Corpus of Electronic Texts Edition
Acallamh na Senórach I (Author: Unknown)

¶ 541


7246] ‘Dar ar m-breithir ám’, ar lucht in t- shída, ‘ní fhaccamar-ne
7247] riam óclach bud fherr anai-ssiu ar tonn-chlar in talman, & dar
7248] lind nír' ferr Find féin anái-ssiu.’ ‘Truag, no sin!’ ar Cailte,
7249] ‘damad h-é Find do-chífed sib-si do-béradh sib in drong daenna
7250] uile ina fhaisneis. ócus as mithig dam-sa imthecht’, ar
7251] Cailte, ‘& bennacht ar lucht in t- shida, & atá dail fer n-Eirenn a
7252] cind bliadna do Temraig, & ní fhetaim-si gan dul d' accallaim
7253] mo choiccli & mo chomalta .i. Oissin mac Find, & tre forchongra
7254] in Tailgind do aichin dim dul ann, & maithe fer
7255] n-Eirenn a n-aen-inadh d' indissin mod & mor-gnim gaili & gaiscid
7256] na Feinde & Fhind meic Cumaill & fer n-Eirenn archena, & do
7257] lesugud údar & olloman dona scelaib indesmait-ne ann co dered
7258] aimsire.’ {folio 144a1}‘Ocus fil cobair accainde duit’, ar in ingen.
7259] ‘Ca cobair sin?’ ar Cailte. ‘Deoch cuim- nigthi céille d' indlucud
7260] duinde duit co Temraig connach tecma duit es nó abhann nó
7261] indber nó a cath nó a comlann nach bia a cuimne accut.’ ‘Is
7262] furtacht carat & fír-muintire sin’, ar Cailte, ‘& da m-beth accainde
7263] ní do-bermais duib nó budh ail lib do-beraind’, ar Cailte.

¶ 542


7264] ‘Is mor in commáin tucais duind’, ar in ingen, ‘uair is tú
7265] ro dingaib do Thúaith Dé Danann in lucht ro bói ac foghail
7266] & ac díbeirg forru gacha sechtmad bliadna. Ocus atá léine
7267] esnadhach ór-shnáith acum-sa duit, & ní géba turbród tú aisti
7268] etir, & brat cimsach corccar-glan d' olaind Tíre Tarrngaire anall,
7269] cona chimais do bán-ór buidhe ina urthimchell, & sómaissi {SG page 225} cacha
7270] dala & gacha h-airechta ar in tí imma m-bia sé, & aiscid t-shadhail
7271] t-shenorach duit’, ar in ingen ‘.i. duban, & Aicill meic Mogha a
7272] chom-ainm, & ní chuirfea ind es nó a n- abaind h-é ara ticfa dilmain.’

¶ 543


7273] ‘Ocus cid do-gena-su, a Fir Maissi meic Eogabail?’ ar Cailte.
7274] ‘Do-gen beith annsa t-shíd annso’, ar eissium, ‘nóco n-dernntar feis
7275] Temra, & co m-berar lium in ní ro gell Bé Bind duit-siu.’ ‘Ocus
7276] tussa dono, a Chais Choraig, cid do-genair?’ ‘Dúl let-su’, ar

p.203


7277] Cas Corach, ‘d' fhoghlaim fhessa & fhir-eolais nó co n-deiligit fir Éirend
7278] í Temraig.’

¶ 544


7279] Ocus is annsin ro thimnadur ceilebrad do lucht in t-sida,
7280] & tángadar co Cnoc in Nuaill amach, & tucsat lucht in baile
7281] nuall mor annsin ac deiliugud ré Cailte. Conid Cnocc in Nuaill
7282] a ainm ó sin anall. ‘ócus ní thiucub-sa ar in baile-seo no có
7283] tí in brath dithi in betha.’

