Corpus of Electronic Texts Edition
Apraid a éolchu Elga (Author: Eochaid Eolach ua Céirín)

Duan in chethrachat cest in so, do-rigni Eochaid ua Cérín

  1. Apraid a éolchu Elga
    a slúaig Fótla fírergna.
    in-fetabair thiar no thair.
    ainm mná Féniusa Fárrsaid?

Bélait ingen Laitin máthair Níuil meic Féniusa. Gae greíne rus-marb.

  1. Cía fer ro-marb Iár na n-each.
    cia h-airmm 'sa-fríth a airlech
    (ni) bás ro-fuc cíar-gegain.
    int éoluch co n- ilbérlaib

.i. Féinius féin ro-marb Iar mac Néma do leccain chámaill íar n-dula do Iar co Bélait & marb Bélait do grád & ro-adhnocht h-i Carnn Bélaite.

  1. Cía h-aiged rucc Feínius feín.
    i focus i n-etercheín?
    c' áitt ro-adnacht in suí sean.
    Iar macc Nému na nainteam?

.i. marb Féinius dana íar .u. láib do digh dermuit coro-adnacht h-i tuaiscirt Maigi Senair .i. in Eipithena ciuitate ro-adnocht Iar & nir-léc Féinius a adhnocul feín & Iar maróen i n-óencathair.

  1. Is cuich in triar tairptech teann.
    ro-buí d' eísi na díleann.
    co-failet a beinn i m-beinn.
    as cach dithrib i nh-Érinn?

.i. tri bráthri do Chessair táncatar h-Érinn áenagaig ría n-dílinn & niro-acaillsit itir Cessair. Luám & Medar & Mel a n-anmann, i n-delbuib eón ro-bátar & i m-Beinn Bairche ro-bátar.

  1. Cid thuc Partholón ó thír.
    cid ara-nderna mórgním?
    Cía lín ro-buí a glinn i n-glinn.
    cid arro-díth a n-Érinn?

.i. Parttolón ro-marb a athair & a máthair ac íarair ríghe dia bráthair (conid aire at-berar Parrtolón mac Sera friss .i. mac fingalach. cera .i. fingal), co-tánicc co h-Érinn ar teched a finghaile, conid íarum luid taimlechta ina fingail .i. .ix. m. do éc fri oínsechtmain díb.

  1. Cía ro-buí for Temraig.
    diar-fear snechta airdergnaid?
    In rann ro-buí a Temraig de.
    ba h-argat fíal findruine.

.i. h-i sechtmad blíadain flatha Éna Aircthig ro-fer froiss airget h-i Temruig & fross fína for h-Érinn uile.

  1. Coich in maccóem co mét n-glonn.
    ránic Eamuin cin imroll.
    ro-marb deich cét monar n-glé.
    dia muinntir i n-oénaidque?

.i. Aengus dana mac In Dágda is é ránicc Emuin ar bréthir Concobair dia-n-epert: for-ossna Cú Chulainn cach óen. & ro-marb

p.132

Oengus .x.c. isin Cráebrúaid & ro-chuimrig Coin Culainn & do-fuc Conall & Celtchair & Conchobor h-i suán.

  1. Cía dalta dia daltaib thair.
    ro-sáraigustar Etain?
    ocus abair rimm co glicc.
    cade ainm athur Seinbicc?

.i. Abcán ua h-Ebricc in file is é ro-sáruigh Etan ingean Dián Cécht at brú Boínne gu rus-toirrchiustur, co-toracht Oengus iar sain gurro-marb Abcán. Conid íarum ruc Etan Senbec & Oengus ro-n-alt Senbeciar sin.

  1. Anmonn na trí son n-doilbthe.
    na-fácbaid co anforbthi. .i. Gó dana & anfír & ainfiss a n-anmonn na sonndoilbthe.
    cid fod-era sund co se
    soillse 'sin chrunn is brénche?.i. diaro-eírig Críst asa adnocul is ed ro-chét saltair for crann crín, ut est tene sinnuig.
  2. Cía do-rigni gart ar tús.
    in-fetabair a imthús? .i. Seth mac Ádaim do-rat fleid dia bráthrib h-i Sléib Taboir & tuc crod da cach bráthair díb, co-farcaibsit bennachtain oca
    searb ocus milis molle.
    cid dos-fucc i nd-oénoidque .i. Míchél at-bert fri Ádam: bennach lat na torthi, ar dot-roa demon aslaigh iterum dot malairt im no toirthi. Cach ní no-bennach Ádam is miliss, cach ní tárill demon is serb.
  3. Cía do rígraidib Fer m-Bolc.
    ro-gab Érinn cíarb anord
    i m-Maigh Tured trúagh in dáil.
    tuc cath do Túaith Dé dámaigh.

.i. Tríath mac Amuir in rí deídenoch do Feruib Bolg in nómad rí díb. Ocus is h-é tuc cath Maighe Turead do Thúathaib Dé Danonn.

  1. Cadead anmunn na sé m-ban.
    & anmunn a n-athar.
    tucsat léo Meic Míled muáid.
    o Thúaith Dé Danann drechruáid?

.i. Lían & Liphi & Lemain tri h-ingena Midir. Aillenn & Cuilleann & Cairchi .iii. ingena Goibnenn.

  1. Ocus anmunn na fear trá.
    cusa-ndeachatar na mná.
    a aés dána na n-dúan dil.
    éistigh uán ocus apraidh.

.i. Lían co Cuáilgne, Lifi co Fúat, Lemain co Murthemni, Aillenn co Lugaidh, Cuillenn co Surghe, Cairche ra Sobairche.

  1. Cía rí díb déighenach dián.
    ro-gab for gasrad Gaílían?
    ocus apraid rimm cen ail.
    cía ainm boí forsin rígh-sain?

    2. p.133

.i. tri rí déc díb ó Thúathaib Dé Danann for h-Érinn co-táncatar Meic Miled .i. Gola ó-sluinnter Slíab n-Gola h-i Ciaraighe is é ba rí déigenach díb.

  1. Ocus ainm mná Ébir aird.
    ni-fetatar na doérbaird.
    ainm a máthar cemafath.
    ocus ainm a degathar.

.i. Adair dana ingen In Dagda móir is í ro-faei la h-Éber .i. in Mórrigan dana ainm a m-máthar Adairi mná Ébir.

  1. Caide a n-díl ó sin alle.
    Túaithe Dé na trommdaíne.
    innisid abus is tair.
    caide a n-ord ocus apraidh.

    Apraid a eol-.