Corpus of Electronic Texts Edition

Slúaigead so re síl Adaim (Author: Unknown)

p.194

1. 1] Slúaigead so re síl Adaim,
   2] is monur ríg do-rálaig:
   3] dá mbeith úaib neach ticsead ris,
   4] ca baili a ngeib a forbais?
2. 5] Fata itáthar ica thríall,
   6] ragar, tiagar, do-cúas ríam,
   7] bethear iga dul co bráth,
   8] ó ré áenfhir can anfháth.
3. 9] Indisfeat dóib, is eól dam,
   10] in leath bearar in slúaigead:
   11] do neoch fo-cheard doman de
   12] a mbreith a ndúrthech n-úre.
4. 13] Is hé do-tháed ar a cend,
   14] atheach dúaibseach dub a drenn:
   15] atchí cách ní fhaicend nech
   16] a Dé, nírb inmain duibdrech.
5. 17] Atchondarc anné 'ca thriall
   18] óclach isa túaith sea thíar;
   19] rob fhiú a chomthrom d'ór buidi
   20] in t-óclach find foltbuide.
6. 21] Dá mbeith 'ca chreic ar cach moig
   22] gar bec re tocht in tlúagaid,
   23] rob iú céd uingi d'ór cheart
   24] in fer cróda claidemderg.

---

p.195

7. 25] Ro baí ballán lán do lind
   26] isan adart ós a chind:
   27] atib dig re tocht ar fecht—
   28] nochar mó a íta ar n-imthecht.
8. 29] Inmain les a macám búad,
   30] inmain leis a ingen úag;
   31] dúthracdar uili thocht lais,
   32] fata leó beith 'na hégmais.
9. 33] Ó ra bánaiged a bonn,
   34] is rotaithmidead a mong,
   35] is ra fhec a fheóil re cnáim,
   36] robo móidi leó a mígráin.
10. 37] Ó ro sheng a medón mas,
    38] is ro sáeb a rosc rindglas,
    39] is ro érig a bruindi,
    40] do-bérdais hé ar énuingi.
11. 41] Re siu ro gobad galar,
    42] rob earr lé muintir anad,
    43] rob ada leó do baí istaig,
    44] ó do baí ac triall in tlúaigid.
12. 45] Ingnad bearar in slúaiged,
    46] ní do chreich bó ná búailead;
    47] marcaigecht a ndiaid a bonn,
    48] cethrar aca imfhulong.
13. 49] Dá chrand cháela táeb re táeb,
    50] sesin féin ar cleathcor cháel,
    51] días 'na díaid, dias roime soir,
    52] sesin can a n-agallaim.
14. 53] Atá and ingnad aile,
    54] ní berar each fa eri,
    55] nocho berar bolc am lón
    56] risin slúag rígda romór.
15. 57] Nocho berar gaí ná scíath,
    58] nocho berar brat ná bíad,
    59] acht cubat do léinid lín
    60] im chorpán cach duine díb.

---

p.196

16. 61] Ropo maith damsa, a Mec Dé,
    62] mathair andsa ochaine,
    63] co faicinnsea thíar nó thair
    64] a fail ag tríall in tlúagaig.

    S.

17. 65] Cinead Ádaim is Eba,
    66] cona ndaínib daithgela,
    67] nocho n-uil díb tíar ná toir,
    68] nach fuil ag tríall in tlúagaid.

    S.

18. 69] Do neoch ro thecht beathaid mbí,
    70] iter fhir is mac is mnaí,
    71] dochum thalman, adbal ceal,
    72] is gúr berar in slúaiged.

    S.

19. 73] Robo maith leam, a Meic Dé,
    74] co mberaind búaid n-ailithre,
    75] ar térnom dam as cach graf,
    76] comad hé m'ainm Slúaigedach.

    S.