Corpus of Electronic Texts Edition

Annals of the Four Masters (Author: [unknown])

Annal M2820

M2820.0

Aois domhoin, da mile ocht c-ced fiche bliadhan.

M2820.1

Naoi mile do ecc fri h-aoin-sechtmain do muinter Parthaloin for Shenmhaigh Ealta Eadoir .i. cúig míle d'feroibh, & ceithre míle do mnáibh. Conadh de sin ata Taimhleacht Muintere Parthalain. Trí ced bliadhain ro caithsiot i n-Erinn.

M2820.2

Ere fas triochat bliadhain go t-tainicc Neimhidh.

Annal M2850

M2850.0

Aois domhoin, da mile ocht c-ced caocca.

M2850.1

Neimhidh do techt in n-Erinn. Is an dara lá décc iar t-techt do Neimhidh co na mhuintir at-bath Macha ben Neimhidh. At iad annso na cethra h-airigh batar lais, Sdarn, Iarbhainel Faidh, Fearghus Leithderg, & Aindind. Ceithre meic Neimhidh iad-sidhe. Medu, Macha, Yba, & Cera, cetheora mná na n-aireach-sin.

Annal M2859

M2859.0

Aois domhoin, dá míle ocht c-ced caoga a naoi.

M2859.1

Isin m-bliadhoin-si ro mebhaidh Loch n-Dairbrech & Loch n-Ainnind h-i Midhe.

M2859.2

At iatt annso na ratha ro toccbadh, na moighe ro slechtadh, & na locha ro tomaidhmsat ind aimsir Nemhidh, gen go b-foghthor bliadhna sainredhacha forra. Rath Cind Ech i n-Uibh Niallain; Rath Ciombaoith h-i Seimhne, Magh Cera,

p.10

Magh n-Eabha, Magh Chuile Toladh, & Magh Luirg h-i c-Condachtoibh; Magh Tochair i t-Tir Eogain; Leagmagh i Mumhain; Magh m-Brensa i Laighnibh; Magh Lughadh i n-Uibh Tuirtre; Magh Seredh h-i t-Tethba; Magh Semhne i n-Dal Aruidhe; Magh Muirthemne i c-Conaille; & Magh Macha lá h-Airghiallaibh. Loch Cal i n-Uibh Nialláin, & Loch Muinremhoir h-i Luighnibh h-i Slebh Guaire. Cath Murbuilg i n-Dál Riada. Cath Boghna, & cath Cnamrossa, for Fomoiribh. Ro bris Nemhidh iad-sidhe.

M2859.3

At-bath Nemhidh iaromh do thamh i c-Crich Liatháin i Mumhain trí mile mar aon ris i nd-oilen Arda Nemhedh.

Annal M3066

M3066.0

Aois domhain, trí mhile sescot a sé.

M3066.1

Toghail, tuir Conainn isin m-bliadhain-si la síol Neimhidh for Conainn mac Faobhair, & for Fomoribh ar chena a n-dioghail gach dochraidhe da t-tardsat forra, amhail as follus isin croinic da n-goirther

p.12

Annal M3266

M3266.0

Aois domhain, trí mhile da ched sesccat a se.

M3266.1

Fir Bolcc do gabhail Eirionn a b-foirchend na bliadhna so. Slainge, Gand, Genann, Seangann, & Rudhruighe a c-cóig toisigh. Cuig meic Deala mic Loich iad-somh. Ro ríoghsat an cethror oile & Fir Bolcc ar chena Slainge uaistibh.

p.14

Annal M3267

M3267.0

Aois domhain, tri míle dá céd seasccat a seacht.

M3267.1

Slainghe mac Deala do beith i ríghe Erionn frí re aoinbhliadhna, & a écc i foircenn na bliadhna sin i n-Dionn Rígh for bru Berbha.

Annal M3268

M3268.0

Aois domhoin, trí mhile da céd seasccat a h-ocht.

M3268.1

Rudhruidhe mac Deala do gabhail ríghe n-Ereand.

M3268.2

An chéd bhliadhain dia righe innsin.

Annal M3269

M3269.0

Aois domhain, trí míle dá céd seascat a naoi.

M3269.1

An dara bliadhoin do righe Rudhruidhe, & a écc i bh-foircionn na bliadhna-so.

Annal M3270

M3270.0

Aois domhain, tri mile da céd sechtmoghat.

M3270.1

An céd bhliadhain do righe Gainn & Geanainn os Erinn innsin.

Annal M3273

M3273.0

Aois domhain, tri mile da céd sechtmoghat a trí.

M3273.1

An cethramhadh bliadhain do Gann & do Geanann, & a n-écc do tamh a b-foircend na bliadhna so h-i c-Crích Liathain co f-fichit céd ar aon riú.