Corpus of Electronic Texts Edition
The Tidings of the Resurrection (Author: Unknown)

section 7

Cestnaigther dano i m-bia esergi dona toglúasachtaib & dona torathraib doennaib. Is e a frecra-sin, co m-bia co demin esérgi thall i m-bethaid do h-ulib ro thechtsat hi fos bás iar m-bethaid. Má ro thechtsat didu na togluasachta bás iar m-bethaid, cid i m-broind a máthár, is demin co m-bia esergi dóib thall & co techtfat bethaid iarsin bás-sin. Manip cumtabairt didu amlaid-sin esérgi dona toglúasachtaib is lugu co mor as cumtabairt esergi dona naedenaib & dona torothraib.


p.238