Atá uaimh uiscci do lethtáob na h-ecailsi sin ina cuiritt na h-oilithrigh sin mórán do clochaib búadha & d'ór mar offrail don dee sin, & anuair ricc an eclais a les ris dogeibther asan uaim íatt, & cuirter a foghnam don eclais íatt, & na laithi fésta bís an cruinnighitt an popul dochum na h-ecailsi, & cuiritt an día mar anóir dó a carpatt, & mórán do clochaib buadha & do nethib maithi ina timchill isin carpat, & in popul ó sin amach ina dhíaidh. Tiagait oilithrigh & loighitt fon carpat co m-brister cossa & lamha chotta díb, & co marbtur cuitt ele acu, & is dóigh léo san cach mét d' olc do gebatt isin inad sin curab móidi an anóir thall é.