Mic Consnama, .i. Toirrdelbach Óg mac Toirrdelbaigh, d'eg.

Uilliam Caoch mac Donnchada I Cellaigh do crochad lesin n-guibernoir i n-Gaillim.

Mac Siurtain Baile Atha Lethain, .i. Tomass Dub, d'eg.

Ocus atait so fa h-aird tigernada ar Ulltoib in tan soin, .i. Toirrdelbach Luinioch ar Tir Eogain, ocus Aod mac Maghnusa Ui Domnaill ar Tir Conuill; Conn mac Neill Oicc ar Clainn Aoda Buidhe; an Fer Dorcha mac Domnaill Óig na Mag Aongusa ar Ibh Echach. Art mac Briain na Mocherghi ar Oirgiallaib. Cu Connacht Og mac Con Connacht ar Feruib Manach. Ruaidri mac Magnusa I Cathain os cinn Oirechta I Cathain.

Matha mac Maoilechlainn Riabaigh mic Maol Tuili d'eg.

Sadb ingen Ui Duibgendain, ben Ghillacoluim mic Maol Muire mic Briain Óig, d'eg.

Mac Eochadu .i. Fer gan Ainm Mac Eochada, ollamh Laigen in Fer gan Ainm sin, d'eg.

Banna Saxsanach do marbad sa Ruta re Cloind Domhnaill na h-Alban, ocus do baineadar Dun Lipse do Saxsanaib, ocus do marbadar aroibhe and.

Kll. Ianair for Aoine, ocus asi aois in Tigerna in tan sa cuig bliadna ocus cethra fichet, ccccc. ocus mile.

Mac Taidhg I Ruairc .i. Brian, ocus cuid do Cloind t-Sithigh do bi ar fasdo aige, do dul ar siubhal innsuighe air Mag Flandchaidh, ocus creacha mora do glacadh doibh la fele Sdeabhain. Mag Flandchaidh ocus mac I Ruairc .i. Tigernan mac Bríain I Ruairc do breth orrtha, ocus tacar do thabhairt da chele doibh; ocus Maghnus Og Mag Dubhain do marbad a tosach in tachair sin. Fir Breifne ocus Dartraoi do bhreith orra 'na diaidh sin, ocus cur doibh dochum na feadhna sin, ocus brisedh ar mac Taidhg I Ruairc ocus ar a muindtir, ocus Eogan mac Sithidh mac Toirrdhealbaigh mic Emaind mic Sithidh do marbad, ocus da fiched maraon ris ar an lathair sin. Do gabhadh mac Taidg I Ruairc ocus Maghnus Og O Curnin, ocus do cuiredh ar Loch na Cula iad fo iarnach; ocus do marbhadar clann Tigernain iad go h-olc; ocus ar Magh h-Oilcheas tugudh in maoidhm sin.

In guibhernoir, .i. tigerna Connacht, do teacht lucht da arrthrach o Baile Atha Luain go carraig Meic Diarmadu, aoidhce cind in da la dhec go n-onoir moir ocus n-oirfidid n-adhbail a tigh Bríain Mic Diarmadu, do fill se tar ais dochum a aitte fein.

Toirrdhealbach Mac an Aba Meg Uidir do marbad le Mag Mathgamna.

Uilliam mac in baruin Nuinnsenn do teacht go h-Erinn tar eis a fuair se d'anro ar fedh an domain sair, ar faghail a parduin do on m-banrigan.

Clann Báiter fada a Burc do ghabail don guibernoir co nemmaith, ocus a c-cur fo iernach co Baile Atha Luain.

Garmluidh ingen Briain mic Eogain Ui Ruairc d'eg caoicdhigis re m-belltuine; ocus do bud do bainéchtuibh maithi Erenn di.

Crecha mora do denamh ar Albanchaib isna glinnibh le Saxanchaib.

Roisi ingen I Neill d'ég .i. in ben do bi ag Conn mac in Calbaig Ui Domnaill.

Domnall Gorm, mac Domnaill Ballaigh meg Domnaill, do marbad is na glinnib le Tomáss Udis; caipdin Saxanach an Tomáss sin.

Albanoigh do athchur a h-Erinn do Saxanchaib.

Fir Erenn uile, do neoch dob inairimh dib, do dol go Baile Atha Cliath docum acta pairlimint. Mac Uí Maoilmuaid, ocus Emann Dorcha mac Domnaill mic Murchada mic Suibhne, ocus daoine imdha oile, do crochad ar an acta pairlimint sin.

Maithe Erenn do theacht slán on comairle sin Atha Cliat gan tarba.

Belghi Erenn do reidhiogad, do neoch ba daingen dib, le Saxanchaib. Doeirchis mor do cur ar Connachtuib do Saxanchuib .i. uingi dór sa cethramain itir cill ocus thuaith, ocus tigernus gach uile tigerna gaidealach dissleghad doib.

Sean na Muaidi .i. tigerna chlainni mic n-Eogain, fer oinigh ocus tighi n-aoidhedh co mor, do ég.

Tomáss mac Baiter Nuinnsenn o tigh Munna d'eg.

Conn mac Airt Oig mic Neill Conallaigh Uí Neill do marbad le h-Aod mac Con Connacht Meg Uidir .i. mac Meg Uidir.

Felim Dub mac Neill mic Cuinn do marbad le Sean mac Meg Uidir.

Iarla Cille Dara, .i. Geroid Og mac Geroid mic Geroid, d'ég a Saxanaibh.

Domnall Óg mac Duibhsithe do marbad a n-Dartraidhe Meg Flannchaidh le cethernn tighi na banrighan.

Fliuchad ar fedh na bliadna sa.

Mac Uilliam Burc d'eg .i. Risderd mac Oiluerus.

Antuirbia dar comainm Anbuirb a Plendrus do gabail le cing Filib .i. le rig na Spaine, ar Plémennchaib ocus ar Saxanchaib, ocus imarcad doene do marbad innti.

O h-Ainlidhe darab comainm Tadg Ballach d'eg.

Clemens mac Semuis Sgerait d'eg; uardian na Gaillue.

Iarla óg Chille Dara do toidhecht a n-Eirinn, .i. Hannri na Tuath mac Geroid mic Geroid mic Geroid, fa chumhachta mora on m-banrigain, ocus barun Dealbhna do teacht maraon ris, ocus cumhachta a duthaide fein leis; ocus in t-Iarla óg sin do thabairt chuirp a athar lais ocus a derbrathar docum Eirenn, ocus a n-adhlocad fa didin De ocus Bride a Cill Dara.

Murchad mac I Ceinneidigh dh'ec.

Findtan mac Illaind mic Dubthaigh I Mhaoil Conaire, .i. adhbar olluman th-Shiol Muiredhaigh, dh'ec.

Alastar mac Somairle Buidhe mheg Domhnaill do marbad re Sagsanaib, ocus fiched da muintir faris; ocus do rugud a ceann go Baile Atha Cliath.

Kl. for Satharnn; aois in Tigernai mile bliadan ocus cuicc ced, ocus cethra fiched ocus se bliadna.

Brien mac Cein Uí Eghra do chur dochum baiss a n-Gaillimh ar fulairim tigerna cuigid Connacht, .i. Risderd Bingiem; ocus fa mor in t-écht an mac sin Cein Uí Eghra a leth uaisle ocus oinigh.

Tomass Ruadh, mac Riocaird mic Seain in termuinn, do marbad a f-feall do Saxanchaib, ocus fa mor in t-écht in mac sin mic Uilliam.

Mac mic Goisdelb, .i. Uilliem mac Pierassa, do crochad le sirriem condae Rossa Commain, ar duma na Rómhanach. Mac Maghnusa Tiri Tuathail do crochad lesin sirriem cedna; Toirrdelbach Buidhi a comainm, ocus ar Cruachan do crochad é; ocus nír fechad don pardún do bi aigi dó; ocus an tress lá do Marta do rinnedh an gnim sin.

