Et do gabur comarthai spetsialta na primcuisí on otur fein .i. mar ata da mbia an cenn té on grein re glacad no da claocluighi dath in lethtuir 58cum dorchachta on fuacht & da mbia in lethur cruaid tirim, mar do beith se arna sinedh, o neithibh sdipicdha doniter sin; & da mbia tesbec ar comuir na n-áo isin spirut nadurtha o digh no o biad, & in fual dathuigthe; & mod o saothar é is anmuinne and sin é, & bi teinnes isna h-altaibh; & modh o fercc bit na suile tenn, & in aigid derg, acht mina roibh in fercc cumusca re modurracht ar son nach fétund digultus do denum, & banuid and sin, & gabaid moran daiterrach dathunn é; madh o modurracht tic, bit na suili arna slugad anunn. Modh o neim tic, bi tes mor & tirmach let istigh, & doni itta mor, aderur gurub lucht lenna duibh sin.