¶1] Nir bó cian bfadeisin atconncutar mur mor ard lethan gan en-dorus air. Ba hairget uile an mur sin. Ní feas do Thundal ga conair a rachadh ann. Fechaid for gach leth de. Atconnairc cora naomh et as edh adbertis uile: ‘Gloria tibi sit Deus pater! Gloria tibi Deus fili Dei! Gloria tibi Spiritus
¶2] Ba finn uile an cora naomh sin con-etaighthiph examlaibh & siad lán do subha & failtechus oc sirmolad na Trínoidi. Deallrad a n-etach amhail tsnechta aonoidchi frisa taithnenn grián. Ba binne muisíca a bfogur, ba cuma rolinad iatt o soildsi & subachus et forbaoiltechus, o aoibhnes et taithnemh & sochraidecht, o slaine & saimhe & suthaine, o caoimhe & comaonta. Boltanugud an muighe forsa rabtar doderscnaig dona haromantaibh.
¶3] ‘Ag so glóir na droinge comaillios a bposad & follamhnaigios a muintir doréir De et dono scáiles a maoine ar bochtaiph & eclais. As riu bhós32 atbéra an Coimdi an bréthir sa a ló braith .i. ‘uenite benedicti patris méi, poisidete {MS page 806} regnum quod uobis paratum est ab origine mundi’ .i. ‘tigid a lucht na mbennacht docum an flaithis ullmaigthair daibh o thosach domuin.’’
¶4] Roguidh Tundal an t-aingel im legadh comnaidhe do an dú sin & nir' bo tarba do. Nir' mhothaighsiot saothar na snimh, ger' mor a n-aisder & a n-imdecht, oir gachfad ro imdigetis, ba moide a menma & a solas & a nemsgith. Gach aon da tegmad friu ag a ngairm ina n-anmonnaibh dilsi. Siad ag tabairt gloire do Día. ‘Gloir det, a Tigerna & a Ri suthain na gloire, les nach ail bas an pecthaig, ar congbaid beó he dia filledh on pecadh & rosaorvis an t-anom so o phéin ifirnn & dono rocengluis ré cumann na naomh hé.’