Corpus of Electronic Texts Edition
Annalium Hiberniae Chronicon ad annum MCCCXLIX (Author: Friar John Clyn)

annal 1325

1325.1

Item, anno Domini 1325, occiditur Dermicius Oge McKarthy rex Desmonie, per Willelmum filium Nicholai filii Mauricii, apud Traly.

1325.2

1325, fuit discordia ut communiter inter religiosos pauperes Hybernie quasi omnes, quidam eorum nacionis sue et sanguinis et lingue partem tenentes et foventes ac promoventes; alii prelacionis et superioritatis officia ambientes.

1325.3

1325, die Lune in festo beati Dominici confessoris, occisus fuit dominus Johannes de Barry de Hely, miles strenuus et frequenter probatus in armis, per O'Carwyllis.

1325.4

1325, die dominico in crastino octav: Sancti Laurentii occiditur Dovenaldus Duff McGilpadricke per suos consanguineos, sed prodiciose.

1325.5

Item, eodem anno Johannes de Brimegham, et Thomas le Botiller collegerunt exercitum super O'Carwyll; qui hoc anno vix reliquit domum, castrum aut villam in Elycarwyll, inter Anglicos et pacis amatores, quin combussit et destruxit.

1325.6

1325, in Pentecoste, capitulum generale celebratum Lugduni; ubi loca de Cork, Boton, Lymyric et Tartdart auferuntur ab Hybernicis fratribus, et Anglicis, et quinta custodia assignatur, cum ante tantum fuissent 4 custodie.

1325.7

Item, eodem anno feria quinta in crastino sanctorum martyrum Dionisii &c.; occiditur Willelmus, filius Ricardi le Butiller, cum multis aliis in Totmonia.

1325.8

Item, eodem anno, circa festum Sancti Thome apostoli Bren O'Bren, vallatus auxilio Anglicorum de Ely, cepit magnam predam in Ossoria, in confinio de Slesblanie, et super Athbo et Admacart; et interfecerunt fideles Anglicos circa defensionem bonorum suorum.

1325.9

Item, eodem anno die Lune in festo Epiphanie, in sero fuit ventus validissimus et tempestas prosternens domos et edificia, denudans ecclesias et monasteria, frangens et evellens radicitus arbores et campanilia multa, dispergens tassos bladorum et horrea.

1325.10

Eodem die Dublinie fuerunt facti duo milites de ordine Hospitalariorum.