Bai dochraite mor for Feraib Rois iar ndith Domnaill mic Aedha mic Ainmireach, & ba he fochond a ndochraide. Iar ngabail Érind do macaib Mael Coba tareis Domnaill batar mic Domnaill ir-ríghi Chenéoil Conaill & Fer Rois .i. Dondchud & Fiacho; Dondchad ar tír Conaill & Fiacha ar feraib Rois.
Ba mor a ndochraidi-side ic Fiacho, ar ni leicthi arm na hedach datha ic neoch dib, ar níptar riaraigh do rig riam reme sin, & ba hadbul meit a foghnoma.
Bliadain do Fiacho ar-righi forro. Dia bliadna tic Fiacha co hInber mBoinne & gairmthir chuice Firu Rois. Asbert friu: ‘Dénaid foghnom beos’.
‘Ni foil ocoinn ní as mo’, ar siat. Asbert som friu: ‘Tabraidh uar sele uile for mo dernaind.’
Doberad, & ba hamlaid bai an sele, & a leth di fuil.
Asbert-som andsidhe: ‘Ni fuil uar foghnom techta foraib beos, ar ni fuil uile an saile. Cuiridh na tulcha isna fantaib corop tir. Clandaid fedha isna muighib cor'bad caillte.’
Ba handsin do eirigh os allaid a comgaire doib. Eirgid uile muindtir in righ andiaidh ind ois. Ba handsin gabsat Fir Rois a armo fén don righ, ar ni raibe arm ic neoch dibseom, & romarbsat he iarom.
Ba holc la brathair, la Dondchad, an gnim-sin, & dothaet & gabais ar braigtib eat uile, & dober i n-oentech dia loscodh.
Bá andsin asbert-som fesin: ‘Ní coir dam an gnim-so do denom cen chomairle frim anmcharait, fri Colum cille.’
Tiaghar uadh co Colum cille. Ticc Snedhghus & Mac Riaghla o Cholum cille, co comairle léo dó .i. sesca lanamna do chor dib isan fairrge & co rucad Dia a breith forro.
Doberar eathair beca doib & cuirter forsin fairge, & tiaghar dia coméd cona tístais arculo.
Impait forculo Snédgus & Mac Riaghuil do dol co Hi, co Colum cille.
Amal batar ina curoch imráidhset eturro dul assa ndeóin isand-ocián n-imechtrach a n-ailithri, amal dochotar in sesca lanamna, cencop assa ndeóin dochotar sidhe.
Impaaid iarum desel, & nodo-séiti gaeth sel siartúaidh isan n-ocian n-imechtrach.
Iar tredhinus doib iarom nos-geib ellsgodh itad moire, cor'bo difulaing doib.
Ba handsin airchisis Crist doib, & dos-ber for sruth somblass amal lemnacht, & sassaither dhe. Atlaighit buidhe do Dia, & asberat: ‘Lecam ar n-imrum do Dia, & tabrum ar rama inar nói’. Ocus leacad iarsin a n-imrom aaenur, & doberad a rama ina nói, {MS column 392} & iar tiachtain doib3 is and asbert an fer dana:
- Snedhghus & Mac Riaghuil
do munntir Coluim chilli
[...]
Doss-corathar iarsin co hindsi n-aile, & aile airgid dara medon, & cora éisc indti, & ba stiall archapur d'airged an corasain, & nolingdis frisin coraid ecne mora. Ba medithir colpthaigh firend cech eicne dib, & sastai-seom dib.
Imraised iarsin docum indsi aile, & oic imda aracind isin mdsi sin co cendaib cat forro. Aenócloch goidhelach indti, & dothaed isin traigh & ferais failte friu, & asbert friu: ‘Di feraib Gaideal damsa’, ol se. ‘Tancamar lucht curaigh sund, & ní mair dib acht missi m'aenur. Dochotar martra la
Nodo-séite an gaeth iarsin co hinnsi a mbúi crand mor co n-enlaith alaind. Búi en mor uaso co cind óir & co n-etib argait, & indisid scela tossaigh domain doib, & indisid gein Crist ó Mairi óigh, & a bathais & a césadh & a eiseirghi. Ocus indisidh scela Bratha; & ba handsidhe notuairctis an enlaith uile cona n-eitib a taebo co siltis a mbraenu folo assa taebuib ar omun airdhe mBratha. Ba comnai & ba cretra4 in fuil-sin. Ocus dober an t-én duillind do duillib an craind-sin dona cleirchib, & meit seched daim móir an dulind-sin. Ocus asbert forsna {MS 1318 col. 393}cleircib a tabairt léo for altóir Coluim cille na duille-sin, conid hi cuilefaid Coluim cille andiu: a Cenandus ata-side.
