Corpus of Electronic Texts Edition
Mithigh sin, a ráith na ríogh (Author: Eochaidh Ó Heóghusa)
p.129
Ó Heóghusa cct.
- 1] Mithigh sin, a ráith na ríogh,
2] lór dhuit ar fhuilngis d'imshníomh;
3] a chúirt ghéagthláith thirmgheal tais,
4] ní himneadh éntráith fhuarais.
p.130
- 5] Ní fheidir mé an mithigh dheit,
6] mithigh dhúin agháil th'aiseic:
7] fada a n-aonmhúich sibhsi is sionn,
8] a Inis chraobhdhlúith Cheithleann.
- 9] Ráithe is bliadhain gidh bé leis,
10] do bhádhbhair, beag do shaoileis,
11] re hucht laochradh bruaigh Banbha,
12] at uaimh fhaolchon allmhardha.
- 13] Gá ttám ní tuigthí an fadsa
14] comhrádh aithnidh umadsa:
15] ort féin ní fhacadhais fhear
16] do fhréimh ghlacsholais Ghaoidheal.
- 17] Níor léig graifne greagh síthe,
18] níor chlaon lorg creach ccoiccríche,
19] a phuirt úir thiormaoibhinn te,
20] clúimh ar fhionnmhaoilinn t'fhaithche.
- 21] Dob annamh riamh roimhe sin
22] tú aonlá ag Aodh Mág Uidhir,
23] gan congháir, gan claisdin sdoc,
24] gan comhdháil d'fhaigsin iomot.
- 25] Gidh eadh, ní hionchaointe dhuit,
26] ránuic tú an tí rod fhuasluic,
27] a ráith pheallghlan na bport ttais,
28] neamhghar na n-olc do fhuarais.
- 29] Fáth orchra ní heagal libh,
30] ó thug Dia d'Aodh Mhág Uidhir,
31] a mhionn, a ghormáras fear bhFáil,
32] seal dot orlámhas d'fhagháil.
p.131
- 33] Ní glór tadhuill tarla ribh,
34] meadhair ríogh fhréimhe hUidhir,
35] ní aithréagha í acht re seal,
36] ná sní d'aithmhéala th'aigneadh.
- 37] 'San chruth chédna ad-chífe sibh
38] a mbíodh d'aoibhnius uair éigin
39] san fhaithche ghégórthais ghil
40] d'aithle t'éadóthchais aignidh.
- 41] Do-chífe dearg druim tar ais,
42] mar an chéduair do chleachtais,
43] gach leath dot ghormfhaithche ghloin,
44] ó chomhghraifne each n-éasccoidh
- 45] Ó shliocht bonn mbuidhne fileadh,
46] ó inghilt chreach ccoillidheadh,
47] do-chífe ceinndearg a ccruth,
48] cíche do gheillearg ngrianach.
- 49] Do-chífe um chiomhsaibh do learg
50] coimhling eachradh 's chon cceinndearg,
51] iomramh laoidheang láimh réd phort,
52] 's gach maoileann lán fád longphort.
- 53] Do-bhéara deallradh dornchladh,
54] lí sgiamhdha sgiath n-óronchon,
55] solus meirge ngairthe nglan,
56] aighthe do leirge ar lasadh.
- 57] Cuirfid aoibhle h'arm leabhar,
58] cuirfidh grís gruadh ndáileamhan,
59] 's loinnear bleidheadh ndealbhghlan ndonn,
60] deallradh teineadh ad thiomcholl.
p.132
- 61] Mar do bhídís uair oile,
62] éigse Innsi Laoghaire,
63] beid ag congháir ar leirg lis,
64] gobhláin sa ceird do chaithis.
- 65] Mar do chleachtais do-chífe
66] lucht sgaoilte sgél ccoigcríche,
67] foghar téadchaoin ceóla crot,
68] deóra as gach éntaoibh ionnot.
- 69] Do-chífe, mo chean tárruidh,
70] ar tteacht ón tuinn iombádhaidh,
71] th'aos comtha ar-ís ar th'aghuidh,
72] fís gach orchra fhuarabhair.
- 73] Mo chean aghuidh fhuil oruibh,
74] mo ghéanor d'éis fhuasgalaidh,
75] a ráith úr na n-aibhneadh tte,
76] lér taidhleadh ar úr h'innse.
- 77] A dhorus caomhna an chóigidh,
78] d'éis a n-uarais d'urchóidibh,
79] lucht th'aithne ar chaoimheing do chnuic,
80] aoibhinn a haithle a n-iomluit.
- 81] Má fríoth orat iasacht ghearr,
82] a aolráith Innsi Ceithleann,
83] ó ghríbh chláir fhonnbháin Fhinne.
84] táir orghráin na haislinge.
- 85] A longphort ríogh fhréimhe Duinn,
86] má fhuarais orchra thadhaill,
87] fa bhrón ní saoilfidhe sibh,
88] clódh do mhaoithchridhe as mithigh.Mithigh.