Tarfas doib 'ar sodhain aroili inis amra edrocht & sondach umhuidhi impi, & lin umhuidhi ar scarad ara fiacluib {Book of Fermoy page 174a}sechtair. Facbuit a curach i traigh in mara, & lotar d'innsaigid an dunaid robhi 'san insi; & mar rochualutar ceol na gaeithi frisin lin focertat i suan co cenn tri la & tri n-oidhce. Muscluit iarsin asa suan, col-luid aroili ben chucu asin lis. Feraidh fáilti riu. Da moelasa fhindruine impi9, & cilarn umha a laim dhi; eascra arguit isin laimh eli. Fodluidh doibsium biadh, amar mhaethla dar-leosan. Dailes uisci na tibrat bui isin traig doibh, & ni raibi blas na fuarutar fair, co ndebert in ben riú: ‘Denuidh imtecht,’ ar si, ‘daigh ni sunna ata bur n-eserghi gidh inann cenel dun.’