Corpus of Electronic Texts Edition
Fled Bricrend (Author: Unknown)
section 25
Lasodain dono ba edh dogensad an fir batar isin tich,
Laegairi Buadach & Conall Cernach, o rusleblaing a luan laich
ier cluais imacallmai na mban: robristii cleth do cletaibh an
tichi righdoi fo a comardus amach, conid si sin conuir dilotar
a mna cuqui isa tech. Cuqulaind immoro turcaib a tech ina
comair a immdai, comtar fodercai renna nimiu fon fraicidh amach
aníos, conid si sen conair diluidh a ben-som & na tri .l. mban
immailli fria, .i. a .l. ban budén & .l. ban cechtar de na da ban
oili, cona bud cutrommas disi frisna mnáibh aili, uair niruo
cutrommus dia firsi fria cach. Tolleci Cuqulaind ir-rightec sis
p.158
iersuidiu, co ndechotar .uii. fercubaid do senamain an tichi a
ntalmain, co forcroth an daun uili & cortrascair grianan Bricrend
fri laur talman, co torchair Bricriu {folio 5a1}
budein & a rigan,
co mbatar isand otrach cacai eter na na conaib. Aill amai,
ol Bricriu, tancatar namaid i ndun, la h-érci suas co h-obann.
Co-rrola cor immar-richtech, co nfacai amal rocloenudh, co
ntarlae for a beolu uili. Adsoirc a bossai lasodain & lecthi isan
teg iersuidii, & ni rabai la h-Ultu fer rusaithgned amail
russalchad, conid asa labrad atgenatar.