Cluain Dubain do gabail don gubernoir, ocus Mathgamain mac an esbuicc Ui Briain, ocus a barda uile, do cur docum baiss ann, ocus an baile do brisedh; ocus fa mor in t-echt sin do toeb uaisle ocus oinigh.

Sisuile ingen mic Dabi d'eg; ocus do bud mor in sgel sin.

Oiluerus mac Seain mic Dabhí Báin a Burc, ocus Tomass mac Dabi Bain, do crochad leisin n-guibernoir.

An guibernoir do dol sluagh diarmhe a timchell Caislen na Caillighi, ocus cuid do slicht Uilleg a Burc ocus do slicht Emuinn a Burc do beth isin caislen, ocus an guibernoir d'innsoiged an baile lucht a do no a tri do báduib; ocus do cuiretar docum in baile, ocus do marbad da xx.et do Muinntir in guibernoir, ocus do h-obrad é fein d'fágbáil; ocus do imdhettar na barda 'na diaidh sin, ocus ni dernadh dígbhail doib.

O h-Airt .i. Felim mac Uilliam Ui Airt deg aidqi casg, ocus a adnaccad a Sligech dia Luain.

Ricard Og, mac Ricaird mic Seain an Termuinn, do crochad don guibernoir isin crich, ocus fa huasal doennachtach degoinigh in fer sin, tri hoidche re gcaisg.

Da mac Baiter Fada a Burc, .i. Maoilir ocus Teboid, do crochad don guibernoir a Ross Commain ar m-beth bliadain a laimh doib, ocus a n-adhnacad a roilig Tempuill an aighnéin itir caisg ocus belltuine; ocus do batar sin ar échtuibh mora Erenn do Galloib an en aimsir riú.

Mac Uí Domhnaill, .i. Magnus Og mac Magnusa Ui Domnaill, do marbad le cuid do slicht Donnchada Ui Gallchubair.

Mac Suibne Baghanach, .i. Brian Bacach, do marbad le na braitrib fein.

Giuistis maith dobi fada for Erinn d'eg a Saxanaibh .i. Hanri Sidnie.

Cogadh mor itir cing Pilib ri na Spainne ocus prinnsa Saxanach .i. Elisdabét, fa Plóndrus.

O h-Egra Riabach .i. Fergal Carrach d'eg.

O Ruanadha .i. Sean, no Aonghus, mac Ruaidri Oig, do marbad le Sean mac Ui Anluain.

An guibernoir ocus Iarla Clainni Ricaird, ocus Iarla Tuadhmuman, ocus sluagha mora maille riu, ocus foslongport do denam isin Tóchair ocus a m-Baile in Rodba doib, ocus do crochatar triur lenab do bi a laim acu fein re fada roime sin .i. mac an Abad Caoich, ocus mac Maoilir mic Baiter Fada, ocus mac Seain a Burc, a Ross Mor; ocus do bud truaigh in gnim sin crochad na lenabh neimchintach. Ocus Eogan mac Domnaill an cogaid Uí Flaithbertaigh do marbad per dolum, ocus morán da Muinntir do crochad ocus do marbad doib; ocus tugatar an sluag do roinne na gnima sin tri mile bo riú, ocus do crechatar Ciarraide co h-uilidi.

Clann t-Semuis meg Domnaill do teacht a n-Erinn, mile co leth Albanach, ocus do milletar moran a n-Ulltoib; ocus teacht doib co Cill Ronain a crich Connacht, ocus do badar cúicc oighche innte, ocus do bhi in guibernóir a m-bél in átha fada, sluag diáirimh do maithibh Connacht ocus do Saxanchuibh na fhochair. Ocus do chuiredar Albanuigh sciath tar lorcc ortha docum Cuilmhuine, ocus tangadar cuid do cloinn Uilliem na g-coinne; ocus do ionnsaigedar Drothad in Chillín; ocus o ro cualadar Sasanuidh Albanuidh do dul tarsa síos do lenadar ied, ocus do buailedh fa ceile iad ag Drothad in Cillín, ocus tucadar tachar tend da chéile ann, ocus do marbadh a cúig no sé deachaib an goibernóra, ocus do imdedar Albanuidh gan dibháil docum Sléibe dam, ocus rucadar crech leo gu Ard na Ria. Dála in guibernora, do lonnuidhedh ocus do láinfherguidhedh leiss fa Albancuibh d'imdecht uadh, ocus do léigse araibhi aga deirge amach Gaoidheluidh uadh, ocus do fhill sé suass docum an caislein móir; ocus rucadar air annsin da banna Shaxanach tanuic on Mumain, ocus do bi se annsin seacht m-banna don armáil dob fherr ar bith; ocus ro len ied gu h-uasal arrachta ánttrenta co rainic Ard na Ria. Ocus in uair do conncadar Albanuidh chuca iad do eirgiodar amach asan m-baili a g-coinne ocus a g-comdáil na n-Gall, ocus tucadar frasa diana disgaire da n-armaib diobraici a n-aghaid na n-Gall, ocus do bhí do dhonus ar Albancuibh nar loitedar duine na each don fras sin, ocus gur gabadar raon madhma ocus teithmhe docum na Muaidhi, ocus gur marbadh ocus gur báthadh .xx. ced no amplius. Do marbad ann da mac Sémais micc Domnaill .i. Domnall Gorm ocus Alusdar, ocus do marbadh ann Giolla Esbuic mac Dubghaill mic Donnchaidh Chaim mic Ailín, ocus do marbadh Emann Cíocarach mac Daibí Báin a Búrc, ocus Cathaoir mac Domnaill mic Donncaidh Ruaidh Meg Domnaill, ocus morán oile nach fédmuid d'airemh ar a méd; ocus a n-Ard na Ria tucadh an t-ár sin seachtmuin re b-feil Micheoil. Ocus tucadh cath a b-Plóndrus an lá sin etir cing Filip ocus banrigan Saxan. Filip mac sir h-Anrigh do marbad andsa cath sin, ocus moran eile.

Sruth na Sionna do filleadh tarais dochum Locha Righ, ocus a bheith ceithre huaire fiched ar an ordubh sin a fiadnuise aroibhe an Ath Luain uile.

Droiched Bhaile assa dara do chrichnugadh le O Conchubair Sligigh.

Muirges mac Muircertaigh mic Donnchaidh dh'ec.

In Sgorlogach dh'ec.

Aodh mac Eogain mic Shuibhne .i. consabal cloinde Ricairt dhec, ocus bud mor in t-eacht sin.

Brian Brathach mac Mic Donnchaid in Chorainn dh'ec ar in Maighin.

Tomas mac I Floind do crocadh a Rosa Chomain da la ria feil Cathtrina.

Mac Diarmada Ruad dh'ec .i. Fergal mac Conchobair Óig meic Muircertaig.

Eogan Ulltach, an liaig is ferr do bi a n-Erinn, d'ég.

Iarla o Lestar do dol sluag di-airimh do cumgnad le Plemennchaib co Plondrus. Ri na Spáinne do denam armala a n-aghaid na h-armala sin, ocus cath do chur etarra, ocus il-imad do miltibh do tuitim etarra ar gach toeb.

Murchad mac Ui Cinnéidigh do tuitim les O g-Cerbuill .i. in Calbach.

Mac an Baird Cula an Urtáin, .i. Muiris mac Laoisigh, do dol d'eg.

Uilliam O Cernaigh, .i. sen brathair dob ferr do bi a n-Erinn do sermóntaigh, d'faghail bais ar an Maighin.

An dall do bi a n-Ulltuib re faistine d'fagail bais, .i. Magnus mac Sithe.

Uilliam Burc mac Emuinn o crich cloinne h-Uilliam d'eg; oigri an Iarla Ruaidh an t-Uilliam sin, ocus ba mor an t-écht sin.

