Oir aderaid na feallsamain arsanta co fuil Eurus te tirim & Zephurus te fliuch & co fuil Boreas fuar tirim & Auster fuar fliuch. Et aderaid blod do na dochturib nach mar sin ata Xepherus na Auster ach gorab fuar fliuch ata Xepherus & gor ab te fliuch Auster. Agus ni fedar-sa an do naduir choitcinn na n-gaeth na an da naduir na n-gaeth a cricaib airithe adubradar sin, oir daciamaid examlacht na n-gaeth a n-atarrach na cric oir ata Eurus & Stepterus fliuch a cricaib ann & tirim a cricaib ele, gidhedh inneosad-sa naduir choitceann deimin na n-gaeth uile.
Oir an t-aer, ar na tegadh on grein, medaigter & letnaigter e & ataidh se & eirgid ceo dub dorcha as in fhairgi suas isin aer & doni nel de tuas & an trat boineas an ceo sin risin aer fuar tuas cumgigter co prap asteac e & dabeir sin air siled & leagad & fertain da denamh dhe . An trat ceana tecmas an ceo sin na fairgi thuas ar in aer te tirim fein & an t-aer a na celi & tocar suas iat let ar let co h-inadh an roigh no co flaitimnas an fuachta, cumhgaidter annsin iat & bit annsin aer. Is i naduir an aeir the & naduir an inaid fuair a contraracht ar a cele & ni fuilngid beth a n-en inadh & is uime sin telgidh an t-inadh an t-aer as & bith 'ga teilgin & ag rith o inadh co h-inad a gluasacht an aeir & as e an gluasacht sin an aeir an gaeth, & gach med bis an t-adbur as a tic an gluasacht as moidi an gaeth. Adhbur ele as a tic an gaeth .i. an tan bis cath no troid 'ga tobairt ag imad na
Et mas ail let an ni sin adubrumar ar togail na gaithi is an aer fuar tar eis a teidhti da derbadh co follus; gab baisin cugad & cuir uisci an a m-bed da orlac no tri ar doimhne & cuir soitec folamh gloine ann & lig doib mar sin fedh na h-aithi co maidin a n-inadh fuar egin & dagebair mocrac an soiteac sin lan d'aer calcaithi fuar & impodh a bel fai san uisci sin ata sa baisin & cuir iat le celi an inadh egin re teas na greine tar eis eirghi dhi, & in trat teidhfis an t-aer tiudh sin annsa gloine, fasaidh & attaidh & lethnaidh , & bidh ag iarraidh inaidh is mo & o nac fuil aigi inadh a rachad ach tri bel an t-soithidh sis annsan uisci, teit fan uisci sin sis & togaid e suas co bel an baisin. Et daciter e mar sin mar lan mara ag fas tar eis a ceili no co n-doirter e uair ann tar in m-baisin amach. Et as e sin foillsighes co fasann & co natann an t-aer da bi sa soiteac adubrumar. Et lig do mar sin aris no co ti an aithi ar cinn & mar imeocas tes an lae & ticfas fuacht na h-aithi cruinneochaidh an fuacht sin an t-aer da bhi sa soitec cedna a na soitec fein aris & calcochaidh e annsin & tuitfidh an t-uisci sin 'na inad fein aris.
Ma sedh o dani an becan aeir sin an fas mor sin, as derb gorab mor an fas doni an t-aer uile no cuit de na speir fein.