Corpus of Electronic Texts Edition
The Dindshenchas of Emain Macha (Author: Unknown)

p.325

1

Cid diatá Eomuin Machae? Ni hanse. Bui righi n-Erenn hi comflaithius etir Ruad mac m-Bodhuirn & Cimbaeth mac Finntain & Dithorbae mac Dimain. Secht m-bliedna do cech oe hi flaith h-Erenn. Imcloeth beus hi cinn hsecht m-bliada na. Ocus is amlaid do-faspenta a righe do flaith nod-gebed beus: ‘Ind flaith si do-asselbtur duit a taspenad uait a n-ógi .i. dom-biur duit cen gái cen ethech cen imarbae cen anfir flatha. Glinne aurut friss .i. secht n-octhigerna & secht righ (no druith) & secht file .i. na h-oigthigirn dot fognam, na druith dot ressadh & dott imdergadh, na filid dott aorad tre m-bricht co rabuit i talmain ria nomaide’. Is amlaid sin tra do-aissilbith ind flaith co m-betiss immurgu na torthae iarna coir lasna flaithi. Is aire dognidiss in sin.

Marb iar suidhiu Dithorba mac Demain, co n-gabsat a mec a forba flatha .i. Baeth & Brass & Betach & Uallach & Borbchass coic maic Dithorbai maic Demain. Do-rochair lobra dano for Ruad mac m-Boduirn, diata Ess Ruaid isin tuaiscert. Ni farcuib side cloinn inge aoningin namma. Macha a h-ainm-sidhe. O ssniastar side in flaith {MS page 69} a comarbus a h-athar nissnarroet Cimbaeth i comflaithius. ‘Do-ber-sa dam-sa illau catha’, ol sissi. Do-gnither son & feguir cath eturru & memaid for Cimbaeth. Gebaid si in flaith co cend secht m-bliadan. Tanic do Chimbaeth aimserá na flatha. ‘Ni bera’, ol in ingen, ‘conidruca ar ecin’. Fechuir cadh ann eturrua. Memaid for Cimbaeth. Geabuid si dano flaithius co cenn secht m-bliadan. Tanic co maccuib Dithorbae in sel flatha. Feruid si cadh friu. Maidid rempe-si. Do meil si dano flaithius Dithorbai. Luid Cimbaeth cuice-si co m-bu he a fer & gaibid sí righi n-Erenn. Lottar maic Dithorbae for fogail & ba trom in chaladfhogal. Cech mac uilc robai ind-Eire do-choid chuca. In baile hi fuacartais nofhoglatiss ann. Ro-hearbad dano h-uadi-si naonbur cech tuaithe for a n-iarair ocus do rimarta geill cecha feine di-si dar cenn na n-drochmac batar


p.326

forsan b-fogail. Con-dahualgnigset a feine ar a tuidecht dia m-bailib, co na rabadar maic Dithorbai acht a n-aonur .i. a coic. Maoite a fogal-sum anacumauc asennud. Luid si iarum feisin for a n-iarair indhi Macha a h-aonar ocus facbais Cimbaeth ina suidiu & indleatha taos secuil impi-si & ceirt impi & ballan mor ina laim & lauidi fo h-Erinn for a n-iarir, co ro-tuarascfat adi i m-Buirind Connacht. Al-luide ina n-diaid isin dithrub con[...] arnic iman tenid. Suidid accu ocon tene & at-luidestar comruc friu nacha teostaiss co in a h-aenur. ‘Can do-dechad, a banscal?’ ol in oig. ‘Is do cein & fhogus on’, ol sisi. Do-berat biad di & doim-gairett dul chuice. ‘Nato’, ol sisi. ‘Caillech amnachtach truagh, ni coir mu t-saurugad.’ ‘Con-ricfa fri firu anocht, a chaillech’, ol seat. ‘Cia raghas chuice a tosaig?’ ‘Misi’, ol in sindsir .i. ol Baeth. Luid side focetoir. Do-bert a sliasait dar a braguit. ‘Fe amai!’ ol se, ‘marb amin ben ocaib.’ ‘At fer trogh’, ol Brass. Luid side don cennu. Do-ber si dano a cois tar suide. Ticc a ceile. Fo-rurmed [...] dano. Tecuit uile & at-raig forru & ataig lomain forra .i. [...] uile ocus imatacht reimpi co rainic Eamuin [...] dia marbad. ‘Nato’, ol sisi. ‘Oc saighid a cirt robatar. Is anbfir a marbad. Do-berthar immurgu fo daoire di foghnum dam-sa.’ ‘Cissi daoire do-berthar forru? acht ani rosiass diar m-bruindib-ne. Is anfir a
[...]
daorad
[...]
’ {MS page 70} ‘Is fior’, ol si.2 ‘Claidid dano in raith immácuairt.’ Suidid forro & eo gairid ina laim & do fóruinn impi toraind na ratha & ro cechladar maic Dithorba inn raith .i. int eo argait ro boi do-rat dar a muin oc torainn na ratha. Conid de sin ata Eamuin Macha inghine Ruaidhi & rl. Finit. Amen. Finit.

Liverpool.
Kuno Meyer.