Corpus of Electronic Texts Edition
Fled Bricrend (Author: Unknown)

section 2

Is amlaid tra doronad a tech sen: suidiugud tighi Midcuarta fair; .ix. nimgada and o thein co fraich; tricha traiged a n-ardai cechae airinigh credumai co ndóirad friu uili. Conrodacht rigimdae ann ierom di Conqupar a nairinech ind rigthigi uas imdhadaibh an tiche uile, co ngemaib loghmaraib & ligrad & ór & arcud & carrmoccail & datha cecha tiri, co mba comsolus la & adaigh indi. & conrotachta dano dá imda .x. in da erred dec Ulad impi. Ba comhnart ierom innus an gnimusae sin dobreth do denam an tighi sin. Sesrech oc tabairt cecha clethi & moirsheser di trenferaib Ulad ac cor cecha h-oenslaiti, & .xxx. soer de primshoeraib Erend oc a denam & ac a orducud.