Corpus of Electronic Texts Edition
Ránacsa, rem rebrad rán (Author: [unknown])
p.106
Lóeg's description to Cú Chulainn of Labraid's home in Mag Mell
- Ránac-sa, rem rebrad rán,
bale ingnad, cíarbo gnád,
con n-ici in carnd (fichtib drong)
hi fúar Labraid lebarmong.
p.108
- Co fúarusa hé 'sin charnd
ina shudi (mílib arm),
mong buide fair (álli dath),
ubull óir ocá íadad.
- Corom-aichnistar íaraim
a l-leind chorcra coícdíabail.
At-bert rim: In raga lim
don tig hi fail Fáelbe Find?
- A-tát na dá ríg is tig,
Fáilbe Find ocus Labraid,
tri cóeccait im chechtar dé:
is é lín inn óentaige.
- Cóeca lepad 'na leth deiss
ocus cóeca (airides);
cóeca lepad 'na leth chlí
ocus cóeca aeridi.
- Colba do lepthaib cróda,
úatne fhinna fhorórda;
is sí caindell ardus-tá
is lía lógmar lainnerda.
- A-tát arin dorus tíar
insinn áit hi funend grían
graig n-gabor n-glas (brec a mong)
is araile corcor-dond.
- A-tát arind dorus sair
tri bile do chorcor-glain
día n-gair in énlaith búan bláith
don macraid assin rígráith.
- A-tá crand i n-dorus liss
(ní h-étig cocetul friss),
crand airgit ris tatin grían
(cosmail fri h-ór a roníam)
- A-tát and tri fichit crand
(comraic nád chomraic a m-barr);
bíatar tri chét do cach crund
do mes ilarda imlum.
p.110
- A-tá tipra 'sin t-shíd trell
cona tri cóectaib breclend,
ocus delg óir cona lí
i n-óe cecha breclenni.
- Dabach and do mid medrach
ocá dáil forin teglach;
maraid béos (is búan in bés)
conid bithlán do bithgrés.
- I-tá ingen is tig trell
ro derscaig do mnáib Érend,
co fult budi thic i-mmach
is sí álaind illánach.
- In comrád do-ní ri cách,
is álaind, is ingnáth;
maidid cridi cech duni
día seirc is día inmuni.
- At-rubairt ind ingen trell:
cóich in gilla ná h-aichnem?
Masa thú tair bic i-lle
gilla ind fhir a Murthemne.
- Do-chúadusa co fóill, fóill;
rom-gab ecla dom onóir.
At-bert rim: In tic i-lle
óenmac dígrais Dechtere?
- Mairg ná dechaid ó chíanaib,
ocus cách icá íarrair
co n-aiced i-mmar i-tá
in tech mór at-chonnarcsa.
- Dámbad lim Ériu ule
ocus ríge Breg m-bude,
do-béraind (ní láthar lac)
ar gnáis in bale ránac.