Caislen mor Meic g-Coisdealb, ocus leath thigernuis in tíre, do thabhairt do Thaboid Diluin do Mac Goisdealb .i. Sean mac in Gilla Dhuibh meic Hoiberd.

O Gadhra do thabhairt cuig m-baile na rand, ocus caislen Doire Mhoir, don fir cedna. Oillilin O Gadhra tug sin uadha.

Kl. for Domhnach; aois in Tigerna mile bliadan ocus cuicc ced, ocus cetra xx.it ocus seacht m-bliadna.

An banrigan Albanach do bi a laimh re fada roime sin ag banrigan t-Saxan do chur docum bais don bainrighan t-Saxanuigh, ocus ni roibhi a rann Eorpa ben bud brégha inas í. An t-ochtmadh la do Febra do cuiredh docum bais í.

Mac Lochluinn O Luccaill, .i. Sean Buidhi, d'eg.

Sir Uilliam Sdannlúi, ridire uasal do cuir banrigan t-Saxan re h-aghaid cogaid co Plondrus, do dol a n-aghaid a prinnsa fein do cungnam le rig na Spainne, ocus ase lín do dóinibh do chuaid lais se ced .x. do Saxanchaib, ocus d'Eirennchaib, ocus d'Albanchaib.

Maoilechlainn mac Maoil Ruanaidh mic Diarmada mic Seain d'eg.

Eg mor ar cethraib na bliadna sa, ocus ro dith arbha innti beos.

Baiter Riabach mac Muiris mic Baiter mic an Iarla, ocus clann Briain mic Cathaoir mic Airt mic Diarmada laimderg, do dol ar creich ar bord Lethlinne in Droichid, ocus crech do denamh doib; ocus toir do breith orra .i. mac maruscail an Ibhair ocus armail maraon ris. Baiter Riabach ocus a muinnter d'filled orra, ocus mac an maruscail ocus cetrar ar xx.it da Muinntir do marbad ar in lathair sin; ocus fa mor in t-echt do toeb in mic sin an maruscail. Cathal mac Toirrdelbaigh mic Diarmada do gabail, ocus a breth co Ros Comain fa daoirsi.

Mac Donnchaid an Corainn d'eg .i. Aod mac Cairbri.

Ro digbail bid an Erinn an bliadain si.

Port do denam do caipdin Gráiin ar Droichet mic Maonaigh, ocus port oile do denam a n-Druim do maigistir Leghinn.

Mac Ui Concenuinn .i. Muircertach mac Cathail d'eg.

Dias mac Eogain Ruaid mic Cormaic do crochad a Cnoc in Bicaire le caipdin Graidhin, ocus le Seoirsi mac Pitair Núinnsenn, per dolum; ocus an Dubaltach maig Riabaigh do crochad mar in cedna. Brian Ballach mac an Calbaigh mic Taidg Buidi Ui Concobair, ocus Dunadach mac Dubguill ar sesion do crochad a mi medhoin t-samrad a Ros Comain.

Sesion do denam a Sligech do Seoirsi Bingiam ocus don giuistis Dilmain, ocus do maigistir Comartun, ocus conndae Sligigh do teacht docum na comdala sin, ocus Felim mac Donnchaid Oig Uí Airt do crochad annsin, ocus Emann mac Enri.

An guibernoir do dol a Saxanaib.

Toirrdelbach mac Ui Broin do crochad le Saxanchaib, ocus é fariu fein a serbis na banrigna.

Cairpri mac Aoda meg Donnchaidh .i. mac mic Donnchaidh, d'ég.

Gilla Coluim Ua h-Uiginn, mac Maoil Muire mic Briain Óig Ui Uigin, d'eg tri hoidqi re lughnasadh.

Mac giuistis na h-Erenn d'eg; sir Seon Piroid ainm in giuistis sin.

Concobar mac Enna Ui Uigin d'eg; sáoi re dan an Concobar sin, ocus a adnacad a caisill na h-Eilidi ar Machaire na n-Ailech.

Cith cloichsneachta do chur a machaire Connacht a c-cinn t-seachtmuine iar lughnasadh, ocus nir mo min uball na gach cloch don t-sneachta sin, ocus arbhar imda do milledh do.

O Concobair Donn .i. Diarmaid mac Cairpri mic Eogain Caoich Uí Concobair, an fer is mó ro traoth ocus ro thuirn dia naimdib, ocus is mo ro foghail ocus ro admill da escairdibh in gach aird, an t-aon duine uasal is ferr tanic do slicht Toirrdelbaigh Moir Ui Concobair re cian d'aimsir d'ég, ocus a adnacad a m-Baile an Topair fa diden De ocus Brigdi, an tres la re ced feil Muiri, ar m-beth cuig bliadna .x. ar fiched a tigernus dó.

Toirrdelbach mac Aoda Ui Baoighill, ocus Aod Óg mac Aoda Buidi Ui Domnaill, ocus moirsesior da Muinntir, do marbad le clainn Neill Ruaidh Ui Baoighill.

Cettach mac Toirrdelbaigh Ui Ruairc ocus Mathghamain mac Caba, ocus triur no cethrar maraon riu, do marbad ocus siad a fochair Domhnaill Ui Ruairc, le cloinn Briain mic Eogain Ui Ruairc .i. Tigernan ocus Domnall; ocus ag Raith Giaín do ronad in marbad sin; ocus do imthig mac Taidg Ui Ruairc .i. Domnall do rith ocus ar éigin.

O Dubda .i. Emunn mac Eogain Uí Dubda d'eg.

Sir Risderd Bingiam do chur don banrigan co Plondrus, ocus a derbhrathair .i. Seoirsi do fagbail ina inad os cinn Connacht.

Eogan mac Ruaidri mic Felim mic Maghnusa d'eg caoicis ria samhain, ocus a adhnacad a Sligech.

Aodh Ruadh mac Ui Domnaill .i. mac Aoda mic Maghnusa, ocus mac mic Suibne Fanat, ocus mac Eogain mic Seain mic Corbmaic Buidi Ui Gallchobair, do gabail ar cuan ratha Maolain do luing Saxanach, ar n-dol dól fina inti doib, ocus a m-breth co Baile Atha Cliath.

Mac Ui Fergail Bain .i. Tadg Og d'ég.

Domnall mac Baotghalaigh Mic Aodagain d'eg.

Ingen Briain mic Diarmada Ruaid, ben oirchinnigh Baile na c-clerech .i. Cathal, dh'ec.

An Sinascal Ui muig Caille ocus Paidrigin mac mic Muiris, ocus Paidricin Cundun, ocus Donnchad mac Corbmaic Meg Carrthaigh, do gabail a n-Ath Cliath do comairle na h-Erenn per dolum.

Port do denam a c-Cluain Eoais a h-Oirgiallaibh do sir Hanrai Diuic, do ridire Saxanach.

Cu Medha mac mic Con Mara Finn ocus a ben, ingen meg Piaruis, d'fagbail bais an aoin seachtmuin.

Kl. for Luan; aois in Tigerna mile bliadan, ocus cuig ced ocus cetra fiched ocus ocht m-bliadna.

O Conchobair Sligigh .i. Domhnall mac Taidg mic Cathail Oig, rogha Gaoidel Erenn, d'eg aidhqi nodlag beg a Sligech, ocus a adnacad innti.

Aod mac in Calbaigh Uí Domnaill, ocus fer ocus ochtar maraon ris, do marbad a feall a g-crannoig Muighi Gaiblín le h-ingen t-Semais meg Domhnaill, le mnaoi Uí Domnaill.

Matha Ruadh O Luinín, .i. saoi re senchus, d'eg an bliadain cedna.

Baiter mac Risderd mic Ricaird Oig a Burc d'ég.

Giuistis nua do teacht co h-Erinn .i. Uilliam Faoiuilliam, ocus ni raibi sith ina soinenn a n-Erinn ina coraid fein o do tanic.

