Corpus of Electronic Texts Edition
Fled Bricrend (Author: Unknown)

section 17

Briatharchath ban Ulad.

Bricriu dano ina grianan & a rigan, ba fodhirc doa asa imdai suidiugud an ríthighi, amal romboth and. Roscruit ina menmain, cinnus noragad for imcosait ina mban, amal deroine imcosait ina fer. An tan ierom roscaich do Bricrind a scrutan ina menmain, amal dorragad airi, ba si sin uair dilluidii Fedilmm Nócridi .l. mban asand rightigh ammach ier truime oil. Atachí Bricriu sece. ‘Maith sin’, al Bricriu, ‘anocht, a ben Laogairi Buadaig! Ni lesainm dit dano Fedilm Noicridii ar febus do crothai & do celli & do ceniuil. Concobar ri coicid Ulad do athair Loegairi Buadach do celi, acht namma nirbo ró leam det cona tisad ben do mnaib Ulad riut hi tech Midhcuarta {folio 4a2} & commad doit íarsala nobeth bantracht Ulad uili. Ba tu tés isan tech ar tuss anocht, doroimli co aidne ais banrignacht uas bandtrachtaib Ulad uili.’ Ted as Fedilm lasodain tar teora futhairbi on tigh.