¶ 545


7284] IS ann (táncatar) rompo co h-Es na Fingaile, frisa raiter
7285] Es Cronain Meic in Bailb isin tan-so. Uair mor-sheissiur derbrathair
7286] ro badur ann, & tarrla eturru immon n-es, co ro marb
7287] cach a cheile díb, conid uaithib-sin atá Es na Fingaile fair, &
7288] ro mairistar a n-athair da n-éis, & ticed conice- seo .i. Crónan
7289] mac in Bailb, & do-nith Crónan ann acáined a mac, & ro moid
7290] a craide ina medhon adhaig ann. Conid uad ata Es Crónain.

¶ 546


7291] Ocus ní cían ro badur ann co tangadur néoill deirid láe
7292] chuca, & tangadur reompo ón es, & at- conncadur fer mor a fer-brugh
7293] gabala ar tulaig ara cind, & ro t- shuidhedur i farrud ind
7294] fhir moir-sin. ‘Canus tangabair?’ ar in t-óclach, & ro indissedur
7295] dó a n-ainm & a sloinded & a tuirrtechta. ‘Ocus cuich thussa?
7296] a m' anum?’ ar iat-sum. ‘Blathmac Boaire missi’, ar se, ‘ó
7297] eochair-imlib t-Shleibe Luga inso o Chúil Radairc annso’, risa raiter
7298] Cúl Ó Find issin tan-so. ‘Ocus áighidhecht na h-aidhchi anocht
7299] rob ail linde uait’, ar Cailte. Ocus is amlaid ro bói in fer-sin,
7300] fer is mó doichell & díbe ro bói a n-Eirinn h-é. ‘Da tucad sib
7301] a luag dam-sa’, ar se, ‘do-beraind frithailim & feis dithat na
7302] h-áidchi anocht dáib.’ ‘Carsat luag-sin, a m' anum?’ ar Cailte.
7303] ‘Tri carthada cloichi atá a cind mo baile, & Carthada in Trir
7304] at-berar ríu, & ní fhetamar cid o sloind- ter iat.’ ‘Ro-fetar-sa duit’,
7305] ar Cailte, ‘uair isam mebrach in ni dia fuil’ .i.

¶ 547


7306] Óclach maith ro bói i Fiannaib Eirenn .i. Find Ban h-úa
7307] Bresail, & do Chlannaib Baiscne dó, & ro badur tri h-ingena
7308] soinemla aicci, & ní raibi do Chlannaib Baiscne achtmád triar
7309] fer a com-maith .i. Find mac Cumaill & Oissin & Oscur & na
7310] tri mná-sin, & ro badur bessa ac na mnáib-{folio 144a2}sin a n-aghaid

p.204


7311] mathusa na fer-sin, uair ro chindsetar ar mnáib Eirenn a
7312] n-druinechus & a n-deglamda,{SG page 226} & ní raibe a n-Eirinn uili triur
7313] ban rob fearr delb anait. Uair étach digraissi deg-alaind do-bered
7314] nech leis a n-aenach Thaillten nó a mordáil Uisnig nó
7315] a feis Temrach, & ní ba h-áil lé nech acht in t-étach do-nídis
7316] na mná-sin. Ocus adubairt Find ríu: ‘A ingena’, ar se, ‘na
7317] dénaid feis lé feraib achtmád na fir da tibar-sa sib & da tibraid
7318] Fianna Eirenn.’ Ocus ro badur- sum re breithir na flatha Find
7319] a n-Almain Laigen amlaid-sin re h-ed & ré h-athaid. Co tangadur
7320] triar do Clannaib Morna seoch Carraic na h-Almaine, & co
7321] faccadar na tri h-ingena ac dénam a n-druinechais ar Carraic
7322] Almaine anairtuaid, & tangadur in triar óclach-sin .i.
7323] Conan & Art & Meccon a n-anmanna, & adubradur: ‘Is maith in
7324] baegul echta út ar Find & ar Chlannaib Baiscne, uair ní fhuil
7325] díb a n-ingnais Fhind & Oissin & Oscair triur is ferr ina
7326] in triur út.’ ‘Ocus ro gabsat iat & tucsat léo iat’, ar Cailte, ‘conici
7327] in tulaig-seo in bail a raibe Goll & a m-braithri.’ ‘Canas tucad
7328] na ban-chimeda?’ ar Goll. ‘A h-Almain Laighen’, ar in ingen
7329] ba sine díb. ‘Adhbur sída do denam rissin Féind sin’, ar
7330] Goll. ‘Dar ar m-breithir ám’, ar Conan, ‘ní do dénam t-shída riu
7331] tucsamar lind iat, acht da marbad in bur fiadnaissi.’ ‘Ar mallacht
7332] ar in tí muirbfes iat!’ ar Goll, ‘& sind fein do beith i
7333] fiadnaissi a marbtha ní bém etir.’

