Item in trath doní nescoid sgamhan do nescoid an taoibh, no litairgia do frenicis, is olc sin & is luga dolc doní, mad hi nescoid an taoib doní do nescoid na sgamhan, no frenicis do litairgia, adeir Avicenna. Et adeir se fos an trat teid in t-adbur o ball uasal cum boill anuasail, gurub maith an comartha sin & an trath teid o ball anuasal cum boill uasuil, na cum boill nach fetund a dilegad co maith, is olc in comartha sin. Tuic curub minic bís fiabras & crith tar eis an tsilid do denúm ar son in adhbuir ac brised & ag loscad an lethtuir & gid eadh do coisc an fiabras dobi ar dus ac denumh an tsilidh [add.]§.