Item bit na cuirp re n-abur crinoides isin fual o loscad fola & feola, isin cetgné d'eitici, & ina coimcengul risin gne taniste; & ticid na cuirp mar lannaidhi o ni imillaig dona ballaib daingne, & na cuirp mar brán ona ngrindell & signidi an 3 gne d'eitici, & is iad is mesa and: & gach loighid bit, is misdi oir is ona balluib is daingne tiaguid ann sin. Et da mad o aonball amhain do tiucfadis na cuirp re n-abur crinoidés, gach méd do beith is do bud misdi; & trit sin ni maith adubairt Egidius, co signidís na cuirp re n-abur crinoides an 3 gne d'eitici. Ticid na cuirp bis mar bran uair and on leis, & bid dath maith ara fual and sin, & uair ele ticid on corp uile, mar bis isin eitici, & bidh drocdath ann sin air.