QUADAM die Baitheneus, ad Sanctum accedens, ait, ‘Necesse habeo ut aliquis de fratribus mecum Psalterium quod scripsi percurrens emendet.’ Quo audito, Sanctus sic profatur, ‘Cur hanc super nos infers sine causa molestiam? nam in tuo hoc, de quo dicis, Psalterio nec una superflua reperietur litera, nec alia deesse, excepta I vocali, quae sola deest.’ Et sic, toto perlecto Psalterio, sicuti Sanctus praedixerat repertum exploratum est.