¶1] Iar n-imdiocht doiph a suide dono atconcatar foraois co ndorus ursailchthe. Tiagait innte iarsodain. Fuaratar magh mínalaind iaram lán do blath et do luibib dagboltanchaib. Ba hán aibhinn an magh, badar imdha fir et mna hi suide. Ni raibhe dorchu na oidhchi riam isin maigin sin. Tiopro glanusci innte.
¶2] ‘Daine maithe émh aitreboitt sunn’, ar in t-aingel, ‘ge ní foilid i frecnarcus muintire neimhea golleic. Tipra na mBéo nomen na tipraite ód. Dethbir son, fodeich cecip nottblaisionn, ni beir bás tré bhithiu.’