Easpacc mallaighthi heregda do beth a n-Oilfinn, ocus do rinne Dia ferta fele air; ocus asi áit a raibhi a thigedas a n-grainsigh in Machaire Riabaigh; ocus do cuiredh cith snechta dó, ocus nir mó fiadh ubhall na gach cloch de; ocus nir fagbad grainne na baile, ocus is re sluasdib do cuirthi an snechta sin o na tigtib; ocus as a mí medoin t-samrad do cuiredh an cioth sin.

O Fallamain .i. Cobhtach O Fallamain d'eg, ocus a mac Remann d'oirnedh na inad. Sean mac Tomais mic Dabi mic Emuinn .i. saccart uasal onorach d'eg.

Mac Uí Raigilligh .i. Emann mac Maoil Morda do teacht ar creich ar Brian mac Fergail Oig Ui Raigilligh, ocus crecha do glacadh dó; ocus mac Fergail Oig do breth orra, ocus Sean Og mac Seain mic Toirrdelbaigh Uí Raigilligh, ocus troid do tabairt da chele doib, ocus an crech do bhuain d'Emann ocus fiche da Muinntir do marbad, ocus Sean Og mac Seain mic Toirrdelbaig do marbad le h-Emann.

An Dubaltach mac Remuinn Ui Fallamain do marbad le Remann mac Cobthaigh I Fallamain.

Gilla na Naom mac Iriail Uí Uiginn d'ég.

Mac mic Diarmada .i. Cathal mac Toirrdelbaigh, ocus mac I Choncubair Ruaid .i. Cedach, ocus mac Mic Con Mara do crochadh, ocus mac Feidlim Buidhi .i. Donnchad, do crochadh maraon riu a n-Gaillim.

Mac mic Goisdelba d'ég .i. Emann.

Mac I Maoil Conairi d'ég .i. Senchán.

Pilib O h-Einidh d'écc .i. duine roibhinn do bi a normm.

Domnall mac I Domnaill, ocus sliocht Aodha I Gallcobair, do dhul ar siubal innsuidhidh ar cloinn Cuinn mic in Calbaigh, ocus do marbadh leo in Calbach Óg mac Cuinn mic in Calbaigh, ocus rucadar leo morán do buaibh ocus do caiplibh.

O Dochartaigh ocus O Gallcobair do gabail don giuistis, ocus a m-breth co Ath Cliath.

Felim Occ mac Concobair mic Toirrdelbaigh Ruaid, ocus an Calbach mac Cuinn mic Felim Ruaid, do dol co rann mic Uilliam Burc, ocus muinnter an t-sirriam do marbad per dolum.

Uisdiun mac Maol Muire mic Felim meg Domnaill do crochad lessin n-guibernoir.

Sbainnig do teacht co h-Erinn loinges adhbail mor, ocus do baithedh a h-ocht no a naoi do na longaib sin a Mumhain ocus a Connachtuib, ocus an méid nar baith an muir do lucht na long sin do baithed, do marbhatar Saxanaigh iad; ocus ni heidir a rimh no a innisin gach ar baithed ocus gach ar marbad san loinges sin ar a méd, ocus gach a frith don edáil, dór ocus d'airged ocus da gach maithes arcena.

Sligech do buain do Donnchad mac Cathail Oig Uí Concobair don guibernoir, ocus mac Cathail Oicc do dol a c-cosaid co Saxanaibh.

O h-Eidhin d'ég .i. Eogan Manntach O h-Edhin.

Cettach mac Briain mic Diarmada Ruaidh d'eg.

Iarla o Lestar .i. prinnsa ro chumachtach do Muinntir banrigan Saxan d'eg.

Caipdin Coilér d'eg.

Sluaiged Erenn uile acht cuiged Ulad nama do teacht a Connachtuibh le sir Uilliam Faoiuilliam .i. giuistis na h-Erenn, ocus gan en red maithesa do denam do, acht araibi o Ath Luain co h-Eirne do milledh do, ocus mac Ui Dochartaigh .i. Cathaoir, do marbad le Saxanchaib.

Maig Eochagain .i. Connla maig Eochagain, fer uasal degoinigh, d'ég.

Mac Tigernain na Brefne .i. Fergal d'ecc.

Mac Suibhne Thire Baghuine, .i. Niall Meirgeach mac Maoil Muire, do marbad re Donnchad n-Dubh mac Maoil Muire Meirgidh meic Suibhne per dolum.

Mairgreg ni Cuaireil in bhen do bhí ag Giolla Colluim O Chlabbuigh dh'ec; ocus ni fhacemar a cill riam ben budh fearr.

Seathan mac Maoilre Bhan mhic Uilliam Burc, mic Ricaird Oig, do marbad re Uilliam Taig a Sligech go timpisteach.

Crecha mora do dhenam d'Aodh mac in Chalbaigh I Domnaill roime e fein do marbad, ocus do mac I Neill ar Thír Aodha, du and aroibhe tri mili bo.

Ni tainic re cian d'aimsir a n-Eirinn riam comh maith na bliadna so do fhaghamar; asi búdh mó bia ocus torad.

Feall granna do dhenamh do righ Frang, oir do marbaid se duice maith da muintir fein per dolum.

Do baithed Brian mac in Persuin ocus Anrias mac in Persuin, ocus Cormac O h-Airt, annsa loingeas Sbaineach sin tainic go Cairbri.

Kl. Ianair for Cédaoin, ocus aois in Tigerna naoi m-bliadna ocus ceathra fiched .ccccc. mile.

Siarrium conndae Muige n-Eo .i. magistir Brun, ocus Domnall O Dalaigh do dul ar siubhal go h-Iorras. Morcrecha ocus marbhtha do dhenam doibh per dolum.

Risdeart mac Deamain in Chorain, ocus Uater mac Ricaird meic Seain in Termuinn, do bhreaith orrtha; ocus do bhadar Saxsanaigh tri ced d'armail, ocus do chuadar do bhualadh a chele, ocus do briseadh air Sagsanchaib, ocus do marbudh Domnall O Dalaigh ocus maigistir Brun .i. in siarriam, ocus maithe a roibhe faru uile, ocus do tugadh in maidm orrtha go h-arrachta uasal tre mirbuile De athar.

Tadhg mac Ruaidri meic Conchobair .i. duine uasal do t-shlicht Fergail meic Diarmada, dh'ec.

Cathal mac Daoighir .i. sagart Achanaigh dh'ec.

O Neill, .i. Toirdhealbach Luineach, do teacht ar tarraing Neill Gairb mic Coind meic an Chalbhuigh I Domhnaill, ar Eogan mac in Decanaigh I Ghallchubair, ocus do g-clagadar crech mhor; agus do rug orra muindter Ghallchubair ocus cuid do Clainn t-Suibhne, ocus do chuireadar chugad go maith no go rangadar in t-inedh andaroibhe O Neill. An uair do connairc O Neill a Muinntir da sandtu do fhill a n-agaid na tora, ocus do bris orrtha, ocus do marbad andsin Maol Muire mac Emaind do consabluibh na Muman, ocus fiched maraon ris. Do fhill O Neill slan edalach.

Maidhm do thabhairt air Roiberd mac Hanrigh duibh Diluin a n-Oirgeallaib meg Mathgamna, ocus e a dul na th-shiarrim ar Mag Uidhir; ocus do gabhudh e fein ocus do marbad a Muinntir; ocus Brían mac Aodha Oig meg Mathgamna tug in maoidhm sin.

