As-bert iarum aingel don arbar mor frisin da aingel batar imme: ‘Beirid tra an fer-sa co n-aicedar ifern.’ Legar iarum fo tuaith fo glenn mar. Sírithir leis co n-acadar amail bid o turcbail greine co fuined. Co n-acadar fochlui mar amail bid beolu uama etir da sliab, co ristais iar n-uachtar. Tiagait isin uaim cein mair, co r-rancatar sliab {folio 44va} mar n-ard n-dub ara ciund for belaib an ifirn acus gleann mar i n-ochtur an t-slebi-sin. Edh indus an glenda-sin: lethan iar n-ichtur, coel iar n-uachtar. Is ed indsin dono dorus an ifirn acus a erportach ind uaim.