Corpus of Electronic Texts Edition

Cros Chríst tarsin n-gnúisse (Author: [unknown])

p.32

Christ's cross

1. Cros Chríst tarsin n-gnúis-se,
   tarsin g-clúais fon cóir-se.
   Cros Chríst tarsin súil-se.
   Cros Chríst tarsin sróin-se.
2. Cros Chríst tarsin m-bél-sa.
   Cros Chríst tarsin cráes-sa.
   Cros Chríst tarsin cúl-sa.
   Cros Chríst tarsin táeb-sa.
3. Cros Chríst tarsin m-broinn-se
   (is amlaid as chuimse).
   Cros Chríst tarsin tairr-se.
   Cros Chríst tarsin n-druim-se.
4. Cros Chríst tar mo láma
   óm gúaillib com basa.
   Cros Chríst tar mo lesa.
   Cros Chríst tar mo chasa.

---

p.34

5. Cros Chríst lem ar m' agaid.
   Cros Chríst lem im degaid.
   Cros Chríst fri cach n-doraid
   eitir fán is telaig.
6. Cros Chríst sair frim einech
   Cros Chríst síar fri fuined.
   Tes, túaid cen nach n-anad,
   Cros Chríst cen nach fuirech.
7. Cros Chríst tar mo déta
   nám-tháir bét ná bine.
   Cros Chríst tar mo gaile.
   Cros Chríst tar mo chride.
8. Cros Chríst súas fri fithnim.
   Cros Chríst sís fri talmain.
   Ní thí olc ná urbaid
   dom chorp ná dom anmain.
9. Cros Chríst tar mo suide.
   Cros Chríst tar mo lige.
   Cros Chríst mo bríg uile
   co roisem Ríg nime.
10. Cros Chríst tar mo muintir.
    Cros Chríst tar mo thempal.
    Cros Chríst isin altar.
    Cros Chríst isin chentar.
11. O mullach mo baitse
    co ingin mo choise,
    a Chríst, ar cach n-gábad
    for snádad do chroise.
12. Co laithe mo báis-se,
    ría n-dol isin n-úir-se,
    cen (ainis) do-bér-sa
    Cros Chríst tarsin n-gnúis-se.