Et atait tri foluid and .i. gruth & medg & ím, & ni imcubaid sin mar a mbi an brig anmunn, & is mar sin atait na senndainibh, masedh ni maith doib an baindi. Ata Galen ina aigid so isin lebur dorindi se do coimet na slainti; & aderim do reir indtlechta Galen, & a inntinne, curub maith baindi dona senndainibh, & dona senoirib & co robadar daine ina mbeathaid cet bliadain ar baindi mar biadh, gid edh is eigin a dilegad co maith isin gaile & gan gruth do legin dó do denum na impogh cum gaothmurachta na duinti do denumh & trit sin ni maith he dona dainibh aga mbitt cuisleanna cumga co nadurtha mina cuirter salann ann & mil indus na derna gruth de & na derna duinti & na impogh cumgaothmuirachta & is maith e ann oir is urusa a dilegad & {MS folio 16b} tollaid co h-urusa, & aontuighe, & ni h-urusa ni ele do caithimh na diaigh no co ndilaigther é.