Cland Murchada na Tuath mic Taidhg I Flathbertaigh do dul ar siubhal innsuighe go Connmaicne, ocus crecha mora do g-clagadh doibh. Saxanaigh do breith orrtha da bhanda do glere glanshluaigh, ocus dol do bualadh a chele doibh; ocus brisadh ar Muinntir Flathbertaigh, ocus Tadg O Flathbertaig mac Murchada, ocus Urun mac Murchada, ocus Tadg Og O Flathbertaigh, ocus ced maraon riu do marbad; ocus do g-crocadh Emann O Flaithbertaigh, mac Murchada na Tuath do bhí a laimh a n-Gaillimh an cedáoin eidir dha cháisg; ocus de satirnn casga do tugadh an máoim ag Caislen an Chathirtha a g-Cuilecha; ocus fa haubhal na hechta sin. Ocus do brisidar Clann Uilliam a coislen, ocus do loisgidar a tíghe ocus a n-arbhinna; ocus do brisidar Baile Atha Lethair, ocus osin siar go fairrge.

An Corinn ocus Tír Oilella do chrechadh do chloinn Rúairc .i. Eoghan ocus Brian Óg. Tír Fhíarach do chrechadh d'O Ruairc fen o Iasguigh saoir. Mac I Ruairc .i. Eoghan do dhul go machaire Chonnacht go n-dechaidh se go Cill Tolltog, ocus clann I Conchabhair Ruaidh maraon fris; ocus gan crech do ghlacadh dóibh do dhith marcsluaigh, ocus filledh tar a n-ais doibh go rangadar bothar sen n-domnuig. Siarrium na cunndae do bhreith orra .i. Ruisteirt Mápútar, ocus Clann n-Dugaill do bhreith orra annsin ocus banna saoididúr. An da fhedhuin sin do dhul an ordugadh ar cuinne a cheile, ocus brisedh ar Saxinachaib, ocus an brisedh sin do bheth orra go caisill Miadhacháin, ocus a n-druma ocus a m-bratach do bhúain díbh, ocus drem dhi-aireimhe dho-fhaisneisi do muinnter na Saxanach d'fhagbháil isin tres tegmhalach trenbhorb sin. Baile an Doire, ocus Liath Truim, ocus cluain Muire ocus Baile na n-Giolla do losgudh dhóibh.

Art mac Ruaidhrí Ghlais .i. fer brataigh Briain mhic Diarmada d'fhadhuil bháis an bliadhain sin.

O Conchobhair Ruadh ocus Tomaltach Óg Mac Diarmada, ocus Ruaidhrí Caoch Mac Diarmada do gabháil per dolum, ocus a g-cur go Ros Chumáin fo dhaoírsi mhóir.

Aos óg shleachda Sheoun a Búrc do thecht go Corunn, ocus crech do ghlacadh dhoibh. Tóir do bhreith orra; cur chum a cheile dhóibh; filledh dhóibh ar an tórad, ocus Cormac O Ruanaidh do mharbadh, ocus daoine ele nach airmed.

Mag Uidir .i. Cu Chonnacht Og mac Con Connacht, sgel budh mo a bheguibh dh'Eirinn d'fhadhuil bháis.

Ailinora ingen Iarla Desmhumhan do dhul dh'ec, ben I Ruairc .i. Brian mac Briain I Ruairc.

Ase ba tiaghirnna ón m-bannrioghan ar choigedh Chonnacht an uair sin .i. sir Ruisteirt Binngem, ocus an mheid nar chroch se do Clainn Uilliam do chuir se ag cogad ar an m-banrioghan íad, ocus Clann n-Domhnaill mar an cedna; ocus do chuir se sliochd Torrdhelbaigh Dhuinn I Chonchabhair ocus sliochd Aodha mic Feidhilim, ocus muinnter Fhlannigáin, ocus O Ruairc ocus mag Flannchaidh, ocus sliochd Eoghain mic Diarmada ag cogadh ar fen ocus ar an m-banrioghan. Ocus do rinne breid slatach sairthech do choigedh Chonnacht, ocus do chuir se sliochd Briain laoidhnigh ocus muinnter Airt san chogadh sin, an mhed nar chroch se dhíbh.

Mar do chualaigh giustis na h-Erenn in t-olc sin do chur ar Connacht do Bingamachaib, tainic se go feirg moir ocus go londus n-adhbail go rainic Gaillim, ocus ni thug se do sluagh leis acht ced marcach ocus ced coissighe; ocus do an in guibernoir a n-Ath Luain a stuider mar do millfeadh an cuid na ar mill se do cuigedh Conacht. Tangadar Clann Uilliam go Gaillim, ocus Murchad O Flathbheartaigh, ocus do ronnadar sith risin giuistis, ocus do chuiredar a m-braighde a laim muindtire na Gaillbhe.

Uilliam Taith ocus cuigear ar fiched soidiur, ocus cuigear marcach, do dul dochum in Bealigh Buidhe ar Corrshliabh doibh. Mac I Ruairc ocus sliocht Eogain meic Diarmada, ocus cuid do Clainn Donnchaidh, do bheith rumpu ar in m-bealach, ocus a do no tri do ceaduibh; ocus do eirgeadar sin dona Galloib, ocus do briseadar orrtha, ocus do marbad andsin ceathra ar fhichid, ocus do bainedh .x. n-eich ocus tri bairill fiona dibh, ocus do imigh Uilliam Taigh.

Mag Mathgamhna .i. Rossa Buidhe mac Airt Maoil dh'ec; ocus fa mor in t-echt sin. Brian mac Aodha Oig do rigad na inadh.

Maighistir Strainse ocus primfhaigh Arda Macha, ocus an giuistis Diluin, do dul go h-Ath Cille Sranain as hucht in giuistis, do dhenamh sithe re mac I Ruairc; ocus do roinneadar sith re chele fa chordia.

Risdeard mac Uater mic Seain mic Oliuerus a Burc do marbad d'urchar do gunna a Tulaigh Aodha, ocus fa mor in t-echt sin.

Seathan Ruad mac Lochlainn mic Phadin .i. mac I Maoil Chonre dh'ec, ocus fa mor in t-echt sin a leith daonachta ocus ealadhna. Siurtan mac Tomais na Capall dh'ec an iarnach andsan Eill ag Saxsanachaib.

Cuigadh Connacht uile ó Ath Luain go h-Eirne fa en olc o asaonta Gall ocus Gaoideal re chele.

Daioghre O Duibhgenain, doine ro bhind suilcuir, dh'ec.

Giolla Padraig Og mac Gilla Padraig mic Filip meic Toirdhealbaigh meg Uidhir, ocus fear ocus ochtar maraon ris, do marbad re Conchobar Og mac Conchobair Ruaid meg Uidhir, ar teacht doibh le Dondchad Óg mac Donnchada meg Uidhir air Conchobar Og, do dhenamh g-clagachas air; ocus do baineadh fiched no dho ech dibh, ocus do loiteadh se fir dheg ar fiched do daoinuibh Donnchada Óig, ocus do bith siubhal tri mile air.

Aodh mac Conchobair Oíg mic Muircertaig meic Diarmada Ruaidh dh'eg, ocus ba mor in sgeal sin a leath laime ocus daonachta; ocus tri la ria ced fheil Muire sa fomar d'eg se; ocus do cuireadh e a Mainistir na Buile; ocus do marbad a mac roime sin re sliocht Eogain meic Diarmada .i. Fear Dorcha mac Aodha; ocus Eogan mac Ruadhri mic in Ghiolla Dhuibh meic Diarmada Ruaidh do marb é.

Sluagh Saxsanach do chur don guibhernoir go h-Ichtar Connacht, ocus tugadar lamh ar O n-Dubhda do chreachad, ocus ni ar eirig sin doibh ce do chuadar go Cill Ghlais ocus go h-Eisgir Obhuinn; tangadar tar a n-ais go Cuil Cnam ocus do mhilleadar andsin moran bith ocus edigh; ocus do chuadar assin go Gleann Dallain, ocus ni bh-fhuaradar edail na amhantur andsin. Ocus do roindedar in treas siubhal ar th-shliocht Eogain meic Diarmada; ocus ce do chuadar go Tir Tuathil ocus go Coilltib Conchobair, ocus tar Droiget mic Maonaigh suas, ni ar eirig ádh na amhantur dhoibh; ocus do búd coir do Dia gan édail d'faghail doibh; siublaighthe feille do roindeadar. Seon Bingam cend in t-sluaigh sin .i. derbhrathair in guibernoir; ocus ni thainic a Connachta riamh comholc a roibhe ar in sluagh sin, oir ni roibhe duine sa doman da rabhadar dileas a c-cill na tuaith.

