Corpus of Electronic Texts Edition
An Irish Astronomical Tract (Author: [unknown])

Caibidil 28

Da cercallaib na greine .

Dico quod Seli bine spere etcetera.

.i. Aderim gorab da speir ata ag an grein. An ced speir acu da rer na speire lanmoiri gluaises siar & fuadaiges le o oirrcear co h-iartar an domain. Et muna thoirmisceadh sibal na speiri sin an grian da beth si re se mhi diles fein ac dul o iartar co h-oircear an domain os cinn talman gan folach. Et da beith an comfad ele sin ac dul o oircer an domain co h-iartar gan faicsin & mar sin da beth leth na bliadna na h-en la & in leth ele na aithe.

An dara speir ata ag an grein darub ainm an speir sa seantrom ata leth amuith da sheantrom na talman mar ata ag an re & o iartar co h-oirrcear an domain ata gluasacht na speiri sin & is fogus an speir so & in grian innte le celi da taib don talmain & is fada on taib ele. Et an trat bis an grian go focus don talmain annsa speir sin, loisgidh si deiscert na talman co mor co fuil an cric sin doaitribthe & in trat as faidi bhis o talmain annsa speir cedna ni roithinn a tes cum an talman & ata an mede sin da tuaiscert na talman doaitrebthi o imarcridh fuachta .

Dagen anois fidair da foillsiughadh mar atait an da cercall sin na greine na ceile.


p.114