Corpus of Electronic Texts Edition
The Tidings of the Resurrection (Author: Unknown)

section 17

Atresat tra na h-uli dáini thall i n-deilb & i n-écosc ecsamail .i. na fir i n-ecosc ferda & na mná i n-ecosc banda. Uair airm i n-apair in t-apstal na ule dóeni do esergi i fer forbthe, ainm fir dorat and-sin forsin duine coitchenn eter firu & mná. Uair dígebthair thall a lochta & a n-anmi ar a corpaib na n- dáeni, cométfaider immorro intib rudilse a n-delbe & a n-ecosca dílis.