Corpus of Electronic Texts Edition
The Voyage of the Hui Corra (Author: Unknown)

section 65

Tarfas doibh iarsin aitheach mor dubh detaighi dimhor, & ba métither moltcroicinn gach slam tenedh ticeadh asa braguit. Lorg iarnuidhi ina laimh ba métither re mol muilinn. Cual connuidh for a mhuin, daighere seisrighi innti. Rolasadh in chual gach re fecht. Roleiged-sumh e fein fon muir ar teiched . Is tuilled pene foghebeadh la tuinn tenedh in mara og eirghi tairis. Roeighidh-sumh annsin ic fulang na moirpene rus-ticead.

‘Cret tu, a dhuine thruáigh ?’ ar siat.

‘Ader ribh,’ ar se. ‘Cual connuidh no imarchainn gacha domhnuigh for mo mhuin, & is e a haitfer sin roberar orm.’