Ba bind ceol ina n-en-sin ic gabail tsalm & cantaci ic moludh in Choimdhidh, ar ba henlaith muigi nime eat, & ni crina corp na duille an craind-sin.
Bennachsat iarsain dona henaib, & imrait co tir n-uathmuir i mbatar dáine co cendaib con, co mongaib ceatra foraib. Dothaed clereach chucu asinn indsi, la forcongra nDé, dia forithin, ar ba gabudh doib and cen biadh; & dober doib iasc & fin & cruithnecht.
Imrait iarsin co rancatar tír a mbatar doine co cendaib mucc forro & siad [...], & meithle mora acco ic buain inn arba a medon an tsamraidh.
Dolotar ass iarsin ina curach, & gabait a salmo & guidhit Dia, co rancatar tir a mbatar díne d'feraib Gaedhel, &
‘Canaid5 beous’, ol an clereach, ar se: ‘sianan na hErenn andso’.
‘Tiagham, a cliarcho!’ ar na mna, ‘co teagh rig na hindsi, ar ron-bia failte & lesugud and’.
Tiagait na mna & an cleirigh isan teach, & ferais an ri failte frisna cleircho, & cuirit a sciss and, & iarfaigis doib: ‘Can bar cenel, a clerco?’
‘D'feraib Erend duind’, ar an cleirich, ‘ocus do muintir Colaim cille.’
‘Cinnus atathar a n-Erind?’ ol se, ‘ocus cia lin mac {MS 1318 col. 394} as beo do Domnall?’ ar an ri.
Freacrais an cleireach: ‘It bí tri meic do Domnall; & dorochair Fiacha mac Domnaill la Firu Roiss, & rocuirit sesca lanamna dib forsm fairrgi issan gnim-sin.’
‘Is fir duib, a cleirchiu, an scel sin. As messi romarb mac rig Temrach, & as sindi rocuiredh isin fairrgi, & as dunn as maith, ar bem sund noco tí an mesrugudh6, ar is maith atam cen pecadh, cen col, cen gail ar cinadh. Maith an inis a tám, ar is indti atá Hele & Énocc, & as úasal in teghdais a foil Éile.’
Ocus dorigne failte moir frisna cleirchib & adbert: ‘Atait da loch isin tir-seo, loch uisce & loch tened, & ricfadís o cianaib for Erind mani padh Martain & Patraic oc guidhi leo’.
‘Ropad maith lind Enoc d'faicsin,’ ar an clerich.
‘Ata i n-inud diamair cor-risam uile don cath il-lo an messa’.
Imrait iarsin on tir-sin co mbatar for tondgor an mara
Ba maith an rí búi isin insi, & ba noemda & ba firian, & ba mor a sluag, & ba huasal teghdhais an rig-sin, ar boi cét dorus isin tigh-sin, & altoir oc gach doruss, & fer graid ic cach altoir ic idpuirt chuirp Christ.
Dolotar iarum isan tegh-sin an chleirig, & bendachais cach dib dia chele, & dolotar uile iarsin, etir mnai & fer, an sluag mor sin do laim occonn aifriunn.
Daltar fin forro iarsin, & adber in rí frisna clércho: ‘Apraidh’, ar se, ‘fri firu Erind dos-fil dígal mór foruib. Dosn-icbad allmaraigh dar muir & trebfaid có leth an n-indse, & gebtait forbais foraib, & is ed dober doib an dighal sin, a meit doberat eislis for timna nDé & fora forcetol. Mi for bliadain atathi for fairrgi & rosessidh inlan, & indisid bar scela uile d'feraib Eirind’.