Roraimhset rempa iarum co facatar inis aluind aili. Reccles diamhuir derrit innti. Oen mac eculsa forarsaidh finnliath ic cantain a urnuighthe innti. Bensait bascrand isin dorus. Ticcid en etrocht dia n-accallaim & innisit do a scéla. Indisidh in t-en don tsruith an ni sin. ‘Osluic rempuib!’ ar in sruith. Osluigius in t-en rompaibh, & bendachuis cach a chele dibh, & foeitt ann in aidci sin. Dus-tic timthiridh do nimh lena cuit doibh. Arabharach aspert in sruith friu-sumh imthecht, uair ni hann sut boi in dan doibh eserghi ; & roinnis doib a tuirrtechtae o sin amach.