Corpus of Electronic Texts Edition
Aisling Tundail (Author: [unknown])

section 9

De furno flamino et eius descriptione

¶1] Rogabsat ag imteacht tar aitibh dorche garbha. Fuaratar tegh adbulmór, metichthir sliabh a méd, {MS page 793} accus a airtte cruinn amail hsorn. Lasair mar ag tocht ass doloisged na hanmanna. 1000. troich uaide. Atbert Tundal frissin aingel: ‘Támoid i focraibh di dorclaib an bais. Cía saorfas an bochtán trúag so?’ ‘Saorfatt-sa on lasair imeachtraich thu. Acht chena bidat eigen dola issin tsurn tenedh isteach.’

¶2] Iar ndol doibh dochum an toighe atconncatar na basaire go mbealaib accus co n-ailtnibh berrtho accus spealaib & corránaibh

p.102

accus demsibh et picibh accus crománaibh & gach aidhmibh archena nofognadh fri goradh no fennadh no diceannadh no gearradh, accus siad ina seasamh a n-etarmethon na richisi. ‘Guidim tú, a tighearna’, ar Tundal, ‘masa tol leibh, mo saoradh on pein si nama, accus atdamhaim ma chor in gach péin olchenæ.’ ‘Is i so pian as mó dar' fechais’, ar an t-aingel. ‘Acht chena docife pían bus ville anás. Eirg co luath a coinnibh na péini si, oir atat coin dasachtacha 'gut furnaide acai17.’

¶3] Roguidh Tundal co n-eccla accus cumgo gan a chur isin pein si & nirbó tarba dó. Rotiodluicced dona demhnaibh iar sodhain. Rotimcellsiot é iaramh. Tugsad na haidhmi remhráite cuige, co ndernsat blothta becca de. Phuistrinis ba nomen don prinnsa robói for an teach-surn soin. Ba hilimda isin tigh sin cnedach accus osnadhach, iactach accus eghmhe, cái & crith fiacal & tene gur fri losgud na n-anmann. Ba himdha ocubur bidh ann & a nemfagbail, daigh is ann búi craos cin mesur, gan dighvodh tré bhithiu. Ba himdha ann nathracha neimnecha ag ceimniughud i corpuibh læch & laiches & aosa crabhaid ann. Do attoimh anam Tundail gurb imchubaid an pian sin do tabairt do bvuidein. Fogeibh hé fein a n-egmois na péine sin ina huide18 a n-ionoth doirche & a sgaile an báis.

¶4] Ticc an t-aingel cuga. ‘Truag sin, a tigerno, caide an briathar rocuala co minic? .i. Misericordia Domini plena est terra .i. tá & in talam lan do trocuire an tigerna.’ {MS page 794} Atbert in t-aingel: ‘Do meall in mbreth si lion dirimhe do daoinibh. Gidh dulgudoch ma Rí-si’, ar in t-aingel, ‘is bes do in cóir do ghnimh. Diglaid morán et maithid ni as ville. A Tunnuil’, ar sé, ‘cecip pian roicesais-si, do badh cóir a fagbáil duit. Tabair atlugud do Día im do saorad o gach péin dá háidble da bfuaroiss cusanois. Oir da maithedh Día gach uili col, cidh imma mbiadh firian fon mbith? & menbat egail lá nech a pianadh, cidh fa bad eguil lais pecoth do gnimh? no

p.103

créd19 ima clofad óa anmianaibh, et dono cidh ima ndemtais faoiside nó aithrige do denamh, menbad egail la cach Diá? Coicclidh Dia dona pecthachoiph co trocuirech, ceni denoid aithrighe ina corpuibh. Acht chena as egen a pianadh dia nglanadh. Togbaidh Día a maithius et a miana saogalta ona peacthoiph ina coraigh, accus tidlaicid an maith hsuthain doiph tall tria dilgud & trocuire.’

¶5] ‘Maithid Día tra’, ar in t-aingel, ‘mor d'ulc & ni leig didu nach maith cin chennach ar a son. Ni bfuil tra nach n-aon cin pecadh et ní bfuilid naoidin bega abáin. Gideth chena saortar mor do maithib o péin cin faicsin & cin taidbsin fosgaidh an bhais doibh amain, gonadh aire sin berthar na fireoin da dechain na pian o saortar iátt abain, ardaigh conadh moide nolasfaidis a ngrad De & a molad a cruthaigtheora a faicsin & a saoradh forra.’

¶6] ‘A contrarda sin tra berar na hanuim anbfechtnacha do fechain an flaithis huthain, fobith comad moide a ndoilges et a ndograing in glóir dosechnadar da ndeoin fein d'faicsin. Is aire sin rugad in sagart do remdecamar do dechain an droichitt, fodaigh comadh moide a gradh et molad ar Día a snadud orra iarna faicsi & a gairm iaram dochum na glóri suthaine tréna soailchibh feisin, conusfuair coróin na bethad, amail rogeall Día fein do lucht a gradaighte. As coir duin cudnodh anos’, ar in t-aingel, ‘oir ní facumar na huile olca béus.’