Corpus of Electronic Texts Edition

Serglige Con Culainn (Author: Unknown)

section 44

726] ‘Mo lécudsa didiu,’ ol Fand. ‘Is córu mo lécudsa,’ ar
727] Emer. ‘Náthó,’ or Fand. ‘Messi léicfidir and, & is mé ro
728] báeglaiged ó chéin.’ Ocus forópair oc dogru & oc domenmain
729] móir, ar bá nár lée a lécud & dul día tig a chétóir, & ro búadir
730] in rográd h-í dorat do Choin Chulaind. Ocus is amlaid ro boí
731] oc dogru & doróni in laíd sea:

1. 732] ‘Messe ragas for astur’
   733] ‘cé dech lim ar mórgestul:’
   734] ‘cé tora nech, lín a blad,’
   735] ‘ropad fherr lim tairisem .’
2. 736] ‘Robad fherr lim bith h-i fus,’
   737] ‘dobér fót láim cen dobus,’
   738] ‘ná dula, cid ingnad lat,’
   739] ‘co gríanan Áeda Abrat.’

---

p.26

3. 740] ‘A Emer, is lat in fer’
   741] ‘& ro mela, a deigben:’
   742] ‘aní ná roich lám cidacht,’
   743] ‘is écen dam a dúthracht.’
4. 744] ‘Mór fer ro boí com íarraid’
   745] ‘eter chlithar is díamair:’
   746] ‘noco dernad ríu mo dál,’
   747] ‘dáig is misi rop irán.’
5. 748] ‘Mairg dobeir seirc do duni,’
   749] ‘menes tarda dia airi:’
   750] ‘is ferr do neoch a chor ass,’
   751] ‘mane charthar mar charas.’
6. 752] ‘Cóeca ban tánac i l-le,’
   753] ‘a Emer án fholtbuide,’
   754] ‘do thascrad ar Faind, ní fó,’
   755] ‘is dá marbad ar andró.’
7. 756] ‘Atát tri cóecait rim lá’
   757] ‘do mnáib, áille óentamá’
   758] ‘acum i n-dún imma l-le’
   759] ‘noco tréicfitis messe.’

   mese.