Sen badun Sligigh ocus Droim na Sgolb do losgadh do Muinntir Airt.

Brian mac Aodha Óig meg Mathgamna, ocus Aodh Ruad mac Airt Mhaoil, do dul go baile Atha Cliath, dochom brethe in ghiuistis ocus na comarle fa thigernus Oirgheall meg Mathgamna; ocus do rugadar na maithe sin in tigernus d'Aodh Ruadh mac Airt Maoil, ocus do chuir in giuistis se banda le Aodh Ruadh, ocus do goir se tigerna de. Do imthigh mac Aodha Oig amhreigh da duthaigh fein go Dartraoi, ocus do fhag se in tír ocus do rug a caorighacht leis fo na daingnithuibh, ocus do fhag se Rudraigh a derbrathair a bardacht Dartraoi. Ocus do gabh captin Pluincet dochum a tíre, ocus do th-siol se go roibh si falamh; ocus do eirig Rugrigh doibh ocus do chuir se chucu, ocus do bris orrtha, ocus do marbad in cuid ba mo da banna air captin Pluincet. Do milleadh in tir eatorra .i. mac Aodha Óig ocus mac Airt Maoil.

Mac I Neill .i. Conn mac Seain do leigean as braighdenus d'O Neill in bliagain se, ocus crecha mora do dhenam ar iarla Ulladh do p-fein ocus da bratrib.

Uilc mora a n-Ulltoib ocus Connachta in bliagain se.

Don h-Antuine derbhrathair rígh Portingeal, do bhí ar innarbad fáthré banrigan Saxsan .i. Elisdabed, o do marbad righ Portigeal a cath leis in Turgach, ocus do indarb righ na Sbainne don h-Antuine an uair sin, ocus do bhain sé in righeacht ocus cathair Liosbuinne de, ocus do mharb sé a daoine uile; ocus ata sé faris in m-banrighan o shin; ocus do chuir si armail leis dochum a duthaide .i. cuig mili dheg, ocus cuig mile dhec eile, inann sin ocus .x. mile fiched. Ocus do chuadar go Liosbuind, ocus do marbadar moran daoinedh, ocus do loisgeadar aroibhe on prim chathruigh amach ar gach taobh di. Do rugadar Sbainnigh orrtha, ocus do tuit meid athrithe do miltibh atorra, ocus do tuit ocht mile dhec do th-Shaxsanaib ann. Ocus is iad so anmanna na h-armala do chuir in banrigan le don h-Antuine .i. sir Seon Norais ocus iarla o bh-feauig, ocus sir Framsa Drach, ocus deich mile fhiched maraon riu; ocus do marbad dibh sin ocht mile d'eg a Lisbuin. Ni fes duin dith Sbainech.

Righ Frang do marbad do brathair per dolum, oir do búdh coir do Dia sin; do rinne se fein feall, oir do marb se duice o Cuibes.

In giuistis do theacht go Gailluibh .i. Uilliam Faoiuilliam, ocus tanic mac Uilliam ocus Murchad na Tuath 'na cend, ocus do roindedar sith ris; ocus do chuaid in giuistis assin go Sligech, agus tainic se assin go Rosa Chomain, ocus do roindne sith re Connachtuibh uile; ocus do chuaidh assin a n-Ulltoib, ocus do chuaidh moran do maithuibh Erenn leis, ocus do roinde sith etir clanna Neill.

Indsaoighe laoi do tabairt d'Aodh Ruad mac Airt Mhaoil Meg Maghamna ar Brían mac Aodha Óig Meg Mathgamna, ocus se fior dhec da muinntir do marbad air an lathair sin.

Ruadhri Caoch mac Taidhg meic Tomaltaig mic Diarmada, ocus clann Maoil Ruanaid mic Tomaltaigh, ocus clann I Conchubhair Ruaigh, do bualudh fa chele an ard mic n-Eogain andsan aoidhche, ocus do marbad andsin mac I Fhlanagain .i. Emann mac Briain, ocus do marbad don taoibh abhus mac meic Diarmada Ruaidh .i. Sean mac Taidg mic Chonchubair Oig mic Muircertaigh.

In t-easpog magg Congaile .i. in Gilla Glas dh'ec andsna Cealluibh Bega, agus fa mor in t-echt sin a leith inigh ocus daonachta.

Toirdhealbach O Briain, .i. mac Taidhg mic Conchobair I Briain, dh'ec.

Conndaois Tuamuman .i. ingen mic I Briain Aradh, ocus Una a h-ainm, dh'ec.

Brian mac Maoil Ruanaidh meic Fergail, .i. in cleirech dob ferr do bíth an Erinn, do h-ég sechtmain ria samhuin ar an n-Grainsigh moir, ocus ba h-athbail in t-echt sin a leith daonachta ocus ealeadhna.

Creacha mora do dhenamh do iarla Uludh ar U Cathain, ocus an cedna do dhenamh do cloind t-Seain I Neill, ocus do mac Toirdealbaigh Luinigh .i. mac I Neill, ar Cormac mac in bharuin, du and aroibhe dá ced dheg bo. Moran do caoriacht I Neill do dul a Fearmanach a tethed, ocus mar do chualaigh an t-iarla a brathair do crechadh do len se caoriacht I Neill go Fearmanach, ocus do rug se fiched ced bo leis. Do ruind in t-iarla na creacha, ocus do ranic se ced bo e fein; ocus do leanadur drong do marcsluagh I Neill in t-íarla ar a drouim, ocus do rug siad in se ced bo sin uadha.

Mac Tomaltaigh mic Diarmada .i. Tomaltach Óg do rédhudha do Brian mac Diarmuda ocus do mac Dábíth as prisun na banrigan.

Mac Fergail Oig I Raighilligh .i. Brian do marbad a feall do th-shiarriam na Brefne .i. Edubhard Hoireabeart, ocus a muighe Bhrecrighe do roindeadh in marbad sin; ocus fa h-adhbail in t-echt sin a leith einigh ocus uaisle.

Fiachra mac Dhahí I Dubhda dh'ec.

Donnchad Grana mac Uilliam Oig mic Uilliam mic Conchobair .i. tigerna Coilleadh in bogaidh dh'ec.

Mac Diarmada Ruadh .i. Muirges mac Conchobair Oig mic Muircertaig dh'ec a tosach in geimrigh.

Maghnus mac Coind mic in Calbaigh I Domnaill do marbad re sliocht Cormaic Buidhe I Ghallcubair.

Ingen I Falluin .i. Sile ingen Cobhuigh, in ben do bhith ag Cedach mac Domnaill I Ceallaigh, dh'ec.

Briseadh coinde do thabairt ar Tomaltach Óg mac Tomaltaig mic Diarmada, do clainn I Conchobair Ruaidh ocus d'O Flannagain, .i. Brian mac Emainn, ag Ard in Chomla, ocus do marbad annsin Brian mac Eogain Granna, ocus Donnchad Dubh mac Donnchada Grana, ocus Dubhghall mac Giollashamais, tri seachtmuine ria nollaig.

Tar eis righ Frang do marbad don bhrathair dar chomainm Sechapim, adubairt righ da Nabharra go m-beath righeacht na Frange aige fein, ocus adubairt priansa Premuinnte daar chomainm duibhce Saue go m-beath righecht na Frange aige fein. Do cuir banrigan Saxsan deich mili fer do chomhnam le righ da Nabharra. Do chuir cing Filip iumad daoineadh do congnam le prinsa Permuinte, ocus do cuiredh cath eidir na righuibh sin, ocus do tuit seacht mile fiched atorra.

