Corpus of Electronic Texts Edition
An Irish Astronomical Tract (Author: [unknown])

Caibidil 30

Sciendum est quia maccima spera etcetera.

.i. Bith a fis agad gorab hi an speir romor as speir direach ann & as mor da baramhlaib secranaca tugadar na h-aineolaid di , oir adobradar ar son gorab i as airdi & as oiredha & as luaithi do na speirib gorab hi tuismidhteoir an domain hi. Agus coimlinaidh si a cursa re la co n-aithi & atait tri fichit & tri ced cem Stodiacus innte fein & is na h-agaid so gluaises speir na n-airdrinnac n-daingin o iartar co oircer an domain & bit ag sibal en ceme deic ced bliadain. Et gach en speir da speirib na plained da rer a cumgachta & a fairsinga coimlinaid a cursa.


p.120

An speir lanmor cheana, ata gac aen taeba a timcill na speiredh eli, follamnaigid iat & dabeir orra impodh o oirrcer ho h-iartar an domain & as i so cuis ag la & ag aithi , ac solus & ag dorcadus & ag examlacht na n-aimser ag earrac & ac samrad ac fodhmar & ac geimreadh.

Et don taibh astigh don speir so cumhdaigter & folamhnaiter & gluaister gach uili ni ar teithead co claechligdis uair egin a stait no a suidheochan no a n-ordochan & is i so dani na plained co soimpaidtec & an talam co dogluasta, oir da m-beth an talam sogluasta ni coinneochadh la na aithi a cursa fein mar donit anois & ni derbochaighi cursa na plained & rotha na firmaminti mar doniter anois. Agus ni fuilit retlanna annsa speir sin. Agus adubradar na h-aineolaidh co fuil anam innti & gorab uaithi gabus gac uili ni anam . Agus aderim-si gidh mor a cumachta an gac uili ni da n-dubrumar gorab o na tuismigteoir fein ghabus si na cumachta sin. Et da derbadh gorab edh ni feas ca h-obair doni neach no co m-bi tar eis a denmusa. Ma sedh o bis fis gac uili gnimha da tig on speir lanmoir againne sul doniter iat, as o nec eli doniter na gnimarta sin & ni h-uaiti fein.