1334.
In festo Tibertii et Valeriani, inceperunt Burgenses Kylkennie pavimentum Kylkennie facere, scilicet, die Jovis.
Item, die Dominico in vigilia beati Marci ewangeliste, Thomas Fanyn intravit castrum de Moytobyr, et occupavit; ejectis inde hominibus domini Eustachii le Poer et exclusis. Et pro castri defensione, eadem ebdomada occiderunt castri custodes, Remundum et David de Angulo, et Thomam Roht-Grasse; et Sabbato sequenti compulsi sunt reddere castrum Jacobo comiti Ermonie tanquam domino comitatus, et in manu media, donec discuteretur quis pinguius jus haberet.
Item, .....[gap: extent: a few letters] Kal: Augusti David filius David de Barry, dominus de Olethan in Desmonia, per Donatum Carbraht Mc Karthey capitur, interfectis c. de hominibus suis ipso die.
Item, Sabbato in vigilia beati Augustini, dominus Johannes de Sancto Albino, dominus de Cumcy, per filios Walteri de Sancto Albino (in quibus confidebat), in capella propria occiditur prodiciose.
Item, circa Epiphaniam, Guydo Canteton, propter multa mala sua opera, que ab pueritia gessit inique, rapinas, scilicet, sacrilegia, depredaciones, incendia et homicidia, Dublinie patibulo patris sui hereditatem invite suscepit; et in eodem ligno cum patre suo vitam finivit.
Item, in ebdomada ante Purificationem per viii. dies fuit nix magna, animalibus multum nociva, sed hominibus plus infesta et mala, ut quosdam ex eis (ut ita dicam) incendio occidit; multos mutilavit, infinitos graviter et plus solito inflacione pedum, pena et vulneribus afflixit; molendina, gurgites et pontes ex glaciei dissolucione confregit et destruxit. Hec hominum passio, occisio et mutilacio fuit die Martis, scilicet ultimo die Januarii, et maxime propter leporum venacionem.