Corpus of Electronic Texts Edition
Rosa Anglica (Author: [unknown])

Section 38

38

Labrum anois do taisceltaib na h-eslainti so na nescoididh, oir adeir Ipocras curub tresi an teinnes ag aipiugad na nescoididh na arna h-aipiugad, & adeir Galen curub fir sin & co h-airighi da n-innurbtur an siled. Tuic co crichnuidter ní dona nescoidibh a cind .xx. la, & ni ele a cind da .xx. la & ni ele a cind tri .xx. la; oir da mbía in t-adbur is e té, & in ball a mbia is e té, crichnuidter sin a cenn .xx. la; & da mbia an t-adbur te & in ball fuar, no in t-adbur fuar & in ball te,129 crichnuidhter sin a cind da .xx. la, & da mbia in t-adbur & in ball fuar crichnuidhe sin fo cenn tri .xx. la: & dena sin do comairernh on la fa tiucfa na h-aicidi so, & bidh nís tresi, no ni is mesa, na mar dobai ár tus .i. driúch & greánd & fiabras ger . Creid co mbrisfé an nescoid a cenn da .xx. la uadha sin no a cenn tri .xx. la.