Corpus of Electronic Texts Edition
Forud na Fíann fás in-nocht (Author: [unknown])

p.152

The passing of the Fíana

& at-bert Caílte
  1. Forud na Fíann fás in-nocht
    gus 'ticed Finn fáebarnocht;
    do bás na flatha gan brón
    is fás Alma úasalmór.
  2. Ní marat in muinter maith;
    ní marann Finn in fír-flaith;
    ní fuil in cuire gan chleith
    ná ruire 'mon ríg-féinnid.
  3. Is marb uile Fíanna Finn,
    gé do-chúatar glinn do glinn;
    olc a-tú i n-díaid na ríg rán,
    tar éis Díarmata is Conán,
  4. D' éis Guill meic Morna don maig
    ocus Ailella cétaig,
    íar n-díth Éogain in gaí glais
    ocus Conall don chét-frais.
  5. A-deirimse rib reime;
    is fír ina ráideim-ne:
    is mór ar n-esbada ann
    gan Dub díbraicthech Drumann.
  6. Ar n-díth na cuire is na cét
    is trúag nách ann fúarus éc,
    íarna n-dul a h-or i n-or
    gérbo forlán in Forud.