Corpus of Electronic Texts Edition
Rosa Anglica (Author: [unknown])

Section 4

4

Item in te bis mar sin is eslainti o línadh lennann gabus se cuigi, masedh ni ho eslainti digbaluigh gabus. Item inti treiges a saothur {MS folio 11b} is a fuacht teid se trit sin. Aderim co fuilid da etici and .i. eitici tic o arrsaighacht & eitici tic maille fiabras. An ti seachnus a saothur teid se a n-etici na h-arrsaidachta, oir anuidh in imurcach isin corp, & anmfuinnige sin in corp, & in dileghad, & doni eslainti tic o linadh lennand, & masedh cuiridh duine i n-arrsaidacht, & is fuar tirim an aois arrsaidh oir anmuindidter in tes ar son na n-imurcach anas isin corp, masedh anmuindighter an dilegad, & ni dilegtur an biadh co lor isin gaile na isna h-aoibh; oir in secran doniter isin cetdilegad ní certaighter sa dileghad taniste é do reir Isidorus, no sa 3 dileghad, masedh bid na boill gan oilemain co mor no gu lor, & truagaigid; masedh bí an eitici a lenmuin an atcomuill. Et trit sin is coir a radh curub e cetni cnaiter san eitici, in metradh nua bis timcill na mball ndaingen ndluith let istigh, & ni hé an


p.72

methradh bis a n-imell agan leathur & tar a eisi sin cnaiter an methradh is arrsaidhi ann. No fogairter gneiti na heitici, & ní do reir traothaid aiterruigh na flichechtan acht do reir traothaidh aiterruigh na mball .i. mar ata an methradh & in feoil, ar tus; & na h-airteri & na cuislenna aindsein; & na cnama & na maothain co rannuighte; & is mar sin anti gabus eitici, co teit sé cum eslainti doniter o línad lennann co h-aicideach, & cum flux aicidigh, & cum fliche mar ata an tatcomull.