Corpus of Electronic Texts Edition
Eine Variante der Brendan-Legende (Author: Unknown)

p.409

section 1

Bator da apstol decc na Erenn hi Ccluain Iraird ic a foglaim oc Findian, co-nderna Findian fleidh dona hapstolaibh et do naemhaibh Erenn archena. Amhail rob ainiu doibh ic comhól na fleidhe, conus-aicet in scoith ndífreccra ndimoir cuca

p.410

dind comartha tire tarngire. Is ann dí ro-fas bruth & comhairle acu im dol d iarraidh tire na scoithi. Nochar-gabh nech do laimh sech a chele dibh dul ann, co-ndernadh crandchor etorra .i. itir cech ndís dibh, co-tarla iarsin donda Brenainn dol ann. Cuirit dí anda Brenainn crannchor eturra fodein, cip e dibh dia-roisedh dul d'iarraidh tire tairngire. Ro-soich dí do Brenainn Birrae dol ann. Is annsin dí ro-chuir naemhu Erenn uile hi socht & a n-imsniomh ar a doilghe leo a roctain don tsenoir .i. do sinnser naemh Erenn & do shúi na faitsine dul i craes mara & morfhairrge. Conadh annsin at-bert Brenainn mac Findlogha: ‘Meisi an sósar, is mé raghas arin fairrge.’

Conidh dó ro-chan in laídh si:

    Brenainn mac Findlogha

    1. Batar ic foghlaim trein treall.
      da apstol dég na hErenn
      ac Finnen co fichtib ceall.
      cansat co léir a leighenn.4
    2. Co-n-acaiset cuca in scaith.
      in comunn féta firmaith
      ota tír thairngire ndaith.
      o righ na righ on righflaith.
    3. Ro-raidhset uile malle.
      ba dia ccomhairlibh maithe
      co roctain dal diamhair de.
      d'iarraidh tire na scoithe.
    4. Scarthus dia da cech dis doib.
      forba saethuir na sennaeimh
      do réir cranncair amra uill.
      co-tarla donda Bhrenuinn.
    5. Coros-bennach dia datha.
      cona lestraibh lindbracha.
      Brenainn Birrae buaidh flatha.
      is Brenainn mac Findlacha.
    6. Cor-cuirset crandchor caemh nglan.
      a fiadnaise na n-apstal
      Brenainn Birra gusin mbladh.
      is dó do-rala in astar.
    7. Innsa re n-aés cumtha coir.
      co cornaibh finda fledhóil
      a dál ar luí mara moir.
      a súi slan is a senoir.
    8. 'Daigh im sósar sunn cose.'
      ar Brenainn oc i n-airde
      'gidh bas damh inní bias de.
      meisi raghas ar fairrge.'

p.411

Is annsin dí do ro-nadh digrais curaigh la Brenainn .i. ar mét & luchtmaire .i. coiciur ar cethrachait & tri sechtmoghait, is e lín do-coid isin curach.