Cía cétliaigh robúi ind-Érinn ar tús ríam ocus cía cétsáer ocus cía cétíasccuire? Amal ispertar:
- Cappo re leighius, nír lag,
re reimmess robu comnart,
Lúasat in sáerglicc cosse
ocus Laighni in t-íascaire.
Éba in bainnliaigh táinicc aróen re Cessair in liaigh tánuiste. Slánga mac Parrthalóin in tres liaigh tánicc le Parrthalón i nh-Érinn. Fergne húa Crithinbéil in cethramad liaigh tánic aráen re Neimidh a n-Éirinn.
Legha Fer mBolg didiu .i. Dubda Dublosach & Codhan comchísnech ocus Fingin fisecda ocus Maine mac Grísach ocus Áengus an térnámach.
Legha Thúaithe Dé Danann íarsin Díancecht & Airmed & Míach.
Túath Dé Danann nó Mumain, is íat tug mucco i nh-Érinn ar tús.