Corpus of Electronic Texts Edition
Anbthine mór ar muig Lir (Author: [unknown])

{folio 9vb}

p.80

Anpthine mór ar Maig Lir

  1. 1] Anbthine mór ar muig Lir
    2] {a}{dána dara a h-ardimlibh}
    3] at-racht gaeth, ran-goin gem garg
    4] cu tét dar muir mórgelgarb§
    5] dos-árraid ga garggemrid.§

  2. p.81

  3. 6] Gním an muighi, mag Lir lór
    7] ro lád sním ar ar sír-slógh;
    8] écht mól cách§ ní lugu
    9] cid as ingantu didú
    10] in scél dírecra dímór?
  4. 11] Ó do- chuir§ in gaíth anair
    12] menma tuinne tarcabair§
    13] cu dúthracair§ dul torainn síar
    14] cosin§ fót fris funenn grían
    15] cosin§ glais-muir n-garg-lethain.
  5. 16] Ó do- chuir§ an gaeth atúaid
    17] co dúthracair§ tuinn temen- crúaid
    18] co m-bad fri domun an- des§
    19] fri fithnem§ ro ferad tres
    20] ró ésted fri elechdúain§

  6. p.82

  7. 21] Ó do-chuir§ an gaíth aníar
    22] dar in sáile§ srebach-dían
    23] co dúthracair§ {folio 10ra} dul torainn sair
    24] co crann n-gréine coros gaib§
    25] i muir lethan lebur- chían
  8. 26] Ó dorala§ an gaíth andes
    27] dar tír Saxan sgiathbras§
    28] co m-benann tond Insi Scít§
    29] dorair do charr§ Calathnít§
    30] co m-brut luibnech líathanglas§
  9. 31] Is lán ler, is lomnán muir
    32] is álaind inn ethar-bruig
    33] ro lá curu in gáeth ganmech
    34] im Inber na Dá Ainmech
    35] is lúath luí re lethan-muir.

  10. p.83

  11. 36] Ní sádail súan, sén§ garg saír
    37] co m-bruthbúad, co m-barann-báigh
    38] fordath eala forda- tuig§
    39] mag mílach§ cona muintir
    40] glúastar mong mná Manannáin§
  12. 41] Ra lá tonn (trén a trethan)
    42] dar cach inber íarlethan
    43] da-rócht§ gáeth, ran-goin gem gel
    44] im Cend Tíre, im Tír n-Alban
    45] silid drib lán slíabdreman§.
  13. 46] Mac Dé athar, adblib scor
    47] rom-ain ar gráin garg- anfod!
    48] Fíadu fírén na Flede
    49] acht rom-ain ar anside§
    50] ar h-iffirn co n-ardanfod.

    Anphu mór.


p.78

Rumund mc Colmáin .i. mc ríg Laegaire do Clannaibh Néill, rígh-file Érenn, is é do-rigne an dúain sa & laíd lúascach ainm na h-aiste ara n- dernad. Is é adbar immorra a dénma dó dia ailithri-se co Rathun i n- aimsir gorta móire. Ra bo meisti la lucht an baile a tuidecht don baili, co n-ann adubratar frisin saer ro buí ic dénum in durthaige móir diúltad do dénum frisin fer n-dána, conid ann at-bert in saer fri fer dia muintir: ‘Erig a n-agaid Rumuind & abair fris ná ticed don bailiu nóco n- derna sé rand i m-bía áirim 'na fil do cláraib sund dochum in durthaige’. Conid ann do-róni-sium in rand-sa:

  1. 1] A mu Coimdiu, cid do- gén-sa
    2] frisin adbur már-sa?
    3] Cuin bus aicdi fo scéim dlúta
    4] inna deich cét clár-sa?
Is ed sin ro buí do cláraib and .i. míle clár & ní ro fétad diúltad fris íarsin, ó ra faillsigh Dia dó triana éicsi in lín clár ro buí ocun saer.

Do-róine mór-dúain do Gallaibh{folio 10rb} Átha Clíath iar sin acétóir & adubratar na Gaill conná tibritis lúach a dúaine dó, conid ann do- róni in rand irdraic co n-ebairt:

  1. 1] M' éra-sa
    2] mád áil do neoch, do-géna
    3] ocus íar sein béra-sa
    4] einech duine das-géna.

p.79

Co tucad a breth féin dó íar sin. Conid sí breth ruc-som .i. pingind cech droch-Gaill & dá pinginn cech deg-Gaill, conná fríth accu Gall nach tuc dá pingind dó, ar nír fiú re Gall díbh droch-Gall do rád fris féin itir. Co n-ebratar fris na Gaill ind fairge do molad, co fintais in dán bunaid buí aicge, conid ann ro mol-som in fairge & sé ar meisce co n-ebairt:
  1. 1] Anpthine mór ar Maig Lir

Co tuc-som immorro in étáil sin leis co Cell Belaig ar Maig Constantín, ar ba do cellaibh Úa Súanaig in cell-sin & Magh Constantín uile. Cach magh dano & cech ferann da- réided Constantín, ba re Mu Cutu, conid do Constantín ainmnigther in magh. Is amlaid buí cell an tan-sin & .uii. sraitde do Gallaib ann .i. ar a méit, & do-rat Rúmunn trían a étála dí & trían do scoil & trían leis féin co Raithen, conid and is marbh, conid adnacht a n-énlebaid re h-úa Súanaig ar mét a anóire la Día & daíne.