Eogan mac Bríain mic Bríain mic Eogain I Ruairc, fer a oisse is ferr tanic do t-sliocht Aodha find re fada, dh'ec in treas la don nodlaig.

Mac mic Goisdealb .i. Uilliam Caoch mac Siurtain mic Seain Dhuibh, ocus Uilliam mac Seain mic Maoilre Ruaidh, do marbad ar Sliabh Muire le Donnchad mac Emaind Bodhair I Ceallaigh, sechtmuin ria nodlaic.

In giuistis do teacht go Gaillim sluagh di-airme caoicis ria nodlaig, do dhenamh sithe re Clainn Uilliam ocus re Clainn Domnaill.

Mac I Neill .i. Aodh Geimleach mac Seain do gabhail re Seaan mac Meg Uidir a feall a tig marcaigh do Muinntir Meg Uidir. Tainic iarla Thire h-Eogain go Feruibh Manach, ocus do gabh se Mag Uidir, ocus do marbad ochtar da muintir, ocus do rug in t-iarla leis Aodh O Neill; ocus do tug se fiche ech do th-Shethan Mag Uidir do chind a droch sherbisse; ocus dochum a mhillte do rug se Aodh O Neill leis.

Maolsechlainn Óg mac Cormaic meic Donnchada, adhbhar righ O n-Oiliolla, d'eg a n-errach na bliadna sa, ocus fa adhbal in t-echt sin mac ingine Mic Diarmada a leith uaisle ocus inigh.

Kll. Ianair for Derdaoin, ocus assi aois in Tigerna deich m-bliadna ocus ceithre fiched .ccccc. ogus mile.

O Ceallaigh .i. Aodh mac Donnchada mic Emaind I Cheallaigh, ocus fa uasal arrachta in fear sin, ocus an ced la don bliadain do fuair bas .i. la nodlaic beg, ocus do cuireadh e a cill Findbuidhe, et ba h-adhbail in t-echt sin.

In giuistis do fhagbhail na Gaillme tri sechtmuine iar nodlaig, ocus ni ar fhag se sith na socracht a Connachtuibh don dul sin; ocus do an in guibhernoir a n-Gaillim do genamh g-cogaid eir Clainn Uilliam. Clann meic Uilliam do teacht go h-Airteach, ocus ar a bh-filledh doibh tar a n-ais tugadar sgathadh don bheann fada, ocus do marbad andsin Anntuine mac Uater Caoich mic Tomais Duibh mic Shiurtain, ocus diolunach eile, ocus do loisgeadh in baile o caislen amach.

Mac I Neill .i. Aodh Geimlech mac Seain mic Coind, iar na gabhail a feall do th-Sheaan mac Meg Uidhir, ocus a thabairt d'Aodh O Neill .i. iarla Tire h-Eogain; ocus do croch in t-iarla in mac sin I Neill do nemthoil aroibe a Tir Eogain uile, ocus fa adhbail in t-echt sin.

Conn mac Neill Óig, tigerna Clainne Aodha Buidhe, dh'ec.

Mac mic Domnaill na h-Alban, Samairle Buidhe, dh'ec.

Brian Carrach mac Cormaic dh'ec.

Sean mac Briain mic Felim Bacaigh I Neill do marbad le mac Samairle Buidhe, ocus ba h-adhbail na h-echta sin.

Mac Mic Diarmada .i. Maol Ruanaidh mac Aodha Mic Diarmada, do marbad re Tomaltach mac Taidhg mic Eogain Mic Diarmada, ocus re Ruadhrigh Caoch mac Eogain mic Taidhg mic Ruadhri Mic Diarmada, andsa Chaladh a feall, ocus fa truagh in gniam sin.

Sir Risdeart do dul sluagh di-arme ar clainn Uilliam no go rainic sliabh bo Aodha. Cuid do Clainn Uilliam ocus do Clainn Domnaill do eirge doibh, ocus troid do thabhairt da celi doibh, ocus began marbhtha do dhenamh atarrudh air gach taoibh. In guibhearnoir do dul go Baile Assa Caorach, ocus foslongport do dhenamh do and, ocus dul assin do don Lagan. Mac Uilliam ocus a chineadh, ocus Clann Domnaill, do beith a bh-foslongport re taoibh in t-shluaigh Gall sin. Cuid do ceirind in t-sluaigh do teacht do losgudh arbha Uater a Burc, ocus do rug orra Mac Uilliam ocus Uater Citach, ocus do marbad dias don cheirind; ocus do bhuail neach acu-san Mac Uilliam do bhuile ar a chois, ocus do ben se a cos de; ocus Uilliam Caoch mac Dabhi mic Emaind in Mac Uilliam sin. Do gabh in guibearnoir suas tar ais go rainic Conmaicne Cuile, ocus tangadar Cland Uilliam ocus Cland Domnaill na ceann, ocus tugadar braighde don guibernoir, ocus tainic tar ais go Ath Luain.

O Conchobair Donn do leigen ass a braighdenus. In t-O Conchobair sin ocus Seon Bingam do dul a Muige Luirg, ocus Brian mac Diarmada do gabail doibh go fealltach. Sior Tomas Straise dh'ec a n-Gaillim, ocus bodh mor in t-echt sin, oir ni roibhe a Connacht mac Goill bhudh mo do sgel do Connacht na e. In sluagh sin ro ba measa iocht ocus congheall do bhí ar feadh Erenn, re ar gabad Brian mac Diarmada mart inide; do rugadar é an oiche sin go baile Tomaltaigh Oig meic Tomaltaig Mic Diarmada, ocus do mhilladar moran san bhaile sin daar comainm Baile in Coillin; ocus do rugadar Brian riu ar na maireach, ocus do cuiredar marcthshluagh leis co Ros Chomain; ocus cedaoine in luathridhe sin do tundrad. Ocus do chuadar an aoidhche sin go h-Airtech, ocus do chrechsiad sliocht in persuin mic Muirgesa, ocus mac Ruaidri I Uigind; ocus do marb O Conchobair Donn Cathal mac Eogain mic an Fhileadh re na laim p-fein gan adhbar ar bith, ocus ni ar marbad re cian d'aimsir a macasamla fein d'echt bhúdh mó na Cathal mac in fhileadh. Ni beg sin, acht bendacht ar anmain.

Diarmaid Dall mac Ruadri mic Taidhg Mic Diarmada dh'ec, ocus dobh uasal deigheinigh daonachtach in fer sin; ocus in ced Derdaoin don corghas teasta Diarmaid, ocus testa maighistir Strainse, ocus do marbad Cathal mac in Fhileadh. A Lios a g-Coirce a Tigh Baoidhin do roinde an marbad sin an cuigeadh la don mharta.

Diarmaid mac Cathail mic Cathail Ruaidh I Conchobair, .i. biocaire Tempoil an Aoidhnein, ocus do bhí a fad roime sin na prioir ar brathraib Rossa Chomain, dh'ec a Ros Chomain; ocus fa maith in duine in Diarmaid sin mac Cathail Ruaid Beig meic Cathail Ruaid eile.

Mac I Ruairc do dul ar siubhal innsuighe a Corann, ocus crech do g-clacadh dho. Seoirse Bingam ocus Aodh Mus do bhreth orra a torigecht. Filleadh ar an toir, ocus .x. ar fiched do marbad dibh, ocus Aodh Mus do lot.

Barda Saxsanach do fhaghbhail a n-Dun gar in la do marbad Cathal mac in Fileadh.