¶ 548


7334] Ocus is annsin do éirgedar Clanna Morna a n-aen-fhecht in
7335] tulaig achtmád in seissir ro badur- sum, & adubradur na h-ingena
7336] ris-sim: ‘Inn é ar marbad-ne is áil lib do denam?’ ar siat.
7337] ‘Is sé immorro’, ar Conan. ‘do- beram-ne coma maith duib’, ar na
7338] mna, ‘.i. gach olcc & cach écoir do-rindeabair ar Fhind & risin
7339] Feind a maithem duib, & síd do dénam, & ar m-beith féin
7340] d' áen-mnáib acaib.’ ‘Ocus nír' faemad sin dóib, & tucsat tri beimenna
7341] dóib, cor' bensat a tri cind dib, & ro cuired fo thalmain
7342] annso iat, co fuilet fáe na tri carthadhaib-sea. Conid uatha
7343] ainmnighther na cairthedha-so’, ar Cailte. Amail adubairt Cailte:

p.205

    1. 7344] Feart trír atá ar in tulaig
      is lem-sa robo doilig,
      7345] inmain triarfá h-aille ille
      atait fó na tri charthe.
    2. 7346] Mor ind esbaid Étain find
      fa maith um biad is um lind,
      7347] Aífi ann is Aillbe ruad
      ba mor in scél ac in t-shluag.
    3. 7348] 'Arsin marbsat Meic Morna
      is gnim da raibi dobhra,
      7349] inmain triarfa blaithi lí
      is díb ata fert in trír.

      4. Fert.


7350] ‘Ocus is iat-sin’, ar se, ‘na mná ata fa na cairthib út’.

¶ 549


7351] ‘Adráe buaid & bennachtain’, ar in t- óclach: ‘is maith in
7352] fis dam féin & dom mac & dom h-ua, & rachaid faeilte na tri
7353] n-áidchi-seo daib-si, a Cailti, ar in senchus-sin ro indisis dam.’

¶ 550


7354] Ocus tangadur reompo co Lis na m-Ban í Cúil Radhairc,
7355] risi raiter Cúil Ó Find isin tan-so, & tangadur issin n-dúnad
7356] anúnn, & ro frithailed co maith ind áidchi-sin iat. Ina degaid-
7357] sin tangatar rompu co Lis na m-Ban i Cuil Radairc, risi raiter
7358] Cúil a Find isin tan-sa, & tangatar isin dunad & isin deg-baile,
7359] & ro freslad & ro frithoilit iat, & ro badar ann co táinic in lá
7360] cona lan-soillsi arnabarach. ócus is annsin ro gab a chois clí
7361] greim do Chailti an lá, & nír' léic imthecht dó, & ro bi óglach
7362] in tighi aca ráda ris: ‘Is mór’, ar se, ‘do degh-lúth do-righned
7363] don chois-sin ce tá a n-galar & a n-eslainti anocht.’ Ocus
7364] at-bert Cailti in láid ann:
    1. 7365] Do rithus a Temraig na tréd
      is ed a fír is ní brég,
      7366] ro rucusa di fa thrí
      tri fichit cét cét-guini.