Corpus of Electronic Texts Edition
A Mediaeval Handbook of Gynaecology [...] (Author: [unknown])

text 4

Galen's Dietary throughout the Year

63. Tecosc Galienuis ann so ar biadh & ar digh & ar fuiliugad ar da mi dec na bliadhna. An cedmi dib .i. Ianuarius .i. is coir apstinens do denam ann & gan fuil do ligen ann re fed .7. la. Et is iat so iat-sein .i. in cédla & in 2 lá & in 3 lá & in 5 la & in .x. lá & in .xi. la & in .ix. la déc. In 2 mi .i. Februarius .i. sechain (&) potaisti ara mbia hocus ann oir ni fuil acht nem and isin mi sin. Et legur cuisle na laime deisi ann, & atait da la baeghail and .i. an .7. la & in 8 la & gnathaigh biada tesaidi isin mi sin. In 3 mi .i. mi Marta .i. caith figeda & raisini & biada millsi ele no no & lig fuil in 8 la & in 10 la ann as do laim dais i n-aiged na fiabras co coitcinn. An 4 mi A. Aprilis, is maith cuisle na laime cli ann & ni biad esbaid radairc ort in bliadhain sin & lic cuisle an 3 la don mi sin & ni bia tinnes cinn an bliadhain sin, & gnathaig feoil ur & biada {MS M fo 95r col 2} teasaidhi isin mi sin. In 5 mi .i. mi May .i. dlighid eirgid co moch & biad & deoch do caithem ann, & gnathaig biada teasaidhe ann & na caith cind nait cosa ann. Et atait tri la baeghail ann .i. an .7. la & in .v. la dec & an 2 la déc & lic cuisle an .v. la no an 3 la no an 4 la no in la deighinach di & saerfaidh sin ar gach uile galur an bliadhain sin tú. In 6 mi .i. mi Iuin, ib deoch d'uisgi fir tibrat ar cedlongad gacha maidne & caithid saiste & létus & na lig fuil acht le h-egintus. In .7. mi .i. mi Iuil, sechain druis & mna ann, oir is ann sin bis in incinn aga comfurtacht fein, & atait da la baegail isin mi sin .i. an .xv. la & in .ix. la. In 8 mi .i. mi Auguist .i. na caith praisech hocais na coblain ann, & na lig fuil sa .ix. la déc don mi sin & da ligter is baeghal. In 9 mi .i. mi Septimper, is maith tortha do caithim and & cuisle do ligen an .7. la de & saeraidh é ar idroipis & ar cancro & ar epilentia isin bliadhain sin. In 10 mi .i. mi October & is maith fin nua d'ol ann .i. must, & da regar a les fuiliugad & dentur an cedla don mi & sechain an .ii. la & an 6 la. In xi.mad mi dec .i. mi Nouimber & sechain fothrugad and, oir ata an fuil co h-uilidi ar tinol a n-eninad isin mi sin & becan fola do ligen a cuislinn an cinn ann & becan d'fhuil cael cos do ligen and, oir atait duile in cuirp a cumsanad ann, & sechain fuil do ligen isin .v. la dec & isin .ix. la dec don mi cedna. In 12 mi .i. mi Decimper, gnathaigi biad to do caithim ann & na caith praisech coblain ann, & na lig fuil acht tre egintas ann & in te do déna na teagoisc so coimedtur a slainti gan baeghlugad aige &rl.


p.76

64. Do thoirmesc na meisgi ann so .i. duilleoga saiste do caithim roim in digh & ni gabann meisgi an la sin in duine. Stupoca praisci deirgi do caithim roim in digh & ni gabann meisge in la sin inti caithis. Item sugh praisgi deirgi do cur isin sroin & turnaidh galar in chinn & toirmisgid in meisgi. Item sugh uindemain do cur isin sroin & tairrngid in galur & in meisgi. Ros muiridhi d'ol ar fin & toirmisgid in meisgi. Item sugh eidhind talman do cur isin sroin & tairrngid adbur na meisgi & galar an chinn. Item absint & ruta & mil & eidhinn & gealan ugh do cur 'na ceirin fon cenn & icaid galar in chinn & meisci na h-incinne. Item ainis do bruith ar mil & a cur fon cenn no puliol ruighel do bruith a n-ola & icaid galar & meisci in cinn.


p.78