¶1] Roascnatar iaram rempu et siád ag imacollaim fria araill. Rogab tedm obontt iád asa haithli .i. crith adbhal & fuacht difulaing et brentaidh dodíchuir et dorchato dermair, triblóit et cumgach, co facatar slutraighe in talman ar chrith.
¶2] ‘A tigerno’, ar Tundal {MS page 798} frisin aingel, ‘ga teidm anetargnaid domfarraidh? daigh nim túalaing anadh im sesamh.’ Dobenadh a ceimniugudh de fri homun iaram. Fechius for gach taobha de et ní facaidh an t-aingel. Et rogab dercained adbhalmór é ‘Trúag sin, a tigerna’, ar sé, ‘oir ní bfuil ecna na eolus na resun a n-ifirnd.’ Is annsin adchualaidh eghiomh et gairfedoch na n-anmo dtrúag & toirnech adhetgidh nach fetfad aigned do thuigsin & nach fetfadh tenga a faisneis.