Corpus of Electronic Texts Edition

Messe ocus Pangur bán (Author: [unknown])

p.2

The scholar and his cat

1. Messe ocus Pangur Bán,
   cechtar nathar fri saindán:
   bíth a menma-sam fri seilgg,
   mu menma céin im saincheirdd
2. Caraim-se fos, ferr cach clú,
   oc mu lebrán, léir ingnu;
   ní foirmtech frimm Pangur Bán:
   caraid cesin a maccdán.
3. Ó ru biam, scél cen scís,
   innar tegdais, ar n-óendís,
   táithiunn, díchríchide clius,
   ní fris tarddam ar n-áthius.
4. Gnáth, h-úaraib, ar gressaib gal
   glenaid luch inna línsam;
   os mé, du-fuit im lín chéin
   dliged n-doraid cu n-dronchéill.
5. Fúaichaid-sem fri frega fál
   a rosc, a n-glése comlán;
   fúachimm chéin fri fégi fis
   mu rosc réil, cesu imdis.
6. Fáelid-sem cu n-déne dul
   hi n-glen luch inna gérchrub;
   hi tucu cheist n-doraid n-dil
   os mé chene am fáelid.
7. Cia beimmi a-min nach ré
   ní derban cách a chéle:
   maith la cechtar nár a dán;
   subaigthius a óenurán.
8. h-É fesin as choimsid dáu
   in muid du-ngní cach óenláu;
   du thabairt doraid du glé
   for mo mud céin am messe.