Corpus of Electronic Texts Edition
Annalium Hiberniae Chronicon ad annum MCCCXLIX (Author: Friar John Clyn)
annal 1348
1348.0
1348.
1348.1
In mense Julii et Augusti, dominus
Fulco de la Frene habens curam et custodiam terrarum comitis
Ermonie, ipso comite in Anglia commorante, tenuit magnam
gardam apud Nenaht, et reduxit abjectos, revocavit ad propria
fideles exulatos, muros confractos et diruptos per Hibernicos per
ipsos reparari fecit et coegit, et cum magna multacione et gravi redempcione
vaccarum et obsidum deliberacione, ad statum primum et subjectionem debitam
(quod omnibus videbatur fieri non posse) compulit redire.
1348.2
Item, obiit Laurencius de
Hastingis comes Penbrochie.
1348.3
Item, hoc anno et maxime mense Septembri et Octobri
convenerunt undique de diversis partibus Hibernie, episcopi et
prelati, viri ecclesiastici et religiosi, magnates et alii, et comuniter
omnes utriusque sexus ad peregrinacionem et vadacionem aque de
Thaht-Molyngis, turmatim et in multitudine, sic ut multa milia
hominum simul illuc multis diebus convenire videres, quidam venerunt
devocionis affectu, alii (sed plures) pestilencie metu, que tunc nimis
invaluit, que primo juxta Dubliniam apud Howht
Dalkey et Drovda
incepit, ipsas civitates Dubliniam et Drovhda fere
destruxit et vastavit incolis et hominibus. Ita ut in Dublinia
tantum, a principio Augusti usque nativitatem Domini xiiij. milia hominum
mortui sunt, hec pestilencia ab oriente ut dicebatur incepit, et per
incredulos et Saracenos transiens, de eis octo milia legiones
hominum interfecit.
1348.4
Item, in provincia, Avinione civitate ubi tunc
Romana viguit et fuit curia, a Januario precedenti incepit, tempore
Clementis Pape VI. ubi et ibi ecclesie et cimiteria
civitatis non sufficiebant capere mortuorum corpora tumulanda. Et dominus
ipse papa ordinavit unum cimiterium
p.36
novum consecrari, in quo mortui ex clade pestilencie interfecti
reconderentur. Ita ut a mense Maii usque Sancti Thome
translacionem quinquaginta milia et eo amplius corpora sunt sepulta in eodem
cimiterio. De ista pestilencia facta est visio mirabilis (ut dicebatur) anno
precedenti scilicet 1347, in claustro Cisterciensium Tripolis, sub
hac forma; quidam monachus celebravit missam coram abbate suo, uno ministro
presente, et inter ablucionem et communionem misse apparuit quedam manus
scribens super corporale in quo predictus monachus confecerat. Cedrus alta Libani succendetur et ibidem
Tripolis destruetur, et Acon capietur, et marchionatus
mundum superabit, et Saturnus insidiabitur Jovi, et vespertilio fugabit
ducem ab mundo universi. Infra xv. annos erit una fides et
unus Deus, et altere evanescent, filii Ierosolomitani a captivitate
liberabuntur, gens quedam nascetur sine capite; ve in clero et sterilitate
navicula Petri jactabitur vallidis fluctibus sed evadet et
dominabitur in fine dierum. In mundo erunt multa prelia et strages magne, et
fames vallide, hominum mortalitas per loca, regnorum mutaciones, et terra
Barbarorum convertetur, ordines mendicantes certe quam plures
adversabuntur; bestia orientalis et leo occidentalis universum mundum suo
subjugabunt imperio; et pax erit in toto orbe terrarum; et copia fructuum
per xv. annos. Tunc passagium erit commune ab omnibus fidelibus ultra aquas
congregatas ad Terram Sanctam. Et civitas Jerusalem glorificabitur;
et sepulchrum Domini ab omnibus honorabitur; in tanta tranquillitate nova
audientur de Antechristo. Vigilate. Non est auditum a principio seculi tot
homines pestilencia, fame aut quacunque infirmitate tanto tempore mortuos in
orbe; nam terre motus, qui per miliaria multa se extendebat, civitates,
villas et castra subvertebat absorbuit et subversit; pestis ista villas,
civitates, castra et oppida homine habitatore omnino privavit, ut vix esset
qui in eis habitaret, ista pestilencia sic erat contagiosa quod tangentes
mortuos vel inde infirmos incontinenter et inficiebantur et moriebantur, et
confitens et confessor simul ducerentur ad sepulchrum. Et pre timore et
horrore, pietatis opera et misericordie, videlicet, visitare infirmos et
mortuos sepellire, homines excercere vix audebant. Nam multi ex antrace et
ex apostematibus, et pustulis que creverunt in tibiis et sub asellis
axillis, alii ex passione capitis et quasi in frenesim versi, alii spuendo
sanguinem moriebantur. Iste annus fuit ultra modum consuetum mirabilis
insolitus et in multis prodigiosus, fertilis tamen satis et habundans, etsi,
morbidus et mortalis. In conventu Minorum de Drouda xxv. et in
Dublinia apud eosdem xxiij. fratres mortui sunt, ante usque
Natale.
1348.5
Item, die Martis in
p.37
crastino Purificacionis, Connili O'Morthe patrie
sue princeps et dominus per germanos ejus in quibus confidebat, cum quibus
ipso die simul epulabatur confidenter, quorum filios pro fidelitate et
subjeccione sibi servanda tunc habebat obsides, natorum suorum necem non
formidantes, et in perjurii crimen incidere non verentes, ambicio dominandi
fraternum fedus disjunxit et seperavit; et rupto vinculo fraternitatis,
spreto amore et federe sanguinis, eum prodiciose occiderunt, et quos venter
et uterus unius mulieris suscepit, tota illa terra et patria recipere non
valebat; nec aufertur nec etiam differtur inde vindicta, nam octavo die
Anglici de Ossoria, qui partem ipsius
Conyl fovebant, patriam intrantes, communi consensu populi
filius ejus primogenitus Rury in principem est electus et
acceptus, et Anglicis Ossorie ad sua ut volebant
revertentibus, David O'Morthe, occisi germanus,
eis obstitit cum quibusdam Anglicis comitatus Kildarie et
Cathirlaht, in quodam passu arto aliquos equos, qui sarcina et arma
Ossoriensium portabant, abstulerunt, et ibi occisus ipse
David, vir potens, dives et discretus post
Conyl de sanguine parem non habens, et sic vitam perdidit,
regnum et germanum; alii vero fratres omnes consentientes exulati patriam
dimittere coguntur.
1348.6
Ista pestilencia apud Kilkenniam in xl.a
invaluit, nam vi.to die Marcii viij Fratres Predicatores infra diem
Natalem obierunt, vix in domo unus tantum moriebatur, sed communiter vir
et uxor cum natis eorum et familia unam viam, scilicet mortis, transierunt.
Ego autem frater Johannes Clyn de Ordine Minorum et conventu Kilkennie hec notabilia facta, que tempore meo
acciderunt, in hoc libro scripsi, que occulata fide vel fide digno relatu
didici, et ne gesta notabilia cum tempore perirent et a memoria recederent
futurorum, videns hec multa mala et mundum totum quasi in maligno positum,
inter mortuos mortem expectans donec veniat, sicut veraciter audivi et
examinavi sic in scripturam redegi, et ne scriptura cum scriptore pereat, et
opus simul cum operario deficiat, dimitto pergamenam pro opere continuando,
si forte in futuro homo superstes remaneat, an aliquis de genere Ade hanc
pestilenciam possit evadere et opus continuare inceptum.