Taiscelta na h-eslainti so re n-abur eitici: tuic curob urusa in cetgne dí do leighes tar eis a h-aithne gid edh is decuir a h-aithne . Et is h-urusa an 2 gne d'aithne, & is decuir a leighes. Et ar ordugad ar domhun ni leighister in 3 gne, oir ni fetund na boill daingne tic on tsilni co h-airighi do fliuchad arna tirmugud. Item in trath cromuid na h-ingne, & toitis in folt, biaid in tecc a ngaire; & da ti flux and, trasgurtur an brig co h-opúnd & is becc nach olc in flux i nderigh gac uile eslainti faidi; & da nattuighi na calpada, is doich co racha decc fo cenn an 3 la: & in trath bid na dernanda o feoighi rena nglacadh & co te deis bidh, do cuaidh in t-adbur a tisis. Item da toitid in brig tochlaigthech & nach fetund si biad do caithimh, na do slugad, ar son tirmuighachta an dibacain ; no nach fetunn ní do caithimh, acht neithi fliucha biaidh in tecc i ngairi ann sin.