Sluaghedh adhbail mor do cur don guibernoir air O Ruairc go Muinntir Eolis a tosach in marta, ocus do rugadar ar deich ced bo; ocus do bhidur an aoidhche sin a Maothail; ocus do cuadar go Liatruim ar na mhaireach, ocus do bhídar da aoidhche annsin; as sin doibh go Fionach, ocus do badar tri aoiche and; as sin doibh go Druim Oirialaigh, ocus do badur ceitri aoidhche ann; ocus do tugadar braighde Cionoil Luachain ocus Teallaigh Choncho leo, ocus do loisgeadar formor in tire. Capten Groin do lot, ocus dias no triur da muinntir do mharbad, ocus cethar do Muinntir I Ruairc do thuitim leis sin t-athcur sin. Tanic braighe o chomharba Fiodhnach, ocus braighe o chomharba Druma Oiriallaigh, ocus tangadar fer ocus ochtar o Muinntir Eoilais etir cill ocus tuaigh, do braighdibh le Sagsanachaib don dul sin. In Brefne do losgad don t-shluagad sin.

Seoin mac Eogain I Chraoieoin, in mac cennighe is lutha is olc do bith a n-Erinn, dh'ec a Sligech, ocus ba mor in t-echt sin.

Barda sagsanach do chur a m-baile I Birn, ocus e fein do chrechadh. Muighe Luirg uile ocus Airteach do mhilledh dona sluaightuibh sin; ocus filleadh tar a n-ais doibh, ocus do an a dho no tri do ceduib re h-adhaigh cogaid I Ruairc; ocus mac Taidhg I Ruairc, ocus mac Aodha Gallda I Ruairc, do g-congnam acu sin a n-aghaid I Ruairc. Foslongport I Ruairc do beaith a nDartraoibh, ocus Brian mac Briain mic Eogain I Ruairg in t-O Ruairc sin.

Mac Tomaltaigh mic Muirgesa mic Tomaltaigh Mic Diarmada Ruaidh .i. Emann, ocus Cathal Óg mac Cathail mic Maghnuasa Meic Diarmada Ruaid, do marbad le Domnall na capall maig Domnaill.

Braighde do bhí a laimh a m-Baile in Mhutta, ocus do tiongadar in baile do gabail .i. Feidhlim Og mac Maghnusa mic Ruaghraide, ocus Feidhlim Dartighach mac Aodha meic Conchobair Oig I h-Airt; ocus do marbad annsin iad, ocus ni ar gabhadar in baile.

Sluagh Sagsanach do dhul go Darttraoibh. O Ruairc ocus Mag Lannchaidh do bheith a bh-foslongport rompu sa tir, ocus ar bh-fagbail fhoslongpuirt I Ruairc do Mag Lannchaidh do buailed a naimde uime .i. Maoilseachlainn Mag Lannchaidh ocus drem ele don t-sluagad fa Mag Lannchaidh, ocus do marbadar e ocus ochtar maraon ris; ocus do cuireadh a cenn go h-Ath Luain.This concludes the Irish text of the Clar. fragment, which terminates on folio 40 b. The next few entries, which belong to a later period than is embraced by the chronicle, are copied from memoranda added by different hands in the MS H. 1.19.

Anno Domini 1595.

Seóirse Óg Biongam do marbadh a Sligech re h-Uillioc a Búrc mac Remund na sgúab, ocus an baile do thabhairt d'O Dhomhnuill .i. d'Aodh Rúadh mac Aoda mic Maghnuis; ocus is mór do leasuigh an marbad sin fa feruibh Condacht, don mheide dibh do bí ar dibert.

Kll. Enair 1599.

Ben Mhumhan Og ni Dhuibhghennain, ingen Pháidín mic Mhaoilechlainn mic Dubhthaigh Óig mic Dubhthaigh Mhóir, do thógbáil an lechta do chlochaibh snoighte atá ós ur thobair mhóir na Sgríne, re h-anam a fir posta .i. an biocaire mac Domhnaill, ocus Eoghan mac Domhnaill ainm in biocaire sin féin;

ocus Maire ingen Taidhg Dhaill Uí Uiginn do bhreit in bhliadhain rémhráiti si; ocus bennacht Dé for na h-anmannaibh sin.

Kl. Enair. An bliadhain so d'áois an Tigerna anno Domini, Míle ocus se ceud ocus dá bliadain deug.

Maoileoin Uá Daluig d'éucc lá feile na marb; ocus a adnacal in Inis Muiredhaigh, iar m-breith búaide ó domhan ocus ó dhemhan; ocus gach aon da leighfidh so tabhradh bennacht ar a anmuin.

Kll. Enair for domhnach, Anno Domini 1636.

Brian Og mac Briain mic Ruaidri mic Taidg mic Ruaidri Óig, .i. tiagerna Muighe Luirg ocus Airtigh ocus Tíre Tuathail, fer a aoisi ocus inme acus a ard tigernuis as ferr tainic do Gaoidealaib Iartair Eorpa ré linn fein, oir ass e as mo ro tiodlaic ocus ro toirbir do ollamnaib ocus d'eigsib ocus d'aois ealadna, do cuirib, do cliaruib ocus do coiccriochaibh, do endgaib, do irisibh, ocus d'iodhanorduib, do bochtaib, do baintreabachaib ocus beigionnmusuib, do duraibh, do dallaib ocus do deiblennaib de, do roignib, do riognaib ocus ro galgadaib; do uaislib, do oirfidib ocus do adbail senoiribh; fer congmala gach cora, gach cirt ocus gach caoinbes, fer di-cuirte gac uilc, gach egcora ocus gach aidmillti; fer cennsaighthi na c-coirtech, ocus na c-coilleched; fer metaighte gach maitiusa ocus gach mortoiche, go n-iomad d'fios ocus d'eoluis ocus d'foglaim, do gaois, do goil ocus do gaiscid, do brut do brigh ocus do buantoirbirt; fer as mo ro cennaig do duantaib, do drechtaib, ocus do d'eg moltuibh ina coimre fein; fer fuillinga na n-ainder, na n-dilocht, ocus na n-dilleactaib; fer tige aoidhed coitcinn da gach luirg no lenfad é an aimsir a n-esbada ocus a n-adbail uiresbai; ocus as cosmail go b-fuair luac a daonnachta ocus a deg croide on trinoid tre persannaig, oir adber gach doctuir ocus gach diadaire an tan as eatal an betha gurab amlaid an bas, ocus mad maith ocus mad andocc an bas go b-fuighe an focraig tall amail as techta do. Iar n-dul go h-Ath Luain do, ait arabadar maite Connacht ar a cionn ag cur a c-comairle um comoircill plantasion, galar a ega da gabail isin baile sin .i. disinteria, ocus fuair bas an t-octmad la fichit do mi Ianuari, dia Satairn do sunnradh, iar m-buaid ongtha ocus aitrige, ocus iar m-breth buaide o dhomun ocus o deamun, ocus as lamaib il-imad ord ocus egailsech, ocus iar n-glacad aibide sanct Doimnic uime, ocus iar m-beth tri bliadna deg ocus fiche ocus raithe a t-tigernus a tire ocus a talman fein da t-toil ocus da n-aonta buddein, ocus iar m-beith tri bliadhna deg ocus da fichit d'aois dó an tan adbath; ocus a adlacadh go h-uasal onorach a c-Cluain mic Nois fo diden De ocus Ciarain, la feil Brigdi; ocus ro h-adnacht, din, fice tiagerna da cined san roilic-sin roime.

Iarla Antrom .i. Ragnall Arannac, cenn oinigh ocus oirbertuis a tire ocus a talman fein, d'fagail bais an bliadain cedna.

Sir Seon Cing .i. sen ridire do comairle na h-Erenn, mortuus.

Maoilechlainn O Ceallaigh .i. mac I Ceallaigh, aon rogha a thire d'eg in hoc anno.

Ar mór ar daoinib an bliadain si lasin m-bolgach bhig.

Aodh mac Brían mic Ruaidhri mic Diarmada d'éag a n-Gránsigh na Manach, an cethrumha la dég do mí Márta 1648.

Maol Ruanaid mac Aodha mic Diarmada ro scriob an began sin, 1652.