Et is mar so fasus nescoid isin ball, in trath fasus si o mailis coimplexa a mball, no curtur imurcach cuigi {MS folio 25a} o ball ele is tresi na se féin, & nach fetunn sin d'innarbad uadha na do dilegad ánd fein. Anaid an imurcach ann & doni nescoid di mar só. Da tairrngter fuil derg no linn ele cum baill, an urduil sin, innus co línund se a cuislenna co leir & bíd na cuislenna and sin balc lan , mar soightech, & silid ni asa poirib cum folmuidechta in baill bis ina timcill & línuidh e, & dealaigi a randa re ceile, & doní att and, re n-abur nescoid.